Mga Dagami sa Umahan ug mga Panalangin sa Pagkapari
Ni Elder Jack N. Gerard
Sa Seventy
Gikan sa usa ka interbyu uban ni Eliza Broadbent
“Ang Manlalaban [Maghuhupay] … [mao] ang Espiritu Santo” (Juan 14:26).
Sa bata pa ko, dunay gamayng umahan ang akong pamilya sa mga baka ug mga uma. Ang magtubo sa usa ka umahan lisud nga trabaho.
Usa ka adlaw sa ting-init, ako ug ang akong igsoong lalaki nagtrabaho sa uma. Kusog ang huros sa hangin, ug daghan kaayo og abug sa hangin. Duna koy grabe nga mga allergy, ug ang mga abug gikan sa mga dagami usahay maghatag nako og sakit. Nagluha ang akong mga mata. Lisud ang pagginhawa. Gani ang akong ilong nagsugod na sa pagdugo kay gibagnusan nako og maayo.
Dihang ang akong mama miadto sa umahan ug iya kong nakita, gipasulod ko niya sa balay. Gipahigda ko niya sa sopa nga may basa nga panapton sa akong nawong. Paglabay sa pipila ka minutos, mibalik siya nga may kaubang duha ka mag-uuma. Nagsul-ob sila og mga saput nga miputos sa ilang tibuok lawasl nga puno sa abug sa dagami.
Ang mga mag-uuma mga miyembro sa among ward. Gipandong nila ang ilang mga kamot sa akong ulo ug misugod sa paghatag og panalangin kanako. Si papa kaniadto dili pa miyembro sa Simbahan, mao nga siya walay gikuptan nga gahum sa pagkapari. Apan dili gayud nako makalimtan ang pagbati dihang kadtong duha ka buotang mga tawo nanalangin kanako. Init kadto, malinawon, ug makahupay. Ug wala na ako masakit.
Sa wala madugay sa kinabuhi, akong naamguhan nga kadtong pagbati mao ang Espiritu Santo. Ang Espiritu Santo usahay gitawag nga Maghuhupay. Ganahan ko niana nga tawag kay ang Espiritu Santo mao man ang naghatag kanako og kahupayan. Mipamaayo kini sa akong pagbati sa gawas ug sa sulod.
Ang Espiritu Santo usa ka talagsaong panalangin. Pangitaa ang kahupayan nga ipadala sa Espiritu Santo ug paningkamuti ang pagbaton niini diha nimo sa matag adlaw. ●
Kahupayan gikan sa Espiritu Santo
Adunay daghang paagi nga imong mabatyagan ang kahupayan gikan sa Espiritu Santo. Kini nga pasikut-sikot [maze] magpakita og pipila niini. Makita ba nimo ang agianan lahus sa pasikut-sikot?
SUGOD
HUMAN
Mga paghulagway pinaagi ni Greg Newbold