Apendiks B

Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi

Sa mga bulan nga adunay lima ka Dominggo, ang mga magtutudlo sa Primary giawhag sa pagpuli sa gieskedyul nga latid sa Dali, Sunod Kanako sa ikalima nga Dominggo gamit ang usa o mas daghan niining mga kalihokan sa pagkat-on.

Mga Baroganan ug mga Ordinansa sa Ebanghelyo ni Jesukristo

Ang doktrina ni Kristo nagtudlo kanato kon unsaon sa pagbalik ngadto sa Dios.

Sa dihang si Jesukristo mipakita ngadto sa katawhan didto sa Amerika, Siya mitudlo kanila sa Iyang doktrina. Siya miingon nga kita makasulod sa gingharian sa Dios kon kita magbaton og hugot nga pagtuo, maghinulsol, mabunyagan, modawat sa Espiritu Santo, ug molahutay ngadto sa kataposan (tan-awa sa 3 Nephi 11:31–40; Doktrina ug mga Pakigsaad 20:29). Ang mga kalihokan sa ubos makatabang nimo sa pagtudlo sa mga bata nga kining mga baroganan ug mga ordinansa motabang kanato nga mas mapaduol ngadto sa Manluluwas sa tibuok natong kinabuhi.

Aron makakat-on pa og dugang mahitungod sa doktrina ni Kristo, tan-awa sa 2 Nephi 31.

Posible nga mga Kalihokan

• Hatagi og mga hulagway ang mga bata nga nagrepresentar og hugot nga pagtuo diha ni Jesukristo, paghinulsol, bunyag, ug kompirmasyon (tan-awa sa Libro sa mga Hulagway sa Ebanghelyo, 1, 111, 103, ug 105). Basaha o sag-uloha uban sa mga bata ang ikaupat nga artikulo sa hugot nga pagtuo, ug hangyoa sila nga ipataas ang ilang mga hulagway kon kana nga baroganan o ordinansa mahisgotan. Tabangi ang mga bata nga makasabot kon sa unsang paagi ang matag usa niining mga baroganan ug mga ordinansa makatabang kanato nga mas mahisama sa Langitnong Amahan ug ni Jesukristo.

• Unsaon nimo pagtabang ang mga bata nga makasabot nga ang hugot nga pagtuo, paghinulsol, bunyag, ug kompirmasyon dili lang usa ka panghitabo sa usa ka higayon apan makaimpluwensiya sa atong espirituhanong paglambo sa tibuok natong kinabuhi? Pananglitan, mahimo nimong ipakita nila ang usa ka hulagway sa usa ka liso ug usa ka dakong kahoy (o drowinga kini nga mga butang diha sa pisara). Tabangi sila sa paghunahuna sa mga butang nga makatabang sa liso nga motubo ngadto sa usa ka dakong kahoy, sama sa tubig, yuta, ug hayag sa adlaw. Tabangi sila nga makakita nga kini sama sa mga butang nga atong buhaton aron mas mapaduol ngadto sa Dios sa tibuok natong kinabuhi—ang pagpalig-on sa atong hugot nga pagtuo diha ni Jesukristo, paghinulsol sa matag adlaw, pagsunod sa atong mga pakigsaad sa bunyag, ug pagpaminaw ngadto sa Espiritu Santo.

• Ipakigbahin sa mga bata ang istorya mahitungod sa pabuto gikan sa mensahe ni Elder Dale G. Renlund “Sa Unsa nga Paagi nga ang Paghinulsol Makatabang Nako nga Mobati nga Malipayon?” (Higala, Dis. 2017, 12–13, o Liahona, Dis. 2017, 70–71; tan-awa usab ang bidyo nga “Paghinulsol: Usa ka Mahimayaon nga Pagpil” [ChurchofJesusChrist.org]). Sa daghang punto sa istorya, dapita ang mga bata sa paghunahuna mahitungod kon sa unsa kaha ang gibati ni Elder Renlund. Nganong mobati man kita og kalipay kon kita maghinulsol? Ipakigbahin sa mga bata ang kalipay ug gugma nga imong nabati sa dihang ikaw mihangyo sa Langitnong Amahan sa pagpasaylo kanimo.

Bunyag

Si Jesukristo mipakita kanako og ehemplo sa dihang Siya gibunyagan.

Bisan og si Jesus walay sala, Siya nagpabunyag aron sa pagpakita og hingpit nga ehemplo sa pagkamasulundon ngadto sa Langitnong Amahan (tan-awa sa 2 Nephi 31:6–10).

Sa pagkat-on og dugang mahitungod sa bunyag, tan-awa sa Doktrina ug mga Pakigsaad 20:37.

Posible nga mga Kalihokan

• Pagpakita og usa ka hulagway sa bunyag sa Manluluwas ug sa bunyag sa laing tawo (o tan-awa sa Libro sa mga Hulagway sa Ebanghelyo, nu. 35 ug bisan asa sa nu. 103 o sa nu. 104). Hangyoa ang mga bata sa pagpakigbahin kon unsa ang kalainan ug unsa ang pagkaparehas tali sa duha ka hulagway. Magdungan sa pagbasa sa Mateo 3:13–17 o “Kapitulo 10: [Si] Jesus Gibunyagan sa Mga Istorya sa Bag-ong Tugon,26–29. Tugoti ang mga bata nga motudlo sa mga butang diha sa hulagway nga gihisgotan sa pagbasa o sa bidyo. Sultihi ang mga bata mahitungod sa imong gugma alang sa Manluluwas ug sa imong tinguha sa pagsunod Kaniya.

• Maminaw o mokanta og usa ka kanta sa bunyag, sama sa “Sa Pagbunyag ni Jesus” (Liahona, Pebrero 2015, 73). Unsa ang atong makat-onan mahitungod sa bunyag gikan sa kanta? Basaha ang 2 Nephi 31:9–10, ug dapita ang mga bata sa pagpaminaw kon nganong si Jesukristo gibunyagan. Dapita sila sa pagdrowing og hulagway sa ilang kaugalingon diha sa ilang adlaw sa bunyag.

Ako makapili sa paghimo og usa ka pakigsaad uban sa Dios ug mahimong bunyagan.

Ang pagpangandam alang sa bunyag nagpasabot og labaw pa kay sa pag-andam alang sa usa ka kalihokan. Kini nagpasabot sa pagpangandam sa paghimo og usa ka pakigsaad ug dayon motuman niana nga pakigsaad sa tibuok kinabuhi. Pamalandongi kon unsaon nimo pagtabang ang mga bata nga masabtan ang pakigsaad nga ilang himoon ngadto sa Langitnong Amahan kon sila bunyagan, nga naglakip og mga saad nga Iyang himoon ngadto nila ug ang mga saad nga ilang himoon ngadto Kaniya.

Posible nga mga Kalihokan

• Ipasabot nga ang pakigsaad mao ang usa ka saad tali sa usa ka tawo ug sa Langitnong Amahan. Samtang kita maningkamot sa pagtuman sa atong mga saad ngadto sa Dios, ang Dios mosaad sa pagpanalangin kanato. Isulat diha sa pisara Akong mga Saad ngadto sa Dios ug Ang mga Saad sa Dios ngari Kanako. Magdungan sa pagbasa sa Mosiah 18:10, 13 ug Doktrina ug mga Pakigsaad 20:37, ug tabangi ang mga bata sa paghimo og lista sa mga saad nga ilang makit-an ubos sa tukma nga mga ulohan (tan-awa usab sa Dallin H. Oaks, “Imong Pakigsaad sa Bunyag,” Higala, Peb. 2021, 2–3). Ipakigbahin kon sa unsang paagi ang Langitnong Amahan mipanalangin kanimo samtang ikaw naningkamot sa pagtuman sa imong pakigsaad sa bunyag.

• Ipakita sa mga bata ang mga hulagway sa mga butang nga gibuhat ni Jesukristo sa dihang Siya dinhi pa sa yuta (alang sa pipila ka mga ehemplo, tan-awa sa Libro sa mga Hulagway sa Ebanghelyo, nu. 33–49). Hangyoa ang mga bata sa paghisgot kon unsa ang gibuhat ni Jesus diha sa matag hulagway. Basaha ang Mosiah 18:8–10, 13, ug dapita ang mga bata sa pagpaminaw alang sa mga butang nga ilang gisaad nga buhaton sa dihang sila gibunyagan (tan-awa usab sa “Ang Pakigsaad sa Bunyag,” Liahona, Peb. 2019, H3). Sa unsang paagi nga kining mga saad makaimpluwensiya sa atong mga aksiyon sa matag adlaw? Dapita ang mga bata sa pagdrowing og usa ka hulagway sa ilang kaugalingon nga nagtabang og usa ka tawo sa paagi nga buhaton ni Jesus. O puwede nimong buhatan ang mga bata og yano nga tsapa nga isul-ob nga aduna kini ngalan sa Manluluwas.

  

  Sa dihang kita bunyagan, kita mohimo og mga saad ngadto sa Dios ug Siya mohimo og mga saad ngari kanato.

Pagkompirma

Sa dihang ako makompirma, ako mahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw.

Ang pagkahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw magdala og daghang panalangin, lakip sa mga oportunidad alang sa mga bata nga mamahimong aktibong mga partisipante diha sa buhat sa Dios.

Aron makakat-on mahitungod sa pagkompirma ug sa gasa sa Espiritu Santo, tan-awa sa Gary E. Stevenson, “Unsaon sa Espiritu Santo Pagtabang Kaninyo?Liahona Mayo 2017, 117–20.

Posible nga mga Kalihokan

• Pagdapit og usa ka tawo nga bag-o lang nabunyagan ug nakompirma sa pag-adto sa klase ug mopakigbahin kon unsay sama nga makompirma. Unsa ang kahulogan alang niini nga tawo nga mamahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw? Tabangi ang mga bata sa paghunahuna og mga paagi nga ilang matuman ang ilang pakigsaad sa bunyag isip mga miyembro sa Simbahan (sama sa pagserbisyo sa uban, pagdapit sa uban aron makakat-on og dugang mahitungod ni Jesus, ug mag-ampo diha sa mga miting, ug uban pa). Ipakigbahin kon sa unsang paagi ang pagbuhat niining mga butanga nakatabang nimo nga mobati og kalipay isip usa ka miyembro sa Simbahan ni Kristo.

• Ipakita ang usa ka hulagway sa mga tawo diha sa Katubigan sa Mormon (tan-awa sa Libro sa mga Hulagway sa Ebanghelyo, nu. 76), ug hangyoa ang mga bata sa paghulagway unsa ang ilang nakita sa hulagway. Isulti ang istorya bahin ni Alma ug sa iyang katawhan nga nabunyagan didto (tan-awa sa Mosiah 18:1–17; “Kapitulo 15: Si Alma Nagtudlo ug Nagbunyag,”Mga Sugilanon sa Ang Basahon ni Mormon, 43–44). Rebyoha ang Mosiah 18:8–9 ug dapita ang mga bata sa pagbuhat sa mga aksiyon aron matabangan sila sa paghinumdom sa mga butang nga ang mga tawo andam nga mobuhat isip mga miyembro sa Simbahan ni Kristo. Ipakigbahin ang usa ka kasinatian dihang imong nasaksihan ang mga miyembro sa Simbahan nga nagserbisyo niining mga paagiha.

Kon ako kompirmahan, akong madawat ang gasa sa Espiritu Santo.

Kon kita bunyagan ug kompirmahan, ang Langitnong Amahan mosaad nga kita “unta sa kanunay makabaton sa iyang Espiritu nga magauban [kanato]” (Doktrina ug mga Pakigsaad 20:77). Kining maanindot nga gasa gikan sa Dios gitawag nga ang gasa sa Espiritu Santo.

Posible nga mga Kalihokan

• Basaha ang Doktrina ug mga Pakigsaad 33:15, ug hangyoa ang mga bata sa pagpaminaw alang sa espesyal nga gasa nga gihatag sa Langitnong Amahan kanato kon kita bunyagan ug kompirmahan. Aron matabangan sila nga makakat-on pa og dugang mahitungod kon sa unsang paagi ang Espiritu Santo motabang kanila, magdungan sa pagrebyo sa Juan 14:26; Mga Taga-Galacia 5:22–23; 2 Nephi 32:5; 3 Nephi 27:20. Mahimo usab nimong rebyohon ang artikulo nga “Ang Espiritu Santo Mao ang …” (Liahona, Hunyo 2019, H12–H13).

• Sa dili pa magklase, hangyoa ang mga ginikanan sa usa o mas daghang mga bata sa pagpakigbahin kon sa unsang paagi sila napanalanginan tungod kay sila adunay gasa sa Espiritu Santo. Sa unsang paagi Siya mitabang kanila? Giunsa nila pagkadungog sa Iyang tingog?

• Manganta og dungan sa awit mahitungod sa Espiritu Santo, sama sa “Ang Espiritu Santo” (Songbook sa mga Bata, 56). Tabangi ang mga bata nga masabtan kon unsa ang gitudlo kanato sa awit mahitungod kon sa unsang paagi ang Espiritu Santo makatabang kanato.

Ang Espiritu Santo makapamulong ngari kanako sa daghang paagi.

Ang mga bata kinsa makaila sa tingog sa Espiritu mahimong andam na aron makadawat og personal nga pagpadayag sa paggiya kanila sa tibuok nilang kinabuhi. Tudloi sila nga adunay daghang paagi nga ang Espiritu Santo makapamulong ngari kanato.

Posible nga mga Kalihokan

• Tabangi ang mga bata sa paghunahuna og lainlaing paagi nga kita makaistorya ngadto sa usa ka higala nga nagpuyo sa layo, sama sa pagsulat, pagpadala og email, o pakig-istorya diha sa telepono. Tudloi sila nga ang Langitnong Amahan makapamulong ngari kanato pinaagi sa Espiritu Santo. Gamita ang mensahe ni Presidente Dallin H. Oaks “Sa Unsang Paagi ang Langitnong Amahan Makigsulti Kanato?” aron matabangan ang mga bata nga makasabot sa lainlaing mga paagi ang Espiritu Santo mamulong sa atong mga hunahuna ug mga kasingkasing (Liahona, Mar. 2020, H2–H3).

• Ipakigbahin ang usa ka kasinatian sa dihang ang Espiritu Santo nakigsulti kanimo, pinaagi man sa hunahuna o pinaagi sa usa ka pagbati sa imong kasingkasing (tan-awa sa Doktrina ug mga Pakigsaad 6:22–23; 8:2–3; tan-awa usab sa Henry B. Eyring, “Ablihi ang Inyong Kasingkasing ngadto sa Espiritu Santo,” Liahona, Ago. 2019, H2–H3). Pagpamatuod ngadto sa mga bata nga ang Espiritu Santo makatabang kanila sa susamang mga paagi.

• Tabangi ang mga bata sa paghunahuna og mga higayon nga sila mibati sa Espiritu—pananglitan, kon manganta og awit mahitungod sa Manluluwas o kon magbuhat og butang nga mabination alang sa uban. Tabangi sila nga maila ang espirituhanong mga pagbati nga dala sa Espiritu Santo. Sa inyong hunahuna ngano nga ang Espiritu Santo mohatag kanato niadto nga mga pagbati? Tabangi ang mga bata sa paghunahuna sa mga butang nga atong gikinahanglan nga buhaton aron madungog ang Espiritu Santo nga mamulong ngari kanato. Hisgoti kon unsa ang inyong buhaton aron mas klarong makadungog sa Espiritu.

Ang Sakramento

Kon moambit ko sa sakramento, ako makahinumdom sa sakripisyo sa Manluluwas ug mobag-o sa akong mga pakigsaad.

Ang Manluluwas mihatag kanato sa sakramento sa pagtabang kanato nga mahinumdom sa Iyang sakripisyo alang kanato ug mobag-o sa atong mga pakigsaad. Tungod niining sinemana nga ordinansa, kita makapadayon sa pagtagamtam sa mga panalangin sa atong bunyag sa tibuok natong kinabuhi.

Aron sa pagkat-on pa og dugang, tan-awa sa Mateo 26:26–30; 3 Nephi 18:1–12; Doktrina ug mga Pakigsaad 20:77, 79.

Posible nga mga Kalihokan

• Dapita ang mga bata sa pagkolor sa “Si Jesus Mipasiugda sa Sakramento ngadto sa mga Nephite” sa Koloranan nga Libro sa mga Istorya sa Kasulatan: Basahon ni Mormon (2019), 26. Hangyoa sila sa pagtudlo sa unsay gihunahuna sa mga tawo diha sa hulagway. Basaha ngadto sa mga bata ang mga porsiyon sa 3 Nephi 18:1–12 o “Kapitulo 45: Si Jesukristo Nagtudlo Mahitungod sa Sakrameto ug Pag-ampo,”Mga Sugilanon sa Ang Basahon ni Mormon, 126–27. Unsay atong buhaton aron mahinumdom ni Jesukristo atol sa sakramento?

• Hangyoa ang mga bata sa pagsulti nimo og pipila ka mga butang nga kinahanglan kanunay nilang hinumdoman nga buhaton, sama sa pagbugkos sa liston sa ilang sapatos o paghugas sa ilang mga kamot sa dili pa sila mokaon. Nganong importante ang paghinumdom niining mga butanga? Basaha ang Moroni 4:3 ngadto sa mga bata, ug hangyoa sila sa pagpaminaw kon unsa ang atong gisaad nga kanunayng hinumdoman kon kita moambit sa sakramento. Nganong importante ang paghinumdom ni Jesukristo? Tabangi ang mga bata nga makasabot kon sa unsang paagi ang pan ug tubig sa sakramento makatabang kanato sa paghinumdom kon unsa ang nabuhat ni Jesus alang kanato (tan-awa sa Moroni 4:3; 5:2).

• Isulat diha sa pisara ang “Ako nagsaad sa .” Basaha ang mga pag-ampo sa sakramento ngadto sa mga bata (tan-awa sa Doktrina ug mga Pakigsaad 20:77, 79). Kon ilang madunggan ang usa ka saad nga atong gihimo ngadto sa Dios, hunong ug tabangi sila nga mokompleto sa kapahayag [sentence] diha sa pisara gamit ang saad nga ilang nadungog. Tabangi sila nga makasabot nga kon kita moambit sa sakramento, kita naghimo og samang mga saad nga atong gihimo sa bunyag.

• Unsay ipasabot sa pagdala diha sa atong kaugalingon sa ngalan ni Jesukristo? Aron matabangan ang mga bata sa pagtubag niining pangutana, ipakigbahin ang usa ka ehemplo sa usa ka butang nga atong ibutang diha sa atong mga ngalan. Nganong atoa man ibutang ang atong mga ngalan niining mga butanga? Nganong gusto man ni Jesukristo nga ibutang ang Iyang ngalan ngari kanato? Ikonsiderar ang pagpaambit niining pagpasabot gikan ni Presidente Russell M. Nelson: “Ang pagdala sa ngalan sa Manluluwas diha kanato naglakip sa pagpahayag ug pagsaksi ngadto sa uban—pinaagi sa atong mga lihok ug sa atong mga pulong—nga si Jesus mao ang Kristo” (“Ang Sakto nga Ngalan sa Simbahan,” Liahona, Nob. 2018, 88).

Gahom, Awtoridad, ug mga Yawe sa Pagkapari

Ang Dios mopanalangin sa Iyang mga anak pinaagi sa gahom sa pagkapari.

Ang tanan nga mga anak sa Dios—babaye ug lalaki, bata ug tigulang—makadawat sa gahom sa Dios kon sila motuman sa mga pagkigsaad nga ilang gihimo ngadto Kaniya. Kita mohimo niining mga pakigsaad kon kita makadawat sa mga ordinansa sa pagkapari sama sa bunyag (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 3.5, ChurchofJesusChrist.org).

Sa pagkat-on ug dugang, tan-awa sa Russell M. Nelson, “Espirituhanon nga mga Bahandi,” Liahona, Nob. 2019, 76–79;“Mga Baroganan sa Pagkapari,” kapitulo 3 sa Kinatibuk-ang Tamdanan nga Basahon.

Posible nga mga Kalihokan

• Tabangi ang mga bata ngaa mamatikdan ang mga panalangin nga ilang madawat tungod sa pagkapari. Sa paghatag kanila og pipila ka ideya, mahjimo nimong ipakita ang bidyo nga “Blessings of the Priesthood [Mga Panalangin sa Pagkapari]” (ChurchofJesusChrist.org). Ikonsiderar ang paglista niining mga panalangin diha sa pisara. Nganong kini nga mga panalangin importante ngari kanato? Ipamatuod nga kining mga panalangin moabot kanato tungod ni Jesukristo ug sa Iyang gahom sa pagkapari.

• Isulat ang mosunod nga mga ulohan diha sa pisara: Gahom sa Dios ug Gahom ug awtoridad sa Dios gihatag ngadto sa tawo dinhi sa yuta. Hangyoa ang mga bata sa pagbutang sa mga hulagway ubos sa unang ulohan nga makatabang kanato nga makasabot kon sa unsang paagi ang Dios migamit sa Iyang gahom sa pagpanalangin kanato, sama sa paglalang sa kalibotan, paggiya ug pagdirekta kanato, pagpakita kanato nga Siya nahigugma ug nakaila kanato, ug pagpaminaw ug pagtubag sa atong mga pag-ampo (tan-awa sa Libro sa mga Hulagway sa Ebanghelyo, nu. 3, 68, 90, 111). Hangyoa sila sa pagbutang sa mga hulagway ubos sa ikaduha nga ulohan nga makatabang kanato nga masabtan kon sa unsang paagi ang takos nga mga kalalakin-an dinhi sa yuta makagamit sa gahom ug awtoridad sa Dios sa pagpanalangin kanato, sama sa pagpanalangin sa masakiton, pagbunyag, pagkompirma, pagpangalagad sa sakramento, ug pagsilyo sa mga pamilya (tan-awa sa Libro sa mga Hulagway sa Ebanghelyo, nu. 46, 104, 105, 107, 120). Ipaambit kon nganong mapasalamaton ka sa pagkapari ug sa mga panalangin nga nahatag niini.

• Usa sa nag-unang mga paagi nga kita makadawat sa mga panalangin sa gahom sa Dios diha sa atong mga kinabuhi mao ang pinaagi sa mga ordinansa sa pagkapari (tan-awa sa Doktrina ug mga Pakigsaad 84:20). Aron matabangan ang mga bata nga makat-on niining kamatuoran, mahimo nimong ilista ang mosunod nga mga kasulatan sa pisara: 3 Nephi 11:21–26, 33 (bunyag); Moroni 2 (kompirmasyon); Moroni 4–5 (sakramento). Ang matag usa sa mga bata makapili og usa niining mga tudling ug motino sa ordinansa nga gihulagway niini. Dapita ang mga bata sa pagpakigbahin kon sa unsang paagi nga sila personal nga napanalanginan pinaagi sa pagdawat og mga ordinansa sa pagkapari.

• Tabangi ang mga bata nga makasabot nga sila makadawat sa gahom gikan sa Dios kon sila bunyagan ug motuman sa ilang pakigsaad sa bunyag. Pangutan-a ang mga bata kon sa unsang paagi kining gahom makatabang kanila.

Ang buhat sa Dios gidumala sa mga yawe sa pagkapari ug gituman pinaagi sa awtoridad sa pagkapari.

Ang takos nga lalaki nga mga miyembro sa Simbahan mahimong maorden ngadto sa usa ka katungdanan sa pagkapari. Agig dugang, sa higayon ang usa ka tawo gi-set apart alang sa usa ka calling o gisangonan sa pagtabang sa buhat sa Dios, siya makahimo sa gisangon nga awtoridad sa pagkapari. Ang paggamit sa tanang awtoridad sa pagkapari diha sa Simbahan giniyahan niadtong mga indibidwal nga naghupot sa mga yawe sa pagkapari, sama sa presidente sa stake, sa bishop, ug sa mga presidente sa korum. Ang mga yawe sa pagkapari mao ang awtoridad sa paggiya sa paggamit sa pagkapari diha sa paghimo sa buhat sa Ginoo.

Posible nga mga Kalihokan

• Basaha uban sa mga bata ang Marcos 3:14–15, ug pagpakita kanila og usa ka hulagway sa panghitabo nga gihulagway didto (sama sa Libro sa mga Hulagway sa Ebanghelyo, nu.38). Pangutan-a ang mga bata kon sila nakakita ba sukad og usa ka tawo nga giorden ngadto sa usa ka katungdanan sa pagkapari o gi-set apart alang sa usa ka calling (o sultihi sila mahitungod sa mga kasinatian nga imong naagian). Sa unsang paagi kana susama sa unsay gibuhat sa Manluluwas ngadto sa Iyang Apostoles? Tabangi ang mga bata sa paglista diha sa pisara sa mga katungdanan sa pagkapari o mga calling nga mahimong mahatag ngadto sa mga miyembro sa Simbahan, sama sa usa ka magtutudlo o lider sa usa ka organisasyon. Tupad sa matag katungdanan o calling, mahimo nimong masulat kon unsay mabuhat sa usa ka tawo nga may awtoridad niana nga katungdanan o calling. Sultihi ang mga bata kon sa unsang paagi ang ma-set apart sa tawo nga ubos sa direksiyon sa mga yawe sa pagkapari nakatabang nimo sa pagserbisyo.

• Dapita ang mga bata sa paghunahuna og usa ka butang nga ikaw nagkinahanglan og usa ka yawe, sama sa usa ka sakyanan o usa ka pultahan. Unsa ang mahitabo kon ikaw walay yawe? Magdungan sa pagbasa sa Doktrina ug mga Pakigsaad 65:2, ug ipakigbahin ang imong pagpamatuod mahitungod sa kaimportante sa pagbaton og mga yawe sa pagkapari dinhi sa yuta. Mahimo usab kamo nga motan-aw sa bidyo nga “Asa ang mga Yawe ug Awtoridad sa Priesthood?” (https://www.churchofjesuschrist.org/study/general-conference/2016/04/where-are-the-keys-and-authority-of-the-priesthood?lang=ceb) ChurchofJesusChrist.org ug pangitaon ang unsa ang gitudlo ni Elder Stevenson bahin sa mga yawe sa pagkapari.

• Paghangyo og usa ka tawo sa ward nga naghupot og mga yawe sa pag-adto sa klase ug mopakigbahin sa mga bata unsa ang gipasabot sa paghupot og mga yawe sa pagkapari. Dapita siya sa paghulagway sa iyang mga responsibilidad. Unsa nga mga bahin sa buhat sa Ginoo ang iyang gipangulohan? Giunsa sa Manluluwas sa pagtabang kaniya?

Ang Templo ug ang Plano sa Kalipay

Ang templo mao ang balay sa Ginoo.

Ang mga templo usa ka bahin sa plano sa Langitnong Amahan alang sa Iyang mga anak. Diha sa mga templo, kita makahimo og sagradong mga pakigsaad ngadto Kaniya, matugahan sa gahom sa pagkapari, modawat og pagpadayag, mohimo og mga ordinansa alang sa atong namatay na nga mga katigulangan, ug masilyo ngadto sa atong mga pamilya alang sa kahangtoran. Kining tanan posible tungod ni Jesukristo ug sa Iyang maulaon nga sakripisyo.

Unsaon nimo sa pagtabang sa mga bata nga imong gitudloan nga moila sa kasagrado sa balay sa Ginoo ug mangandam sa ilang kaugalingon nga mahimong takos sa pag-apil sa mga ordinansa sa templo? Ikonsiderar ang pagrebyo niiing mga kapanguhaan: Doktrina ug mga Pakigsaad 97:15–17; Russell M. Nelson, “Panapos nga Pakigpulong,” Liahona, Nob. 2019, 120–22.

Ang mga templo usa ka bahin sa plano sa Langitnong Amahan alang sa Iyang mga anak.

Posible nga mga Kalihokan

• Ipakita ang usa o daghang mga litrato sa mga templo. Pangutan-a ang mga bata unsa ang nakapahimo sa templo nga usa ka espesyal nga dapit. Ipasabot nga sa matag templo mao ang kinudlit nga: “Pagkabalaan ngadto sa Ginoo: Ang Balay sa Ginoo.” Pangutan-a ang mga bata kon unsay ilang hunahuna nga mahimong gipasabot sa “Pagkabalaan ngadto sa Ginoo”. Nganong ang templo gitawag nga ang balay sa Ginoo? Unsa ang gitudlo niini kanato mahitungod sa templo? Kon ang bisan kinsa nga mga bata nakasulod na sa templo, mahimo usab silang mopakigbahin kon unsa ang ilang gibati sa dihang anaa sila didto. Kon ikaw nakaadto na sa templo, ipakigbahin kon sa unsang paagi nabati nimo ang presensiya sa Ginoo didto, ug hisgoti mahitungod kon nganong ang templo usa ka sagradong dapit para nimo.

• Basaha og dungan ang Doktrina ug mga Pakigsaad 97:15–17. Hangyoa ang mga bata sa pagpangita sa unsa ang gilaoman sa Ginoo niadtong kinsa mosulod sa Iyang balaan nga balay. Nganong kinahanglan man kita nga mamahimong takos sa pagsulod sa Iyang balay? Isip kabahin niining panag-istoryahanay, pakig-istorya sa mga bata mahitungod sa mga rekomend sa templo, lakip ang pamaagi kon unsaon sa pagdawat og usa. Mahimo nimong dapiton ang usa ka sakop sa bishopric sa pagpakigbahin uban nila kon unsa sama ang usa ka interbyo sa rekomend sa templo ug ang mga pangutana nga gipangutana sa usa.

Diha sa templo, kita mohimo og mga pakigsaad sa Dios.

Si Presidente Russell M. Nelson nagtudlo, “Si Jesukristo midapit kanato sa pagsubay sa dalan sa pakigsaad balik sa atong Langitnong mga Ginikanan ug ikauban ang atong mga minahal” (“Dali, Sunod Kanako,” Liahona, Mayo 2019, 91). Tabangi ang mga bata nga makasabot nga ang dalan sa pakigsaad naglakip sa bunyag, kompirmasyon, ug sa pagtuga sa templo ug pagsilyo.

Posible nga mga Kalihokan

• Hangyoa ang mga bata sa pagtabang kanimo sa pagrebyo sa pakigsaad nga atong gihimo ngadto sa Dios sa dihang kita gibunyagan ug nga atong gibag-o kon kita moambit sa sakramento (tan-awa sa Mosiah 18:10; Doktrina ug mga Pakigsaad 20:77, 79). Ipakita ang usa ka hulagway sa templo ug ipasabot nga ang Langitnong Amahan adunay mas daghang panalangin nga gusto Niyang ihatag kanato diha sa templo.

• Pagdrowing og usa ka ganghaan nga padulong ngadto sa usa ka dalan. Pangutan-a ang mga bata kon ngano kaha nga makatabang kaayo nga adunay dalan nga subayon. Basaha og dungan ang 2 Nephi 31:17–20, diin si Nephi mitandi sa pakigsaad sa bunyag ngadto sa usa ka ganghaan ug nagdapit kanato sa pagpadayon diha sa dalan human sa bunyag. Adunay dugang pa nga mga pakigsaad nga pagahimoon human sa bunyag, lakip sa mga pakigsaad nga gihimo diha sa templo. Ipasabot nga si Presidente Nelson mitawag niining dalan nga ang “dalan sa pakigsaad.”

Diha sa templo, mahimo kitang mabunyagan ug makompirmahan alang sa mga katigulangan nga namatay na.

Ang ebanghelyo ni Jesukristo ang naghimo niining posible alang sa tanang anak sa Dios nga makabalik og puyo uban Kaniya, bisan kon sila mamatay nga wala masayod sa ebanghelyo. Diha sa templo, kita mabunyagan ug makompirmahan nga mga miyembro sa Simbahan ni Jesukristo alang kanila.

Posible nga mga Kalihokan

• Paghisgot mahitungod sa usa ka panahon sa dihang ang usa ka tawo mibuhat og butang alang kanimo nga dili nimo mahimo alang sa imong kaugalingon. Dapita ang mga bata sa pagpakigbahin og susama nga mga kasinatian. Ipasabot nga kon kita moadto sa templo, kita makadawat og sagrado nga mga ordinansa sama sa bunyag alang sa uban kinsa namatay na. Sa unsang paagi nga kita nahimong sama ni Jesus kon kita maghimo sa buhat alang sa patay? Unsa ang Iyang gibuhat alang kanato nga kita dili makahimo alang sa atong kaugalingon?

• Pagdapit og usa o dugang pa nga mga kabatan-onan nga nabunyagan alang sa ilang mga katigulangan nga mopakigbahin sa ilang kasinatian. Pangutan-a sila kon unsay pamati diha sa templo. Awhaga sila sa pagpakigbahin kon unsa ang ilang gibati sa paghimo niining buhat alang sa ilang mga katigulangan.

• Pagdrowing og usa ka kahoy diha sa pisara, lakip sa mga gamot ug mga sanga. Hangyoa ang mga bata sa paghunahuna kon sa unsang paagi ang usa ka pamilya sama sa usa ka punoan sa kahoy. Sulati ang mga gamot og Mga Katigulangan, sulati ang mga sanga og Mga Kaliwatan, ug sulati ang punoan sa kahoy og Ikaw. Basaha og dungan kining kapahayag gikan sa Doktrina ug mga Pakigsaad 128:18: “Kay kita kon wala sila [atong mga katigulangan] dili mahimo nga hingpit; ni sila kon wala kita.” Ipangutana ang sama sa mosunod: “Nganong kita nagkinahanglan sa atong mga katigulangan? Nganong ang atong mga kaliwatan nagkinahanglan kanato? Sa unsang paagi ang atong mga ginikanan, mga apohan, ug ubang mga katigulangan mitabang kanato?” Dapita ang mga bata sa pagpangita sa nahabilin sa Doktrina ug mga Pakigsaad 128:18 alang sa usa ka hugpong sa mga pulong nga naghulagway kon sa unsang paagi nga kita makatabang sa atong mga katigulangan.

• Ikonsiderar ang pagtabang sa mga ginikanan sa matag bata nga makakaplag og ngalan sa usa ka katigulangan aron madala sa anak ngadto sa templo (tan-awa sa FamilySearch.org).