Gikan sa Unang Kapangulohan

Sa Unsang Paagi ang Langitnong Amahan Makigsulti Kanato?

Ni Presidente Dallin H. Oaks

Unang Magtatambag sa Unang Kapangulohan

Gikuha gikan sa “Eight Ways God Can Speak to You,” New Era, Sept. 2004, 4–8.

Ang Langitnong Amahan makigsulti kanato sa daghang lahi-lahi nga paagi. Dihang nag-ampo si Joseph Smith kon asa nga simbahan ang eksakto, ang Langitnong Amahan ug si Jesukristo mipakita kaniya ug nakigsulti kaniya nawong sa nawong. Apan sa kasagaran ang Langitnong Amahan makigsulti kanato pinaagi sa Espiritu Santo. Mohatag siya kanato og mga hunahuna diha sa atong alimpatakan ug mga pagbati diha sa atong kasingkasing.

Aniay pipila ka paagi nga kita makadungog Kaniya:

1. Pagbati nga si Jesus nahigugma kanato ug nga ang ebanghelyo tinuod

2. Pagbati sa kahupayan kon kita magmagul-anon o mibati nga nag-inusara

3. Malipayong pagbati human kita naghinulsol

4. Maayong pagbati kon maminaw kita og nindot nga musika o motan-aw og makapadasig nga hulagway

5. Malinawong pagbati nga ang usa ka butang maayo nga pagpili

6. Pagbati sa pasidaan nga kini sayop

Mopili sa Matarung ug Maminaw

Kon ang Langitnong Amahan mamulong kanato pinaagi sa Espiritu Santo, gitawag kini og “pagpadayag.” Ang Langitnong Amahan ug si Jesukristo dili mohatag kanato og pagpadayag mahitungod sa tanan nga atong buhaton. Apan kita dili angayang mabalaka. Kon kita naningkamot nga mopili sa matarung ug maminaw sa Espiritu Santo, Sila motabang ug mogiya kanato kon kini importante. ●

Mga paghulagway pinaagi ni Katie Rewse