“Agosto 28–Septyembre 3. 1 Mga Taga-Corinto 8–13: ‘Kamong Tanan Lawas ni Kristo’” Dali, Sunod Kanako—Alang sa Primary: Bag-ong Tugon 2023 (2022)
“Agosto 28–Septyembre 3. 1 Mga Taga-Corinto 8–13,” Dali, Sunod Kanako—Alang sa Primary: 2023
Agosto 28–Septyembre 3
1 Mga Taga-Corinto 8–13
“Kamong Tanan Lawas ni Kristo”
Samtang imong basahon ang 1 Mga Taga-Corinto 8–13, paminaw alang sa mga pag-aghat gikan sa Espiritu kon unsaon sa pagtudlo sa mga baroganan niini nga mga kapitulo. Hinumdomi nga bisan unsa sa mga ideya sa kalihokan mahimong mapahiangay alang sa mas magulang ug sa mas gagmay nga mga bata.
Dapita ang Pagpaambit
Dapita ang mga bata sa pagpaambit og usa ka butang nga ilang gibuhat atol sa panagtigom alang sa sakramento aron sa paghunahuna mahitungod ni Jesus.
Itudlo ang Doktrina: Mas Gagmay nga mga Bata
Ang Langitnong Amahan motabang kanako sa paghimo og matarong nga mga pagpili.
Dili kanunay sayon ang pagpili sa matarong, ug ang Langitnong Amahan nasayod niana. Kon mangayo kita, Siya motabang kanato tungod kay gusto Siya nga molampos kita.
Posible nga mga Kalihokan
-
Basaha ang 1 Mga Taga-Corinto 10:13 ngadto sa mga bata, nga dapiton sila sa paglingo-lingo sa ilang mga ulo kon madungog nila ang mga pulong nga “tintalon” o “tintasyon.” Ipasabot kon unsa ang kahulogan niini nga bersikulo kanimo.
-
Pagsaysay og mugbo nga mga istorya sa mga tawo kinsa hapit na mohimo og sayop nga pagpili. Samtang maminaw ang mga bata, dapita sila sa pagpataas sa ilang mga kamot o sa usa ka papel nga may karatula sa paghunong kon ang tawo diha sa istorya mohimo og sayop nga pagpili. Unsa man ang matarong nga pagpili? Pagpamatuod nga ang Langitnong Amahan motabang kanato sa pagpili sa matarong.
-
Ipakita ang usa ka hulagway ni Jesus, ug kantaha uban sa mga bata ang usa ka awit mahitungod ni Jesukristo, sama sa “Maninguha Kong Mahimong Mahisama Kang Jesus” (Songbook sa mga Bata, 40–41). Hisgoti kon sa unsang paagi nga ang paghinumdom ni Jesus makatabang kanimo sa paghimo og maayo nga mga pagpili. Ipakita ang mga litrato sa ubang mga butang nga makatabang kanato sa paghimo og maayo nga mga pagpili, sama sa mga ginikanan o mga kasulatan. Pangutan-a ang mga bata kon unsa ang makatabang kanila sa paghimo og maayo nga mga pagpili.
Ang Langitnong Amahan mipanalangin kanako og espirituhanon nga mga gasa.
Gihatagan sa Langitnong Amahan ang tanan Niyang mga anak og espirituhanon nga mga gasa. Unsa nga espirituhanon nga mga gasa ang imong makita diha sa mga bata nga imong gitudloan?
Posible nga mga Kalihokan
-
Hangyoa ang mga bata sa pagdrowing og hulagway sa usa ka paborito nga gasa nga ilang nadawat. Ipasabot nga ang Langitnong Amahan mohatag kanato og espirituhanon nga mga gasa aron sa paglig-on sa atong hugot nga pagtuo ug sa pagtabang kanato sa pagpanalangin sa uban. Ipaambit sa mga bata ang pipila sa espirituhanon nga mga gasa nga gihulagway sa 1 Mga Taga-Corinto 12:7–11.
-
Pagsulat og mubo nga sulat alang sa matag bata, nga naghulagway sa usa ka espirituhanon nga gasa nga imong nakita diha kaniya (o mahimo nimong dapiton ang mga ginikanan sa pagsulat niini nga mga mugbong sulat). Isulod ang mga mugbong sulat diha sa mga sobre. Tugoti ang mga bata sa pag-abli sa mga sobre, ug tabangi sila sa pagbasa mahitungod sa ilang espirituhanon nga mga gasa.
Gihatagan sa Langitnong Amahan ang tanan Niyang mga anak og espirituhanon nga mga gasa.
Makahimo ako sa paghigugma sa uban.
Ang mga kasulatan nagtudlo nga ang gugma nga putli mao ang “tiunay nga gugma ni Kristo” (Moroni 7:47). Unsaon nimo pagtabang ang mga bata nga makapalambo ug makapahayag og Kristohanong gugma?
Posible nga mga Kalihokan
-
Basaha ang 1 Mga Taga-Corinto 13:13 ug Moroni 7:47, ug tabangi ang mga bata sa pagsulti og balik sa pulongan nga “Ang gugma nga putli mao ang tiunay nga gugma ni Kristo.” Ipakita ang mga hulagway ni Jesus nga nagmahigugmaon ug nagmabination, ug pangutan-a ang mga bata kon giunsa Niya sa pagpakita og gugma ngadto sa uban (tan-awa ang Libro sa mga Hulagway sa Ebanghelyo alang sa mga ideya).
-
Kantaha ang usa ka awit mahitungod sa paghigugma sa uban, sama sa “Si Jesus Miingon Higugmaa ang Tanan” o “Maghigugmaay” (Songbook sa mga Bata, 39, 74), uban sa mga bata. Ipakita ang mga litrato sa lainlaing tawo (sama sa usa ka ginikanan, igsoon, magtutudlo, o higala), ug hangyoa ang mga bata sa pagpaambit kon unsaon nila sa pagserbisyo niana nga tawo. Dapita ang mga bata sa paghunahuna og usa ka tawo nga ilang maserbisyohan ug dayon sa paghimo og mubo nga sulat o sa pagdrowing og litrato nga ikahatag niana nga tawo.
Itudlo ang Doktrina: Mas Magulang nga mga Bata
Ang Langitnong Amahan motabang kanako sa pagpakigbatok sa tintasyon.
Ang mga saad niini nga bersikulo makahatag sa mga bata og pagsalig nga makabatok sila sa tintasyon uban sa tabang sa Langitnong Amahan.
Posible nga mga Kalihokan
-
Dapita ang mga bata nga magpares sa pagbasa sa 1 Mga Taga-Corinto 10:13 ug i-summarize ang bersikulo sa ilang kaugalingon nga mga pulong. Hangyoa ang mga bata sa pagpaambit og kasinatian diin ang Langitnong Amahan mitabang kanila sa paglikay o pagpakigbatok sa tintasyon. Unsa ang atong mabuhat aron mosalig sa Langitnong Amahan kon kita tintalon?
-
Isulat diha sa mga piraso nga papel ang mga tintasyon nga mahimong atubangon sa mga bata karon. Dapita ang matag usa sa mga bata nga mopili og usa ka papel ug mopaambit kon unsay gihatag sa Langitnong Amahan aron sa pagtabang kanato sa paglikay o pagpakigbatok niini nga mga tintasyon. Alang sa pipila ka ideya, basaha og dungan ang Alma 13:28–29.
Atol sa sakramento, mahimo akong maghunahuna kon sa unsang paagi nga nagsunod ako sa Manluluwas.
Tabangi ang mga bata nga imong gitudloan nga makakita nga ang sakramento usa ka oportunidad nga “magsusi” sa ilang kaugalingon ug mobag-o sa ilang pakigsaad sa bunyag nga moserbisyo sa Ginoo ug motuman sa Iyang mga sugo (1 Mga Taga-Corinto 11:28).
Posible nga mga Kalihokan
-
Hangyoa ang usa ka bata sa pagbasa sa 1 Mga Taga-Corinto 11:28. Unsa ang gipasabot nga “magsusi” sa atong kaugalingon sa dili pa moambit sa sakramento? Hangyoa ang mga bata sa paghunahuna og uban nga mga tawo kinsa mosusi sa mga butang, sama sa mga doktor, mga detektib, o mga siyentipiko (sama pananglit, ang mga doktor mosusi kanato aron sa pagseguro nga kita himsog). Kon moambit kita sa sakramento, unsa man ang atong mabuhat aron sa pagsusi kon sa unsang paagi nato gisunod ang atong mga pakigsaad sa bunyag?
-
Hangyoa ang mga bata sa paghimo og lista sa mga butang nga mahunahuna nila kon moambit sila sa sakramento. Dapita sila sa paggamit sa ilang mga lista isip usa ka pahinumdom sa pagsusi sa ilang kaugalingon atol sa sakramento.
1 Mga Taga-Corinto 12:4, 7–12, 31; 13:1–8
Aduna akoy espirituhanon nga mga gasa.
Mitudlo si Pablo nga ang mga gasa sa espiritu “anaa sa matag usa” (1 Mga Taga-Corinto 12:7). Kini nga baroganan makatabang sa mga bata sa paglig-on sa ilang pagbati og bili sa kaugalingon, ilabi na kon ilang gamiton ang ilang mga gasa sa pagpanalangin sa uban.
Posible nga mga Kalihokan
-
Hangyoa ang mga bata sa pagsulat diha sa pisara sa espirituhanon nga mga gasa nga ilang makit-an diha sa 1 Mga Taga-Corinto 12:7–11; 13:2. Dapita sila sa pagpangita og dugang nga mga gasa nga gihisgotan diha sa Moroni 10:8–18 ug Doktrina ug mga Pakigsaad 46:13–26. Ipaambit kanila ang pipila sa dugang nga espirituhanon nga mga gasa nga gihisgotan ni Elder Marvin J. Ashton: “Ang gasa sa pagpangutana; ang gasa sa pagpaminaw; … ang gasa sa paglikay sa panaglalis; … ang gasa sa pagtinguha niana nga matarong; ang gasa nga dili dayon mohukom; ang gasa sa pagdangop ngadto sa Dios alang sa giya; … ang gasa sa pag-amuma sa uban; … ang gasa sa paghalad og pag-ampo; ang gasa sa paghatag og makapatandog nga pagpamatuod” (“There Are Many Gifts,” Ensign, Nob. 1987, 20). Dapita ang mga bata sa paghisgot sa espirituhanon nga mga gasa nga ilang nakita diha sa usag usa.
-
Sa dili pa magklase, pangutan-a ang mga ginikanan sa mga bata diha sa imong klase mahitungod sa mga gasa nga ilang nakita diha sa ilang mga anak, o ikaw mismo ang maghunahuna mahitungod sa mga gasa sa mga bata. Sultihi ang mga bata mahitungod niini nga mga gasa. Dapita ang mga bata sa pagsulat og usa ka paagi nga gamiton nila ang ilang mga gasa sa pagpanalangin sa usa ka tawo niini nga semana.
-
Ipaambit ang lainlaing sitwasyon diin ang mga tawo makagamit og espirituhanon nga gasa gikan sa 1 Mga Taga-Corinto 12:7–10. Dapita ang mga bata sa pag-ila sa espirituhanon nga mga gasa nga magamit sa matag sitwasyon.
Awhaga ang Pagkat-on diha sa Panimalay
Isugyot nga ang mga bata maghisgot og usa ka butang ngadto sa ilang mga pamilya nga imong gihisgotan diha sa klase. Sama pananglit, mahimo nimong dapiton ang mga bata sa pagpaambit sa ilang espirituhanon nga mga gasa ngadto sa ilang mga pamilya ug sa pagpangutana sa mga sakop sa ilang pamilya kon unsa ang ilang mga gasa.
Pagpalambo sa Atong Pagtudlo
Ipadangat ang mga pagdapit nga nagtahod sa kabubut-on. Samtang imong dapiton ang mga bata sa paglihok sa unsay ilang nakat-onan, paghunahuna og mga paagi sa pagtahod sa ilang kabubut-on. Imbes nga magpadangat og piho nga mga pagdapit, ikonsiderar ang pagdapit kanila sa paghunahuna og ilang kaugalingon nga mga paagi sa paggamit sa unsay ilang nakat-onan.