Day of Pentecost [Adlaw sa Pagkunsad sa Espiritu Santo], ni Sidney King

Hulyo 3–9

Mga Buhat 1–5

“Mahimo Kamong Akong mga Saksi”

Sugdi ang imong pagpangandam pinaagi sa pagbasa sa Mga Buhat 1–5. Tinguhaa sa mainampoong paagi nga makasabot sa mga panginahanglan sa mga bata nga imong gitudloan. Ang Dali, Sunod Kanako—Alang sa mga Indibidwal ug mga Pamilya ug kini nga latid makatabang usab kanimo.

Dapita ang Pagpaambit

Isulat ang Kinsa man Ako? diha sa pisara. Paghatag og pipila ka pamahayag mahitungod ni Pedro ug pangutan-a ang mga bata kon alang kang kinsa ang mga pamahayag. Unsa pa ang ilang nahibaloan mahitungod ni Pedro?

Itudlo ang Doktrina: Mas Gagmay nga mga Bata

Mga Buhat 1:1–11

Si Jesukristo nangulo sa Iyang Simbahan pinaagi sa mga propeta ug apostoles.

Ang pagkat-on kon giunsa sa pagpangulo sa Manluluwas ang Iyang karaan nga Simbahan pinaagi sa apostoles makatabang sa mga bata nga makaangkon og pagpamatuod mahitungod sa mga propeta ug apostoles sa atong panahon.

Posible nga mga Kalihokan

• Ipakita ang tibuok pahina nga hulagway gikan sa latid niini nga semana sa Dali, Sunod Kanako—Alang sa mga Indibidwal ug mga Pamilya. Pangutan-a ang mga bata kon ngano kaha nga nagtan-aw sa langit ang mga tawo. Ilaktod ang istorya diha sa Mga Buhat 1:1–11. (Tan-awa usab sa “Kapitulo 55: Ang mga Apostoles Nangulo sa Simbahan,” diha sa Mga Istorya sa Bag-ong Tugon, 145–47.) Dapita ang usa ka bata nga ipataas ang usa ka hulagway sa kasamtangang Apostoles. Kinsa ang motabang ni Jesukristo nga mangulo sa Simbahan kon wala Siya dinhi sa yuta?

• Pagdula og pares-pares gamit ang duha ka hut-ong sa mga hulagway sa buhi nga Unang Kapangulohan ug Napulog Duha ka Apostoles. Kon adunay mahimo nga pares, ipaambit ang ngalan sa Apostol o Presidente ug usa ka butang mahitungod kaniya.

• Sa luyo sa usa ka hulagway sa Presidente sa Simbahan, ipapilit ang gagmay nga mga hulagway sa mga butang nga iyang gitudlo, sama sa Manluluwas, bunyag, o usa ka templo. Papuli-puliha ang matag bata sa pagtan-aw sa usa sa mga hulagway ug sa pagsulti ngadto sa klase, “Ang propeta nagtudlo kanato mahitungod sa [hilisgotan diha sa hulagway].” Pagpamatuod nga ang mga propeta ug apostoles nagtudlo kanato sa unsay gusto ni Jesus nga atong mahibaloan ug buhaton.

Mga Buhat 3:1–10

Ang Langitnong Amahan makapanalangin sa uban pinaagi kanako.

Unsay imong mabuhat aron sa pagtabang sa mga bata nga mahibalo og mga paagi nga makapanalangin sila niadtong naglibot kanila? Tabangi sila nga makat-on gikan sa ehemplo ni Pedro ug Juan nga nag-ayo sa bakol nga tawo.

Posible nga mga Kalihokan

• Dapita ang mga bata sa paghimo og mga aksiyon nga mobagay sa istorya sa Mga Buhat 3:1–10, sama sa pagtuyhad sa ilang mga kamot aron mangayo og kwarta ug sa paglukso sa kalipay. Giunsa sa Langitnong Amahan pagpanalangin ang tawo nga dili makalakaw?

• Pagdala og bag nga gisudlan og mga hulagway nga nagrepresentar sa mga paagi nga makapanalangin ug makaserbisyo kita sa uban. Papuli-puliha ang mga bata sa pagpili og mga hulagway gikan sa bag ug sa pagpaambit kon unsaon nga sila makapanalangin sa uban niana nga paagi.

• Hangyoa ang mga bata sa pagpaambit og higayon sa dihang mitabang sila og usa ka tawo.

Mga Buhat 5:1–11

Mahimo akong magmatinuoron.

Ang nag-unang mga Kristiyano mipakigbahin sa unsay anaa kanila aron sa pagtabang og atiman sa usag usa. Kadtong nanag-iya og yuta mibaligya niini ug mihatag sa kwarta ngadto sa Apostoles, kinsa mihatag dayon niini ngadto sa mga Santos sumala sa ilang mga panginahanglan. Si Ananias ug Safira dili matinuoron sa ilang mga kontribusyon, nagtuo nga malingla nila ang mga sulugoon sa Ginoo.

Posible nga mga Kalihokan

• Tabangi ang mga bata nga idrama-drama ang istorya ni Ananias ug Safira. Ipasabot nga bisan tuod dili kita mamatay kon mamakak kita, kini nga istorya nagpakita kon unsa ka importante ang pagkamatinuoron ngadto sa Langitnong Amahan.

• Tabangi ang mga bata nga makasabot nga ang pagkamatinuoron nagpasabot nga kanunay nga mosulti sa kamatuoran ug dili mokuha sa mga butang nga gipanag-iya sa laing tawo.

• Paggamit og mga puppet nga hinimo sa bulsita aron idrama-drama ang yano nga mga sitwasyon diin ang usa ka tawo nagmatinuoron o wala magmatinuoron. Hangyoa ang mga bata sa pagbarog kon ang tawo nagmatinuoron o sa paglingkod sa salog kon ang tawo wala magmatinuoron. Tabangi ang mga bata nga makasabot kon ngano nga importante nga magmatinuoron.

Itudlo ang Doktrina: Mas Magulang nga mga Bata

Mga Buhat 1:8, 22–26

Si Jesukristo nangulo sa Iyang Simbahan pinaagi sa mga propeta ug apostoles.

Unsaon nimo sa pagtabang ang mga bata nga makasabot nga ang Simbahan sa Manluluwas karon gipangulohan sa mga propeta ug apostoles, sama sa karaang panahon?

Posible nga mga Kalihokan

• Isulat diha sa pisara Sa unsang paagi pangulohan ni Jesukristo ang Simbahan kon wala Siya dinhi sa yuta? Dapita ang mga bata nga maminaw alang sa mga tubag ngadto sa pangutana samtang imong basahon ang mga pulong sa Manluluwas ngadto sa Apostoles diha sa Mga Buhat 1:8. Tabangi ang mga bata nga makasabot nga si Jesus mipili og mga propeta ug apostoles sa pagpangulo sa Simbahan karon, sama sa Iyang gibuhat sa karaan.

• Basaha og dungan ang Mga Buhat 1:22–26. Uban sa tibuok klase, hibaloi kon sa unsang paagi nga ang Apostoles mitawag og bag-o nga Apostol.

• Dapita ang bata sa pagpaambit sa iyang nakat-onan ngadto sa klase ug, kon mahimo, unsay gisulti sa Apostol kabahin sa iyang tawag diha sa iyang unang mensahe sa kinatibuk-ang komperensiya.

Ang mga Apostoles nangulo sa Simbahan human nga si Jesus misaka ngadto sa langit.

Mga Buhat 2:36–47

Ang Espiritu Santo mosaksi sa akong kasingkasing sa mga kamatuoran sa ebanghelyo.

Kon ang mga bata makat-on sa pag-ila kon sa unsang paagi ang Espiritu Santo mamulong diha kanila, madasig sila sa pagpaminaw ug sa pagsunod sa inspirasyon nga ilang nadawat.

Posible nga mga Kalihokan

• Basaha og dungan ang Mga Buhat 2:36–37. Unsa kaha ang bation kon ang Espiritu Santo adunay isulti diha sa atong kasingkasing?

• Uban sa tibuok klase, paghimo og poster nga dunay mga pulong nga Unsa ang atong buhaton? sa ibabaw. Ipakita ang poster kada semana, ug pagdugang og mga paagi nga ang mga bata makabuhat sa unsay ilang nakat-onan sa leksiyon matag semana.

• Dapita ang mga bata sa pagbasa sa Mga Buhat 2:41–47 ug pangitaon ang maayo nga mga butang nga gihimo sa mga tawo human sila nabunyagan. Unsa nga maayong mga butang ang atong mahimo aron sa pagpakita nga mapasalamaton kita sa gasa sa Espiritu Santo nga atong nadawat sa dihang nabunyagan kita?

Mga Buhat 3:1–10

Ang Langitnong Amahan makapanalangin sa uban pinaagi kanako.

Unsaon nimo pagtudlo ang mga bata nga makapanalangin sila sa uban, bisan kon wala silay “salapi o bulawan”? (Mga Buhat 3:6). Unsaon nimo nga matabangan sila nga makakita og mga oportunidad sa pagserbisyo sa Dios pinaagi sa pagserbisyo sa uban? (tan-awa sa Mosiah 2:17).

Posible nga mga Kalihokan

• Hangyoa ang usa ka bata sa pagbasa sa Mga Buhat 3:1–10 samtang ang ubang mga bata modrama-drama sa istorya. (Alang sa tabang, tan-awa ang “Kapitulo 56: [Si] Pedro Miayo sa usa ka Tawo,” sa Mga Istorya sa Bag-ong Tugon, 148–49.) Sa unsang paagi nga ang panalangin nga nadawat niini nga tawo mas dako kay sa kwarta nga iyang gipangayo?

• Ipasa-pasa ang usa ka bag sa mga sensilyo. Samtang gunitan sa mga bata ang bag, pangutan-a sila kon unsa ang ilang mapalit sa kwarta. Pangutan-a ang mga bata kon unsa ang anaa kanato nga mahatag ngadto sa uban nga wala magkinahanglan og kwarta. Dapita sila sa pagpaambit kon unsaon nila sa pagtabang sa uban nga mas magpaduol sa Manluluwas—usa ka gasa nga wala magkinahanglan og kwarta (Mga Buhat 3:6).

Awhaga ang Pagkat-on diha sa Panimalay

Awhaga ang mga bata sa pagplano og usa ka paagi nga makaserbisyo sila sa Langitnong Amahan pinaagi sa pagtabang og usa ka sakop sa ilang pamilya karong semanaha.

Pagpalambo sa Atong Pagtudlo

Pagsag-ulo og usa ka kasulatan. Pagpili og usa ka tudling sa kasulatan nga sa imong hunahuna makatabang sa mga bata sa imong klase, sama sa Mga Buhat 2:38 o Mga Buhat 3:19, ug tabangi sila sa pagsag-ulo og usa ka pulongan gikan sa kasulatan. Ang biswal nga mga tabang o mga aksiyon makatabang usab sa mga bata nga makasag-ulo sa mga kasulatan.