Corinto, Habagatang Gresya, ang Forum ug Civic Center, painting pinaagi ni Balage Balogh/www.ArchaeologyIllustrated.com

Agosto 21–27

1 Mga Taga-Corinto 1–7

“Paghiusa Gayod Kamo”

Ang Espiritu Santo motabang kanimo nga masayod unsa nga mga baroganan sa ebanghelyo diha sa 1 Mga Taga-Corinto 1–7 ang makatabang sa mga bata nga imong tudloan. Samtang mainampoon nimong basahon kini nga mga kapitulo, irekord ang mga hunahuna ug mga pagbati nga moabot kanimo gikan sa Espiritu.

Dapita ang Pagpaambit

Pangutan-a ang mga bata kon mipaambit ba sila sa ilang mga pamilya og usa ka butang nga ilang nakat-onan sa Primary sa miaging semana. (Tingali kinahanglan nimong rebyohon kadali ang leksiyon sa miaging semana.) Kon mao, unsa man ang ilang gipaambit?

Itudlo ang Doktrina: Mas Gagmay nga mga Bata

1 Mga Taga-Corinto 2:11–14

Ang Espiritu Santo nagtudlo kanako og mga kamatuoran sa ebanghelyo.

Usa sa mga tahas sa Espiritu Santo mao ang pagtudlo kanato sa kamatuoran. Unsa nga mga kasinatian ang mapaambit nimo sa mga bata aron sa pagtabang kanila nga makasabot niini?

Posible nga mga Kalihokan

• Ipakita ang mga butang o mga hulagway nga nagrepresentar sa mga paagi nga makat-on kita mahitungod sa kalibotan (sama sa usa ka eskwelahan, libro, o cell phone). Unsa ang atong makat-onan kon mogamit kita niini nga mga butang? Ipasabot nga sa 1 Mga Taga-Corinto 2:11, 14, mitudlo si Pablo nga makakat-on lamang kita mahitungod sa Dios pinaagi sa Espiritu sa Dios, nga mao ang Espiritu Santo. Unsa ang atong mahimo aron makakat-on sa “mga [butang] sa Dios”?

• Ipakpak ang imong mga kamot samtang imong isulti ang matag silaba sa kapahayag nga “Ang Espiritu Santo nagtudlo kanato sa kamatuoran.” Hangyoa ang mga bata sa pagpakpak sa ilang mga kamot ug sa pagsulti og balik sa pulongan. Pagpaambit sa mga bata og usa ka kasinatian sa dihang ang Espiritu Santo mitabang kanimo nga mahibalo nga ang usa ka butang tinuod.

• Kantaha og dungan ang usa ka awit mahitungod sa Espiritu Santo, sama sa “Ang Espiritu Santo” (Songbook sa mga Bata, 56). Tabangi ang mga bata sa pagpangita og mga pulong ug mga pulongan diha sa awit nga nagtudlo kon sa unsang paagi ang Espiritu Santo mamulong kanato ug unsa ang Iyang itudlo kanato.

1 Mga Taga-Corinto 3:10–11

Si Jesukristo mao ang akong pundasyon.

Ang mga bata nagtukod og pundasyon alang sa ilang mga pagpamatuod, ug ikaw makatabang kanila sa pagtukod og lig-on nga pundasyon diha ni Jesukristo.

Posible nga mga Kalihokan

• Basaha ang 1 Mga Taga-Corinto 3:11 ngadto sa mga bata, ug ipasabot nga si Jesukristo mao ang atong pundasyon. Ipakita sa mga bata ang pipila ka hulagway sa mga butang diin kita makabaton og mga pagpamatuod, lakip ang usa ka hulagway ni Jesukristo. Tabangi sila sa paghan-ay sa mga hulagway aron ang hulagway ni Jesus anaa sa ubos, sama sa usa ka pundasyon, ug ang ubang mga hulagway “natukod” diha sa usa ka pagpamatuod mahitungod Kaniya.

• Paghimo og mga aksiyon alang sa awit nga “Ang Tawong Maalam ug ang Tawong Walay Kaalam” (Songbook sa mga Bata, 132), ug kantaha ang awit uban sa mga bata. Hatagi ang matag bata og usa ka bato nga gisulatan og “Si Jesukristo mao ang akong pundasyon.” Ipadala nila ang mga bato sa ilang pagpauli aron mopahinumdom kanila kon unsay ilang nakat-onan.

• Pagpaambit og mga hulagway nga nagpakita sa pipila sa imong paborito nga mga istorya sa kinabuhi sa Manluluwas, ug hangyoa ang mga bata sa pagsulti kanimo sa unsay nahitabo diha sa mga hulagway. Tugoti sila sa pagpaambit og pipila sa ilang paborito nga mga istorya mahitungod ni Jesus. Ipakigbahin ang imong pagpamatuod nga si Jesukristo mao ang pundasyon sa imong hugot nga pagtuo.

1 Mga Taga-Corinto 6:19

Ang akong lawas sama usa ka templo.

Unsaon nimo pagtabang ang mga bata nga makasabot sa kaimportante sa ilang mga lawas isip mga gasa gikan sa Dios ug makabaton og dakong tinguha sa pag-atiman niini?

Posible nga mga Kalihokan

• Ipakita sa mga bata ang mga hulagway sa mga templo (tan-awa ang latid niini nga semana diha sa Dali, Sunod Kanako—Alang sa mga Indibidwal ug mga Pamilya), ug basaha kini nga mga pulong gikan sa 1 Mga Taga-Corinto 6:19: “Ang inyong lawas mao ang templo sa Espiritu Santo.” Tabangi ang mga bata nga makasabot nga gusto sa Langitnong Amahan nga ipabilin natong limpyo ug balaan ang atong mga lawas, sama sa usa ka templo.

• Ipakita ang hulagway sa usa ka bata, ug butangi og mga hulagway libot niini sa mga butang nga maayo sa atong mga lawas ug mga butang nga dili maayo. Dapita ang mga bata nga magpuli-puli sa pag-ila sa maayo nga mga butang ug sa pagtangtang sa dili maayo nga mga butang.

• Kantaha og dungan ang usa ka awit mahitungod sa mga lawas, sama sa “Ulo, Abaga, Tuhod, ug Tiil” (Songbook sa mga Bata, 129A), ug pangutan-a ang mga bata nganong mapasalamaton sila sa ilang mga lawas.

Itudlo ang Doktrina: Mas Magulang nga mga Bata

1 Mga Taga-Corinto 1:23–25

Ang pagkahimong maalamon nagpasabot sa pagsalig sa kaalam sa Dios.

Ang mga bata nga imong gitudloan makakaplag—kon wala pa man gani—nga ang ubang mga tawo motudlo og mga butang nga mosukwahi sa kaalam sa Dios. Ang pagtuon sa 1 Mga Taga-Corinto 1:23–25 makatabang sa mga bata nga makasabot nga makasalig kita sa kalaam sa Dios tungod kay mas labaw kini kay sa atong kaalam.

Posible nga mga Kalihokan

• Hangyoa ang mga bata sa pagbasa sa 1 Mga Taga-Corinto 1:23–25 ug pangitaon ang mga pulong nga kaalam ug binuang. Ipasabot nga daghang tawo ang naghunahuna nga binuang ang mga pagtulon-an ni Pablo, apan mipasabot si Pablo nga ang pagtuo sa ebanghelyo ni Kristo mao ang tinuod nga kaalam. Nganong maalamon man nga motuo sa unsay gitudlo sa Dios?

• Tabangi ang mga bata sa pagdrama-drama kon unsaon nila sa pagtubag sa mga tawo nga naghunahuna nga “binuang” ang mga sugo sa Dios—sama sa sugo nga magbaton og hugot nga pagtuo diha sa Manluluwas, motuman sa Pulong sa Kaalam, o pagsunod sa balaod sa ikapulo. Sama pananglit, makapamatuod sila sa mga panalangin nga nagagikan sa pagsunod niini nga mga pagtulon-an.

• Pagpaambit og kasinatian sa dihang ang uban nagtuo nga ang imong mga tinuohan binuang, o pagpaambit og usa ka ehemplo gikan sa mga kasulatan. Tugoti ang mga bata nga mopakigbahin og susama nga mga kasinatian. Sa unsang paagi nga ang 1 Mga Taga-Corinto 1:25 makatabang kanato nga magpabiling matinud-anon kon ang ubang tawo motawag sa atong mga gituohan nga binuang?

1 Mga Taga-Corinto 2:11–14

Ang Espiritu Santo nagtudlo kanako og mga kamatuoran sa ebanghelyo.

Unsaon nimo pagtabang ang mga bata nga makaamgo nga gikinahanglan nila ang Espiritu Santo aron makasabot sa “mga [butang] sa Dios”?

Posible nga mga Kalihokan

• Hangyoa ang mga bata sa paghimo og lista sa mga paagi nga makakat-on kita mahitungod sa kalibotan—sama pananglit, mga libro, eskwelahan, ug ang internet. Dayon basaha og dungan ang 1 Mga Taga-Corinto 2:11–14. Unsa ang gitudlo niini nga mga bersikulo mahitungod kon unsaon nato sa pagkat-on sa “mga [butang] sa Dios”?

• Isaysay ang mahitungod sa usa ka higayon sa dihang nakakat-on ka og usa ka butang pinaagi sa Espiritu sa Dios. Tabangi ang mga bata sa pag-ila og mga higayon sa dihang gibati nila ang Espiritu. Unsa nga “mga [butang] sa Dios” (1 Mga Taga-Corinto 2:11) nga nakatabang ang Espiritu kanato nga makasabot?

• Dapita ang matag bata sa pagbasa sa usa niini nga mga kasulatan: 1 Mga Taga-Corinto 2:11–14; 1 Nephi 10:17; Moroni 10:3–5; ug Doktrina ug mga Pakigsaad 8:2–3. Hangyoa ang mga bata sa pagpaambit sa unsay ilang nakat-onan gikan niini nga mga kasulatan kon sa unsang paagi ang Espiritu Santo nagtudlo kanato. Nganong mapasalamaton man kita sa gasa sa Espiritu Santo?

1 Mga Taga-Corinto 6:19–20

Kinahanglan nakong itratar ang akong lawas uban sa pagtahod ug ipabilin kining balaan.

Ang pagsabot nga ang atong mga lawas mga gasa gikan sa Langitnong Amahan makatabang sa mga bata nga mapabiling sagrado ang ilang mga lawas, bisan kon matintal sila sa pagbuhat sa sukwahi.

Posible nga mga Kalihokan

• Pagdala og sudlanan nga adunay mga hulagway sa usa ka bata ug sa usa ka templo. Dapita ang mga bata sa pagbasa sa 1 Mga Taga-Corinto 6:19–20 ug sa pagtag-an kon unsa ang anaa sa sulod sa sudlanan. Paablihi kini kanila ug hisgoti kon sa unsang paagi nga ang atong mga lawas sama sa mga templo.

• Hisgoti ngadto sa mga bata kon unsaon nato sa pagtratar ang usa ka templo. Kon ang atong mga lawas susama sa mga templo, unsaon man nato sa pagtratar ang atong mga lawas? Ang pagkanta o pagbasa sa mga pulong sa awit mahitungod sa mga templo, sama sa “Ang Ginoo Naghatag Kanako og Templo” (Songbook sa mga Bata, 73), makatabang sa pagtubag niini nga pangutana. Kon makahimo kita og mga sayop, unsaon nato sa paghimo sa atong “mga templo” nga malimpyo pag-usab?

• Basaha og dungan ang “Ang Inyong Lawas Sagrado” (diha sa Alang sa Kalig-on sa mga Kabatan-onan [giya 2022], 22–29). Dapita ang mga bata sa paglista diha sa pisara sa tambag nga ilang makit-an kon unsaon sa pag-atiman ang atong mga lawas.

Awhaga ang Pagkat-on diha sa Panimalay

Dapita ang mga bata sa pagpaambit sa ilang mga pamilya og usa ka awit nga ilang gikanta diha sa klase ug unsay ilang nakat-onan gikan niini.

Pagpalambo sa Atong Pagtudlo

Pagpamatuod bahin ni Jesukristo. Usa sa labing importante nga mga butang nga imong mahimo isip usa ka magtutudlo mao ang pagpamatuod mahitungod ni Jesukristo. Makatabang kini sa mga bata nga mapalig-on ang ilang mga pagpamatuod ug mobati sa gugma sa Manluluwas alang kanila.