Ecce Homo [Ania Siya], ni Antonio Ciseri

Hunyo 19–25

Mateo 27; Marcos 15; Lucas 23; Juan 19

“Natapos Na”

Sugdi ang imong pagpangandam pinaagi sa pagbasa sa Mateo 27; Marcos 15; Lucas 23; ug Juan 19. Tinguhaa sa mainampoong paagi nga makasabot sa mga panginahanglan sa mga bata.

Dapita ang Pagpaambit

Papuli-puliha ang matag bata sa paggunit sa hulagway gikan sa latid niini nga semana diha sa Dali, Sunod Kanako—Alang sa mga Indibidwal ug mga Pamilya. Samtang naggunit sa hulagway, ang matag bata mahimong mopaambit og usa ka butang nga iyang nakita diha sa hulagway.

Itudlo ang Doktrina: Mas Gagmay nga mga Bata

Mateo 27:11–66; Lucas 23; Juan 19

Tungod kay si Jesus namatay alang kanako, ako mabanhaw.

Ang gagmay nga mga bata tingali maguol sa mga istorya sa Paglansang ni Jesus. Ang “Kapitulo 52: Ang mga Husay ni Jesus” ug “Kapitulo 53: [Si] Jesus Gilansang sa Krus” (diha sa Mga Istorya sa Bag-ong Tugon, 133–38,) naghatag og maayo nga ehemplo kon unsaon nimo nga tukmang mapaambit kini nga istorya ngadto kanila.

Posible nga mga Kalihokan

• Ipakita ang hulagway diha sa latid niini nga semana sa Dali, Sunod Kanako—Alang sa mga Indibidwal ug mga Pamilya samtang imong isaysay ang mahitungod sa husay, Paglansang, ug paglubong ni Jesus (tan-awa usab sa Libro sa mga Hulagway sa Ebanghelyo, mga nu. 57–58). Dapita ang mga bata sa pagpaambit sa unsay ilang nahibaloan mahitungod niini nga mga hitabo. Ipasabot og maayo nga sa ikatulo nga adlaw, si Jesus nabanhaw. Sa ato pa, Siya nabuhi pag-usab.

• Hangyoa ang mga bata sa pagngalan og pipila ka butang nga gihimo sa ilang mga ginikanan alang kanila nga dili nila mahimo sa ilang kaugalingon. Ipakita ang usa ka hulagway sa Manluluwas. Ipasabot nga tungod ni Jesus, kita mabanhaw—usa ka butang nga dili nato mahimo sa atong kaugalingon.

• Ipakita ang litrato sa usa ka tawo nga imong kaila nga namatay. Ipaambit ang imong pagpamatuod nga tungod ni Jesus kana nga tawo mabuhi pag-usab ugma damlag.

The Burial [Ang Paglubong], ni Carl Heinrich Bloch

Mateo 27:26–37; Lucas 23:34

Makapasaylo ako sa uban sama sa gibuhat ni Jesus.

Unsaon nimo pagtabang ang mga bata nga makasabot kon unsaon sa pagpasaylo niadtong mga dili mabination, sama sa gibuhat ni Jesus?

Posible nga mga Kalihokan

• Ihulagway kon sa unsang paagi nga ang mga sundalo dili mabination ngadto ni Jesus (tan-awa sa Mateo 27:26–37), ug dayon basaha ang Lucas 23:34. Ipasabot nga kon gipasaylo nato ang uban, wala na kita masuko kanila ug mopakita kita og gugma ngadto kanila.

• Pagpaambit og mga ehemplo diin ang usa ka tawo adunay gisulti o gibuhat nga dili mabination. Dapita ang mga bata sa paghisgot kon unsaon nila sa pagpakita og pagpasaylo niini nga mga sitwasyon.

• Kantaha og dungan ang usa ka awit mahitungod sa pagpasaylo, sama sa “Tabangi Ko, Mahal nga Amahan” (Songbook sa mga Bata, 52). Pangutana og mga butang nga natubag diha sa awit, sama sa “Kinsa ang kinahanglan natong pasayloon?” o “Kinsa ang makatabang kanato kon lisod ang pagpasaylo?”

• Siksika ang bag-ong isyu sa Higala aron mangita og istorya mahitungod sa usa ka bata kinsa mipasaylo sa usa ka tawo. Ipaambit kini nga istorya ngadto sa mga bata.

Lucas 23:32–33, 39–43

Tungod kay si Jesus nag-antos ug namatay alang kanako, makahinulsol ako ug mapasaylo.

Bisan og ang ubos sa otso anyos nga mga bata wala pay tulubagon, importante nga sugdan na nila karon ang pagkat-on unsaon sa paghinulsol sa sayop nga mga pagpili nga ilang nahimo.

Posible nga mga Kalihokan

• I-summarize ang Lucas 23:32–33, 39–43, ug tabangi ang mga bata nga makit-an ang duha ka kawatan diha sa hulagway 57 sa Libro sa mga Hulagway sa Ebanghelyo. Ipasabot nga sa dihang ang unang kawatan mibugalbugal ni Jesus, ang ikaduhang kawatan miangkon nga nakahimo siya og sayop—misugod na siya sa paghinulsol.

• Basaha ang Doktrina ug mga Pakigsaad 19:16 ngadto sa mga bata. Nganong nag-antos man si Jesus alang kanato?

• Ipasabot nga mahimo kitang mag-ampo sa Langitnong Amahan ug Siya makatabang kanato nga matul-id ang atong mga sala ug mga sayop ug makadawat og kapasayloan.

• Pahimoa ang mga bata og mga marka sa chalk diha sa pisara aron morepresentar sa sayop nga mga pagpili. Dayon hangyoa sila sa pagpapas sa pisara aron sa pagrepresentar sa paghinulsol. Ipakita ang usa ka hulagway sa Manluluwas, ug pagpamatuod nga makahinulsol kita tungod Kaniya.

Itudlo ang Doktrina: Mas Magulang nga mga Bata

Mateo 27:11–66; Lucas 23; Juan 19

Si Jesus namatay alang kanako tungod kay nahigugma Siya kanako.

Nganong mapasalamaton man ka nga si Jesukristo namatay alang kanimo? Hunahunaa kon unsaon nimo nga matabangan ang mga bata nga makasabot sa kamahinungdanon sa sakripisyo sa Manluluwas alang kanila.

Posible nga mga Kalihokan

• Isulat ang importante nga mga panghitabo gikan sa Mateo 27:11–66 sa managlahi nga mga piraso sa papel (alang sa tabang sa pagbuhat niini, tan-awa sa “Kapitulo 52: Ang mga Husay ni Jesus” ug “Kapitulo 53: [Si] Jesus Gilansang sa Krus,” diha sa Mga Istorya sa Bag-ong Tugon, 133–38). Dapita ang mga bata sa pagtuon niini nga mga bersikulo ug sa pagbutang sa mga panghitabo sa tukma nga han-ay.

• Hangyoa ang usa ka bata sa pagbasa sa Mateo 27:54, ug dapita ang mga bata sa pagpaambit sa mga butang mahitungod ni Jesus nga nakatabang kanila nga masayod nga Siya mao ang Anak sa Dios.

• Pangutan-a ang mga bata kon unsay ilang nakat-onan mahitungod sa Paglansang gikan sa “Ang Manunubos Sud-onga” (Mga Himno, nu. 112) o laing himno sa sakramento. Nganong andam man si Jesus nga mag-antos alang kanato? (tan-awa sa Doktrina ug mga Pakigsaad 18:10–11; 19:16).

Mateo 27:26–37; Lucas 23:34

Makapasaylo ako sa uban sama sa gibuhat ni Jesus.

Mahimong lisod ang pagpasaylo sa uban. Ang mga bata nga imong gitudloan mapanalanginan samtang mosunod sila sa ehemplo sa Manluluwas ug magkat-on nga mopasaylo.

Posible nga mga Kalihokan

• Dapita ang mga bata nga magpuli-puli sa pagbasa mahitungod sa mga sundalo nga dili mabination ngadto ni Jesus diha sa Mateo 27:26–37 ug ni Jesus nga mipasaylo kanila diha sa Lucas 23:34. (Tan-awa ang panabot nga gihatag pinaagi sa ang Hubad ni Joseph Smith sa Lucas 23:34, Mga Tabang sa Pagtuon.) Unsa ang atong makat-onan gikan sa ehemplo ni Jesus?

• Isulat diha sa pisara Unsa ang inyong mabuhat aron makapasaylo sa usa ka tawo nga dili mabination kaninyo? Papuli-puliha ang mga bata sa pagsulat og mga ideya diha sa pisara, sama sa Pag-ampo aron makabaton og mabination nga mga pagbati ngadto sa tawo o Paghunahuna og maayong butang mahitungod sa tawo.

Lucas 23:32–33, 39–43

Tungod kay si Jesus nag-antos ug namatay alang kanako, makahinulsol ako ug mapasaylo.

Kini nga leksiyon usa ka maayong panahon sa pagpamatuod nga tungod ni Jesukristo, makahinulsol kita sa atong mga sala ug mapasaylo.

Posible nga mga Kalihokan

• Dapita ang usa ka bata sa pagbasa og kusog sa Lucas 23:32–33, 39–43. Ipasabot nga ang duha ka tawo nga gilansang sa krus uban ni Jesus mga kawatan. Sa unsang paagi ang usa sa mga kawatan mipakita nga misugod na siya sa paghinulsol? Unsay atong mahimo aron sa pagpakita nga kita naghinulsol? (Tan-awa sa Giya ngadto sa mga Kasulatan, “Hinulsol, Paghinulsol,” scriptures.ChurchofJesusChrist.org.)

• Isulat ang mosunod nga kapahayag diha sa pisara, nga mobilin og mga blangko alang sa naka-italicize nga mga pulong: “Mahimo akong mapasaylo kon maghinulsol ako tungod sa Pag-ula ni Jesukristo” Hatagi ang mga bata og mga timailhan aron sa pagtabang kanila nga mabutangan og tubag ang mga blangko.

• Dapita ang usa ka bata nga mogunit og bag, ug sudli kini og mga bato samtang ang ubang mga bata mongalan og sayop nga mga pagpili nga mabuhat sa usa ka tawo. Tabangi ang mga bata sa pagtandi sa bag ngadto sa espirituhanon nga palas-anon nga atong dad-on kon makasala kita. Sa unsang paagi ang paghinulsol sama sa pagkuha sa mga bato gikan sa bag? Mahimo nimong pahinumdoman ang mga bata nga ang paghinulsol dili usa ka higayon nga panghitabo apan usa ka inadlaw nga proseso.

• Pangitaa diha sa usa ka bag-ong isyu sa Higala nga magasin ang usa ka istorya o mensahe mahitungod sa paghinulsol ug ipaambit kini sa mga bata.

Awhaga ang Pagkat-on diha sa Panimalay

Awhaga ang mga bata sa paghunahuna og usa ka tawo nga kinahanglan nilang mapasaylo ug sa pagdesisyon bahin sa usa ka butang nga ilang buhaton aron sa pagpakita niana nga tawo nga sila mipasaylo na kaniya.

Pagpalambo sa Atong Pagtudlo

Pagkat-on sa pag-ila og pagpadayag. Ang pagpadayag sa kasagaran moabot “pagtul[o]n-an human sa usa ka pagtul[o]n-an” (2 Nephi 28:30), dili nga kausahon ra. Samtang mag-ampo ug mamalandong ka sa mga kasulatan ug niini nga latid, imong makaplagan nga ang mga ideya ug mga impresyon mahimong moabot bisan kanus-a ug bisan asa—samtang mopadulong ka sa trabaho, magbuhat sa mga buluhaton sa balay, o makig-istorya sa pamilya ug mga higala.