Hulyo 31–Agosto 6

Mga Buhat 22–28

“Mag-alagad ug Magpamatuod”

Samtang mobasa ka og mga istorya gikan sa pagpangalagad ni Pablo ang Apostol diha sa Mga Buhat 22–28, pangita og mga baroganan nga makahuluganon ngadto sa mga bata nga imong gitudloan.

Dapita ang Pagpaambit

Ipakita ang mga hulagway nga mahimong mopahinumdom sa mga bata sa mga istorya gikan sa Mga Buhat 22–28, sama sa usa ka selda sa bilanggoan, usa ka sakayan, ug usa ka bitin. Dapita ang mga bata sa pagpaambit og bisan unsang istorya nga ilang nahibaloan mahitungod ni Pablo nga dunay kalabotan niini nga mga hulagway.

Itudlo ang Doktrina: Mas Gagmay nga mga Bata

Mga Buhat 23:10–11

Ang Langitnong Amahan ug si Jesus nagpakabana kanako ug motabang kanako atol sa malisod nga mga panahon.

Ang pagkat-on kon sa unsang paagi ang Manluluwas mitabang kang Pablo makapalambo sa hugot nga pagtuo sa mga bata nga ang Langitnong Amahan ug si Jesus nagpakabana kanila.

Posible nga mga Kalihokan

• Ipaambit ang istorya sa Mga Buhat 23:10–11 mahitungod sa Manluluwas nga mibisita ni Pablo diha sa bilanggoan. Pagpaambit og panahon nga ikaw adunay kalisdanan ug nakadawat og giya ug kahupayan gikan sa Dios. Hangyoa ang mga bata sa pagpaambit og mga panahon sa dihang nabati nila nga gihupay sa Dios.

• Tabangi ang mga bata sa pagsag-ulo sa gisulti ni Jesus kang Pablo: “Sumalig ka.” Hangyoa ang mga bata sa paghunahuna og usa ka tawo nga mahimo nilang dapiton nga magmasaligon—tingali usa ka tawo nga naguol o nabalaka.

• Kantaha ang usa ka awit uban sa mga bata mahitungod sa pagkamalipayon, sama sa “Mga Pahiy[o]m” (Songbook sa mga Bata, 128).

Sama ni Pablo, makapili kita sa pagpakigbahin sa atong mga pagpamatuod sa Manluluwas.

Mga Buhat 26:1–29

Makapaambit ako sa akong pagpamatuod sa uban.

Ang pagrebyo sa pagpamatuod ni Pablo sa atubangan ni Haring Agripa makatabang sa mga bata nga makat-on kon unsaon sa pagpaambit sa unsay ilang nahibaloan nga tinuod.

Posible nga mga Kalihokan

• Pagdala og papel nga korona sa klase ug ipasul-ob kini sa usa ka bata ug magpakaaron-ingnon siya nga si Haring Agripa. Dapita ang laing bata sa pagbarog atubangan sa hari nga morepresentar ni Pablo samtang imong i-summarize ang pagpamatuod ni Pablo ug ang reaksiyon ni Haring Agripa, nga makita diha sa Mga Buhat 26:1–29 (tan-awa sa “Kapitulo 63: Pablo Mitapos sa Iyang Misyon,” diha sa Mga Istorya sa Bag-ong Tugon, 162–66). Ipasabot nga makapaambit kita sa atong mga pagpamatuod ngadto sa uban, sama sa gibuhat ni Pablo.

• Hangyoa ang mga bata sa pagpaminaw samtang imong kantahon o basahon ang usa ka awit mahitungod sa pagpamatuod, sama sa “Ako Nasay[o]d Akong Amahan Buhi” (Songbook sa mga Bata, 8). Dapita ang mga bata sa pag-isa sa ilang mga kamot kon makadungog sila og usa ka butang nga nasayod sila nga tinuod. Mahimo nimong kantahon ang awit sa makadaghang higayon; dapita ang mga bata sa pag-apil kanimo sa higayon nga mapamilyar na sila sa mga pulong. Tabangi sila nga magbansay sa pagpaambit sa ilang mga pagpamatuod bahin sa mga butang nga nasayod sila nga tinuod.

• Gamita ang pahina sa kalihokan niini nga semana aron sa pagtabang sa mga bata nga maghunahuna mahitungod sa usa ka butang nga mahimo nilang isulti kon sila mopaambit sa ilang mga pagpamatuod (tan-awa ang mga Artikulo sa Hugot nga Pagtuo alang sa dugang nga mga ideya). Dapita sila sa pagpaambit sa ilang mga pagpamatuod ngadto sa usa ka tawo diha sa ilang pamilya.

Mga Buhat 27

Ang mga propeta mopasidaan kanako sa kakuyaw.

Ikonsiderar kon sa unsang paagi nga ang istorya sa pagkaguba sa barko nga gisakyan ni Pablo makatudlo sa mga bata nga ang mga propeta makakita sa pisikal ug espirituwal nga kakuyaw nga dili nato makita.

Posible nga mga Kalihokan

• Dapita ang mga bata nga magpakaaron-ingnon nga anaa sila sa usa ka barko nga naguba sa unos. Basaha ang pasidaan ni Pablo ngadto sa mga tawo, nga makita diha sa Mga Buhat 27:9–10, ug ipaambit ang istorya sa pagkaguba sa barko nga nahitabo tungod kay wala sila maminaw sa iyang pasidaan (tan-awa sa Mga Buhat 27 11, 39–44). Ipakita ang usa ka hulagway sa Presidente sa Simbahan, ug ipakigbahin ang imong pagpamatuod nga siya makapasidaan kanato bahin sa espirituhanon nga mga kakuyaw.

• Pagbutang og pipila ka hulagway o mga butang palibot sa lawak nga magrepresentar sa mga butang nga gitudlo sa mga propeta nga atong buhaton aron mahimong mas mahisama ni Jesus, sama sa paghigugma sa uban o pagpabunyag. Uban sa tibuok klase, lakaw palibot sa lawak, nga mohunong sa matag hulagway o butang aron hisgotan kon sa unsang paagi nga ang pagsunod sa mga pagtulon-an sa propeta makatabang kanato nga magpabiling luwas.

Itudlo ang Doktrina: Mas Magulang nga mga Bata

Mga Buhat 23:10–11; 27:18–25; 28:1–6

Kon mag-atubang ko og kalisdanan, ang Dios dili mobiya kanako.

Sa tanang pagsulay nga nasinati ni Pablo, giubanan siya sa Ginoo. Unsaon nimo pagtabang ang mga bata nga ipahisama ang mga kasinatian ni Pablo diha sa ilang kaugalingon nga mga kinabuhi?

Posible nga mga Kalihokan

• Gamit ang Mga Buhat 23:10, ipasabot nga gibilanggo si Pablo tungod kay gitudloan niya ang mga tawo mahitungod ni Jesus. Dayon basaha ang Mga Buhat 23:11 uban sa mga bata. Nganong makahimo man sa “pagsalig” si Pablo bisan og anaa siya sa bilanggoan?

• Isulat diha sa pisara ang Mga Buhat 23:10–11; Mga Buhat 27:18–25; ug Mga Buhat 28:1–6. Ipakita ang mga hulagway sa usa ka bilanggoan, usa ka barko, ug usa ka bitin, ug dapita ang mga bata sa pagrebyo niini nga mga bersikulo ug ipares kini ngadto sa mga hulagway. Sa matag usa niini nga mga istorya, sa unsang paagi nga gipakita sa Ginoo kang Pablo nga Siya nag-uban kaniya? Ipaambit ang usa ka kasinatian sa dihang giubanan ka sa Ginoo atol sa usa ka malisod nga panahon ug sa unsang paagi nga kini nakapalig-on sa imong pagpamatuod Kaniya. Awhaga ang mga bata sa pagpaambit usab og mga kasinatian.

Mga Buhat 26

Maisogon akong makapaambit sa akong pagpamatuod mahitungod ni Jesukristo.

Ang kaisog ni Pablo sa pagpaambit sa iyang pagpamatuod makatabang sa mga bata nga magmaisogon kon mopaambit sa ilang mga pagpamatuod.

Posible nga mga Kalihokan

• Pagpili og mga bersikulo gikan sa Mga Buhat 26 nga basahon uban sa mga bata aron matabangan sila nga makasabot sa unsay gisulti ni Pablo ngadto kang Haring Agripa mahitungod sa iyang mga kasinatian (sama sa mga bersikulo 9–16) ug kon unsa ang iyang gitudlo mahitungod kang Jesukristo (sama sa mga bersikulo 18, 23). Nganong makahahadlok kaha alang kang Pablo nga ipaambit kini nga mga butang atubangan sa hari? Dapita ang mga bata sa paglista og pipila ka baroganan sa ebanghelyo nga ilang nahibaloan nga tinuod. Hangyoa sila sa paghunahuna og tawo nga ilang kaila nga nakinahanglan nga makadungog sa ilang pagpamatuod bahin niini nga mga kamatuoran.

• Dapita ang mga bata sa paggamit sa pahina sa kalihokan karong semanaha aron sa pagsulat og usa ka butang nga mahimo nilang isulti kon sila mopaambit sa ilang mga pagpamatuod.

Mga Buhat 27

Ang mga propeta mopasidaan kanako sa kakuyaw.

Ang mga bata makapaminaw sa mga mensahe sa buhi nga mga propeta ug makaila sa ilang mga pasidaan. Unsaon nimo pagtabang ang mga bata nga makakat-on unsaon sa pagpatalinghog niadto nga mga pasidaan?

Posible nga mga Kalihokan

• Guntinga ang usa ka piraso nga papel nga giporma og barko ngadto sa mga piraso sa puzzle. Dapita ang mga bata sa pagsulat sa mga pasidaan ni Pablo nga anaa sa Mga Buhat 27:9–11 diha sa mga piraso ug han-ayon ngadto sa saktong porma ang puzzle. Nganong wala man naminaw ang mga tawo kang Pablo? (tan-awa sa bersikulo 11). Dapita ang mga bata sa pagbasa sa mga bersikulo 18–20 ug 40–44 aron mahibaloan kon unsay nahitabo isip resulta. (Ipasabot nga tungod kay ang mga tawo misunod sa ulahing tambag ni Pablo nga magpabilin sa barko, walay usa nga namatay sa pagkaguba sa barko; tan-awa sa mga bersikulo 30–32.) Unsa ang atong makat-onan gikan niini nga kasinatian mahitungod sa pagsunod sa propeta?

• Pagdala og usa ka bag-o nga mensahe sa komperensiya sa Presidente sa Simbahan ug ipaambit sa mga bata ang bisan unsa nga mga pasidaan o tambag nga iyang gihatag. Dapita ang mga bata sa paghunahuna og mga paagi nga makahimo sila sa pagsunod sa propeta.

Awhaga ang Pagkat-on diha sa Panimalay

Hangyoa ang mga bata sa paggamit sa unsay ilang nakat-onan mahitungod ni Pablo aron sa pag-awhag sa ilang mga pamilya nga magtuon sa labing bag-o nga mensahe sa propeta ug hisgotan kon sa unsang paagi nga sila makasunod sa iyang tambag.

Pagpalambo sa Atong Pagtudlo

Apila ang mga balatian [senses]. “Kadaghanan sa mga bata (ug mga hamtong) labing makakat-on kon maapil ang daghang mga balatian. Pangita og mga paagi sa pagtabang sa mga bata nga magamit ang ilang mga balatian sa pangtan-aw, pangdungog, ug panghikap samtang sila nagkat-on. Sa pipila ka mga sitwasyon, mahimo gani ka nga makakita og mga paagi nga malakip ang ilang mga balatian sa pangsimhot ug pangtilaw!” (Pagtudlo sumala sa Pamaagi sa Manluluwas, 25).