Feed My Sheep [Pakan-a ang Akong mga Karnero], ni Kamille Corry

Hunyo 26–Hulyo 2

Mateo 28; Marcos 16; Lucas 24; Juan 20–21

“Siya Nabanhaw”

Basaha sa mainampoon nga paagi ang Mateo 28; Marcos 16; Lucas 24; ug Juan 20–21, pamalandonga ang hingpit nga kalipay nga ikaw aduna tungod sa Pagkabanhaw ni Kristo. Kinsa ang mahimong mapanalanginan pinaagi sa pagkadungog sa imong pagpamatuod mahitungod niini nga panghitabo?

I-rekord ang Imong mga Panghunahuna

Ngadto sa daghang tig-obserbar, ang kamatayon ni Jesus sa Nazaret ingon og sayop nga kataposan ngadto sa usa ka talagsaon nga kinabuhi. Dili ba kini ang tawo nga mibanhaw ni Lazaro gikan sa patay? Wala ba Siya makigbatok sa mga hulga sa pagpatay gikan sa mga Pariseo matag karon ug unya? Mipakita Siya og gahom sa pag-ayo sa pagkabuta, sanla, ug paralisis. Ang mga hangin mismo ug kadagatan misunod Kaniya. Ug gani ania Siya, nagbitay sa krus, nagpadayag, “Tapos na” (Juan 19:30). Mahimong dihay pipila ka sinsero nga sorpresa sa mabiay-biayong mga pulong “Kana Siya nagluwas sa uban, apan sa Iyang kaugalingon dili na hinoon makaluwas” (Mateo 27:42). Apan nasayod kita nga ang kamatayon ni Jesus dili mao ang kataposan sa istorya. Nasayod kita nga ang kahilom sa lubnganan temporaryo ug nga ang makaluwas nga buhat ni Kristo mao lamang ang sinugdanan. Nakaplagan Siya karon nga wala “diha sa mga patay” apan sa mga buhi (Lucas 24:5). Ang Iyang mga pagtulon-an dili mapahilom, kay ang Iyang maunungon nga mga disipulo mosangyaw sa ebanghelyo sa “tanang kanasuran,” nagsalig sa Iyang saad nga Siya “magauban [kanila] kanunay, hangtod sa kataposan sa kapanahonan” (Mateo 28:19–20).

Mga Ideya alang sa Personal nga Pagtuon sa Kasulatan

Mateo 28; Marcos 16; Lucas 24; Juan 20

Si Jesukristo nabanhaw.

Niini nga mga tudling, mabasa nimo ang mahitungod sa usa sa labing importante nga mga panghitabo diha sa kasaysayan sa katawhan: ang Pagkabanhaw ni Jesukristo. Samtang ikaw magbasa, ibutang ang imong kaugalingon sa dapit sa mga tawo kinsa nakasaksi sa mga panghitabo nga naglibot sa Pagkabanhaw. Unsa ang imong nakat-onan gikan sa ilang mga kasinatian?

Unsa ang imong gibati samtang nagbasa ka mahitungod sa Pagkabanhaw sa Manluluwas? Hunahunaa kon sa unsa nga paagi kini nakaapekto kanimo—sa imong panglantaw sa kinabuhi, sa imong mga relasyon sa uban, sa imong hugot nga pagtuo sa ubang mga kamatuoran sa ebanghelyo.

Tan-awa usab sa Giya ngadto sa mga Kasulatan, “Pagkabanhaw”; Gospel Topics, “Resurrection,” topics.ChurchofJesusChrist.org.

Lucas 24:13–35

Makadapit ako sa Manluluwas nga “[mag]pabilin uban [kanako].”

Samtang ikaw magbasa sa kasinatian sa duha ka tigbiyahe nga mga disipulo kinsa nakasugat sa nabanhaw nga Manluluwas, pangita og mga pagkasusama sa imong mga kasinatian isip usa ka sumusunod ni Kristo. Sa unsa nga paagi ikaw makalakaw uban Kaniya karon ug makadapit Kaniya nga “pabilin” pa og taud-taod? (Lucas 24:29). Unsaon nimo pag-ila ang Iyang presensya diha sa imong kinabuhi? Sa unsa nga mga paagi ang Espiritu Santo mipamatuod sa pagkabalaan ni Jesukristo nganha kanimo?

Tan-awa usab ang “Uban Nako; ’Gabii Na,” “Uban Nako!,” Mga Himno, nus. 96–97.

Lucas 24:36–43; Juan 20

Ang pagkabanhaw mao ang permanente nga paghiusa sa lawas ug sa espiritu.

Ang istorya sa Pagkabanhaw ni Jesukristo makatabang kanimo sa pagsabot kon unsa ang kahulogan sa mahimong mabanhaw. Sama pananglit, unsa nga mga kamatuoran ang imong makita sa Lucas 24:36–43 ug Juan 20 mahitungod sa nabanhaw nga mga lawas? Mahimo ka usab nga makasuhid sa ubang mga kasulatan mahitungod sa pagkabanhaw, sama sa 1 Mga Taga-Corinto 15:35–44; Mga Taga-Filipos 3:20–21; 3 Nephi 11:13–15; Doktrina ug mga Pakigsaad 88:27–31; 110:2–3; 130:1, 22.

Juan 20:19–29

“Dalaygon kadtong wala managpakakita, ngani nanagpanoo.”

Pipila ka mga tawo mobati og sama ni Tomas, kinsa miingon, “Gawas kon makakita ko … dili gayod ako motuo” (Juan 20:25). Sa inyong opinyon, ngano nga ang pagtuo nga dili makakita mahimong usa ka panalangin? (tan-awa sa Juan 20:29). Palandonga kon sa unsang paagi ikaw napanalanginan tungod sa pagtuo sa mga butang nga dili nimo makita. Unsa ang nagtabang kanimo nga makabaton og hugot nga pagtuo sa Manluluwas bisan kon dili ka makakita Kaniya? Unsaon nimo sa pagpadayon sa paglig-on sa imong hugot nga pagtuo sa “mga butang nga dili makita, diin mga tinuod”? (tan-awa sa Alma 32:16–21; Ether 12:6). Hunahunaa ang pagrekord sa mga kasinatian diha sa journal nga nakatabang kanimo sa pagtuo ni Jesukristo, o ipakigbahin kini ngadto sa usa ka tawo nga imong kaila.

Juan 21:1–17

Ang Manluluwas nagdapit kanako sa pagpakaon sa Iyang karnero.

Tingali makapaikag ang pagtandi sa pakighinabi sa Manluluwas uban sa Iyang Apostoles sa Juan 21 ngadto sa unang higayon nga mimando Siya kanila sa pagtaktak sa ilang mga pukot, nga narekord sa Lucas 5:1–11. Unsa nga mga pagkasama ug mga pagkalain ang imong nakita? Unsa nga mga panabot mahitungod sa pagkadisipulo ang imong nakaplagan?

Hunahunaa kon sa unsa nga paagi nga ang mga pulong sa Manluluwas ngadto ni Pedro sa Juan 21:15–17 mahimong magamit nganha kanimo. Aduna bay butang nga nakapugong kanimo sa pagpangalagad ngadto sa mga karnero sa Ginoo? Unsay imong mahimong tubag kon ang Ginoo mangutana kanimo, “Gihigugma mo ba ako?” Palandonga kon unsaon nimo sa pagpakita sa imong gugma alang sa Ginoo.

Tan-awa usab sa 1 Pedro 5:2–4, 8; Jeffrey R. Holland, “Ang Unang Dakong Sugo,” Liahona, Nob. 2012, 83–85.

Mga Ideya alang sa Pamilya nga Pagtuon sa Kasulatan ug Home Evening

Lucas 24:5–6.Si Presidente Thomas S. Monson miingon kabahin sa Lucas 24:5–6, “Walay pulong diha sa Kristiyanismo nga mas dako og kahulogan ngari kanako” (“Siya Nabanhaw!,” Liahona, Mayo 2010, 89). Unsa ang kahulogan niini nga mga pulong nganha kanimo ug sa imong pamilya?

Mateo 28; Marcos 16; Lucas 24; Juan 20–21.Samtang ang imong pamilya nagbasa niini nga mga kapitulo, paniiri ang mga tawo kinsa nakighinabi ni Jesus sa matag istorya. Sama pananglit, unsa ang nagdani kanimo mahitungod sa mga tawo kinsa mibisita sa lubnganan sa Manluluwas? Unsa ang imong nakat-onan gikan sa mga pulong o mga lihok sa mga Apostoles o gikan sa mga disipulo diha sa dalan paingon sa Emaus?

Hunahunaa ang pagkanta og dungan sa “Nabuhi ba Gayod Pag-usab si Jesus?” (Songbook sa mga Bata,, 45). Paghisgot mahitungod sa usa ka tawo nga nailhan sa imong pamilya kinsa namatay, ug hisgoti kon sa unsang paagi ang mga kamatuoran dinhi niini nga awit nagdala og kahopayan.

Road to Emaus [Ang Dalan Paingon sa Emaus], ni Wendy Keller

Mateo 28:16–20; Marcos 16:14–20; Lucas 24:44–53.Dinhi niini nga mga bersikulo, unsa ang gisugo ni Jesus sa Iyang Apostoles nga buhaton? Unsaon nato pagtabang nga matuman kini nga buhat? Ang mga sakop sa pamilya makahimo sa pagpakigbahin sa mga kasinatian kon ilang gibati nga “ang Ginoo nagbuhat uban kanila” sa pagtuman sa Iyang mga katuyoan (Marcos 16:20).

Juan 21:15–17.Hunahunaa ang pagbasa niini nga mga bersikulo samtang nagdungan og pangaon. Makadugang kini og kahulogan ngadto sa mga pulong sa Manluluwas “pakan-a ang akong mga karnero.” Gibase sa unsay gitudlo ni Jesus mahitungod sa karnero sa Bag-ong Tugon (tan-awa, sama pananglit, sa Mateo 9:35–36; 10:5–6; 25:31–46; Lucas 15:4–7; Juan 10:1–16), ngano nga ang pagpakaon sa karnero usa ka maayong paagi sa paghulagway sa pagserbisyo sa mga anak sa Dios? Unsa ang gitudlo niini nga pagkasusama mahitungod kon sa unsa nga paagi ang Langitnong Amahan ug si Jesus mibati alang kanato?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Nabuhi ba Gayod Pag-usab si Jesus?,” Songbook sa mga Bata, 32.

Pagpalambo sa Personal nga Pagtuon

Paggamit og musika aron sa pagdapit sa Espiritu ug pagkat-on sa doktrina. Ang pagpaminaw o pagkanta sa mga himno sama sa “Siya Nabanhaw!” (Mga Himno, nu. 118) makadapit sa Espiritu ug makatabang kanimo sa pagkat-on mahitungod sa Pagkabanhaw sa Manluluwas.

The Resurrected Christ [Ang Nabanhaw nga Kristo], ni Walter Rane