Day Of Pentecost [Adlaw sa Pagkunsad sa Espiritu Santo], ni Sidney King

Hulyo 3–9

Mga Buhat 1–5

“Kamo Mao Unya ang Akong mga Saksi”

Samtang ikaw magtuon sa Mga Buhat 1–5, ang Espiritu Santo makadasig kanimo sa pagpangita sa mga kamatuoran nga may kalabotan sa imong kinabuhi. Timan-i ang mga bersikulo nga makadani kanimo, ug pangita og mga oportunidad sa pagpakigbahin unsay imong nakat-onan.

I-rekord ang Imong mga Panghunahuna

Natingala ba ikaw kon unsa kaha ang gihunahuna ug gibati ni Pedro sa dihang siya, kauban sa ubang Apostoles, “nanagtutok pa sila sa langit” samtang si Jesus mikayab ngadto sa Iyang Amahan? (Mga Buhat 1:10). Ang Simbahan nga gitukod sa Anak sa Dios sa karon anaa sa pag-atiman ni Pedro. Ang buluhaton sa paggiya sa paningkamot sa “paghimo nga tinun-an sa tanang kanasuran” karon gibilin diha kaniya (Mateo 28:19). Apan kon mibati siya nga dili angay o nahadlok, dili nato makita ang ebidensya niana diha sa basahon sa Mga Buhat. Unsay atong makaplagan mao ang mga ehemplo sa walay kahadlok nga pagpamatuod ug pagkakabig, milagroso nga mga pagpang-ayo, espirituhanong mga pagpakita ug makahuluganong pagtubo sa Simbahan. Kini sa gihapon Simbahan sa Manluluwas, sa gihapon gipangulohan Niya. Sa tinuod, ang basahon sa Mga Buhat sa Apostoles mahimo usab nga tawgon og Mga Buhat ni Jesukristo pinaagi sa Iyang apostoles. Gigiyahan pinaagi sa pagbu-bu sa Espiritu, si Pedro dili na ang walay edukasyon nga mangingisda nga nakaplagan ni Jesus diha sa mga kabaybayonan sa Dagat sa Galilea. Ni siya ang magul-anon nga tawo kinsa pipila lamang ka semana ang milabay nagminatay og hilak tungod kay iyang gilimod nga siya nakaila ni Jesus sa Nazaret.

Diha sa basahon sa Mga Buhat, mabasa nimo ang gamhanang padayag mahitungod ni Jesukristo ug sa Iyang ebanghelyo. Makita usab nimo sa unsa nga paagi kana nga ebanghelyo makausab sa mga tawo—lakip kanimo—ngadto sa maisugon nga mga disipulo nga nahibaloan sa Dios nga sila mamahimo.

Mga Ideya alang sa Personal nga Pagtuon sa Kasulatan

Mga Buhat 1:1–8, 15–26; 2:1–42; 4:1–13, 31–33

Si Jesukristo naggiya sa Iyang Simbahan pinaagi sa Espiritu Santo.

Ang basahon sa Mga Buhat nagrekord sa mga paningkamot sa Apostoles sa pagtukod sa Simbahan ni Jesukristo human sa Pagkayab sa Manluluwas. Bisan og si Jesukristo wala na dinhi sa yuta, Siya migiya sa Simbahan pinaagi sa pagpadayag pinaagi sa Espiritu Santo. Hunahunaa kon sa unsa nga paagi ang Espiritu Santo migiya sa bag-ong mga lider sa Simbahan ni Kristo samtang ikaw nagrebyo sa mosunod nga mga tudling: Mga Buhat 1:1–8, 15–26; 2:1–42; 4:1–13, 31–33.

Isip mga miyembro sa Simbahan ni Kristo karon, kita tagsa-tagsa adunay responsibilidad sa pag-apil diha sa buhat sa kaluwasan ug kahimayaan––sa pagpuyo sa ebanghelyo ni Jesukristo, pag-atiman niadtong nanginahanglan, pagdapit sa uban sa pagduol ngadto ni Kristo, ug sa paghiusa sa pamilya alang sa kahangturan (tan-awa sa Kinatibuk-ang Tamdanan nga Basahon, 1.2). Unsay imong makat-onan gikan niining unang Apostoles mahitungod kon sa unsa nga paagi ikaw makasalig sa Espiritu Santo sa paggiya sa imong mga paningkamot?

Tan-awa usab sa Giya ngadto sa mga Kasulatan, “Espiritu Santo.”

Mga Buhat 2:36–47; 3:12–21

Ang unang mga baroganan ug mga ordinansa sa ebanghelyo nagtabang kanako nga moduol ngadto ni Kristo.

Gibati na ba nimo nga “sakitan ang [imong] kasingkasing,” sama sa mga Judeo diha sa adlaw sa Pentecostes? (Mga Buhat 2:37). Tingali ikaw adunay nabuhat nga imong gibasulan, o tingali gusto lamang nimo nga usbon ang imong kinabuhi. Unsay angay nimong buhaton kon ikaw aduna niini nga mga pagbati? Ang tambag ni Pedro ngadto sa mga Judeo makita sa Mga Buhat 2:38. Timan-i nga ang unang mga baroganan ug mga ordinansa sa ebanghelyo (lakip sa hugot nga pagtuo, paghinulsol, bunyag, ug gasa sa Espiritu Santo—o unsa usahay gipasabot nga ang doktrina ni Kristo) nakaapekto niini nga mga kinabig, ingon nga girekord sumala sa Mga Buhat 2:37–47.

Tingali nabunyagan na ikaw ug nakadawat sa gasa sa Espiritu Santo, mao nga unsaon nimo sa pagpadayon sa paggamit sa doktrina ni Kristo? Hunahunaa kining mga pulong gikan ni Elder Dale G. Renlund: “Kita mahingpit sa pagbalik-balik… nga mopakita og hugot nga pagtuo diha ni [Kristo], maghinulsol, moambit sa sakramento sa pagbag-o sa mga pakigsaad ug mga panalangin sa bunyag, ug pagdawat sa Espiritu Santo isip kanunay nga kauban. Kon buhaton nato kini, mas mahisama kita kang Kristo ug makalahutay sa katap[o]san” (Ang mga Santos sa Ulahing mga Adlaw Magpadayon sa Pagpaningkamot,” Liahona, Mayo 2015, 56–57).

Mga Buhat 3:19–21

Unsa ang “panahon sa kahayahay” ug “ang panahon sa pag-uli sa tanang mga butang”?

“Ang panahon sa kahayahay” nagpasabot sa Milenyum, sa higayon nga si Jesukristo mobalik sa yuta. “Ang mga pulong nga panahon sa pag-uli sa tanang butang” nagpasabot sa Pagpahiuli sa ebanghelyo, nga nag-andam sa kalibotan alang sa Milenyum.

Mga Buhat 3; 4:1–31; 5:12–42

Ang mga disipulo ni Jesukristo gihatagan og gahom sa pagpahigayon og mga milagro diha sa Iyang ngalan.

Ang bakol nga tawo naglaom nga makadawat og kwarta gikan niadtong kinsa mianha sa templo. Apan ang mga sulugoon sa Ginoo mitanyag kaniya og mas daghan pa. Samtang ikaw magbasa sa Mga Buhat 3; 4:1–31 ug 5:12–42, hunahunaa sa unsa nga paagi nga ang milagro nga misunod miapekto niini nga mga tawo:

• Ang bakol nga tawo

• Pedro ug Juan

• Ang mga saksi diha sa templo

• Ang mga labawng sacerdote ug mga tigmando

• Ubang mga Santos

Such as I Have I Give Thee [Ingon nga Ako Aduna Hatagan Ko Ikaw], ni Walter Rane

Mga Ideya alang sa Pamilya nga Pagtuon sa Kasulatan ug Home Evening

Mga Buhat 1:21–26.Ang pagbasa sa Mga Buhat 1:21–26 makatabang sa imong pamilya sa paghisgot sa mga panalangin nga moabot gikan sa pagbaton og Apostoles dinhi sa yuta karon. Ang mga sakop sa pamilya makapaambit kon giunsa nila pagbaton og usa ka saksi nga ang mga apostoles ug mga propeta karon gitawag sa Dios. Nganong ang pagbaton niini nga saksi mahiunungdanon?

Mga Buhat 2:37.Unsa ang kahulogan sa hugpong sa mga pulong “gisakitan sila sa kasingkasing”? Kanus-a kita mibati og susama? Ngano nga importante nga moingon, “Unsa ang atong buhaton?” kon kita aduna sa maong mga pagbati?

Mga Buhat 3:1–10.Tingali malingaw ang imong pamilya sa pag-aksyon sa istorya niini nga mga bersikulo. O makatan-aw kamo sa video “Peter and John Heal a Man Crippled Since Birth” (ChurchogJesusChrist.org). Sa unsa nga paagi nga ang tawo diha sa templo napanalanginan sa lahi nga paagi kay sa iyang gipaabot? Sa unsa nga paagi atong nakita ang mga panalangin sa Langitnong Amahan nga miabot kanato sa wala damha nga mga paagi?

Mga Buhat 3:12–26; 4:1–21; 5:12–42.Unsa ang nakapadani kanimo mahitungod sa pagkamatinud-anon ni Pedro ug Juan? (tan-awa usab ang video “Peter Preaches and Is Arrested” sa ChurchofJesusChrist.org). Sa unsa nga paagi kita magmaisugon sa atong pagpamatuod ni Jesukristo? Hunahunaa ang pagtabang sa gagmay nga mga bata pagbansay sa pakigbahin sa ilang mga pagpamatuod.

Mga Buhat 4:31–5:4.Unsaon nga makatabang kita sa atong pamilya, ward, o komunidad nga mahimong mas sama sa unsay gihulagway sa Mga Buhat 4:31–37? Unsa ang buot ipasabot nga mahimong “usa sa kasingkasing ug usa sa hunahuna”? Sa unsa nga mga paagi usahay kita “[motipig] og balik kabahin” sa atong amot? Ngano nga ang pagbuhat niana sama sa “[pagpamakak] ngadto sa Dios”? (Mga Buhat 5:2, 4). Sa unsa nga paagi nga ang pagkalimbongan makaapekto kanato sa espirituhanong paagi?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Paggiyaha ang Espiritu,” Mga Himno, nu. 85.

Pagpalambo sa Atong Pagtudlo

Pagpili og usa ka hisgotanan. Papuli-puliha ang mga sakop sa pamilya sa pagpili og hisgotanan gikan sa Mga Buhat 1–5 nga tun-an og dungan.

The Ascencion [Ang Pagkayab], ni Harry Anderson