Oktubre 2–8

Mga Taga-Efeso

“Aron sa Pag-andam sa Tibuok Katawhan sa Dios”

Samtang imong tun-an ang Sulat ngadto sa Mga Taga-Efeso, hunahunaa kon unsa nga mga baroganan ang hatagan nimo og gibug-aton aron mapanalanginan ang mga bata nga imong gitudloan. Irekord ang bisan unsang ideya nga mosulod sa hunahuna samtang magbasa ka.

Dapita ang Pagpaambit

Dapita ang mga bata nga mobarog nga maglinya. Sugod sa atubangan sa linya, hatagi ang matag bata og kahigayonan sa pagpaambit og usa ka butang nga iyang bag-ohay lang nga nakat-onan mahitungod sa ebanghelyo atol sa pamilya nga pagtuon sa kasulatan, sa Primary, o sa laing dapit.

Itudlo ang Doktrina: Mas Gagmay nga mga Bata

Mga Taga-Efeso 2:19

Ang mga miyembro sa Simbahan kinahanglang mahimong mga higala ug “mga kauban.”

Ang mga bata ba sa imong klase mas sama sa “mga langyaw” o “mga kauban” sa usag usa ug sa ubang mga miyembro sa ward? Tabangi sila nga makasabot nga bisan tuod aduna kitay mga kalahian, ang Manluluwas nagtabang kanato nga magkahiusa ug mohigugma sa usag usa.

Posible nga mga Kalihokan

• Pagbutang og hulagway sa Manluluwas diha sa sentro sa lawak. Dapita ang mga bata nga mobarog sa lainlaing bahin sa lawak aron morepresentar sa “mga langyaw” o “mga dumuduong.” Tabangi sila nga makasabot nga kini nga mga pulong nagpasabot sa mga tawo nga wala pa nato mailhi. Samtang basahon nimo ang Mga Taga-Efeso 2:19, dapita sila nga molakaw padulong sa hulagway ni Kristo hangtod nga nagbarog na sila nga dug-ol sa usag usa. Sultihi sila nga samtang mas mopaduol kita sa Manluluwas, mahimo kitang mahiusa sa uban isip “mga kauban,” o mga higala.

• Pangita og mga hulagway sa mga bata gikan sa lainlaing parte sa kalibotan, ug tagoi kini libot sa lawak. Pagbutang og hulagway sa Manluluwas diha sa atubangan sa lawak. Dapita ang imong klase nga magpares sama sa mga misyonaryo ug magpuli-puli sa pagpangita og hulagway sa usa ka “langyaw” aron mabutang duol sa hulagway sa Manluluwas. Tabangi sila nga makasabot nga kon ang mga tawo mabunyagan, mahimo sila nga kabahin sa atong pamilya sa Simbahan, o sa “panimalay sa Dios.” Unsaon nato sa pagtabang ang usa ka bag-o nga tawo aron mobati nga giabiabi?

Mga Taga-Efeso 6:1–3

Gusto sa Langitnong Amahan nga motuman ko sa akong mga ginikanan.

Samtang imong basahon ang Mga Taga-Efeso 6:1–3, paghunahuna og mga paagi nga makatabang ka sa mga bata nga makasabot kon nganong importante ang pagtuman sa ilang mga ginikanan.

Posible nga mga Kalihokan

• Basaha ang Mga Taga-Efeso 6:1 ngadto sa klase, o tabangi ang usa sa mga bata sa pagbasa niini. Tabangi sila sa paghunahuna sa mga panahon sa dihang gituman nila ang ilang mga ginikanan. Hangyoa sila sa pagpaambit kon sa unsang paagi nga sila napanalangin tungod sa pagtuman ug unsa ang ilang gibati sa dihang sila mituman. Nganong importante man nga motuman sa atong mga ginikanan?

• Kantaha og dungan ang usa ka kanta mahitungod sa pagkamasulundon, sama sa “Dali Ko nga Motuman” (Songbook sa mga Bata, 71). Papuli-puliha ang mga bata sa pagngalan og usa ka butang nga gihangyo sa ilang mga ginikanan nga ilang buhaton, ug dapita sila nga magpakaaron-ingnon sa pagbuhat niana nga butang.

• Ipakita ang hulagway ni Jesukristo nga gibunyagan (tan-awa sa Libro sa mga Hulagway sa Ebanghelyo, nu. 35), ug ipaambit kon sa unsang paagi nga ang Manluluwas mituman sa Langitnong Amahan pinaagi sa pagpabunyag (tan-awa sa 2 Nephi 31:6–7). Pagpaambit og usa ka kasinatian diin mituman ka sa imong mga ginikanan ug napanalanginan. Nganong gusto man sa Langitnong Amahan nga motuman kita sa atong mga ginikanan?

Mga Taga-Efeso 6:10–18

Ang hinagiban sa Dios makapanalipod kanako gikan sa daotan.

Unsaon nimo pagtabang ang mga bata nga makasabot nga ang pagbuhat og matarong nga mga butang susama sa pagsul-ob og hinagiban?

Posible nga mga Kalihokan

• Ipakita ang hulagway sa usa ka tawo nga nagsul-ob og hinagiban, sama sa usa nga anaa sa pahina sa kalihokan karong semanaha diha sa latid niini nga semana sa Dali, Sunod Kanako—Alang sa mga Indibidwal ug mga Pamilya. Samtang imong i-summarize ang Mga Taga-Efeso 6:10–18, pakit-a ang mga bata kon sa unsang paagi nga ang managlahi nga mga piraso sa hinagiban mopanalipod sa lainlaing parte sa lawas. (Tan-awa sa “Ang Tibuok Taming sa Dios,” Liahona, Hunyo 2016, 70–71.)

• Pagdala og pipila ka butang ngadto sa klase nga nagrepresentar sa mga piraso sa hinagiban nga gihisgotan diha sa Mga Taga-Efeso 6:14–17 (sama pananglit, kalo o apron), o paghimo og yanong mga piraso sa hinagiban gikan sa papel. Papuli-puliha ang mga bata sa pagsul-ob sa “hinagiban.” Tabangi sila nga makasabot kon sa unsang paagi kita magsul-ob sa hinagiban sa Dios (sama pananglit, pinaagi sa pagtuon sa mga kasulatan, pagserbisyo sa uban, pag-ampo, pagtuman, ug uban pa). Hisgoti kon sa unsang paagi nga ang pagbuhat niini nga mga butang makapanalipod kanato gikan sa daotan.

Itudlo ang Doktrina: Mas Magulang nga mga Bata

Mga Taga-Efeso 2:13–19

Kita “mga kauban” diha sa panimalay sa Dios.

Malig-on ang mga bata kon aduna silay maayong mga higala diha sa ebanghelyo. Unsaon nimo sila pagtabang sa pagpalambo og mas maayo nga panaghigalaay sa usag usa?

Kita “mga kauban” uban sa mga Santos sa Dios.

Posible nga mga Kalihokan

• Basaha og dungan ang Mga Taga-Efeso 2:19, ug hisgoti kon unsay gipasabot nga mahimong usa ka langyaw o dumuduong. Pagpaambit og kasinatian diin gibati nimo nga sama sa usa ka langyaw o dumuduong ug usa ka tawo ang mitabang nimo nga mobati nga giabiabi ug gidawat. Dapita ang mga bata sa pagpaambit og susama nga mga kasinatian. Unsa ang atong mabuhat aron mahimo nga “mga kauban” imbes nga mga langyaw? Aduna bay mga bata sa imong klase kinsa dili kanunay motambong, tingali tungod kay mibati sila nga daw mga langyaw? Tabangi ang mga bata sa paghimo og plano nga matabangan kadto nga mga miyembro nga mobati nga giabiabi ug gihigugma.

• Aron matabangan ang mga bata nga mapalig-on ang ilang mga relasyon sa usag usa, pagsulat og pipila ka pangutana diha sa pisara nga makaaghat kanila sa pagpaambit og usa ka butang mahitungod sa ilang mga kaugalingon, sama sa Kanus-a man kamo nakasulay nga natubag ang inyong pag-ampo? o Unsa ang paborito ninyong buhaton uban sa inyong pamilya? Bahina ang mga bata nga magpares-pares, ug dapita sila sa pagpangutana sa usag usa sa mga pangutana. Unsa man ang atong nakat-onan mahitungod sa usag usa?

Mga Taga-Efeso 6:1–3

Gusto sa Langitnong Amahan nga motuman ko ug motahod sa akong mga ginikanan.

Paghunahuna og mga paagi nga makatabang ka sa mga bata nga makasabot kon nganong importante ang pagtuman sa ilang mga ginikanan.

Posible nga mga Kalihokan

• Dapita ang mga bata sa pagbasa sa Mga Taga-Efeso 6:1–3 sa tagsa-tagsa ug sa pagtino sa mga pulongan nga importante kanila. Dapita sila sa pagpaambit niini nga mga pulongan ug kon nganong gibati nila nga importante ang mga pulongan.

• Dapita ang mga bata sa pagpangita ug paghisgot mahitungod sa mga ehemplo sa mga tawo diha sa mga kasulatan kinsa mituman ug mitahod sa ilang mga ginikanan, sama sa Manluluwas (tan-awa sa Lucas 2:42–52), ni Ruth (tan-awa sa Ruth 1), o ni Nephi (tan-awa sa 1 Nephi 3:1–8). Nganong importante man nga tumanon ug tahoron ang atong mga ginikanan?

• Hatagi ang matag bata og usa ka piraso sa papel nga adunay pulong nga tahod sa ibabaw. Hisgoti kon unsay gipasabot sa pulong. Dapita ang mga bata sa pagsulat o pagdrowing diha sa ilang mga papel og usa ka butang nga ilang mahimo aron mapakita nga nagtahod sila sa ilang mga ginikanan.

Mga Taga-Efeso 6:10–18

Ang hinagiban sa Dios makapanalipod kanako gikan sa daotan.

Samtang imong basahon ang Mga Taga-Efeso 6:10–18, paghunahuna og pipila ka espirituhanon nga mga peligro nga giatubang sa mga bata ug sa unsang paagi ka makatabang sa paglig-on sa mga bata batok niini.

Posible nga mga Kalihokan

• Samtang basahon sa usa ka bata ang Mga Taga-Efeso 6:10–18, hangyoa ang laing bata sa paglista o pagdrowing diha sa pisara sa mga piraso sa hinagiban nga gihisgotan. Nganong importante man ang hinagiban diha sa pakig-away? Sa unsang paagi nga makasul-ob kita og espirituhanon nga hinagiban kada adlaw?

• I-assign ang matag bata sa pagdrowing ug pagngalan og usa ka piraso sa hinagiban nga gihulagway diha sa Mga Taga-Efeso 6:14–17. Sa unsang paagi kini nga mga piraso sa hinagiban makapanalipod kanato gikan sa daotan? Unsa ang gisaad sa Ginoo niadtong mosul-ob sa hinagiban sa Dios? (tan-awa sa Mga Taga-Efeso 6:13). Unsay gipasabot sa “makasukol kamo inig-abot na sa daotan nga adlaw”?

Awhaga ang Pagkat-on diha sa Panimalay

Dapita ang mga bata nga magbantay karong semanaha alang sa usa ka tawo nga tingali mobati nga daw usa ka langyaw. Hagita sila sa paghimo og bisan unsa nga makatabang niana nga tawo.

Pagpalambo sa Atong Pagtudlo

Tabangi ang gagmay nga mga bata nga makakat-on gikan sa mga kasulatan. Ang gagmay nga mga bata makakat-on gikan sa mga kasulatan, apan tingali kinahanglan nilang tutokan ang usa ka bersikulo o bisan usa lamang ka importanting pulongan. Mahimo nimong dapiton ang mga bata sa pagbarog kon makadungog sila og piho nga pulong o pulongan. (Tan-awa sa Pagtudlo sumala sa Pamaagi sa Manluluwas, 25–26.)