Bag-ong Tugon 2023
Mga Panudlo alang sa Panahon sa Pagpanganta ug sa Pasundayag sa mga Bata sa Panagtigom alang sa Sakramento

“Mga Panudlo alang sa Panahon sa Pagpanganta ug sa Pasundayag sa mga Bata sa Panagtigom alang sa Sakramento,” Dali, Sunod Kanako—Alang sa Primary: Bag-ong Tugon 2023 (2023)

“Mga Panudlo alang sa Panahon sa Pagpanganta ug sa Pasundayag sa mga Bata sa Panagtigom alang sa Sakramento,” Dali, Sunod Kanako—Alang sa Primary: 2023

Mga bata sa Primary nga nanganta samtang naghimo og mga aksiyon sa kamot

Mga Panudlo alang sa Panahon sa Pagpanganta ug sa Pasundayag sa mga Bata sa Panagtigom alang sa Sakramento

Minahal nga mga Kapangulohan sa Primary ug mga Lider sa Musika,

Ang mga awit sa Primary maoy usa ka gamhanan nga himan sa pagtabang sa mga bata nga makat-on mahitungod sa plano sa Langitnong Amahan sa kalipay ug sa sukaranang mga kamatuoran sa ebanghelyo ni Jesukristo. Samtang manganta ang mga bata mahitungod sa mga baroganan sa ebanghelyo, ang Espiritu Santo mopamatuod sa katinuod niini. Ang mga pulong ug musika magpabilin diha sa mga hunahuna ug mga kasingkasing sa mga bata sa tibuok nilang kinabuhi.

Pagtinguha sa tabang sa Espiritu samtang mangandam kamo sa pagtudlo sa ebanghelyo pinaagi sa musika. Ipaambit ang inyong pagpamatuod kalabot sa mga kamatuoran nga inyong gikanta. Tabangi ang mga bata nga makakita kon sa unsang paagi ang musika adunay kalabotan sa unsay ilang nakat-onan ug nasinati diha sa panimalay ug sa mga klase sa Primary. Ang mga bata ug ang ilang mga pamilya mapanalanginan pinaagi sa inyong mapahinungoron nga mga paningkamot sa pagtabang sa mga bata nga mokanta og sagrado nga musika.

Gimahal namo kamo ug among ipadangat ang among pasalamat alang sa mapahinungoron nga serbisyo nga inyong gihatag sa paglig-on ug pagpanalipod sa atong bililhong mga bata.

Ang Kinatibuk-ang Kapangulohan sa Primary

Mga Panudlo alang sa Panahon sa Pagpanganta

5 minutos (kapangulohan sa Primary): Pangbukas nga pag-ampo, kasulatan o artikulo sa hugot nga pagtuo, ug usa ka pakigpulong

20 minutos (lider sa musika): Panahon sa pagpanganta

Ang kapangulohan sa Primary ug lider sa musika mopili og mga awit alang sa matag bulan aron sa pagpalig-on sa mga baroganan sa ebanghelyo nga nakat-onan sa mga bata sa ilang mga klase ug sa panimalay. Usa ka lista sa mga awit nga naglig-on niini nga mga baroganan gilakip dinhi niini nga giya. Kini nga mga awit gisugyot usab diha sa mga latid sa Dali, Sunod Kanako—Alang sa Primary ug sa Dali, Sunod Kanako—Alang sa mga Indibidwal ug mga Pamilya.

Samtang motudlo kamo og mga awit sa mga bata, dapita sila sa pagpaambit sa unsay ila nang nakat-onan mahitungod sa mga istorya ug mga baroganan sa doktrina diha sa mga awit nga inyong itudlo. Mahimo ninyong rebyohon ang mga latid sa Dali, Sunod Kanako—Alang sa Primary nga gitun-an sa mga bata diha sa ilang mga klase. Makatabang kini kaninyo nga mahibalo sa mga istorya ug mga baroganan nga ilang nakat-onan aron makonsiderar ninyo kon unsaon sa pagsuporta sa ilang nakat-onan pinaagi sa musika.

Atol sa panahon sa pagpanganta, mahimo usab ninyong rebyohon ang mga awit nga nakat-onan na kaniadto sa mga bata ug mga awit nga ganahan nilang kantahon. Samtang magrebyo kamo, dapita ang mga bata sa pagpaambit og kadiyot sa ilang mga hunahuna ug mga pagbati mahitungod sa mga kamatuoran nga makita diha sa mga awit.

Ang Songbook sa mga Bata mao ang sukaranan nga kapanguhaan sa musika sa Primary. Ang mga himno gikan sa hymnbook ug mga awit gikan sa Higala o Liahona angay usab. Usahay ang mga bata mahimong mokanta og bayanihon o pang-holiday nga mga awit nga mohaom alang sa Dominggo ug angay alang sa mga edad sa mga bata. Ang paggamit sa bisan unsang ubang musika sa Primary kinahanglan nga aprobahan sa bishopric (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 12.3.4, ChurchofJesusChrist.org).

Kinatibuk-ang Pagpasabot bahin sa Primary

Matag semana, ang Primary maglakip sa:

Panahon sa pagpanganta:25 minutos

Pagbalhin:5 minutos

Mga klase:20 minutos

Ang mga lider sa mga Primary nga adunay daghang bata mahimong mobahin sa mga bata ngadto sa duha ka grupo ug ibutang ang usa ka grupo diha sa mga klase sa Primary samtang ang laing grupo ibutang sa panahon sa pagpanganta. Dayon ang duha ka grupo magbaylo og pwesto. Sa ingon nga mga sitwasyon, ang mga lider sa Primary kinahanglan tingaling mousab sa mga oras nga gipakita sa ibabaw aron mapahaom sa ilang mga kahimtang.

Mga bata sa Primary nga naggunit og mga hulagway ni Jesus

Gisugyot nga Musika alang sa Panahon sa Pagpanganta

Enero

Pebrero

Marso

Abril

Mayo

Hunyo

Hulyo

Agosto

Septyembre

Oktubre

Nobyembre

Disyembre

Paggamit og Musika sa Pagtudlo sa Doktrina

2:3

Ang panahon sa pagpanganta gituyo aron sa pagtabang sa mga bata nga mabati ang impluwensiya sa Espiritu Santo samtang magkat-on sila sa mga kamatuoran sa ebanghelyo. Ang mosunod nga mga ideya makatabang.

Sulati ang blangko. Pagsulat og usa ka bersikulo sa awit diha sa pisara nga giwala ang pipila ka importante nga mga pulong. Dayon hangyoa ang mga bata sa pagkanta sa awit, nga maminaw alang sa mga pulong nga ihulip sa mga blangko. Samtang ilang sulatan ang matag blangko, dapita ang mga bata sa pagpaambit kon unsa nga mga baroganan sa ebanghelyo ang ilang makat-onan gikan sa nawala nga mga pulong.

Gamita ang mga kinutlo gikan sa mga lider sa Simbahan. Dapita ang mga bata sa pagpaminaw sa usa ka kinutlo gikan sa usa ka lider sa Simbahan nga nagtudlo sa samang baroganan sa ebanghelyo nga gitudlo sa awit sa Primary. Hangyoa sila sa pagpataas sa ilang kamot kon aduna silay madunggan nga makatabang nila sa pagsabot sa kamatuoran nga ilang gikanta. Hangyoa sila sa pagpaambit sa unsay ilang nadunggan.

Magpamatuod. Pagpaambit og mubong pagpamatuod ngadto sa mga bata mahitungod sa mga kamatuoran sa ebanghelyo nga makita diha sa awit sa Primary. Tabangi ang mga bata nga makasabot nga ang pagkanta maoy usa ka paagi nga makahatag sila og pagpamatuod ug mobati sa Espiritu.

Gamita ang mga hulagway. Hangyoa ang mga bata sa pagtabang kaninyo sa pagpangita o paghimo og mga hulagway nga motakdo sa importanteng mga pulong o mga pulongan diha sa awit. Dapita sila sa pagpaambit kon sa unsang paagi ang mga hulagway adunay kalabotan sa awit ug kon unsay gitudlo sa awit. Sama pananglit, kon nagtudlo kamo sa kanta nga “Sundon Ko ang Plano sa Dios” (Songbook sa mga Bata, 86–87), mahimo kamong mobutang og mga hulagway sa palibot sa lawak nga nagpakita sa importanteng mga pulong gikan sa awit (sama sa gasa, langit, panimalay, kalibotan, ug pagkatawo). Hangyoa ang mga bata sa pagpundok sa mga hulagway ug sa pagpataas niini sa husto nga han-ay samtang dungan ninyo nga kantahon ang awit.

Pagpaambit og usa ka butang. Mahimo kamong mogamit og butang nga may kalabotan sa awit. Sama pananglit, ang awit nga “Hugot nga Pagtuo” (Songbook sa mga Bata, 50–51) naghisgot og gamay nga liso. Mahimo kamong mopakita sa mga bata og liso aron sa pagtabang kanila nga makasabot nga ang gamay nga hugot nga pagtuo diha kang Jesukristo mahimong modako sa paglabay sa panahon.

Ikonektar ang awit sa personal nga mga kasinatian. Tabangi ang mga bata nga makonektar ang mga baroganan nga gitudlo diha sa awit ngadto sa mga kasinatian nga ilang nasinati mahitungod niadto nga mga baroganan. Sama pananglit, sa dili pa manganta sa “Gusto Ko nga Makita ang Templo” (Songbook sa mga Bata, 99), mahimo ninyong hangyoon ang mga bata sa pag-isa sa ilang mga kamot kon nakakita na ba sila og templo. Dapita sila sa paghunahuna samtang manganta sila mahitungod sa unsay ilang bation kon makakita sila og templo.

Pangutana. Adunay daghang pangutana nga mahimo ninyong ipangutana samtang manganta kamo. Sama pananglit, mahimo ninyong pangutan-on ang mga bata kon unsay ilang nakat-onan gikan sa matag bersikulo sa awit. Mahimo usab ninyo silang hangyoon sa paghunahuna og mga pangutana nga gitubag sa awit.

Paminaw alang sa mga tubag. Hangyoa ang mga bata sa pagpaminaw og mga tubag sa mga pangutana nga sama sa “kinsa?” “unsa?” “asa?” “kanus-a?” o “ngano?” Sama pananglit, diha sa kanta nga “Bunyag” (Songbook sa mga Bata, 54–55), mahimo silang maminaw kon kinsa ang nagbunyag ni Jesus ug asa, kanus-a, giunsa, ug nganong gibunyagan Siya. Mahimo usab ninyong hangyoon ang mga bata sa pagpaminaw alang sa importanteng mga pulong o sa pag-ihap sa ilang mga tudlo kon kapila na nila nakanta ang usa ka pulong.

mga bata nga nanganta diha sa panagtigom alang sa sakramento

Pagtabang sa mga Bata nga Makakat-on ug Mahinumdom sa mga Kanta sa Primary ug mga Himno

Ang mga bata makakat-on og kanta pinaagi sa pagpaminaw ug pagkanta niini nga pabalik-balik. Kantaha kanunay ang mga pulong sa bag-o nga awit ngadto sa mga bata—ayaw lamang kini basaha o isulti. Makatabang kini sa mga bata sa pagsumpay sa melodiya ngadto sa mga pulong. Human matudlo ang usa ka awit, rebyoha kini sa lainlaing makalingaw nga mga paagi sa tibuok tuig. Sa ubos mao ang pipila ka ideya aron sa pagtabang sa mga bata nga makakat-on ug morebyo sa mga awit.

Paghimo og mga poster. Pagpakita og mga poster nga adunay mga pulong gikan sa matag bersikulo o mga hulagway nga nagrepresentar sa mga pulong. Samtang manganta ang mga bata, taboni ang pipila sa mga pulong o mga hulagway hangtod nga makakanta na sila sa tibuok bersikulo nga wala ang poster. Mahimo usab ninyong dapiton ang mga bata nga motabang ninyo sa paghimo sa mga poster.

Kantaha ang gitas-on sa tono. Aron matabangan ang mga bata nga makakat-on sa melodiya sa awit, iposisyon ang inyong kamot nga pinahigda, ug samtang inyong kantahon ang mga pulong, ipataas ang inyong kamot aron sa pagtimaan og mas taas nga tono ug ipaubos aron sa pagtimaan og mas ubos nga tono.

Lanog [Echo]. Dapita ang mga bata nga mahimo nga lanog [echo] ninyo pinaagi sa pagsubli sa unsay imong gikanta. Kantaha ngadto sa mga bata ang usa ka mubo nga pulongan o usa ka linya, ug dayon ipakanta kini kanila og balik nganha kanimo.

Paggamit og lainlaing pamaagi. Kantaha ang mga awit sa lainlaing paagi, sama sa paghunghong, paghagonghong, pagpakpak sa kumpas [beat], pag-usab-usab sa gipaspason, o pagkanta samtang maglingkod o magbarog.

Panganta nga maggrupo. Hatagi ang matag klase o indibidwal og usa ka pulongan nga kantahon samtang magbarog, ug dayon magbaylo sila og mga pulongan hangtod ang matag klase o indibidwal makakanta na sa matag pulongan.

Pag-aksiyon gamit ang kamot. Dapita ang mga bata sa paghunahuna og yano nga mga aksiyon sa kamot nga makatabang kanila sa paghinumdom sa mga pulong ug sa mga mensahe sa usa ka awit. Sama pananglit, kon mokanta kamo sa “Nagtah[o]d, Naghil[o]m” (Songbook sa mga Bata, 11), mahimo ninyong dapiton ang mga bata sa pagkiyugpos sa ilang mga kamot, pagduko sa ilang mga ulo, ug paghikap sa ilang mga kasingkasing kon manganta sila sa mahinungdanong mga linya sa kanta.

Ang mga batang babaye manganta, ang mga batang lalaki manganta. Pagdrowing og hulagway sa batang lalaki ug hulagway sa batang babaye, ug ipapilit ang mga hulagway ngadto sa managlahi nga mga tukog. Samtang magrebyo sa usa ka awit, ipataas ang usa sa mga hulagway aron mapakita kon kinsa ang kinahanglang mokanta niana nga bahin sa awit.

Ipares ang usa ka hulagway ngadto sa usa ka pulongan. Isulat ang matag linya sa awit diha sa lahi nga piraso sa papel, ug pangita og hulagway nga magrepresentar sa matag linya. Ibutang ang mga hulagway sa usa ka kilid sa lawak ug ang mga papel sa pikas kilid. Kantaha ang awit, ug hangyoa ang mga bata sa pagpares sa mga hulagway ngadto sa mga pulong.

Mga Sumbanan alang sa Pasundayag sa mga Bata sa Panagtigom alang sa Sakramento

3:3

Ubos sa direksiyon sa bishop, ang pasundayag sa mga bata sa panagtigom alang sa sakramento kasagaran ipahigayon atol sa kataposang tulo ka bulan [fourth quarter] sa tuig. Isip kapangulohan sa Primary ug lider sa musika, planoha nga makigkita sayo sa tuig uban sa magtatambag sa bishopric kinsa nagdumala sa Primary aron masugdan sa paghisgot ang mga plano alang sa pasundayag. Kon makompleto na ninyo ang mga plano, pangayoa ang iyang pagtugot alang niini.

Ang pasundayag kinahanglang motugot sa mga bata sa pagpresentar sa unsay ilang nakat-onan ug sa ilang mga pamilya gikan sa Bag-ong Tugon diha sa panimalay ug sa Primary, lakip ang mga awit sa Primary nga ilang gikanta sa tibuok tuig. Ikonsiderar sa mainampoong paagi kon unsa nga mga baroganan sa ebanghelyo ug mga awit ang mosuporta sa unsay ilang nakat-onan. Sa tibuok tuig, pagtipig og mga mubo nga sulat sa mga pakigpulong ug personal nga mga kasinatian sa mga bata nga posibleng magamit sa pasundayag. Dapita ang mga bata sa pagpaambit og mga kasulatan, mga istorya, ug sa ilang mga pagpamatuod diha sa pasundayag. Samtang inyong planohon ang pasundayag, paghunahuna og mga paagi nga makatabang kini sa kongregasyon nga motutok sa Langitnong Amahan ug sa Manluluwas ug sa mga pagtulon-an Nila.

Ang mga yunit nga diyotay ra og mga bata mahimong mokonsiderar og mga paagi diin ang mga sakop sa pamilya mahimong moapil uban sa ilang mga bata. Usa ka sakop sa bishopric mahimong motapos sa miting pinaagi sa mubo nga pakigpulong.

Samtang inyong andamon ang pasundayag, hinumdomi ang mosunod nga mga sumbanan:

  • Ang mga pagbansay kinahanglang dili mogamit og dakong panahon gikan sa mga klase sa Primary o sa mga pamilya.

  • Ang mga biswal, mga igsusul-ob [costume], ug mga pasundayag sa media dili angay sa panagtigom alang sa sakramento.

Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 12.2.1.2, ChurchofJesusChrist.org.