Melchizedek Blesses Abram [Si Melchizedek Nagpanalangin ni Abram], ni Walter Rane. Gasa sa artist

Nobyembre 6–12

Mga Hebreo 7–13

“Pangulong Pari sa mga Maayong Butang nga Ania na Dinhi”

Samtang imong rebyohon ug pamalandongan kini nga latid, pagmatngon sa mga pag-aghat nga imong nadawat mahitungod sa mga bata nga imong tudloan. Ang Espiritu motabang kanimo sa pagpangita og mga mensahe alang kanila diha sa Mga Hebreo 7–13.

Dapita ang Pagpaambit

Hangyoa ang mga bata sa pagpaambit og mga butang nga gibuhat nila ug sa ilang pamilya aron magkat-on sa ebanghelyo diha sa panimalay. Dapita sila sa pagpaambit sa pipila sa ilang paborito nga mga kasinatian sa pagkat-on sa ebanghelyo uban sa ilang mga pamilya.

Itudlo ang Doktrina: Mas Gagmay nga mga Bata

Mga Hebreo 7:1–6

Ang pagkapari makatabang kanato sa daghang paagi.

Ang Mga Hebreo 7:1–6 makahatag og oportunidad nga mapaila ngadto sa mga bata ang mga panalangin sa pagkapari.

Posible nga mga Kalihokan

• Ipasabot og kadiyot kon kinsa si Abraham, ug dayon gamita ang Mga Hebreo 7:1–6 aron sa pagtudlo nga si Abraham mibayad og ikapulo ngadto kang Melchizedek (tan-awa usab sa Hubad ni Joseph Smith, Genesis 14:36–40 [sa Giya ngadto sa mga Kasulatan]). Ipasabot nga si Melchizedek naghupot sa pagkapari, nga mao ang gahom sa Dios, ug gigamit kini ni Melchizedek aron sa pagpanalangin ni Abraham. Ang mga bata malingaw tingali nga idrama-drama ang istorya gamit ang yanong mga props, sama sa usa ka korona ug sobre sa ikapulo.

• Dapita ang usa ka naghupot sa Aaronic ug Melchizedek nga Pagkapari sa pagbisita sa klase ug sa pagsulti sa mga bata kon giunsa nila paggamit ang pagkapari aron sa pagpanalangin sa uban. Dayon pakit-a ang mga bata og mga hulagway sa lainlain nga ordinansa sa pagkapari (alang sa mga ehemplo, tan-awa sa mga hulagway 103–8 diha sa Libro sa mga Hulagway sa Ebanghelyo). Tabangi ang mga bata sa pagtino kon unsa nga pagkapari ang gikinahanglan alang sa matag ordinansa ug ihatag kana nga hulagway ngadto sa tukma nga naghupot sa pagkapari aron pagunitan.

Mga Hebreo 11:1–32

Ang hugot nga pagtuo mao ang pagtuo sa mga butang nga dili nato makita.

Bisan og dili kita makakita sa Langitnong Amahan ug ni Jesukristo, makapalambo kita og hugot nga pagtuo diha Kanila ug sa Ilang mga saad, nga magsunod sa mga ehemplo sa matinud-anon nga mga tawo nga gihulagway diha sa Mga Hebreo 11.

Posible nga mga Kalihokan

• Ipakita ang usa ka hulagway ni Jesus. Ibutang palibot sa lawak ang pipila ka butang nga nagrepresentar sa “mga ebidensya” nga tinuod Siya bisan tuod dili kita makakita Kaniya (sama sa mga kasulatan, usa ka hulagway sa Unang Panan-awon, ug hulagway sa kalibotan). Dapita ang mga bata sa pagpangita sa mga butang, ug dayon ipaambit kanila kon sa unsang paagi nga ang matag butang makatabang kanato nga makabaton og hugot nga pagtuo nga buhi si Jesus.

• Pagdala og papel nga paypay, ug papuli-puliha ang mga bata sa pagbatyag sa hangin sa paypay sa ilang mga nawong. Tudloi sila nga dili nato makita ang hangin, apan mabatyagan nato kini. Sa samang paagi, dili kita makakita sa Langitnong Amahan ug ni Jesukristo, apan atong mabati ang Ilang gugma ug makabaton og hugot nga pagtuo nga tinuod Sila.

• Ipaambit ang mga istorya sa usa o dugang pa nga mga tawo nga gihisgotan diha sa Mga Hebreo 11:4–32. Makakaplag usab ka og mga istorya mahitungod niini nga mga tawo diha sa Mga Istorya sa Daang Tugon. Unsa ang gibuhat niini nga mga tawo aron sa pagpakita nga aduna silay hugot nga pagtuo sa usa ka butang nga dili nila makita? Ipaambit ang pipila ka panalangin nga imong nadawat tungod sa imong hugot nga pagtuo.

Mga Hebreo 13:5–6

Ang Langitnong Amahan ug si Jesukristo motabang kanato ug dili mobiya kanato.

Unsa nga mga pagsulay kaha ang gisinati sa mga bata? Sa unsang paagi kaha ang mensahe sa Mga Hebreo 13:5–6 makatabang kanila?

Posible nga mga Kalihokan

• Rebyoha ang pipila ka istorya sa Bag-ong Tugon nga nakat-onan sa mga bata niini nga tuig diin ang Manluluwas mitabang sa uban, sama niadtong giayo Niya ang tawo nga paralitiko (tan-awa sa Lucas 5:18–26) o mipakaon sa 5,000 (tan-awa sa Mateo 14:15–21). Tabangi ang mga bata nga makakat-on sa pulongan nga “Ang Ginoo maoy akong magtatabang” (Mga Hebreo 13:6).

• Dapita ang mga bata sa pagdrowing og hulagway sa usa ka higayon sa dihang mihupay kanila ang usa ka tawo sa dihang nahadlok sila. Basaha ang Mga Hebreo 13:5–6 ngadto kanila, ug pagpamatuod nga ang Langitnong Amahan motabang kanato ug dili gayod mobiya kanato. Tabangi ang mga bata sa paggunting og mga papel nga kasingkasing nga igo ang gidak-on aron motabon sa mga drowing. Unsa ang pipila ka butang nga makatabang kanato nga mobati nga mas duol sa Langitnong Amahan? Isulat ang pipila niini nga mga butang diha sa mga kasingkasing.

• Tudloi ang mga bata og usa ka awit kon sa unsang paagi nga ang Langitnong Amahan ug si Jesus nahigugma ug nagtabang kanato, sama sa “Sultihi Ko, Mahal nga Ginoo” (Songbook sa mga Bata, 75). Unsaon nato pagkahibalo nga ang Langitnong Amahan ug si Jesukristo duol kanato? Hisgoti ang usa ka panahon sa dihang nabati nimo nga “ang Ginoo maoy [imong] magtatabang.”

Itudlo ang Doktrina: Mas Magulang nga mga Bata

Mga Hebreo 7:1–4

Ang mga lider sa Simbahan nagsunod sa Manluluwas.

Unsaon nimo paggamit niini nga mga bersikulo aron matabangan ang mga bata nga makasabot nga kadtong gitawag sa pagserbisyo sa Simbahan sa Ginoo kinahanglan nga magmatinud-anon ug moserbisyo sa uban sama sa Iyang gibuhat?

Posible nga mga Kalihokan

• Tabangi ang mga bata sa paglista og mga butang nga ilang nahibaloan mahitungod sa duha ka talagsaon nga mga lider nga si Abraham ug Melchizedek. Makakita sila og tabang diha sa Mga Hebreo 7:1–4; Abraham 1:1–2; ug sa Hubad ni Joseph Smith, Genesis 14:25–40 diha sa Giya ngadto sa mga Kasulatan. Unsa nga mga Kristohanong hiyas ang anaa niini nga mga tawo nga nakatabang kanila sa pagtahod sa pagkapari?

• Hangyoa ang mga bata sa pagbasa sa Mga Hebreo 7:1–2 ug sa pagpangita sa mga titulo nga gigamit sa paghulagway kang Melchizedek. Sa unsang paagi kini nga mga titulo nagpahinumdom kanato ni Jesukristo? Tabangi sila sa paghunahuna og mga paagi diin si Jesus mao ang “Hari sa Kalinaw.” Dapita sila sa paghisgot mahitungod sa ubang mga naghupot sa pagkapari kinsa mga ehemplo usab sa pagsunod sa Manluluwas.

• Pagpaambit og kasinatian diin ang imong hugot nga pagtuo sa Manluluwas napalig-on tungod sa serbisyo sa usa ka matarong nga naghupot sa pagkapari. Tabangi ang mga bata sa paghunahuna og mga paagi nga ang pagkapari nakapanalangin kanila.

Mga Hebreo 11

Ang Langitnong Amahan moganti niadtong adunay hugot nga pagtuo.

Ang Mga Hebreo 11 naglangkob og daghang ehemplo sa mga tawo kinsa napanalanginan sa dihang milihok sila uban sa hugot nga pagtuo. Hain sa mga istorya ang labing makadasig o makatabang sa mga bata nga imong gitudloan?

Posible nga mga Kalihokan

• Dapita ang mga bata sa paghimo og lista diha sa pisara sa mga butang nga ilang nakat-onan mahitungod sa hugot nga pagtuo diha sa Mga Hebreo 11:1–3, 6. Hatagi ang matag bata og ngalan sa usa ka tawo nga gihisgotan diha sa Mga Hebreo 11, ug dapita sila sa pagbasa sa mga bersikulo nga may kalabotan niana nga tawo. Hangyoa sila sa pagpaambit og mga timailhan mahitungod sa tawo aron ang ubang mga bata makatag-an kon si kinsa kini. Giunsa niini nga mga tawo sa pagpakita og hugot nga pagtuo, ug sa unsang paagi nga ang Langitnong Amahan miganti kanila? (Alang sa mga hulagway niini nga mga tawo, tan-awa ang seksiyon sa Daang Tugon diha sa Libro sa mga Hulagway sa Ebanghelyo.)

• Human sa pagbasa mahitungod sa pipila sa matinud-anon nga mga ehemplo diha sa Mga Hebreo 11, hangyoa ang mga bata sa pagsulat mahitungod sa usa ka tawo nga ilang nailhan kinsa mipakita og hugot nga pagtuo. Dapita ang pipila ka estudyante nga mopaambit sa ilang mga ehemplo diha sa klase.

Mga Hebreo 12:5–11

Ang Ginoo mopanton niadtong Iyang gihigugma.

Kini nga mga bersikulo makatabang sa mga bata nga makasabot nga ang Langitnong Amahan, ang ilang mga ginikanan, ug ang uban mokorihir kanila tungod kay sila nahigugma kanila ug gusto nga makat-on sila gikan sa ilang mga sayop.

Posible nga mga Kalihokan

• Basaha og dungan ang Mga Hebreo 12:5–11, ug hangyoa ang mga bata sa pagpangita og mga rason nganong ang Langitnong Amahan mopanton kanato (mokorihir o modisiplina kanato). Unsa ang gitudlo niini kanato kon nganong ang yutan-ong mga ginikanan mokorihir usab sa ilang mga anak? Unsaon nato pagtubag ang mahigugmaon nga pagkorihir?

• Pagpaambit og mga ehemplo sa mga tawo diha sa mga kasulatan kinsa gipanton sa Ginoo ug naghinulsol (pananglitan, tan-awa sa 1 Nephi 16:25–27; Ether 2:13–15). Sa unsang paagi nga sila maayo nga mga ehemplo sa mga baroganan diha sa Mga Hebreo 12:5–11?

• Human sa pagbasa sa Mga Hebreo 12:5–11, dapita ang mga bata sa pagsulat og pipila ka butang nga paningkamotan nilang hinumdoman kon korihian sila sa ilang mga sayop.

Awhaga ang Pagkat-on diha sa Panimalay

Dapita ang mga bata sa pagsulat o pagdrowing og hulagway sa usa ka butang nga ilang nakat-onan sa klase. Awhaga sila sa paggamit niini aron sa pagpaambit sa unsay ilang nakat-onan ngadto sa ilang mga pamilya.

Pagpalambo sa Atong Pagtudlo

Gamita ang mga pahina sa kalihokan. Samtang kompletohon sa mga bata ang mga pahina sa kalihokan atol sa klase, gamita ang panahon sa pagrebyo sa mga baroganan gikan sa leksiyon.