Oktubre 2019 nga Kinatibuk-ang Komperensya

Ang tanang numero sa pahina naggikan sa Nobyembre 2019 nga Liahona.

Tambag gikan ni Presidente Nelson

Sa kinatibuk-ang komperensya, si Presidente Russell M. Nelson mihatag og importanting tambag sa mga Santos sa Ulahing mga Adlaw.

Giawhag niya ang kabatan-onan nga:

“Magmahimong takus alang sa limitado og gamit nga rekomend sa templo” (“Panapos nga Pakigpulong,” 121).
Hinumduman ang iyang pagdapit nga “pagpalista sa batalyon sa kabatan-onan sa Ginoo” sa pagpundok sa Israel (“Mga Saksi, Mga Korum sa Aaronic nga Pagkapari, ug mga Klase sa Young Women,” 39).

Gitamabagan niya ang mga babaye nga:

“Maningkamot nga makasabut unsay gusto sa Ginoo nga inyong mahibaloan ug buhaton,” ug “tun-an sa mainampoon ang seksyon 25 sa Doktrina ug mga Pakigsaad ug diskubrihon unsay itudlo sa Espiritu Santo kaninyo.”
“Mopahilayo kamo gikan sa kalibutanong mga butang,” ug sa “pagbuhat ug pagpadayon niining tibuok kinabuhi nga proseso sa pagpahinungod sa inyong kinabuhi ngadto sa Ginoo.”
Motudlo sa doktrina ni Jesukristo, ug mohatag og “ideya diha sa mga konseho sa pamilya, ward ug sa stake.”
Moserbisyo, mag-ampo, magpuasa, magtuon sa mga kasulatan, magserbisyo sa templo ug sa buhat sa family history, kining tanan “makaabli sa kalangitan nganha kaninyo.”
“Mainampoong magtuon sa tanang mga kamatuoran nga inyong mahibaloan mahitungod sa gahum sa pagkapari,” magsugod sa Doktrina ug mga Pakigsaad 84 ug 107. (Tan-awa sa “Espirituhanon nga mga Bahandi,” 77, 79.)

Giawhag niya ang tanang miyembro sa Simbahan sa pag-andam alang sa kinatibuk-ang komperensya sa Abril 2020 pinaagi sa:

Pagbasa sa sugilanon sa Unang Panan-awon ni Joseph Smith.
Pagpamalandong kon sa unsang paagi ang Basahon ni Mormon ug ang mga panghitabo sukad sa Unang Panan-awon nakahimo og kalainan ngari kanato ug sa atong mga minahal.
Paghimo sa bag-ong mga video sa Basahon ni Mormon nga kabahin sa atong indibidwal ug pamilya nga pagtuon.
Pagpili og atong kaugalingong mga pangutana, paghimo og atong kaugalingong mga plano, ug sa pagtuon og maayo “sa mahimayaong kahayag sa Pagpahiuli.” (Tan-awa sa “Panapos nga Pakigpulong,” 122.)

Unsaon sa …

Pagpaambit sa ebanghelyo

Mahitungod sa pagpamaambit sa ebanghelyo, si Sister Cristina B. Franco nangutana sa mosunod nga mga pangutana ug dayon gisultihan ang mga miyembro sa Simbahan, “Ang tubag sa tanan niining mga pangutana mao ang oo! Mahimo nato kini!”

“Mahimo ba kitang modapit og usa ka higala nga dili miyembro sa atong simbahan nga moadto sa simbahan uban nato sa Dominggo?”
“O mahimo ba kaha kitang mopaambit og kopya sa Basahon ni Mormon sa usa ka paryente o higala?”
“Mahimo ba kitang motabang sa uban sa pagpangita sa ilang mga katigulangan diha sa FamilySearch o mopaambit sa uban sa unsay atong nakat-unan atol sa semana samtang nagtuon kita sa Dali, Sunod Kanako?”
“Mahimo ba kita nga mas mahisama sa atong Manluluwas, nga si Jesukristo, ug mopaambit sa uban sa unsay nakahatag kanato og hingpit nga kalipay sa atong kinabuhi?”

Sister Cristina B. Franco, Ikaduhang Magtatambag sa Kinatibuk-ang Kapangulohan sa Primary, “Pagkaplag og Hingpit nga Kalipay sa Pagpaambit sa Ebanghelyo,” 85.

Palawuman Pa ang Pagtuon

Pagsubay sa Dalan sa Pakigsaad

Sa pagtuman sa duha ka dagkong mga sugo, miingon si Presidente Dallin H. Oaks, “nagsubay kita sa pino nga linya tali sa balaod ug sa gugma––nagtuman sa mga sugo ug naglakaw sa dalan sa pakigsaad, samtang naghigugma sa atong mga silingan. Kini nga paglakaw nanginahanglan kanato nga magtinguha sa balaanong inspirasyon” (“Duha Ka Dagkong mga Sugo, “75). Tan-awa o basaha ang iyang pakigpulong ug ang mga pakigpulong sa mosunod nga mga mamumulong alang sa kalig-on subay sa dalan sa pakigsaad:

Si Elder Terence M. Vinson, ang miingon, “Ang gikinahanglan nato dinhi minos nga Wi-Fi ug dugang nga Nephi!” (“Tinuod nga mga Disipulo sa Manluluwas,” 9).
Si Brother Stephen W. Owen, ang miawhag kanato sa pagtinguha og “espiritwal nga pag-alima” pinaagi sa pagdiskonektar sa kalibutan ug pagkonektar sa langit (“Magmatinud-anon, Dili ang Kawalay Pagtuo,” 12).
Si Sister Michelle Craig, ang namulong mahitungod sa “upat ka paagi sa pagpalambo sa atong espirituhanong kapasidad sa pagdawat og pagpadayag” (“Espirituhanong Kapasidad,” 19).
Si Elder Gary E. Stevenson, ang miingon, “Kinahanglan kitang mopadayon nga matinud-anon ug magmabinantayon, kay sa ingon mao lamang ang paagi sa pag-ila sa kamatuoran ug sa pagdungog sa tingog sa Ginoo pinaagi sa Iyang mga sulugoon” (“Ayaw Paglingla Kanako,” 96).
Si Presidente M. Russell Ballard, ang miingon, “Usa sa labing importating mga butang nga atong makat-unan niining kinabuhia mao nga kon unsaon paghatag og gibug-aton ang atong mahangturong espirituhanon nga kinaiya ug pugngan ang atong dautan nga mga tinguha” (“Tuguti ang Atong Espiritu sa Pagkontrolar sa Atong Lawas,” 109).
Si Elder Peter M. Johnson, ang mitudlo kanato unsaon nato sa pagbuntog sa tulo ka himan sa kaaway: paglingla, pagbalda, ug pagwagtang sa kadasig (“Gahum sa Pagbuntog sa Kaaway,” 110–12).