Ang Ubon Ward Makahimo Niini!
Ang tagsulat nagpuyo sa Isan, Thailand.
Ang mga miyembro sa among ward panagsa rang magkapundok—bisan sa simbahan. Unsa kahay among buhaton aron magkapundok ang tanan?
Ang dagan sa panahon, gilay-on, ug mga iskedyul sa eskwelahan nagpugong sa daghang miyembro sa Thai sa pagsimba, mao nga ang Ubon Ward mihukom, nga mag-iskedyul og usa ka petsa ug miawhag kutob sa daghang tawo sa pagtambong.
Daghang miyembro dinhi sa Thailand maglisud sa pagsimba tungod sa mga miting sa eskwelahan, sa dautang panahon (kadaghanan sa among mga miyembro magbiyahe nga mag-motor), ug lagyo. Ang mga miyembro sa akong ward, sa Ubon Ward, nag-atubang sa tanan niini nga hagit ug daghan pa, nga naghimo sa pagsimba nga lisud.
Usa ka Dominggo, naghunahuna ko kon sa unsang paagi matabangan namo ang mga miyembro nga ilang mailhan ang mga panalangin pinaagi sa paggamit sa hugot nga pagtuo aron mas kanunay nga dungan nga makasimba. Ang ideya miabut kanako, “Unsa kaha kon magpili mi og usa ka Dominggo nga tutukan namo ang pagpasimba sa matag miyembro nianang adlawa?” Kon mapasimba namo ang tanan nianang adlawa, ang mga miyembro makakita gayud ug mobati sa kalig-on sa ward.
Ang ubang mga lider ug mga miyembro sa ward nakauyon sa ideya ug miapil na sa pagplano alang niini. Mihukom kami og usa ka petsa, Hunyo 17, 2018—ang Dominggo nga maoy pinakaduol sa anibersaryo sa pagkatukod sa Ubon Thailand Stake—ug gisugdan dayon ang pagpadala og mga mensahe bahin niini pinaagi sa social media. Gitawag namo kini nga kalihokan og “Manimba Kita sa Samang Adlaw nga Dominggo! 200 nga Attendance sa Miting sa Sakramento—Ang Ubon Ward Makahimo Niini.”
Hapit tanan sa tibuok ward miapil sa pag-awhag sa matag usa sa pag-adto. Ang tanan padayong nagpadala og mga mensahe nag-awhag sa uban sa pag-apil sa kalihokan. Ang mga miyembro midapit usab sa mga namalik nga mga miyembro ug mga higala nga dili miyembro. Ug daghan kaayong tawo ang miingon og oo!
Among namatikdan nga labaw kini kay sa makalingaw nga kalihokan nga makakita kon pila ka tawo ang moabut. Gusto namo nga mahimo kining espesyal kaayo nga espirituhanong kasinatian sa pagdasig sa mga miyembro nga ang pagtambong sa miting sa sakramento himoon nga usa ka prayoridad. Mao nga sa mga bulan nga nagdulong ang kalihokan, ang bishopric miawhag sa mga tawo nga likayan ang mga kalihokan nga posibling makapaminos sa importansya sa sakramento o pagsimba sa Ginoo.
Gani nanghimo kami og mga bookmark aron matabangan ang mga miyembro sa paghinumdom sa kalihokan ug sa Espiritu nga sayud kaming maanaa didto tungod sa paningkamot sa tanan nga makatambong. Ang bookmark dunay pangalan sa kalihokan ug usa ka kasulatan usab: “Ako miingon: Kamo mao ang mga dios; ug kamong tanan mga anak sa Hataas Uyamut” (Salmo 82:6). Gipili namo kini nga kasulatan kay gusto namo nga ang tanan makaamgo nga sila mga anak sa Dios ug adunay potensyal sa pagkahimong sama Kaniya.
Giplano sa mga miyembro sulod sa taas nga panahon aron ang tanan makatambong sa gitakda nga adlaw. Sa katapusan, miabut na ang adlaw. Apan mao usab ang mga babag. Miulan og kusog kaayo sa gabii sa wala pa ang kalihokan ug padayon nga miulan sa tibuok gabii. Lain usab nga babag sa pipila ka miyembro mao nga ang usa ka importante nga miting sa eskwelahan mahitabo sa samang oras sa pagsimba.
Gihangyo namo ang tanan sa pag-ampo nga matangtang kini nga mga babag o mabuntog. Mga alas 7:00 sa buntag. Domingo sa buntag, mihunong ang ulan. Ug sa pagpangabut namo sa simbahan, nakita namo kadtong mga pamilya kinsa nagkinahanglang moadto unta sa miting sa eskwelahan. Dihang gipangutana namo sila mahitungod sa ilang uban nga miting, miingon sila, “Unahon namo ang sakramento nga miting.” Usa kadto ka dakong pagpamatuod ngari nako sa kaimportante sa sakramento sa Ginoo.
Ang mga miyembro midala ngadto sa miting og daghang higala ug mga silingan. Usa ka sister sa ward midala og walo ka higala kinsa wala pa gyud sukad nakasimba! Dihang nagkadaghan ang nangabut, kinahanglan namong ablihan ang overflow nga kwarto. Sa pag-ihap 215 ka tawo ang nanambong sa sakramento! Sa tibuok nga panahon sa miting, akong gibati ang Espiritu Santo nga nag-uban kanamo ug nga ang Dios mitabang nga molampos kami niini nga paningkamot.
Human niining makatingala nga Dominggo, ang gidaghanon sa regular nga motambong og miting sa sakramento nagkadaghan. Naglakip kini sa tulo ka naghupot sa Melchizedek nga Pagkapari kinsa nagsugod sa regular nga pagsimba kauban sa ilang pamilya. Gani usa ka pamilya may duha ka anak nga gipabunyagan ug gikumpirmahan sa misunod nga bulan.
Nakita sa among mga lider sa stake ang pagkamaayo niini nga kasinatian para sa among ward ug mihimo og susama nga kalihokan. Para sa kalihokan sa stake, ang mga miyembro sa stake matag usa mihimo og pasalig nga motambong sa kaugalingon nilang mga ward sa sama nga Dominggo. Ang kalihokan nagmalampuson usab sa tibuok stake—akong nahibaloan nga usa ka ward sa among stake dunay mitambong nga 208 ka tawo! Nagpasalamat kaayo ko sa nadawat nakong mga panalangin ug sa akong ward ug sa akong stake tungod niini nga mga kalihokan ug sa Espiritu nga among gibati sa pagpangandam ug sa pagpaapil kanila.