“Hulyo 10–16. Mga Buhat 6–9: ‘Unsa ang Buot Nimong Ipabuhat Kanako?,’” Dali, Sunod Kanako—Alang sa Primary: Bag-ong Tugon 2023 (2022)
“Hulyo 10–16. Mga Buhat 6–9,” Dali, Sunod Kanako—Alang sa Primary: 2023
Conversion on the Way to Damascus [Pagkakabig sa Dalan paingon sa Damascus], ni Michelangelo Merisi da Caravaggio
Hulyo 10–16
Mga Buhat 6–9
“Unsa ang Buot Nimong Ipabuhat Kanako?”
Sugdi pinaagi sa pagbasa sa Mga Buhat 6–9. Ang latid niini nga semana diha sa Dali, Sunod Kanako—Alang sa mga Indibidwal ug mga Pamilya makatabang kanimo sa pagtuon niini nga mga kapitulo. Ang mga kalihokan alang sa gagmayng mga bata niini nga latid mahimo usab nga mapahiangay alang sa mas magulang nga mga bata, ug vice versa.
Dapita ang Pagpaambit
Isulat diha sa pisara ang mga ngalan sa pipila ka tawo nga gikan sa Mga Buhat 6–9, sama ni Saulo, Esteban, ug Tabita. Dapita ang mga bata sa pagpaambit sa bisan unsa nga ilang nahibaloan mahitungod niini nga mga tawo.
Itudlo ang Doktrina: Mas Gagmay nga mga Bata
Makasunod ako ni Jesukristo pinaagi sa pagpanalipod sa matarong.
Unsa ang makat-onan sa mga bata gikan ni Esteban mahitungod sa pagkahimong sumusunod ni Jesukristo?
Posible nga mga Kalihokan
-
Tabangi ang mga bata sa paghimo og mga aksiyon nga mobagay sa usa ka awit kalabot sa pagpili sa matarong, sama sa “Bar[o]gan ang Kamatuoran” (Songbook sa mga Bata, 81). Gamita ang Mga Buhat 7:51–60 aron sa pagtudlo sa mga bata nga si Esteban mitudlo mahitungod ni Jesukristo, bisan og kini nakapasuko pag-ayo sa mga lider nga Judeo (tan-awa usab sa “Kapitulo 57: Da[o]tang mga Tawo Mipatay kang Esteban,” diha sa Mga Istorya sa Bag-ong Tugon, 150–51). Giunsa ni Esteban sa pagbarog alang sa matarong?
-
Hatagi ang mga bata og pipila ka sitwasyon bahin sa mga bata nga kinahanglang mopili tali sa matarong ug sayop. Pangutan-a ang mga bata unsa ang ilang buhaton aron sa pagbarog alang sa matarong.
Ang Espiritu Santo nagdasig kanako sa pagpaambit sa ebanghelyo ngadto sa uban.
Gisunod ni Felipe ang mga pag-aghat sa Espiritu ug gitabangan ang usa ka lalaki nga taga-Etiopia nga naglisod sa pagsabot sa mga kasulatan. Unsa nga mga leksiyon ang makat-onan gikan niini nga istorya alang sa mga bata nga imong gitudloan?
Philip Teaching the Ethiopian [Si Felipe nga Nagtudlo sa Lalaki nga taga-Etiopia], ni Robert T. Barrett
Posible nga mga Kalihokan
-
Itapad ang duha ka lingkoranan aron makahimo og karwahe. Pagdapit og duha ka bata nga molingkod diha sa karwahe, ang usa morepresentar ni Felipe ug ang usa morepresentar sa lalaki nga taga-Etiopia. Dayon isaysay ang istorya kon sa unsang paagi gitudlo ni Felipe ang ebanghelyo ngadto sa lalaki nga gikan sa Etiopia.
-
Pagpaambit og kasinatian diin nabati nimo ang Espiritu Santo nga misulti kanimo nga ipaambit ang ebanghelyo ngadto sa usa ka tawo. Pagpamatuod nga ang Espiritu Santo makatabang kanato sa paghisgot ngadto sa uban mahitungod ni Jesus.
Ang Langitnong Amahan nagdapit kanako nga maghinulsol ug mag-usab.
Sa dihang gisultihan ni Jesus si Saulo sa paghunong sa pagpanglutos sa Simbahan sa Ginoo, si Saulo dihadiha dayon naghinulsol ug nag-usab. Sa unsang paagi kini nga istorya makatabang sa mga bata nga imong gitudloan nga magtinguha nga mag-usab diha dayon kon makahimo sila og sayop?
Posible nga mga Kalihokan
-
I-summarize ang istorya sa pagkakabig ni Saulo, nga makita diha sa Mga Buhat 9:1–20 (tan-awa usab sa “Kapitulo 59: Saulo Nahibalo mahitungod ni Jesus,” diha sa Mga Istorya sa Bag-ong Tugon, 154–55).
-
Hisgoti sa mga bata ang mahitungod sa mga butang nga mausab, sama sa usa ka pitopito, nga mausab ngadto sa usa ka baki, o usa ka caterpillar, nga mausab ngadto sa usa ka alibangbang. Pagpakita og mga litrato, kon mahimo. Sa unsang paagi nga nausab si Saulo sa dihang si Jesukristo mibisita kaniya?
-
Pagdrowing og nagsanga nga dalan diha sa pisara. Dapita ang mga bata sa pagngalan og mga dapit nga gusto nilang bisitahon, ug isulat kini sa ibabaw sa usa ka dalan. Unsa kaha ang mahitabo kon moliko kita ngadto sa sayop nga dalan? Itandi ang paghinulsol ngadto sa pagbalik sa husto nga dalan.
-
Hangyoa ang mga bata sa pagsulti og balik sa unsay gisulti ni Saulo ngadto sa Ginoo: “Unsa ang buot nimong ipabuhat kanako?” (Mga Buhat 9:6). Unsa ang gusto sa Ginoo nga atong buhaton?
Itudlo ang Doktrina: Mas Magulang nga mga Bata
Mahimo akong saksi ni Jesukristo.
Sa unsang paagi nga ikaw makatabang sa mga bata nga imong gitudloan nga makakat-on gikan sa ehemplo ni Esteban nga mobarog isip saksi ni Jesukristo?
Posible nga mga Kalihokan
-
Basaha ang Mga Buhat 6:5–15 ug 7:51–60 ngadto sa mga bata. Unsay nakapahimo ni Esteban nga lig-on kaayo nga saksi ni Jesukristo? Dapita ang usa o dugang pa nga mga bata nga magpakaaron-ingnon nga si Esteban ug mopaambit kon nganong nagtuo sila kang Jesukristo.
-
Dapita ang mga bata sa pagbasa sa Mga Buhat 6:3–10, nga mangita sa mga kinaiya ni Esteban nga nakatabang kaniya nga molambo.
-
Hangyoa ang mga bata sa pagtabang kanimo sa paghunahuna og mga sitwasyon diin makabarog sila isip mga saksi ni Jesukristo ug sa Iyang ebanghelyo. Tabangi sila sa pagdrama-drama sa pipila niini nga mga sitwasyon. Hangyoa ang mga bata sa pagbasa sa Mosiah 18:9. Ipasabot nga ang pagkahimong saksi ni Jesukristo nalakip sa mga saad nga atong himoon sa bunyag.
Ang pagkapari usa ka bililhon kaayo nga gasa gikan sa Dios.
Si Satanas nagpasiugda og mensahe nga ang materyal nga mga butang makahatag kanato og kalipay. Unsaon nimo paggamit sa istorya ni Simon sa pagtabang sa mga bata nga hatagan og bili ang espirituhanon nga mga butang sama sa pagkapari ug ang mga panalangin niini?
Posible nga mga Kalihokan
-
I-summarize ang istorya ni Simon, nga makita diha sa Mga Buhat 8:9–24 (tan-awa usab sa “Kapitulo 58: Simon ug ang [Pagkapari],” diha sa Mga Istorya sa Bag-ong Tugon, 152–53). Nganong dili man nato madawat ang pagkapari pinaagi sa pagpalit niini? Sa unsang paagi nga ang usa ka tawo tinuoray nga makadawat sa awtoridad sa pagkapari? (tan-awa sa Mga Artikulo sa Hugot nga Pagtuo 1:5).
-
Ipakita ang mga hulagway sa sakramento, sa templo (nga nagrepresentar sa mga panalangin sa templo), sa bunyag, ug sa uban pang mga panalangin nga atong madawat pinaagi sa pagkapari. Ipasabot nga kini nga mga gasa nga gikan sa Dios dili mapalit sa kwarta. Nganong mas bililhon pa kini kay sa bisan unsang butang nga atong mapalit? Unsaon nato sa pagdawat niini nga mga panalangin?
Ang Langitnong Amahan nagdapit kanako nga maghinulsol ug mag-usab.
Sa dihang gisultihan ni Jesus si Saulo sa paghunong sa pagpanglutos sa Simbahan sa Ginoo, si Saulo dihadiha dayon naghinulsol ug nag-usab. Sa unsang paagi kini nga istorya makatabang sa mga bata nga imong gitudloan nga magtinguha nga mag-usab diha dayon kon makahimo sila og sayop?
Posible nga mga Kalihokan
-
Dapita ang mga bata nga tungaon pagpilo ang usa ka piraso nga papel. Hangyoa sila sa pagsulat og Sa Wala Pa sa usa nga katunga ug Pagkahuman diha sa pikas nga katunga. Basaha uban sa mga bata ang Mga Buhat 8:1–3; 9:1–2; ug 9:17–22, ug hangyoa sila sa pagsulat sa mga pulong o mga pulongan nga naghulagway ni Saulo sa wala pa ug pagkahuman niya nakita ang Ginoo.
-
Dapita ang usa ka miyembro sa ward sa pagpaambit sa iyang istorya sa pagkakabig ug sa unsang paagi ang pagkamiyembro sa Simbahan nakapausab sa iyang kinabuhi, sama nga nausab ang kinabuhi ni Saulo.
-
Pagdrowing og “dalan padulong sa Damasco” diha sa pisara. Dapita ang mga bata sa pagbasa sa Mga Buhat 9:6, 11, 18, 20–22, nga mangita kon unsay gibuhat ni Saulo aron maghinulsol ug modangop ngadto ni Kristo, ug isulat kini nga mga buhat diha sa dalan. Unsa ang atong makat-onan gikan ni Saulo mahitungod kon unsaon nato nga mahimong mas sama ni Kristo?
-
Dapita ang mga bata sa pagdrowing sa ilang paborito nga bahin sa istorya sa pagkakabig ni Saulo ug sa pagpaambit sa ilang drowing diha sa klase.
Awhaga ang Pagkat-on diha sa Panimalay
Awhaga ang mga bata sa pagsulti ngadto sa ilang pamilya mahitungod sa ilang paborito nga kalihokan sa klase karon ug unsa ang gitudlo niini kanila.
Pagpalambo sa Atong Pagtudlo
Tabangi ang mga bata sa pagkat-on gikan sa mga kasulatan. Ang gagmayng mga bata tingali dili pa kaayo makabasa, apan mahimo gihapon nimo silang ilakip diha sa pagkat-on gikan sa mga kasulatan. Sama pananglit, mahimo nimong basahon ang usa ka tudling ug dapiton sila sa pagbarog o pagpataas sa ilang kamot kon madungog nila ang piho nga pulong o pulongan nga gusto nimong tutokan.