Sa Digital Lamang: Mga Young Adult
Pakighimamat sa Propeta Nagtudlo kanako sa Paghunong og Sobra nga Paghunahuna sa Ebanghelyo
Kita may hilig nga himoong lisud kaayo ang ebanghelyo, nga sa tinud-anay kini yano.
Ang tagsulat nagpuyo sa New South Wales, Australia.
Isip usa ka batan-on nga naningkamot sa pagpangita sa Dios, kini lisud kaayo ang pagtuo nga kita adunay mga propeta nga nagpuyo dinhi sa yuta karon. Kini bation ang hilabihan nga kasamok ug ka makalibug. Apan hapit duha ka tuig ang milabay, isip usa ka mapasaligon nga kinabig sa Simbahan, akong nakita nga gani mas lisud ang pagtuo nga ako mao ang usa sa 15 ka young adult sa Sydney, Australia, napili nga makighimamat ni Presidente Russell M. Nelson alang sa usa ka sesyon sa pangutana ug pagtubag.
Kini usa ka kasinatian nga kanunay magdala og usa ka pahiyom sa akong nawong ug mga luha sa kalipay sa matag higayon nga akong hinumduman kini.
Kaming tanan matinguhaong makighimamat kaniya ug gani mas nahadlok sa pagpaminaw unsay iyang kinahanglan nga isulti ngari kanamo isip mga young adult. Naghunahuna ako sa mga tubag nga iyang ihatag sa among mga pangutana nga mahimong lawom ug detalyado, ug ako naghunahuna kon ako andam ba sa pagpaminaw ug pagsabut sa iyang mga pulong. Uban sa hilabihan namo ka nerbyos, kaming tanan mihukom sa pag-ampo aron sa pagtabang kanamo nga mas makomportable ug sa pagdapit sa Espiritu.
Ang higayon nga si Presidente Nelson misulod ngadto sa kwarto hilabihan ka dili katuhoan. Kita kanunay gitudloan nga ang mga propeta nagdawat og pagpadayag gikan sa Dios ug ipakigbahin kini ngadto sa kalibutan, nagtabang sa tanan sa pagduol ngadto kang Kristo. Makita nato sila nga mamulong sa kinatibuk-ang komperensya. Apan ang pagtan-aw ug pagpakigsulti kaniya nga nag-atubangay usa ka lahi nga kasinatian.
Ania siya—usa ka mapainubsanon, mahigugmaon nga propeta sa Dios. Ang Espiritu nga iyang gidala sulod sa kwarto hilabihan kagamhanan. Kaming tanan mibarug diha sa kahilum, nagpanuko sa pagpahiyom o sa pagsulti, apan samtang siya milakaw nga may dakong pahiyom ug misulti kanamo unsa siya ka malipayon sa pakighimamat kanamo, kaming tanan napuno sa hilabihan nga kalipay ug kalinaw. Gibati nako ang iyang kinasingkasing nga pagpaubos ug ang gugma nga siya aduna sa matag usa kanamo samtang siya milamano ug mihatag kanamong tanan og usa ka malumo nga pahiyom.
Kami misugod sa pagpangutana kaniya mahitungod sa mga young adult sa Simbahan, ug usa ka piho nga pangutana ingon og labing mahinungdanon kaayo ngari kanako. Kami nangutana, “Isip mga young adult, kami kasagaran nanlimbasug sa pag-awhag sa among mga pamilya ug mga higala sa pag-apil diha sa ebanghelyo. Sa unsang paagi kami makahimo og mas maayo sa pagpaambit sa ebanghelyo ngadto kanila?” Si Presidente Nelson mihunong sa makadiyot aron sa paghunahuna ug dayon misulti og duha ka mga pulong: “Magmadanihon ka.” Ug siya mipadayon: “Magpakaehemplo ug magpakamatinud-anon.”
Mao kadto—usa ka yano apan mapalandungon ug tinuod nga mensahe. Ang iyang yano nga mga pulong napatik og maayo sa among mga hunahuna ug mga kasingkasing. Nakaamgo ako nianang higayuna nga isip mga young single adult, kami hilig sa pagpalisud ug pagpasobra og hunahuna sa ebanghelyo, nga sa tinud-anay ang mga sumbanan gikan sa Espiritu ug sa atong mga propeta mga yano, madayganon, ug kini naghupot og daghan kaayong mga saad sa mga panalangin.
Nakaamgo ako nianang higayuna kon giunsa ni Presidente Nelson paghimo nga hilabihan ka mapainubsanon ug espiritwal: gikan sa kanunay nga pagbansay og puyo sa ebanghelyo ni Jesukristo. Ug ingon niana ang tanan natong kinahanglan nga buhaton. Buhata kadtong gagmay nga mga butang sa matag adlaw nga mas makapasuod kanato ngadto sa Langitnong Amahan ug ni Jesukristo: pagsimba ug pagtambong sa templo, pagbasa sa mga kasulatan, pag-ampo nga kinasingkasing ug sa katapusan pagmabination ug pagmahigugmaon ngadto sa tanan nga atong ikahimamat. Kadtong gagmay, inadlaw nga mga buhat mao ang mga yawe nga mabatid ang paagi sa pagkamahimong tinuod nga mga disipulo ni Kristo, paglig-on sa atong relasyon ngadto Kaniya, ug mopakigbahin sa Iyang kamatuoran ngadto sa uban.
Kinahanglan lamang kitang maningkamot nga mahimong labing nindot nga bersyon sa atong mga kaugalingon, ug kadtong ginagmay nga yanong mga butang modala ngadto sa dagkong mga sangputanan. Oo, ang kalibutan samok, ug oo, sayon ang sobra sa paghunahuna sa daghang mga butang sa kinabuhi, apan yano ang plano sa Dios, ug kon kita mosunod niini, kini naghimo sa kinabuhi nga mas yano. Pinaagi sa kinasingkasing nga pagsunod sa paggiya sa propeta ug sa pagbuhat sa atong labing maayo nga mahimong sama sa atong Manluluwas nga si Jesukristo matag adlaw, ang atong mga ehemplo sa hugot nga pagtuo lamang ang mopausab sa mga kinabuhi sa naglibut kanato.