Hulyo 17–23

Mga Buhat 10–15

“Ang Pulong sa Dios Mitubo ug Misanay”

Basaha ang Mga Buhat 10–15 nga mabinantayon, maghatag og panahon alang sa Espiritu sa pag-aghat kanimo sa mga hunahuna ug mga pagbati. Unsay anaa niini nga mga kapitulo nga imong makat-onan?

I-rekord ang Imong mga Panghunahuna

Sa panahon sa Iyang mortal nga pangalagad, kasagaran gihagit ni Jesukristo ang dugay na nga mga tradisyon ug mga tinuohan. Kini wala mohunong human Siya misaka sa langit, samtang Siya mipadayon sa paggiya sa Iyang Simbahan pinaagi sa pagpadayag. Sama pananglit, sa panahon sa kinabuhi ni Jesus ang Iyang mga disipulo misangyaw sa ebanghelyo ngadto lamang sa isig ka Judeo. Apan human dayon sa pagkamatay sa Manluluwas ug si Pedro nahimong pangulo sa Simbahan, si Jesukristo mipadayag ngadto ni Pedro nga ang panahon husto na nga isangyaw ang ebanghelyo ngadto sa dili mga Judeo. Ang ideya sa pagpakigbahin sa ebanghelyo ngadto sa mga Hentil dili ikatingala karon, busa unsa ang leksyon niini nga istorya alang kanato karon? Tingali ang usa ka leksiyon mao nga ang karaan ug ang Simbahan karon, usa ka mapinanggaon nga Manluluwas ang naggiya sa Iyang pinili nga mga lider (tan-awa sa Amos 3:7; Doktrina ug mga Pakigsaad 1:38). Ang nagpadayon nga pagpadayag usa ka importante nga timailhan sa tinuod ug buhi nga Simbahan ni Jesukristo. Sama ni Pedro, kinahanglan nga andam kita nga modawat sa nagpadayon nga pagpadayag ug mabuhi “dili sa tinapay lamang” (Lucas 4:4), lakip sa “tanan nga [Siya] mipadayag, sa tanan nga gipadayag Niya karon” ug sa “daghan nga dagko ug mahinungdanon nga mga butang” nga ipadayag pa Niya “kalabot sa Gingharian sa Dios” (Mga Artikulo sa Hugot nga Pagtuo 1:9).

Mga Ideya alang sa Personal nga Pagtuon sa Kasulatan

Mga Buhat 10

“Ang Dios wala diay pinalabi sa mga tawo.”

Sulod sa mga henerasyon, ang mga Judeo mituo nga “ang kaliwat ni Abraham,” o usa ka literal nga kaliwat ni Abraham, gipasabot nga kanang tawhana gidawat ug gipili sa Dios (tan-awa sa Lucas 3:8). Ilang gihunahuna ang bisan kinsa nga “dili limpyo” nga Hentil kinsa wala dawata sa Dios. Sa Mga Buhat 10, unsa ang gitudlo sa Ginoo ni Pedro mahitungod kon kinsa “ang pagahimut-an kaniya”? (Mga Buhat 10:35). Unsa nga ebidensya ang imong makita dinhi niini nga kapitulo nga ang kinabuhi ni Cornelio madawat ngadto sa Ginoo? Palandonga kon unsa ang gipasabot sa pahayag “Ang Dios wala diay pinalabi sa mga tawo” (bersikulo 34; tan-awa usab sa 1 Nephi 17:35). Nganong importante nganha kanimo nga mahibaloan kini nga kamatuoran?

Sama sa mga Judeo kinsa ubos ang pagtan-aw niadtong kinsa dili kaliwat ni Abraham, nakabantay ba ikaw sa imong kaugalingon nga naghimo og dili mabination o dili mao nga panghunahuna mahitungod sa tawo kinsa lahi kay kanimo? Unsaon nimo sa pagbuntog niini nga kahilig? Makapaikag tingali ang pagsulay og yanong kalihokan alang sa mosunod nga pipila ka adlaw: Kon ikaw makig-istorya sa usa ka tawo, sulayi ang paghunahuna diha sa imong kaugalingon, “Kining tawhana usa ka anak sa Dios.” Samtang buhaton nimo kini, unsa nga kausaban ang imong mamatikdan sa paagi sa imong paghunahuna ug sa pakig-istorya sa uban?

Tan-awa usab sa 1 Samuel 16:7; 2 Nephi 26:13, 33; Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 92–95; “Peter’s Revelation to Take the Gospel to the Gentiles” (video), ChurchofJesusChrist.org.

Mga Buhat 10; 11:1–18; 15

Ang Langitnong Amahan nagtudlo kanako og pagtulon-an human sa laing pagtulon-an pinaagi sa pagpadayag.

Sa dihang si Pedro nakakita sa panan-awon nga gihulagway sa Mga Buhat 10, naglisod siya sa sinugdanan sa pagsabot niini ug “nalibog pa sa iyang hunahuna kon unsa kaha ang kahulogan niadtong [panan-awon]” (bersikulo 17). Apan ang Ginoo mihatag ni Pedro og mas dakong pagsabot samtang si Pedro nagtinguha niini. Samtang magbasa ka sa Mga Buhat 10, 11, ug 15, panid-i kon sa unsa nga paagi ang pagsabot ni Pedro sa iyang panan-awon nalig-on paglabay sa panahon. Giunsa nimo pagtinguha ug pagdawat ang mas dako nga pagsabot gikan sa Dios sa dihang ikaw dihay mga pangutana?

Mga Buhat 10, 11, ug 15 nag-istorya sa mga higayon diin ang Ginoo migiya sa Iyang mga sulugoon pinaagi sa pagpadayag. Tingali makatabang ang pagrekord unsay imong nakat-onan kabahin sa pagpadayag samtang nagbasa ka niini nga mga kapitulo. Sa unsa nga mga paagi ang Espiritu nakigsulti nganha kanimo?

Tan-awa usab sa Giya ngadto sa mga Kasulatan, “Pagpadayag,” topics.ChurchofJesusChrist.org; Quentin L. Cook, “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi,” Liahona, Mayo 2020, 96–100; “The Jerusalem Conference” (video), ChurchofJesusChrist.org.

Mga Buhat 11:26

Ako usa ka Kristiyano tungod kay ako nagtuo ug nagsunod ni Jesukristo.

Unsa ang importante mahitungod sa usa ka tawo nga gitawag og Kristiyano? (tan-awa sa Mga Buhat 11:26). Unsay kahulogan niini nganha kanimo nga mailhan isip usa ka Kristiyano? Hunahunaa ang kaimportante sa mga ngalan. Pananglitan, unsa ang kahulogan sa imong apelyido nganha kanimo? Ngano nga ang ngalan sa Simbahan importante nganha kanimo? (tan-awa sa Doktrina ug mga Pakigsaad 115:4). Unsa ang kahulogan niini nganha kanimo ang pagdala diha sa imong kaugalingon sa ngalan ni Jesukristo pinaagi sa pakigsaad? (tan-awa sa Doktrina ug mga Pakigsaad 20:77).

Tan-awa usab sa Mosiah 5:7–15; Alma 46:13–15; 3 Nephi 27:3–8; Russell M. Nelson, “Ang Sakto nga Ngalan sa Simbahan,” Liahona, Nob. 2018, 87–90.

Mga Ideya alang sa Pamilya nga Pagtuon sa Kasulatan ug Home Evening

Mga Buhat 10:17, 20.Kita diha bay espirituhanong mga kasinatian sukad ug wala madugay nagduha-duha unsay atong gibati o nakat-onan? Unsa nga tambag ang atong mahatag sa usag usa nga makatabang kanato nga makabuntog sa atong mga pagduha-duha? (Tan-awa sa Neil L. Andersen, “Mga Espirituhanong Panumduman nga Angay Hinumduman,” Liahona,, Mayo 2020, 18–22.)

Mga Buhat 10:34–35.Unsaon nimo pagtudlo ang imong pamilya nga ang “Dios wala diay pinalabi sa mga tawo”? (Mga Buhat 10:34). Tingali makapakita ka og mga hulagway sa mga tawo gikan sa nagkalain-laing mga kaagi ug mga kultura samtang ang imong pamilya nagbasa niini nga mga bersikulo. Unsaon sa mga kamatuoran dinhi niini nga mga bersikulo pag-impluwensiya sa atong mga lihok? (tan-awa, sama pananglit, “Mouban Ko Nimo” [Songbook sa mga Bata, 78–79]).

Mga Buhat 12:1–17.Ang imong pamilya mahimong mo-role play sa istorya ni Pedro nga gibalhog sa bilanggoan ug ang mga miyembro sa Simbahan nagpundok ug nag-ampo alang kaniya. Kanus-a kita napanalanginan pinaagi sa pag-ampo? Aduna bay usa ka tawo nga kita mibati og kadasig nga i-ampo, sama sa usa ka lider sa Simbahan o tawo nga minahal? Unsa ang gipasabot nga mag-ampo “nga magpadayon”? (Mga Buhat 12:5; tan-awa usab sa Alma 34:27).

Peter Delivered from Prison [Gipagawas si Pedro gikan sa Bilanggoan], ni A. L. Noakes

Mga Buhat 14.Samtang inyong basahon kini nga kapitulo og dungan, ang pipila ka mga sakop sa pamilya mahimong magtimaan sa mga panalangin nga miabot ngadto sa mga disipulo ug sa Simbahan. Ang ubang sakop sa pamilya maghinumdom sa oposisyon o mga pagsulay nga nasinati. Ngano nga ang Dios nagtugot sa malisod nga mga butang nga mahitabo ngadto sa matarong nga mga tawo?

Mga Buhat 15:1–21.Kini nga mga bersikulo naghulagway og usa ka panagsumpaki diha sa Simbahan mahitungod kon ang mga kinabig gikinahanglan bang magsunod sa balaod ni Moises, lakip ang pagsirkunsisyon. Unsa ang gibuhat sa Apostoles mahitungod niini nga panagsumpaki? Unsa ang atong makat-onan gikan niini nga ehemplo mahitungod kon unsaon sa mga lider sa Simbahan sa paggiya sa buluhaton sa Simbahan?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Mouban Ko Nimo,” Songbook sa mga Bata,, 78–79.

Pagpalambo sa Atong Pagtudlo

Pagdrowing og hulagway. Ang mga hulagway makatabang sa mga sakop sa pamilya nga makahanduraw sa mga pagtulon-an ug mga istorya sa kasulatan. Makadapit ka og mga sakop sa pamilya sa pagdrowing og mga hulagway kabahin sa unsay imong nabasa, sama sa panan-awon ni Pedro diha sa Mga Buhat 10.

Ang mga kasinatian ni Pedro ug Cornelio nagpakita nga ang “Dios wala diay pinalabi nga mga tawo” (Mga Buhat 10:34).