Si Jesus nga nakig-istorya kang Pedro sa may baybayon

Feed My Sheep [Atimana ang Akong mga Karnero], ni Kamille Corry

Hunyo 26–Hulyo 2

Mateo 28; Marcos 16; Lucas 24; Juan 20–21

“Nabanhaw Siya”

Ang mga bata nga adunay pagpamatuod sa mga kamatuoran niini nga mga kapitulo adunay lig-on nga pundasyon nga matukoran sa ilang hugot nga pagtuo. Unsaon nimo sa pagdapit ang Espiritu sa pagpamatuod niini nga mga kamatuoran?

pagpaambit nga icon

Dapita ang Pagpaambit

Ang pagkakita og hulagway makatabang sa mga bata sa paghinumdom sa mga butang nga ilang nakat-onan sa panimalay o sa ubang mga sitwasyon. Tingali mapakita nimo ang hulagway diha sa latid niini nga semana sa Dali, Sunod Kanako—Alang sa mga Indibidwal ug mga Pamilya ug hangyoa ang mga bata sa pagpaambit sa unsay ilang nahibaloan mahitungod sa istorya nga gipakita diha sa hulagway.

pagtudlo nga icon

Itudlo ang Doktrina: Mas Gagmay nga mga Bata

Mateo 28; Marcos 16; Lucas 24; Juan 20:1–23

Mabuhi ako pag-usab human sa akong kamatayon, sama ni Jesus.

Ang Pag-ula ni Jesukristo, lakip sa Iyang Pagkabanhaw, mao ang labing importante nga panghitabo sa kasaysayan, ug mao kini ang pundasyon sa Kristiyano nga tinuohan. Samtang magbasa ka mahitungod sa Pagkabanhaw, pamalandongi kon unsaon nimo pagtabang ang mga bata sa paglig-on sa ilang hugot nga pagtuo kang Jesukristo.

Posible nga mga Kalihokan

• Isaysay ang istorya sa Pagkabanhaw ni Jesus sa imong kaugalingong mga pulong. (Kon gikinahanglan, gamita ang “Kapitulo 54: [Si] Jesus Nabanhaw,” diha sa Mga Istorya sa Bag-ong Tugon, 139–44.) Ipasabot nga sa dihang namatay si Jesus, ang Iyang espiritu mibiya sa Iyang lawas. Sa dihang nabanhaw Siya, ang Iyang espiritu ug ang Iyang lawas nahiusa pag-usab. Hangyoa ang mga bata nga magpuli-puli sa pagsaysay og balik sa istorya nganha kanimo. Pangutan-a ang mga bata kon unsa kahay ilang bation kon nakakita sila ni Jesus nga nabuhi pag-usab.

• Ipaambit ang imong pagpamatuod nga ang tanan mabanhaw ugma damlag. Dapita ang mga bata sa pagpaambit sa ilang mga pagpamatuod.

• Kantaha ang usa ka awit mahitungod sa Pagkabanhaw sa Manluluwas, sama sa “Nabuhi ba Gay[o]d Pag-usab si Jesus?” (Songbook sa mga Bata, 45). Hangyoa ang mga bata sa paghunahuna kon daw unsa kaha ang bation nga makakita ni Jesus. Ipaambit nila ang ilang mga hunahuna diha sa klase.

Juan 20:24–29

Makabaton ako og hugot nga pagtuo kang Jesukristo bisan og dili ako makakita Kaniya.

Hunahunaa kon sa unsang paagi nimo matabangan ang mga bata nga makasabot kon unsa ang hugot nga pagtuo ug unsaon nila sa pagpakita og hugot nga pagtuo sa Manluluwas.

Posible nga mga Kalihokan

• Sultihi ang mga bata mahitungod sa kasinatian ni Tomas diha sa Juan 20:24–29. Sublia ang istorya, apan niining higayona hangyoa ang mga bata sa paghatag og pipila sa mga detalye.

• Ipakita ang usa ka kahon nga adunay butang sa sulod nga dili makita sa mga bata, ug ihulagway ang butang ngadto sa mga bata. Pangutan-a sila kon motuo ba sila nga ang butang anaa ba gayod sa sulod sa kahon ug ngano. Dayon ipakita kanila ang butang, ug ipasabot nga ang hugot nga pagtuo mao ang pagtuo sa mga butang nga dili nato makita. Ang labing importante nga hugot nga pagtuo nga atong mabatonan mao ang hugot nga pagtuo diha ni Jesukristo.

Si Jesus nga nagpakita sa mga kamot ngadto sa Apostoles

Behold My Hands [Tan-awa ang Akong mga Kamot], ni Jeff Ward

Juan 21:15–17

Makapakita ako sa akong gugma kang Jesus pinaagi sa pagserbisyo sa uban.

Unsaon nimo pagdasig ang mga bata nga mohigugma ug motabang niadtong naglibot kanila?

Posible nga mga Kalihokan

• Tabangi ang mga bata nga makasabot sa unsay gusto ni Jesus nga buhaton ni Pedro: ipaambit ang ebanghelyo ug dapiton ang tanan nga motuo kang Jesus. Hatagi ang matag bata og papel nga karnero, ug hangyoa sila sa pagsulat o pagdrowing diha niini og usa ka butang nga ilang mabuhat aron sa pagtabang sa usa ka tawo nga ilang kaila nga mas mopaduol kang Jesus.

• Tabangi ang mga bata sa paghunahuna og mga butang nga ilang gibuhat sa paghigugma ug pagserbisyo sa uban. Unsa pay atong mabuhat aron sa pagpakita sa atong gugma?

• Isulat ang ngalan sa matag bata sa imong klase diha sa mga piraso sa papel nga giporma nga karnero, ug ikatag kini nga mga karnero palibot sa lawak. (Ilakip ang mga ngalan sa mga bata kinsa dili motambong kanunay.) Dapita ang mga bata sa pagpundok sa mga karnero pinaagi sa pagpangita sa usa nga nakasulat ang ilang ngalan. Tabangi ang mga bata sa paghunahuna og mga paagi nga makatabang sila sa usa ka higala nga wala nagsimba.

pagtudlo nga icon

Itudlo ang Doktrina: Mas Magulang nga mga Bata

Mateo 28; Marcos 16; Lucas 24; Juan 20:1–23

Tungod kay nabanhaw si Jesus, ang tanan mabanhaw.

Natural lamang sa mga bata nga maghunahuna kon unsay mahitabo human kita mamatay. Hunahunaa kon unsaon nimo sa pagtudlo mahitungod sa Pagkabanhaw sa paagi nga makapalig-on sa ilang hugot nga pagtuo.

Posible nga mga Kalihokan

• Dapita ang mga bata sa pagpiyong sa ilang mga mata ug sa paghanduraw nga naglingkod sila duol sa lubnganan ni Jesus samtang imong basahon ang Juan 20:1–17 o i-summarize ang istorya bahin sa Iyang Pagkabanhaw (tan-awa usab sa “Kapitulo 54: [Si] Jesus Nabanhaw,” sa Mga Istorya sa Bag-ong Tugon, 139–44). Unsay buot ipasabot nga mabanhaw? Unsa kaha ang pagbati nga makakita sa nabanhaw nga Manluluwas?

• Hangyoa ang matag bata sa pagtuon sa kasinatian sa usa ka tawo kinsa nakakita sa nabanhaw nga Manluluwas ug sa pagpaambit diha sa klase kon unsay iyang nakat-onan.

• Dapita ang mga bata sa pagpaambit kon nganong importante kanila ang Pagkabanhaw sa Manluluwas.

Juan 20:24–29

Makabaton ako og hugot nga pagtuo kang Jesukristo bisan og dili ako makakita Kaniya.

Unsaon nimo pagtabang ang mga bata nga mapalig-on ang ilang hugot nga pagtuo kang Jesukristo?

Posible nga mga Kalihokan

• Dapita ang mga bata sa pagbasa sa Juan 20:24–29. Sa unsang paagi nga kita makahibalo nga buhi si Jesukristo, bisan kon dili kita makakita Kaniya?

• Isulat ang matag pulong sa pulongan nga “Bulahan kadtong motuo bisan wala makakita” sa managlahi nga mga piraso sa papel. Dapita ang mga bata sa pagbutang sa mga pulong diha sa tukma nga han-ay. Dapita sila sa pagsulti og mga kasinatian diin gibati nila ang gugma sa Manluluwas bisan kon wala sila makakita Kaniya.

• Dapita ang mga bata sa pagdrowing og mga hulagway sa mga butang nga ilang mahimo aron sa paglig-on sa ilang hugot nga pagtuo niini nga semana. Hangyoa sila sa pagpaambit sa unsay ilang gidrowing, ug ipaambit unsay imong gibuhat aron sa paglig-on sa imong hugot nga pagtuo kang Jesukristo.

Juan 21:1–17

Akong mapakita ang akong gugma kang Jesus pinaagi sa pag-atiman sa Iyang mga karnero.

Ang mga bata makaimpluwensiya gayod niadtong naglibot kanila. Unsaon nimo sila sa pag-awhag nga lig-onon ang uban diha sa ebanghelyo?

Posible nga mga Kalihokan

• Basaha og dungan ang Juan 21:1–17. Sa dihang imong basahon ang mga bersikulo 9–13, hangyoa ang mga bata sa paghunahuna mahitungod sa usa ka higayon sa dihang ang usa ka tawo nagluto og espesyal nga pagkaon alang kanila, ug dapita sila sa paghunahuna bahin sa mga paagi nga si Jesus mopakaon kanato sa espirituhanon nga paagi. Kon magbasa ka sa mga bersikulo 15–17, pulihi ang ngalan ni Simon sa mga ngalan sa mga bata. Kinsa ang mga karnero ni Jesus? Unsaon nato sa pagtabang Kaniya sa pag-atiman kanila?

• Ipakigbahin ang usa ka yano nga matimo [snack] ngadto sa mga bata. Samtang nangaon sila, pangutan-a sila kon sa unsang paagi ang pagpaambit sa ebanghelyo sa usa ka tawo susama sa pagpakaon kanila.

pagkat-on nga icon

Awhaga ang Pagkat-on diha sa Panimalay

Dapita ang mga bata sa paggamit sa pahina sa kalihokan niini nga semana aron sa pagtudlo sa ilang mga pamilya mahitungod sa Pagkabanhaw sa Manluluwas.

Pagpalambo sa Atong Pagtudlo

I-follow up ang mga pagdapit sa paglihok. Kon imong dapiton ang mga bata sa paglihok sa unsay ilang nakat-onan, i-follow up ang imong pagdapit atol sa sunod nga klase. Nagpakita kini sa mga bata nga ikaw nagpakabana mahitungod kon sa unsang paagi nga ang ebanghelyo nagpanalangin sa ilang mga kinabuhi. Samtang nagpaambit sila sa ilang mga kasinatian, malig-on sila ug motabang sa usag usa sa pagsunod sa ebanghelyo.

pahina sa kalihokan: tungod kay nabanhaw si Jesus, ang tanan mabanhaw