Septiyembre 11–17

2 Mga Taga-Corinto 1–7

“Magpasig-uli Kamo ngadto sa Dios”

Samtang ikaw magtuon sa mga sulat ni Pablo ngadto sa mga taga-Corinto, isulat ang pipila sa mga baroganan sa ebanghelyo nga imong nakaplagan ug palandonga unsaon nimo sa paggamit niini sa imong kinabuhi.

I-rekord ang Imong mga Panghunahuna

Usahay, ang pagkalider sa Simbahan nagpasabot og pagsulti sa pipila ka malisod nga mga butang. Tinuod kini sa panahon ni Pablo sama lamang sa karon. Sa dayag usa ka nag-unang sulat gikan ni Pablo ngadto sa mga Santos nga taga-Corinto naglakip og pagpanton ug nakahimo og masakit nga mga pagbati. Sa sulat nga nahimong 2 Mga Taga-Corinto, misulay siya sa pagpasabot unsa ang nakaaghat sa iyang mahait nga mga pulong: “Kay kadto akong gisulat kaninyo gikan sa tuman nga kaguol ug kasakit sa kasingkasing inubanan sa daghang mga luha; dili aron sa pagsakit kaninyo, kon dili aron sa pagpahibalo kaninyo sa kadagaya sa akong gugma alang kaninyo” (2 Mga Taga-Corinto 2:4). Kon kamo ang tigdawat sa pipila ka mga pamanton gikan sa usa ka lider, kini sa piho nagtabang nga mahibaloan nga kini dinasig pinaagi sa Kristohanon nga gugma. Ug bisan niadtong mga sitwasyon diin dili ingon niini, kon kita andam nga motan-aw sa uban sa matang sa gugma nga gibati ni Pablo, kini mas sayon ang pagtubag sa angay nga paagi ngadto sa bisan unsa nga mga kasaypanan. Sama sa gitambag ni Elder Jeffrey R. Holland, “Mao nga pagmapailubon kabahin sa tawhanon nga kahuyang—ang inyong kaugalingon ingon man usab niadtong nagserbisyo uban ninyo niini nga Simbahan gipangulohan sa mga boluntaryo, mortal nga mga lalaki ug babaye. Gawas lang sa Iyang bugtong hingpit nga Anak, ang dili hingpit nga mga tawo mao ang gikatambayayong sa Dios” (“Nagatuo Ako,” Liahona, Mayo 2013, 94).

Mga Ideya alang sa Personal nga Pagtuon sa Kasulatan

2 Mga Taga-Corinto 1:3–7; 4:6–10, 17–18; 7:4–7

Ang akong mga pagsulay mahimong usa ka panalangin.

Nahatagan sa tanang kasakit nga nasinati ni Pablo sa panahon sa iyang kinabuhi, dili kini ikatingala nga misulat siya og daghan mahitungod sa mga katuyoan ug mga panalangin sa kasakit. Samtang ikaw nagbasa sa 2 Mga Taga-Corinto 1:3–7; 4:6–10, 17–18; 7:4–7, paghunahuna mahitungod sa mga paagi nga ang imong mga pagsulay mahimong usa ka panalangin. Sama pananglit, mahimo kang mamalandong kon sa unsa nga paagi ang Dios “naglipay [kanimo] sa tanan [nimong] kasakit” ug sa unsa nga paagi nga ikaw, agig balos, “makahimo sa pagpalipay kanila nga anaa sa bisan unsang kasakit” (2 Mga Taga-Corinto 1:4). O mahimong tutokan nimo kon giunsa sa kahayag ni Jesukristo nga “nagasidlak” diha sa imong kasingkasing, bisan og ikaw “ginasakit” ug “nangalibog” (2 Mga Taga-Corinto 4:6, 8).

Tan-awa usab sa Mosiah 24:13–17; Henry B. Eyring, “Nasulayan, Napamatud-an, ug Nahashasan,” Liahona, Nob. 2020, 96–99; Gospel Topics, “Adversity,” topics.ChurchofJesusChrist.org.

2 Mga Taga-Corinto 2:5–11

Ang pagpasaylo usa ka panalangin nga ako makahatag ug makadawat.

Wala kita makaila kaayo mahitungod sa tawo nga gipasabot ni Pablo diha sa 2 Mga Taga-Corinto 2:5–11––lamang nga nakalapas siya (tan-awa sa mga bersikulo 5–6) ug nga si Pablo gusto nga ang mga Santos mopasaylo kaniya (tan-awa sa mga bersikulo 7–8). Ngano nga kita usahay mapakyas sa “pagpasig-uli sa [atong] gugma ngadto” sa usa ka tawo nga nakasilo kanato? (bersikulo 8). Sa unsang paagi ang pagpugong sa pagpasaylo makadaot sa uban ug sa atong mga kaugalingon? (tan-awa sa mga bersikulo 7, 10–11). Sa unsang paagi ang pagpugong sa pagpasaylo naghatag ni “Satanas … nga kita malupigan”? (bersikulo 11).

Tan-awa usab sa Doktrina ug mga Pakigsaad 64:9–11.

2 Mga Taga-Corinto 5:14–21

Pinaagi sa Pag-ula ni Jesukristo, ako makapasig-uli ngadto sa Dios.

Sama sa ubang mga tawo, si Pablo nahibalo kon sama sa unsa ang mahimong “usa ka bag-o nang binuhat” (2 Mga Taga-Corinto 5:17). Siya gikan sa usa ka tigpanggukod sa mga Kristiyanos ngadto sa walay kahadlok nga tigpanalipod ni Kristo. Samtang ikaw nagbasa sa 2 Mga Taga-Corinto 5:14–21, paghunahuna mahitungod sa mga pangutana nga sama niini: Unsa ang gipasabot sa pasig-uli? Unsa ang gipasabot sa pagpasig-uli ngadto sa Dios? Pamalandonga kon unsa ang nagbulag kanimo gikan sa Dios. Unsa ang imong kinahanglang buhaton aron mas hingpit nga mapasig-uli ngadto Kaniya? Unsaon sa Manluluwas paghimo niana nga posible?

Mahimo usab nimong palandungon kon unsa ang kahulogan nga mamahimong “mga tinugyanan alang ni Kristo” sa “pagpangalagad sa pasig-uli” (mga bersikulo 18, 20). Unsa nga mga panabot ang imong maangkon gikan sa mensahe ni Elder Jeffrey R Holland sa “Ang Pangalagad sa Pagpasig-uli”? (Liahona, Nob. 2018, 77–79).

Tan-awa usab sa 2 Nephi 10:23–25.

2 Mga Taga-Corinto 7:8–11

Ang diosnong kasubo modangat ngadto sa paghinulsol.

Sa kasagaran dili kita maghunahuna sa kasubo isip usa ka maayong butang, apan si Pablo naghisgot sa “diosnon nga kasubo” (2 Mga Taga-Corinto 7:10) isip importante nga bahin sa paghinulsol. Hunahunaa kon unsa ang imong nakat-onan mahitungod sa diosnong kasubo gikan sa mosunod: 2 Mga Taga-Corinto 7:8–11; Alma 36:16–21; Mormon 2:11–15; ug sa mensahe ni Sister Michelle D. Craig “Balaan nga Pagkawala Matagbaw” (Liahona, Nob. 2018, 52–55). Kanus-a ka mibati og diosnon nga kasubo, ug sa epekto niini diha sa imong kinabuhi?

Mga Ideya alang sa Pamilya nga Pagtuon sa Kasulatan ug Home Evening

2 Mga Taga-Corinto 3:1–3.Aduna bay sakop sa imong pamilya nga mihangyo sukad og usa ka tawo sa pagsulat og rekomendasyon alang kanila, sama sa paghangyo og trabaho o aplikasyon alang sa eskwelahan? Hangyoa sila sa pag-asoy mahitungod niini nga kasinatian. Gitudlo ni Pablo nga ang mga kinabuhi sa mga Santos sama sa rekomendasyon nga mga sulat alang sa ebanghelyo ni Jesukristo, “sinulat dili sa tinta, apan sa Espiritu sa buhi nga Dios.” Samtang kamo nagbasa sa 2 Mga Taga Corinto 3:1–3 og dungan, paghisgot kon giunsa sa atong mga ehemplo nga sama sa mga sulat nga mahimong “pagahibaloan ug pagabasahon sa tanang mga tawo,” pagpakita sa kamatuoran ug sa bili sa ebanghelyo. Tingali ang matag sakop sa pamilya makasulat og sulat o “epistola” nagpasabot kon sa unsa nga paagi nga ang laing sakop sa pamilya nahimong usa ka maayong ehemplo sa usa ka disipulo ni Jesukristo. Makahimo sila sa pagbasa sa ilang mga sulat ngadto sa pamilya ug ihatag kini ngadto sa sakop sa pamilya nga ilang gisulatan. Nganong importanting masabtan nga ang atong kinabuhi mao ang “epistola [mga] ni Kristo”?

2 Mga Taga-Corinto 5:6–7.Unsa ang ipasabot sa “nagakinabuhi pinaagi sa pagtuo, dili pinaagi sa makita”? Unsa ang atong gibuhat sa pagpakita nga kita nagtuo diha sa Manluluwas bisan tuod kita dili makakita Kaniya?

2 Mga Taga-Corinto 5:17.Makahunahuna ba o makakaplag ba ang imong pamilya og mga panig-ingnan sa kinaiyahan sa mga butang nga moagi sa importanting mga kausaban ug mamahimong usa ka bag-ong mga binuhat? (tan-awa ang mga hulagway diha sa kataposan sa latid). Sa unsang paagi ang ebanghelyo ni Jesukristo nag-usab kanato?

2 Mga Taga-Corinto 6:1–10.Sumala sa 2 Mga Taga-Corinto 6:1–10, unsa ang gipasabot nga mamahimong “mga tigpangalagad sa Dios”? (bersikulo 4). Unsa nga mga kalidad ang usa ka tigpangalagad sa Dios aduna?

2 Mga Taga-Corinto 6:14–18.Unsaon nato pagsunod ang tambag ni Pablo sa “panggula kamo gikan [sa pagkadili matarong], ug magpalain kamo,” samtang naghigugma usab niadtong naglibot kanato?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Tabangi Ako, Mahal nga Amahan,” Songbook sa mga Bata, 36.

Pagpalambo sa Atong Pagtudlo

Ipaambit ang mga leksiyon nga naggamit og mga butang. Ang ubang mga konsepto sa ebanghelyo, sama sa Pag-ula, mahimong lisod nga masabtan. Hunahunaa ang paggamit og mga hulagway o mga butang nga makatabang sa imong pamilya nga makasabot sa mga baroganan nga imong nakaplagan diha sa mga kasulatan.

Kon makabig kita ngadto sa ebanghelyo ni Kristo, ang atong kausaban talagsaon kaayo nga gihulagway kini ni Pablo nga nahimong usa ka “bag-o nang binuhat” (2 Mga Taga-Corinto 5:17).