Conversion on the Way to Damascus [Pagkakabig Padulong ngadto sa Damascus], ni Michaelangelo Merisi da Caravaggio

Hulyo 10–16

Mga Buhat 6–9

“Unsa ang Buot Nimong Ipabuhat Kanako?”

Pagsugod pinaagi sa pagbasa sa Mga Buhat 6–9. Ang mga sugyot niini nga latid makatabang kanimo sa pag-ila sa pipila sa importante nga mga baroganan niini nga mga kapitulo, bisan og ikaw makakita sa uban diha sa imong kaugalingong pagtuon.

I-rekord ang Imong mga Panghunahuna

Kon adunay ingon og dili maayo nga kandidato sa pagkakabig, tingali kini mao si Saulo—usa ka Pariseo kinsa nabantog sa pagpanggukod sa mga Kristiyano. Mao nga sa dihang ang Ginoo misugo sa usa ka disipulo nga ginganlan og Ananias sa pagpangita ni Saulo ug motanyag kaniya og panalangin, masabtan nga si Ananias nagdumili. “Ginoo,” miingon siya, “Nakadungog ako gikan sa daghan mahitungod niining tawhana, unsa kadako sa kadaot ang iyang nahimo sa imong mga balaan” (Mga Buhat 9:13). Apan ang Ginoo nakahibalo sa kasingkasing ni Saulo ug sa iyang kalagmitan, ug Siya naghunahuna og misyon alang ni Saulo: “Siya pinili nga galamiton ko sa pagdala sa akong ngalan sa atubangan sa mga Hentil ug sa mga hari ug sa mga anak sa Israel” (Mga Buhat 9:15). Mao nga misunod si Ananias, ug sa dihang iyang nakit-an kining kanhi tigpanggukod, gitawag niya kini og “Igsoong Saulo” (Mga Buhat 9:17). Kon si Saulo mahimong hingpit nga mausab ug si Ananias gawasnon kaayong makaabiabi kaniya, nan moisip ba kita ni bisan kinsa nga dili kandidato alang sa kausaban—lakip sa atong kaugalingon?

Mga Ideya alang sa Personal nga Pagtuon sa Kasulatan

Mga Buhat 6–8

Ang akong kasingkasing kinahanglan nga “matarong sa atubangan sa Dios.”

Ang nagtubo nga simbahan nagpasabot sa nagtubo nga panginahanglan alang sa mga tinun-an sa pagserbisyo diha sa gingharian. Sumala sa Mga Buhat 6:1–5, unsa nga mga hiyas ang gipangita sa Napulog Duha ka Apostoles alang niadtong kinsa moserbisyo uban kanila? Samtang ikaw magbasa sa Mga Buhat 6–8, hinumdomi kon sa unsa nga paagi kini nga mga hiyas, ug ang uban, nakita diha sa mga tawo sama nila ni Esteban ug Felipe. Unsa ang kulang ni Simon, ug unsay atong makat-onan gikan kaniya mahitungod sa pagkaandam sa pag-usab?

Aduna bay bisan unsa ka nadasig sa pag-usab aron sa pagsiguro nga ang imong kasingkasing “matarong sa atubangan sa Dios”? (Mga Buhat 8:21–22). Sa unsa nga paagi nga ang paghimo niini nga kausaban nagpanalangin kanimo samtang nagserbisyo ka sa Dios?

Mga Buhat 6–7

Ang pagbatok sa Espiritu Santo makagiya ngadto sa pagsalikway sa Manluluwas ug sa Iyang mga sulugoon.

Ang mga lider nga Judeo mga responsable alang sa pag-andam sa mga tawo alang sa pag-abot sa Mesiyas. Ug gani sila napakyas sa pag-ila sa Mesiyas ug misalikway Kaniya. Sa unsa nga paagi kini nahitabo? Kabahin sa tubag mahimong makaplagan diha sa mga pulong ni Esteban: “Kanunay gay[o]d kamong nagapakigbatok sa Espiritu Santo” (Mga Buhat 7:51). Unsa kaha ang gipasabot sa pagpakigbatok sa Espiritu Santo? Ngano nga ang pagpakigbatok sa Espiritu Santo mogiya ngadto sa pagsalikway sa Manluluwas ug sa Iyang mga sulugoon?

Samtang magbasa ka sa Mga Buhat 6–7, pangitaa ang ubang mga mensahe nga gitudlo ni Esteban sa mga Judeo. Unsa nga mga kinaiya ang iyang gipasidaan nga dili maayo? Nakamatikod ba ikaw og bisan unsang pagkasusama nga mga kinaiya diha sa imong kaugalingon? Unsa ang gitudlo sa mga pulong ni Esteban kanimo mahitungod sa mga sangputanan sa pagpakigbatok sa Espiritu Santo? Unsaon nimo nga mas masensitibo ug masulundon sa mga pag-aghat sa Espiritu Santo sa imong kinabuhi?

Tan-awa usab ang “The Martyrdom of Stephen” (video), ChurchofJesusChrist.org.

Mga Buhat 8:26–39

Ang Espiritu Santo motabang kanako nga mogiya sa uban ngadto ni Jesukristo.

Unsay imong nakat-onan mahitungod sa pagpakigbahin sa ebanghelyo gikan sa istorya sa Mga Buhat 8:26–39? Giunsa pagtabang sa Espiritu Santo si Felipe? Sa unsa nga paagi nga ang pagpakigbahin sa ebanghelyo ngadto sa uban sama sa usa ka giya? (tan-awa sa Mga Buhat 8:31).

Miingon si Elder Ulisses Soares nga kini nga istorya “usa ka pahinumdom sa balaanong sugo alang kanato nga magtinguha nga makakat-on ug makatudlo sa usag usa sa ebanghelyo ni Jesukristo. … Usahay susama kita sa Etiopiahanon––nagkinahanglan kita sa tabang sa usa ka matinud-anon ug dinasig nga magtutudlo; ug usahay susama kita ni Felipe––kinahanglan kitang motudlo ug molig-on sa uban diha sa ilang pagkakabig” (“Unsaon Nako Pagkasab[o]t?,” Liahona, Mayo 2019, 6). Hunahunaa ang pagbasa sa nahibilin nga mensahe ni Elder Soares ug sa pagpamalandong kon unsaon sa Espiritu Santo nga makatabang kanimo nga mahimong mas maayong tigkat-on ug magtutudlo sa ebanghelyo.

Mga Buhat 9

Kon ako motugyan ngadto sa kabubut-on sa Ginoo, mahimo akong usa ka instrumento sa Iyang mga kamot.

Ang pagkakabig ni Saulo ingon og kalit kaayo; siya nagdali gikan sa pagpabilanggo sa mga Kristiyano ngadto sa pagsangyaw mahitungod ni Kristo diha sa mga sinagoga. Samtang magbasa ka sa iyang istorya, palandonga ngano nga siya andam nga mag-usab. (Aron mabasa ang kaugalingong paghulagway ni Saulo sa iyang pagkakabig, tan-awa sa Mga Buhat 22:1–16 ug 26:9–18. Timan-i nga dinhi niini nga mga asoy si Saulo ginganlan na og Pablo [tan-awa sa Mga Buhat 13:9].)

Samtang tinuod nga ang kasinatian ni Saulo dili kasagaran—kay kasagaran sa mga tawo, ang pagkakabig usa ka taas kaayo nga proseso—ikaw ba adunay makat-onan gikan ni Saulo mahitungod sa pagkakabig? Unsay imong makat-onan sa reaksyon ni Ananias ug sa ubang mga disipulo sa pagkakabig ni Saulo? Unsay imong buhaton sa paggamit niini nga mga leksiyon diha sa imong kinabuhi? Mahimong sugdan nimo pinaagi sa pag-ampo, sama sa gibuhat ni Saulo, “Unsa ang buot nimo nga ipabuhat kanako?”

Samtang ikaw magbasa sa Mga Buhat 9:36–42, hunahunaa kon sa unsa nga paagi nahimo si Tabita nga usa ka instrumento diha sa mga kamot sa Dios. Unsay nakapadasig kanimo mahitungod sa iyang ehemplo?

Tan-awa usab sa Dieter F. Uchtdorf, “Naghulat diha sa Dalan sa Damasco,” Liahona, Mayo 2011, 70–77; “The Road to Damascus” (video), ChurchofJesusChrist.org.

Mga Ideya alang sa Pamilya nga Pagtuon sa Kasulatan ug Home Evening

Mga Buhat 6:8; 7:51–60.Itandi ang mga istorya ni Esteban diha sa Mga Buhat 6:8 ug Mga Buhat 7:51–60 ngadto sa mga istorya sa Manluluwas sa Lucas 23:1–46. Giunsa ni Esteban pagsunod ang ehemplo sa Manluluwas?

Mga Buhat 7:51–60.Sa unsa nga paagi ang Espiritu Santo mipanalangin ni Esteban sa dihang siya gigukod? Kanus-a kita nakadawat og kalig-on gikan sa Espiritu Santo atol sa malisod nga mga panahon?

Tabitha Arise [Tabita Bangon], ni Sandy Freckleton Gagon

Mga Buhat 9:32–43.Hunahunaa ang pagdapit sa mga sakop sa imong pamilya sa pagdrowing og mga hulagway sa mga istorya sa Mga Buhat 9:32–43. Unsay atong nakat-onan mahitungod sa tinuod nga pagkadisipulo gikan niini nga mga istorya? Unsaon sa usa ka tawo kinsa “daghan og maayong mga binuhatan,” sama ni Tabita, pagtabang sa uban sa pagtuo diha sa Ginoo? (tan-awa sa Mga Buhat 9:36; “Kapitulo 60: Gibuhi ni Pedro og Balik si Tabita” (diha sa Mga Istorya sa Bag-ong Tugon, 156–57, o ang magkatukma nga video diha sa ChurchofJesusChrist.org).

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Moadto Ako Bisan Asa sa Pagbuot Mo,” Mga Himno, nu. 168.

Pagpalambo sa Personal nga Pagtuon

Ipahisama ang mga kasulatan sa imong kinabuhi. Samtang ikaw nagbasa, hunahunaa kon sa unsa nga paagi ang mga istorya ug mga pagtulon-an diha sa mga kasulatan magamit sa imong kinabuhi. Sama pananglit, unsa nga mga oportunidad ikaw aduna sa pagserbisyo sa uban sama sa gibuhat ni Tabita diha sa Mga Buhat 9:36–39?

“Ug ilang gipanagbato si Esteban, ug siya, nagtawag sa Dios, miingon, Ginoong Jesus, dawata ang akong espiritu” (Hubad ni Joseph Smith, Mga Buhat 7:59).