Ang Mga Panalangin sa Pagkamiyembro sa Simbahan

Niining tuiga magsaulog kita sa ika-200 nga anibersaryo sa pagbisita sa Amahan ug sa Anak kang Joseph Smith. Napulo ka tuig human sa Unang Panan-awon, Ang Simbahan ni Jesukristo sa mga Santos sa Ulahing mga Adlaw na-organisar, naghatag sa mga ordinansa, mga pagtulun-an sa ebanghelyo, ug sa awtoridad sa pagkapari nga gikinahanglan alang sa atong kaluwasan.

Samtang ang kalibutan nagkaanam ka kalibutanon, bisan pa niana, daghang tawo ang naglibug nganong gikinahanglan ang organisado nga relihiyon. Mibati sila nga mahiduol ra sila sa Dios nga walay pagpasakop sa usa ka simbahan. Samtang tinuod nga kita mobati sa Espiritu sa Ginoo sa daghang dapit, kini nga isyu sa Liahona nagsuhid sa pipila ka rason nganong giorganisar sa Ginoo ang Iyang Simbahan ug sa unsang paagi ang Iyang gipahiuli nga Simbahan nagtutok sa atong pagkat-on ug mopalambo sa atong indibidwal nga mga pagsanong sa Iyang Espiritu alang sa kaayohan karon sa atong panahon.

Sigun sa akong gisulat sa akong artikulo diha sa pahina 24, ang mga miyembro sa Simbahan nagsunod sa mga pagtulun-an ni Propeta Joseph Smith sa “pagpakaon sa gigutom, pagsinina sa hubo, … paghupay sa masakiton, maanaa man dinhi sa simbahan, o sa lain.” Sa akong trabaho sa Latter-day Saint Charities, nakasaksi ko sa dako kaayong mga kontribusyon nga gihimo sa Simbahan sa sobra sa 100 ka nasud matag tuig. Salamat sa gagmayng mga donasyon gikan sa mga miyembro sa Simbahan, ang atong mga kaigsoonan sa tibuok kalibutan napanalanginan sa mga panginahanglan sa kinabuhi ug mas daghan pa.

Sa pahina 12, gipasabut ni Presidente Dallin H. Oaks nganong ang Ginoo nangulo sa Iyang Simbahan pinaagi sa mga propeta ug mga apostoles, ug sa pahina 18, si Sister Jean B. Bingham, kinsa kauban nakong nagserbisyo sa Kinatibuk-ang Kapangulohan sa Relief Society, mipaambit og mensahe mahitungod sa impluwensya sa mga babaye ug unsaon nato nga makatabang sa usag usa sa pagkab-ot sa atong balaan nga potensyal pinaagi sa pagtinabangay diha sa Simbahan.

Hinaut nga ang Dios mopanalangin kanato isip mga indibidwal ug isip katawhan aron magpadayon sa pagpangalagad sa mas taas ug mas balaan nga paagi hangtud nga ang Manluluwas moanhi pag-usab.

Sister Sharon Eubank

Unang Magtatambag sa Kinatibuk-ang Kapangulohan sa Relief Society