Hulyo 24–30

Mga Buhat 16–21

“Ang Dios Nagtawag Kanamo aron sa Pagwali sa Maayong Balita [Ebanghelyo]”

Human mabasa ang Mga Buhat 16–21, sunda ang mga pag-aghat sa Espiritu ug ikonsiderar ang mga ideya dinhi niini nga latid samtang mangandam ka sa pagtudlo. Konsultaha ang “Pagtubag sa mga Panginahanglan sa Mas Gagmay nga mga Bata” dinhi niini nga manwal alang sa dugang nga tabang.

Dapita ang Pagpaambit

Dapita ang mga bata sa pagsulti kanimo sa unsay ilang nahibaloan mahitungod sa mga kasinatian ni Pablo sa pagpaambit sa ebanghelyo. Mahimo usab silang maghisgot mahitungod sa ubang mga misyonaryo nga ilang nailhan o mahitungod sa ilang kaugalingon nga mga kasinatian sa pagpaambit sa ebanghelyo ngadto sa laing tawo.

Itudlo ang Doktrina: Mas Gagmay nga mga Bata

Mga Buhat 16:25–34

Ang mga misyonaryo nagtudlo sa mga tawo mahitungod kang Jesus.

Nahibalo ba ang mga bata nga imong gitudloan kon unsay ginabuhat sa mga misyonaryo? Unsaon nimo pagtabang ang mga bata nga makasabot nga mahimo silang mopaambit sa ebanghelyo ngadto sa uban?

Posible nga mga Kalihokan

• Tabangi ang mga bata sa pagdrama-drama sa Mga Buhat 16:25–34 samtang imong i-summarize ang istorya ni Pablo ug Silas nga mipaambit sa ebanghelyo diha sa bilanggoan (tan-awa usab sa “Kapitulo 61: Pablo ug Silas Nabilanggo,” diha sa Mga Istorya sa Bag-ong Tugon, 158–60). Ipasabot nga ang mga misyonaryo karon nagtudlo usab sa mga tawo mahitungod ni Jesus ug nagtabang kanila nga mangandam sa pagpabunyag.

• Paghimo og misyonaryo nga mga name tag nga isul-ob sa mga bata, ug tabangi sila sa pagsulat sa ilang mga ngalan diha sa mga tag. Tudloi ang mga bata og yano nga mga pamahayag sa doktrina nga ilang ikapaambit sa uban, sama sa “Ako anak sa Dios,” “Ang Dios mamulong pinaagi sa buhi nga propeta,” o “Si Jesukristo mao ang atong Manluluwas.” Pahinumdomi ang mga bata nga wala kita magkinahanglan og misyonaryo nga name tag aron sa pagpaambit sa ebanghelyo ngadto sa uban.

Mga Buhat 17:10–12

Ang mga kasulatan nagpamatuod sa Langitnong Amahan ug ni Jesukristo.

Bisan og ang ubang mga bata nga imong gitudloan tingali dili pa kahibalo mobasa, makatabang ka kanila nga makapalambo og gugma alang sa mga kasulatan ug makakita kon sa unsang paagi kini nagpamatuod sa Manluluwas.

Posible nga mga Kalihokan

• Tabangi ang usa sa mga bata sa pagbasa sa pulongan nga “Nagtuon sila sa Kasulatan matag adlaw” (Mga Buhat 17:11). Dapita ang mga bata nga itudlo ang matag adlaw sa semana diha sa kalendaryo samtang ilang balikon pagsulti kini nga pulongan uban kanimo. Kantaha og dungan ang usa ka awit nga nagtudlo mahitungod sa mga panalangin sa pagbasa sa mga kasulatan, sama sa “Pagsiksik, Pamalandong, ug Pag-ampo” (Songbook sa mga Bata, 66).

• Aron sa pagtudlo sa mga bata nga ang mga kasulatan nagpamatuod sa Langitnong Amahan ug ni Jesukristo, tabangi sila sa pagpakli ngadto sa usa ka kapitulo sa mga kasulatan, sama sa Mga Buhat 17 o 18, ug sa pagpangita sa mga pulong nga sama sa Dios, Ginoo, o Jesus. (Mahimo nimong markahan daan kini nga mga pulong aron mas dali kining makit-an sa mga bata.) Sa matag higayon nga makakita ang mga bata og usa niini nga mga pulong, dapita sila sa pagpaambit og usa ka butang nga ilang nahibaloan mahitungod sa Langitnong Amahan ug ni Jesukristo.

Mga Buhat 17:22–31

Ako anak sa Dios.

Sa Bungtod sa Mars, si Pablo mitudlo og sukaranang mga kamatuoran mahitungod sa kinaiya sa Dios, lakip sa mga kamatuoran nga kita Iyang mga anak ug nga Siya “dili layo kanato” (Mga Buhat 17:27). Unsaon nimo sa pagtabang ang mga bata nga mobati nga suod sa ilang Langitnong Amahan?

Posible nga mga Kalihokan

• Dapita ang mga bata sa pagsulti og balik sa pulongan nga “Kay kaliwat man diay kita sa Dios” (Mga Buhat 17:29), ug ipasabot nga ang kaliwat nagpasabot sa mga anak. Ipakigbahin ang imong pagpamatuod ngadto sa matag bata, sa tagsa-tagsa, nga siya anak sa Dios. Dapita sila sa pagpaambit kon unsay ilang gibati mahitungod sa ilang Langitnong Amahan.

• Pagpakita og mga hulagway sa mga bata uban sa ilang mga pamilya (kon mahimo, ilakip ang mga litrato sa mga bata sa imong klase). Hangyoa ang mga bata nga itudlo ang mga ginikanan diha sa mga hulagway. Ipasabot nga kita mga anak sa atong mga inahan ug mga amahan, ug kitang tanan usab espiritu nga mga anak sa atong langitnon nga mga ginikanan.

• Kantaha ang usa ka awit mahitungod sa Langitnong Amahan, sama sa “Ako Nasay[o]d Akong Amahan Buhi” (Songbook sa mga Bata, 8). Uban sa tabang sa mga bata, pagsulat og mga pulong o pagdrowing og mga hulagway diha sa pisara nga nagrepresentar sa mga butang nga atong nakat-onan mahitungod sa Langitnong Amahan gikan sa awit.

• Basaha ngadto sa mga bata kini nga mga pulong gikan sa Mga Buhat 17:27: “Ang Dios dili layo kanato.” Hisgoti ang mga panahon nga mibati ka nga duol sa Langitnong Amahan, ug dapita ang mga bata sa pagbuhat sa ingon.

Ang matag tawo anak sa Dios.

Itudlo ang Doktrina: Mas Magulang nga mga Bata

Mga Buhat 16:14–15, 25–34; 18:7–8, 24–28

Mamahimo akong misyonaryo karon.

Unsaon nimo pagtabang ang mga bata nga mahimong sama kang Pablo ug mopaambit ngadto sa uban sa unsay ilang nakat-onan mahitungod sa ebanghelyo?

Posible nga mga Kalihokan

• Dapita ang mga bata sa pagbasa sa Mga Buhat 16:14–15, 25–34; 18:7–8, 24–28 ug sa paghimo og lista sa mga tawo nga gipaambitan ni Pablo ug Apolos sa ebanghelyo. Dayon dapita sila sa paghimo og lista sa mga tawo nga mahimo nilang paambitan sa ebanghelyo. Ipadrama-drama sa mga bata kon unsaon kaha nila sa pagsulti niini nga mga tawo mahitungod ni Jesukristo o sa pagdapit kanila sa simbahan. Mahimo usab nimong dapiton ang mga bata sa paghimo og mugbo nga mga sulat nga nagpamatuod mahitungod sa usa ka kamatuoran sa ebanghelyo ngadto niini nga mga tawo.

• Dapita ang kasamtangan nga full-time nga mga misyonaryo, mga returned missionary, o mga ward missionary sa pagbisita sa klase ug sa pagsulti mahitungod sa ilang mga kasinatian sa pagpaambit sa ebanghelyo. Awhaga ang mga bata sa pagpangutana kon unsaon nila sa pagpaambit sa ebanghelyo ngadto sa uban.

Mga Buhat 17:2–4, 10–12; 18:28

Ang mga kasulatan nagpamatuod mahitungod ni Jesukristo.

Ang tanang propeta nagpamatuod mahitungod ni Jesukristo. Unsaon nimo sa pagtudlo ang mga bata sa pagpangita Kaniya diha sa mga kasulatan, bisan kon wala Siya hisgoti pinaagi sa ngalan?

Posible nga mga Kalihokan

• Tabangi ang mga bata sa pagbasa sa Mga Buhat 17:2–4, 10–12; 18:28, ug dapita sila sa pagpangita kon unsa ang komon nga anaa niini nga mga tudling. Sumala niini nga mga bersikulo, unsa ang nakatabang sa mga tawo nga motuo sa ebanghelyo ni Jesukristo? Dapita ang mga bata sa pagpaambit og paborito nga mga istorya kabahin ni Jesus nga ilang nakat-onan gikan sa mga kasulatan.

• Diha sa mga piraso sa papel, isulat ang mga pakisayran sa kasulatan nga nagtudlo kabahin sa Manluluwas (makakita ka og pipila diha sa Giya ngadto sa mga Kasulatan, “Jesukristo,” scriptures.ChurchofJesusChrist.org). Tagoi ang mga papel palibot sa lawak ug dapita ang mga bata sa pagpangita niini. Tabangi ang mga bata sa pagtan-aw sa mga pakisayran nga ilang nakit-an, ug hangyoa sila sa pagpaambit sa usag usa kon unsa ang gitudlo sa matag kasulatan mahitungod ni Jesus.

Mga Buhat 17:22–31

Ako anak sa Dios.

Unsaon nimo sa pagtabang ang mga bata nga makahinumdom nga sila mga anak sa Dios?

Posible nga mga Kalihokan

• Pakit-a ang mga bata og usa ka bato, ug ipasabot nga sa panahon ni Pablo, ang mga tawo misimba og mga dios-dios nga ilang gihimo gikan sa bato ug ubang materyales. Hangyoa ang mga bata sa pagbasa sa Mga Buhat 17:27–29. Unsa ang atong makat-onan mahitungod sa Dios gikan niini nga mga bersikulo? Ipasabot nga ang kaliwat nagpasabot nga mga anak. Pangutan-a ang mga bata kon unsa ang ilang gibati sa pagkasayod nga sila mga anak sa Dios.

• Hangyoa ang mga bata sa pagbasa sa Mga Buhat 17:27. Dapita ang mga bata sa pagsulat o pagdrowing og mga hulagway sa mga paagi nga sila “makaabot” o mas maduol sa Dios. Kanus-a sila mibati nga Siya “dili layo [kanila]”?

Awhaga ang Pagkat-on diha sa Panimalay

Awhaga ang mga bata sa pagpangita og usa ka kasulatan niini nga semana nga nagtudlo mahitungod ni Jesukristo (mahimong mahitabo kini atol sa ilang personal o pamilya nga pagtuon sa kasulatan). Sunod semana, dapita sila sa pagpaambit kon unsa ang ilang nakit-an.

Pagpalambo sa Atong Pagtudlo

Tabangi ang mga bata nga mahimong mas maayo nga mga tigkat-on. Ang imong katuyoan sa pagtudlo sa mga bata dili lamang ang pagpaambit sa kamatuoran ngadto kanila. Kinahanglan usab nimo nga tabangan sila nga molambo ngadto sa makabarog sa kaugalingong paningkamot nga mga tigpangita sa kamatuoran. Pananglitan, imbes nga yano lang nga isugilon sa mga bata ang istorya ni Pablo nga nagsangyaw didto sa Bungtod sa Mars, mahimo kang magplano og mga kalihokan, sama niadtong gisugyot niini nga latid, nga makatabang kanila nga sila mismo ang makadiskobre sa mga kamatuoran diha sa istorya.