Hulyo 17–23

Mga Buhat 10–15

“Ang Pulong sa Dios Nagpadayon Pagkaylap”

Tun-i ang Mga Buhat 10–15 sa mainampoong paagi, nga maghunahuna mahitungod sa mga bata sa imong klase. Unsa ang imong nakaplagan dinhi niini nga mga kapitulo nga nadasig ka nga itudlo ngadto sa mga bata?

Dapita ang Pagpaambit

Aron matabangan ang mga bata sa pagpaambit sa unsay ilang nakat-onan ug nasinati, mahimo nimo silang hangyoon sa pagpaambit og mga butang nga ilang ginabuhat nga nagpakita nga mituo sila kang Jesukristo.

Itudlo ang Doktrina: Mas Gagmay nga mga Bata

Mga Buhat 10:34–35

Ang Langitnong Amahan nahigugma sa tanan Niyang mga anak.

Usa ka sukaranang kamatuoran nga bisan ang gagmayng mga bata makasabot mao nga ang tanan anak sa Dios ug nga Siya nahigugma sa tanan Niyang mga anak.

Posible nga mga Kalihokan

• Ipakita ang hulagway nga Si Kristo ug ang Kabataan sa tibuok Kalib[o]tan (Libro sa mga Hulagway sa Ebanghelyo, nu. 116) samtang imong basahon ang Mga Buhat 10:34–35. Ipasabot nga sa panahon ni Pedro nagtuo ang ubang mga tawo nga ang mga panalangin sa ebanghelyo dili alang sa tanan. Apan nakat-onan ni Pedro nga ang Dios nahigugma sa Iyang tanang anak ug gusto Siya nga ang tanan kanila makakat-on sa ebanghelyo.

• Dapita ang mga bata sa pagdrowing og hulagway sa ilang mga kaugalingon. Samtang ilang ipaambit ang ilang mga hulagway, paghisgot mahitungod sa usa ka butang nga imong ganahan sa matag bata. Ipaambit ang imong pagpamatuod nga ang Langitnong Amahan nahigugma sa matag usa kanila ug sa tanan Niyang mga anak, bisan unsa pa ang ilang panagway o diin sila gikan.

• Kantaha uban sa mga bata ang usa ka awit mahitungod sa paghigugma sa uban, sama sa “Mouban Ko Nimo” (Songbook sa mga Bata, 78–79). Dapita ang mga bata sa pagpaambit og mga paagi nga makapakita sila og gugma alang sa tanan, sama sa gibuhat ni Jesus.

• Tagsa-tagsa nga itudlo ang matag bata ug isulti, “Ang Langitnong Amahan nahigugma ni [ngalan].” Papuli-puliha ang mga bata sa pagtudlo sa usag usa ug sa pagsulti niini nga pulongan.

Mga Buhat 11:26

Usa ako ka Kristohanon tungod kay nagtuo ug nagsunod ako kang Jesukristo.

Unsaon nimo sa pagtabang ang mga bata nga makat-on kon unsay buot ipasabot sa pagkahimong usa ka Kristohanon?

Posible nga mga Kalihokan

• Basaha ang Mga Buhat 11:26 ngadto sa mga bata, ug dapita sila sa pagtindog kon makadungog sila nimo nga mosulti sa pulong nga Kristohanon. Pangutan-a sila kon unsay ilang pagsabot nga mahimong usa ka Kristohanon. Ipasabot nga ang usa ka tawo nga nagtuo ug nagsunod ni Jesukristo gitawag og Kristohanon, mao nga kita mga Kristohanon.

• Kantaha uban sa mga bata ang usa ka awit mahitungod sa pagsunod ni Jesukristo, sama sa “Ang Simbahan ni Jesukristo” (Songbook sa mga Bata, 77). Sa unsang paagi nato mapakita nga kita mga sumusunod ni Jesukristo ug nahisakop sa Iyang Simbahan? Tabangi ang mga bata sa paghunahuna og mga butang nga ilang mahimo aron sa pagsunod ni Jesus diha sa panimalay, sa eskwelahan, ug sa ubang mga dapit.

Ang Langitnong Amahan nahigugma kanato ug motubag sa atong mga pag-ampo.

Mga Buhat 12:1–17

Ang Langitnong Amahan mamati ug motubag sa mga pag-ampo.

Ang istorya sa anghel nga mipalingkawas ni Pedro gikan sa bilanggoan kusganong nagtudlo nga ang Langitnong Amahan motubag sa mga pag-ampo.

Posible nga mga Kalihokan

• Dapita ang mga bata nga idrama-drama ang istorya ni Pedro nga gipalingkawas gikan sa bilanggoan diha sa Mga Buhat 12:1–17 samtang imong i-summarize ang istorya. Giunsa sa Langitnong Amahan pagtubag ang mga pag-ampo niadtong mga nag-ampo alang kang Pedro?

• Kantaha ang usa ka awit mahitungod sa pag-ampo—sama pananglit, “Iduko ang Atong Ulo” (Songbook sa mga Bata, 18B)—ug pagsugyot og mga aksiyon nga mobagay sa mga pulong nga makatabang sa mga bata nga makat-on unsaon sa pag-ampo. Dapita ang mga bata sa pagpaambit og mga ehemplo sa mga butang nga mahimo silang magpasalamat sa Langitnong Amahan ug mangayo Kaniya diha sa pag-ampo.

• Ipakita ang mga hulagway sa mga tawo nga nag-ampo (tan-awa, sama pananglit, ang Libro sa mga Hulagway sa Ebanghelyo, mga nu. 111–12) samtang mopaambit ka og kasinatian dihang ang Langitnong Amahan mitubag sa imong mga pag-ampo.

Itudlo ang Doktrina: Mas Magulang nga mga Bata

Mga Buhat 10:34–35; 15:6–11

“Ang Dios walay pinalabi.”

Ang mga bata nga imong gitudloan kinahanglang makasabot nga ang Langitnong Amahan nahigugma sa tanan Niyang mga anak, bisan unsa ang ilang panagway, asa sila gikan, o unsa nga mga pagpili ang ilang gihimo.

Posible nga mga Kalihokan

• Pangutan-a ang mga bata kon makasulti ba sila kon unsa ang usa ka tawo pinaagi lang sa pagtan-aw kanila o pagtag-an kon diin sila gikan. Sumala sa Mga Buhat 10:35, unsaon sa pagdeterminar sa Dios kon ang usa ka tawo “iyang dawaton”?

• Basaha ang Mga Buhat 10:34–35; 15:6–11 uban sa mga bata. Ipasabot nga sa kapanahonan ni Pedro, ang mga Judeo nagtuo nga ang Dios dili modawat og mga tawo nga dili Judeo (kini nga mga tawo gitawag nga mga Hentil). Apan ang Dios mitudlo ni Pedro nga ang Dios nahigugma sa tanan Niyang mga anak, mga Judeo ug mga Hentil. Kantaha og dungan ang “Ako Anak sa Dios” (Songbook sa mga Bata, 2–3). Dapita ang mga bata sa pagpuli sa ilang mga ngalan sa mga pulong nga sama sa ako o ko.

• Dapita ang mga bata sa pagpaambit og usa ka butang nga talagsaon kabahin sa usa ka tawo diha sa klase. Ipasabot nga ang pamahayag nga “Ang Dios walay pinalabi” nagpasabot nga ang Langitnong Amahan nahigugma sa tanan Niyang mga anak, ug tungod kay nahigugma Siya kanila, gusto Siya nga ang tanan Niyang mga anak makadungog sa ebanghelyo.

Mga Buhat 11:26

Ang usa ka Kristohanon mao ang usa ka tawo nga nagtuo ug nagsunod ni Jesukristo.

Unsaon nimo pagtabang ang mga bata nga makasabot nga ang ilang mga pulong ug mga buhat nagpakita nga sila mga Kristohanon?

Posible nga mga Kalihokan

• Dapita ang mga bata sa pagbasa sa Mga Buhat 11:26; 3 Nephi 27:3–8; ug Doktrina ug mga Pakigsaad 115: 4. Isulat ang Kristohanon diha sa pisara ug badlisi ang parte nga nag-ingon og “Kristo.” Hangyoa ang mga bata sa pagpaambit kon unsay ilang pagsabot sa pagkamahimong usa ka Kristohanon.

• Hangyoa ang mga bata sa pagpaambit sa mga ngalan sa nagkalainlaing grupo diin sila nahisakop, sama sa ilang pamilya o nasod. Dapita sila sa pagpaambit og mga rason nganong mapasalamaton sila nga nahimong usa ka Kristohanon ug nahisakop sa Ang Simbahan ni Jesukristo sa mga Santos sa Ulahing mga Adlaw. Unsaon nato sa pagpakita sa uban nga kita mga Kristohanon?

• Ipakita ang pipila ka butang o hulagway nga nagrepresentar sa mga kamatuoran nga talagsaon diha sa Simbahan ni Jesukristo, sama sa hulagway sa pagpahiuli sa pagkapari (tan-awa sa Libro sa mga Hulagway sa Ebanghelyo, mga nu. 93–94). Hangyoa ang usa ka bata sa pagpili og usa sa mga butang o mga hulagway ug sa pagpasabot kon sa unsang paagi nga kini usa ka panalangin sa atong Simbahan. Ipasabot nga samtang ang mga Kristohanon sa tibuok kalibotan nahisakop sa daghan nga nagkalainlaing simbahan, nahisakop kita sa samang Simbahan nga giestablisar ni Jesukristo dinhi sa yuta.

• Dapita ang mga bata sa pagsulat o pagdrowing og mga butang nga ilang mabuhat aron mahimong tinuod nga mga Kristohanon.

Mga Buhat 12:1–17

Kon mag-ampo ako uban sa hugot nga pagtuo, ang Langitnong Amahan motubag.

Pamalandongi ang mga higayon sa dihang gitubag sa Langitnong Amahan ang imong mga pag-ampo. Unsaon nimo paggamit niini nga mga kasinatian sa pagtudlo sa mga bata nga ang Langitnong Amahan maminaw ug motubag sa ilang mga pag-ampo sa Iyang kaugalingong paagi ug panahon?

Posible nga mga Kalihokan

• Dapita ang mga bata sa pagdrama-drama sa istorya sa anghel nga mipalingkawas ni Pedro sa bilanggoan samtang basahon sa laing bata ang istorya diha sa Mga Buhat 12:1–17.

• Pangutan-a ang mga bata kon unsa ang ilang pagsabot sa “nag-ampo nga mainiton” (Mga Buhat 12:5). Sa unsang paagi gitubag ang mga pag-ampo sa mga tawo? Dapita ang mga bata sa pagpaambit og mga kasinatian diin ang Langitnong Amahan mitubag sa personal o sa pamilya nga pag-ampo. Mahimo usab kang mopaambit og kasinatian diin gitubag Niya ang imong pag-ampo. Mahimo nimong ilakip ang mga kasinatian diin ang tubag miabot sa wala damha nga paagi. Pagpamatuod nga ang Dios nahigugma kanato ug motubag sa atong mga pag-ampo sa paagi ug panahon nga labing maayo alang kanato.

Awhaga ang Pagkat-on diha sa Panimalay

Dapita ang mga bata sa paghimo og usa ka butang nga mopahinumdom kanila sa unsay ilang nakat-onan karon, sama sa usa ka pahinumdom nga mag-ampo.

Pagpalambo sa Atong Pagtudlo

Pagpamatuod sa gisaad nga mga panalangin. Kon dapiton nimo ang mga bata sa Primary sa pagsunod og piho nga baroganan, pagpaambit og mga panalangin nga gisaad sa Dios niadtong mosunod niana nga baroganan. Sama pananglit, mahimo kang mopamatuod bahin sa mga panalangin nga imong nadawat samtang nag-ampo ka inubanan sa hugot nga pagtuo.