Little Lamb [Gamay nga Nating Karnero], ni Jenedy Paige

Disyembre 18–24

Pasko

“Maayong Balita sa Dakong Kalipay”

Hunahunaa kon unsaon ang pagpamalandong sa pagkatawo ug sa misyon sa Manluluwas makatabang sa pagdala og usa ka espiritu sa kalinaw ug pagkasagrado ngadto sa panahon sa Pasko.

I-rekord ang Imong mga Panghunahuna

Ngano nga ang pagkahimugso sa usa ka batang masuso makahatag og dakong kalipay? Tingali tungod kay ang bag-ong batang masuso mahimong usa ka simbolo sa paglaom. Adunay usa ka butang mahitungod sa bag-ong kinabuhi nga puno sa mga posibilidad nga nagdapit kanato sa pagpamalandong kon unsa ang umaabot sa kinabuhi niana nga bata ug unsang talagsaong mga butang ang iyang matuman. Wala pa gayod sukad nga mas natinuod kay sa pagkahimugso sa Anak sa Dios, si Jesukristo. Wala pa gayod sukad nga mas adunay paglaom nga gibutang diha sa usa ka bata, ug wala pa gayod sukad nga may natawo uban sa daghan kaayo nga saad.

Sa dihang ang anghel midapit sa mga magbalantay sa karnero sa pagpangita sa bag-ong natawo nga bata diha sa usa ka pasungan, mihatag usab siya kanila og mensahe mahitungod niana nga bata. Usa kadto ka mensahe sa paglaom—nga kini nga bata mianhi sa yuta aron sa pagtuman sa usa ka sagrado nga misyon. Ang mga magbalantay sa karnero mipahibalo sa ilang mensahe “gipanugilon … ug ang tanan nakadungog niini nahibulong sa gisulti kanila sa mga magbalantay sa karnero. “Apan kining tanang mga butanga gitipigan ni Maria nga namalandong niini diha sa iyang kasingkasing” (Lucas 2:17–19). Tingali maayo nga mosunod sa ehemplo ni Maria niining Pasko: sa pagpamalandong diha sa imong kasingkasing sa mga butang nga imong nakat-onan mahitungod sa Manluluwas niini nga tuig. Giunsa Niya pagtuman ang Iyang misyon sa katubsanan diha sa mga istorya nga imong nabasa? Ug mas importante, sa unsa nga paagi nga ang Iyang misyon nakausab sa imong kinabuhi? Dayon mahimo kang mobati nga nadasig sa pagsunod sa ehemplo sa mga magbalantay: unsaon nimo sa “pagpanugilon” sa unsay nahimo ni Jesukristo alang kanimo?

Mga Ideya alang sa Personal nga Pagtuon sa Kasulatan

Mateo 1:18–25; 2:1–12; Lucas 1:26–38; 2:1–20

Si Jesukristo mikunsad aron matawo taliwala kanato dinhi sa yuta.

Bisan kon ikaw nakabasa o nakadungog sa istorya sa pagkatawo ni Jesukristo sa daghang na nga higayon kaniadto, pagtuon niini karon uban niini sa hunahuna: “Ang Pasko dili lamang usa ka pagsaulog sa unsa nga paagi si Jesus mianhi sa kalibotan apan usab sa pagkasayod kinsa Siya—ang atong Ginoo ug Manluluwas, si Jesukristo—ug ngano nga mianhi Siya” (Craig C. Christensen, “Ang Kompleto nga Istorya sa Pasko” [Debosyonal sa Pasko sa Unang Kapangulohan, Dis. 4, 2016], broadcasts.lds.org).

Unsa ang imong nahibaloan mahitungod kon kinsa si Jesukristo sa wala pa siya matawo? (tan-awa, sama pananglit, Juan 17:5; Mosiah 3:5; Doktrina ug mga Pakigsaad 76:13–14, 20–24; Moises 4:2). Sa unsa nga paagi kini nga kahibalo nag-apekto sa paagi sa imong gibati sa dihang imong nabasa ang mahitungod sa Iyang pagkatawo?

Unsa ang imong nahibaloan mahitungod kon nganong si Jesukristo mianhi sa yuta? (tan-awa, sama pananglit, Lucas 4:16–21; Juan 3:16–17; 3 Nephi 27:13–16; Doktrina ug mga Pakigsaad 20:20–28). Sa unsa nga paagi kini nga kahibalo nag-apekto sa imong pagbati mahitungod sa Manluluwas? Sa unsa nga paagi kini nag-apekto sa imong pagpuyo?

Tan-awa usab sa 2 Mga Taga-Corinto 8:9; Mga Hebreohanon 2:7–18; 1 Nephi 11:13–33; Alma 7:10–13; “The Nativity” (video), ChurchofJesusChrist.org.

1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25

Gituman ni Jesukristo ang Iyang misyon ug mihimo niini nga posible alang kanako nga makapanunod sa kinabuhing dayon.

Bisan og ang istorya sa pagkatawo ni Kristo gilibotan pinaagi sa milagroso nga mga panghitabo, ang Iyang pagkatawo mahimo lamang unta og usa sa laing pagkatawo kon dili pa tungod sa importante nga buhat nga Iyang natuman sa ulahing bahin sa Iyang kinabuhi. Sama sa gisulti ni Presidente Gordon B. Hinckley, “Ang masuso nga si Jesus sa Betlehem mahimong usa lamang sa laing masuso kon wala ang matubsanong Kristo sa Getsemani ug sa Kalbaryo, ug ang madaugong kamatuoran sa Pagkabanhaw” (“The Wondrous and True Story of Christmas,” Ensign, Dis. 2000, 5).

Gethsemane [Getsemani], pinaagi ni J. Kirk Richards

Ebidensya sa balaang misyon sa Manluluwas ug sa Iyang gamhanang gugma alang sa uban makaplagan diha sa tibuok Bag-ong Tugon. Unsa nga mga tudling o mga istorya ang moabot sa imong hunahuna? Mahimo nimong tan-awon pag-usab pinaagi niini nga kapanguhaan o sa imong journal sa pagtuon ug ribyoha ang pipila sa mga panghunahuna nga imong na-rekord. Mahimo usab nimong basahon ang 1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25 ug pamalandonga kon sa unsa nga paagi ang Manluluwas ug ang Iyang buhat nagpanalangin sa imong kinabuhi. Unsa ikaw nadasig sa pag-usab diha sa imong kinabuhi? Unsaon nimo sa pagpahigayon sa gahom sa Manluluwas?

Mga Ideya alang sa Pamilya nga Pagtuon sa Kasulatan ug Home Evening

Mateo 1:18–25; 2:1–12; Lucas 1:26–38; 2:1–20.Unsaon nimo pagsaulog ang pagkatawo ni Jesukristo uban sa imong pamilya? Ania ang pipila ka mga ideya, o ikaw makahimo og imong kaugalingon:

• Basaha o i-drama ang mga bahin sa istorya sa Pagkatawo nga magdungan.

• Tan-awa ang video “The Christ Child” (ChurchofJesusChrist.org).

• Suhira ang pipila sa mga kapangohaan diha sa “Jesukristo” koleksyon diha sa Gospel Library, ilabi diha sa seksiyon nga giulohan “Ang Iyang Pagkatawo (Pasko).”

• Pagtan-aw og debosyonal sa Pasko sa Unang Kapangulohan (broadcasts.ChurchofJesusChrist.org).

• Panganta og mga himno sa Pasko og dungan, o pagpili og mga silingan o mga higala nga bisitahan ug kantahan sila (tan-awa sa Mga Himno,, nus.201–14).

• Paghimo og buhat sa pagserbisyo.

• Hangyoa ang mga sakop sa pamilya sa pagpangita alang sa mga detalye sa istorya sa Pagkatawo nga naghatag kanila og mga ideya alang sa mga dayan-dayan o mga dekorasyon nga sila makahimo sa pagpahinumdom kanila ni Jesukristo.

1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25.Ngano nga kita mapasalamaton nga natawo si Jesukristo? Unsa nga mga gasa ang Iyang gihatag kanato? Unsaon nato pagpakita Kaniya sa atong pagka-mapasalamaton? Ang imong pamilya makakanta og awit nga nagtudlo mahitungod sa Iyang misyon, sama sa “Mipadala sa Bugtong Anak” (Songbook sa mga Bata, 20).

“Ang Buhi nga Kristo: Ang Pagpamatuod sa mga Apostoles.”Kon gusto nimong motabang sa imong pamilya nga motutok sa Manluluwas sa panahon sa Pasko, tingali kamo makagahin og panahon sa pagbasa ug pagtuon og dungan sa “Ang Buhi nga Kristo: Ang Pagpamatuod sa mga Apostoles” (ChurchofJesusChrist.org). Tingali makasag-ulo ka og mga tudling gikan sa “Ang Buhi nga Kristo” o makapangita og mga paghulagway sa kinabuhi sa Manluluwas diha sa Bag-ong Tugon nga nagsuporta sa mga pamahayag niini. Mahimo usab nga ikaw makadapit sa matag sakop sa pamilya sa pagsulat sa iyang kaugalingong pagpamatuod ni Jesukristo ug, kon naaghat, mobasa niini ngadto sa pamilya.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Didto sa Pasongan,” Songbook sa mga Bata, 19.

Pagpalambo sa Personal nga Pagtuon

Pangitaa si Jesukristo. Ang mga kasulatan nagtudlo kanato nga ang tanang mga butang nagpamatuod ni Jesukristo (tan-awa sa Moises 6:62–63), busa kita kinahanglan mangita Kaniya diha sa tanang mga butang. Samtang ikaw magbasa sa mga kasulatan, hunahunaa ang pagtimaan o pagmarka sa mga bersikulo nga nagtudlo kanimo mahitungod Kaniya. Paggahin og panahon sa mga adlaw nga nagsingabot ang Pasko sa pagpangita sa mga butang sa imong palibot nga nagpamatuod ni Jesukristo.

The Nativity [Ang Pagkatawo], ni Brian Call