Hulyo 24–30

Mga Buhat 16–21

“Gitawag Kami sa Ginoo aron sa Pagsangyaw sa Maayong Balita [Ebanghelyo]”

Samtang ikaw nagbasa sa mga paningkamot ni Pablo sa pagsangyaw sa ebanghelyo, ang Espiritu mahimong moaghat kanimo og mga hunahuna o mga pagbati. Isulat kini nga mga hunahuna, ug paghimo og mga plano sa pagbuhat niini.

I-rekord ang Imong mga Panghunahuna

Usa sa mga kataposang mga pulong sa Ginoo ngadto sa Iyang Apostoles mao ang sugo, “Busa panglakaw kamo ug himoa ninyong mga tinun-an ang tanang kanasuran, sa pagpamautismo kanila sa ngalan sa Amahan ug sa Anak ug sa Espiritu Santo: nga magatudlo kanila sa pagtuman sa tanan nga akong gisugo kaninyo” (Mateo 28:19–20). Samtang ang Apostoles wala makaadto sa tanang kanasuran, ang Mga Buhat 16–21 nagpakita nga si Pablo ug ang iyang mga kauban nakahimo og talagsaong kauswagan sa pagtukod sa Simbahan. Sila mitudlo, mibunyag, ug mitugyan sa gasa sa Espiritu Santo. Mihimo sila og mga milagro, gani nagbanhaw sa usa ka tawo gikan sa patay, ug nanagna sa Dakong Apostasiya (Mga Buhat 20:7–12, 28–31). Ug ang buhat nga ilang nasugdan nagpadayon uban sa buhi nga Apostoles karon, uban sa maunungong mga disipulo sama kanimo, kinsa nagtabang nga matuman ang sugo sa Manluluwas sa mga paagi nga dili gayod mahanduraw ni Pablo. Tingali nakamatikod ka og mga tawo nga wala makaila sa ilang Langitnong Amahan o sa Iyang ebanghelyo. Tingali imong gibati nga ang imong “espiritu nahagit sa sulod [kanimo]” sa pagpakigbahin uban kanila unsay imong nahibaloan mahitungod Kaniya (Mga Buhat 17:16). Kon sundon nimo ang ehemplo ni Pablo sa pagkamapainubsanon ug pagkamaisugon sa pagpakigbahin sa ebanghelyo, tingali makakita ka og tawo nga ang “iyang kasingkasing giablihan sa Ginoo” (Mga Buhat 16:14).

Mga Ideya alang sa Personal nga Pagtuon sa Kasulatan

Mga Buhat 16–21

Ang Espiritu mogiya kanako sa akong mga paningkamot sa pagpakigbahin sa ebanghelyo.

Si Propeta Joseph Smith mipahayag, “Walay tawo nga makasangyaw sa Ebanghelyo kon wala ang Espiritu Santo” (Mga Pagtulun-an sa mga Presidente sa Simbahan: Joseph Smith [2007], 402). Samtang ikaw nagbasa sa Mga Buhat 16–21, hunahunaa kon nganong ang pamahayag sa Propeta tinuod. Timan-i ang mga higayon nga ang Espiritu mitabang ni Pablo ug sa iyang mga kauban. Unsa nga mga panalangin ang miabot samtang sila misunod sa Espiritu? Kanus-a nimo nabati ang Espiritu nga nag-aghat kanimo sa imong mga paningkamot sa pagpakigbahin sa ebanghelyo?

Mga Buhat 16–21

Makapahayag ako sa ebanghelyo sa tanang mga kahigayonan.

Ang pagkabalhog sa bilanggoan tungod sa pagsangyaw sa ebanghelyo mahimong masabtan nga katarungan sa paghunong sa pagsangyaw. Apan ngadto nila Pablo ug Silas, nahimo kini nga oportunidad sa pagkabig sa magbalantay sa bilanggoan (tan-awa sa Mga Buhat 16:16–34). Sa tibuok Mga Buhat 16–21, pangita og laing mga ehemplo sa pagkaandam ni Pablo sa pagpakigbahin sa iyang pagsaksi ngadto sa tanan. Ngano kaha nga siya maisugon ug walay kahadlok? Unsay imong nakat-onan sa ehemplo ni Pablo?

Adunay daghan nga mensahe mahitungod sa pagpakigbahin sa ebanghelyo sa kapitulo 16–21. Samtang ikaw magtuon niini nga mga kapitulo, pangita og pipila nga ilabi ka magamit diha kanimo.

Tan-awa usab sa Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 15–18.

Matag usa kanato anak sa Dios.

Mga Buhat 17:16–34

“Kita mao ang kaliwat sa Dios.”

Sa Atena, nakaplagan ni Pablo ang mga tawo nga adunay lainlaing mga opinyon ug mga panglantaw sa relihiyon. Sila kanunay nangita “sa pagpaminaw og bag-ong butang,” ug unsay ikatanyag ni Pablo sa piho bag-o alang kanila (tan-awa sa Mga Buhat 17:19–21). Gisimba nila ang daghang mga dios, lakip sa usa nga ilang gitawag og “Dios nga wala hiilhi” (Mga Buhat 17:23), apan mituo sila nga ang mga dios mga gahom o mga pwersa, dili buhi, personal nga mga tawo, ug sa pagkatinuod dili atong Amahan. Palandonga kon unsay gisulti ni Pablo sa pagtabang kanila nga makaila sa Dios. Unsay kahulogan diha kanimo nga mahimong “kaliwat sa Dios”? (Mga Buhat 17:29). Sa imong opinyon, sa unsa nga paagi nga ang pagkaanak sa Dios lahi gikan sa usa lamang sa Iyang mga nilalang? Sa unsang paagi nga ang pagsabot niini nga kamatuoran nag-impluwensya sa paagi sa imong pagtan-aw sa imong kaugalingon ug sa uban?

Kon ikaw nagbarog tupad ni Pablo samtang siya nagpamatuod, unsa kaha ang imong isulti sa karaang mga Gresyanhon mahitungod sa atong Langitnong Amahan? Aduna ka bay nailhan nga makabenepisyo sa pagpaminaw sa imong pagpamatuod?

Tan-awa usab sa Mga Taga-Roma 8:16; 1 Juan 5:2; “We Are the Offspring og God” (video), ChurchofJesusChrist.org.

Mga Ideya alang sa Pamilya nga Pagtuon sa Kasulatan ug Home Evening

Mga Buhat 16–21.Sa paglig-on sa pagsabot sa pamilya sa Mga Buhat 16–21, makahimo ka sa pagtuon sa mapa sa kataposan sa latid, mangita alang sa mga siyudad diin misangyaw sa ebanghelyo si Pablo niini nga mga kapitulo. Unsa nga mga kapangohaan kita aduna karon sa pagtabang og dala sa ebanghelyo ngadto sa tanang kanasuran?

Mga Buhat 17:10–12; 18:24–28.Sa unsa nga paagi kita mas mahisama sa mga Santos dinhi niini nga mga bersikulo? Unsa kaha ang ipasabot sa “[midawat] sa pulong uban sa bug-os nga pagkamasibuton”? (Mga Buhat 17:11). Unsa ang atong mahimo aron mahimong “batid sa mga kasulatan”? (Mga Buhat 18:24).

Mga Buhat 19:1–7.Kini nga mga bersikulo makatabang sa imong pamilya sa paghisgot mahitungod sa importansya nga mabunyagan ug makumpirmahan. Sa pagsabot og mas maayo sa mga kamatuoran sa Mga Buhat 19:1–7, makahimo ka sa paghisgot og pipila ka mga butang nga walay kaposlanan kon walay kauban nga laing butang, sama sa usa ka cell phone nga walay bateriya. O ikaw makahimo sa pagpakigbahin niini nga pagtulon-an gikan kang Propeta Joseph Smith: “Ang bunyag pinaagi sa tubig katunga lamang sa bunyag, ug walay bili kon wala ang laing katunga—kana mao, ang bunyag sa Espiritu Santo” (Mga Pagtulun-an sa mga Presidente sa Simbahan: Joseph Smith, 112). Ngano nga ang bunyag “walay kaposlanan” kon dili madawat ang gasa sa Espiritu Santo? (tan-awa sa 3 Nephi 27:19–20; Moises 6:59–61).

Mga Buhat 19:18–20.Samtang ikaw magbasa sa Mga Buhat 19:18–20, tan-awa ang bili sa mga kabtangan nga ang mga tawo andam sa pagbiya aron sa pagsagop sa ebanghelyo (tan-awa sa bersikulo 19). Aduna bay kalibotanong mga kabtangan o mga kalihokan nga kinahanglan natong biyaan aron makadawat sa langitnong mga panalangin?

Mga Buhat 20:32–35.Kanus-a nakasinati ang imong pamilya sa pagtulon-an ni Kristo nga “labi pang bulahan ang paghatag kay sa pagdawat”? (Mga Buhat 20:35). Aduna bay tawo kinsa makabenepisyo gikan sa serbisyo, panahon, o sa mga gasa nga ang imong pamilya makahatag? Isip usa ka pamilya, hisgoti ang pipila ka ideya ug paghimo og plano sa pagserbisyo sa usa ka tawo. Unsay atong bation kon kita nagserbisyo sa uban? Ngano nga labi pang bulahan ang paghatag kay sa pagdawat?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Ako Anak sa Dios,” Songbook sa mga Bata, 1.

Pagpalambo sa Personal nga Pagtuon

I-rekord ang mga Panghunahuna. “Kon imong i-rekord ang espirituhanong mga panghunahuna, imong gipakita sa Ginoo nga imong gihatagan og bili ang Iyang sugo, ug Siya mopanalangin kanimo og mas kanunay nga pagpadayag” (Pagtudlo sumala sa Pamaagi sa Manluluwas, 12; tan-awa usab sa pahina 34).

Ang misyonaryo nga mga panaw ni Apostol Pablo.