Musika alang sa Mas Maayo nga Adlaw
Gipatiran ni Elizabeth ang walay sulod nga bagol sa lubi ngadto sa dili sementadong dalan. Nimug-ot siya dihang miligid kini palayo. Karon dili maayo nga adlaw.
Dili gayud!
Si Lagi may dili maayong gisulti kaniya didto sa eskwelahan. Sa wala madugay, nangatawa ang mga estudyante dihang nasayop siya sa pagsulbad sa math atubangan sa klase. Ug unya ang iyang project naguba.
“Dili kini makatarunganon!” Miingon si Elizabeth. Hinoon kinsa bay nag-imbento og bati nga mga adlaw?
Mipitas si Elizabeth og usa ka matahum nga hibiscus nga bulak. Maayo na lang ni kay kini usa ka maayong butang karon. Bisan sa bati nga adlaw sa Samoa makakita siya og mga bulak nga matahum bisan asa.
Gitusok niya ang pink nga bulak ngadto sa iyang buhok ug mipauli.
“Talofa!” Miingon si Papa. “Kumusta ang imong adlaw?”
Miduko si Elizabeth. “Bati.” Milakaw siya agi sa langas nga baboy sa ilang nataran ug milingkod tapad sa iyang Papa sa balkonahe.
Milingkod si Papa ug naminaw samtang gisulti ngadto niya ang tanan mahitungod sa lisud niya nga adlaw.
“Pasensya na lang,” miingon si Papa, nga migakos kaniya. “Ako usab dunay mga adlaw nga sama niana. Gusto ka bang masayud unsay nakatabang nako?”
Miyango siya. “Oo, palihug!”
Misugod siya sa pagkanta sa kanta nga nahibaloan kaayo ni Elizabeth. Kantahon ni Papa sa tanang higayon kining matahum nga love song ngadto ni Mama.
Mikatawa si Elizabeth ug midap-ig sa iyang abaga. “Daa–aad!”
Mingisi si Papa. “Seryoso ko! Ang maayong musika nakatabang nako nga mobati og mas maayo. Ug, mahitungod sa musika …”
Nasayud si Elizabeth unsa pay iyang isulti. Oras na para magpraktis og piano.
Labaw sa tanan, si Elizabeth gustong makakat-on og piano aron makatukar siya sa simbahan. Ganahan na siyang daan nga mokanta kauban sa iyang pamilya. Ilabi na uban ni Papa. Apan ang pagtukar og piano mas lisud. Maglisud ang iyang tudlo sa pagpangita sa mga nota.
“Ambot lang kay wa ko ganahing magpraktis karon,” miingon siya.
Mibarug si Papa. “Sulayi sa paghunahuna kon unsay imong gitukar. Ang mga himno makatabang nato nga mobati nga mas duol sa Dios.”
Dayon gihubo ni Papa ang iyang mga sandal ug misulod aron motabang para sa panihapon.
Gihubo usab ni Elizabeth ang iyang mga sandal ug misulod usab. Si Papa ang mihiwa sa mga utanon samtang nag-ukay si Mama sa linuto.
Ang papel sa musika alang sa “Fa’afetai ako Le Atua” naa ra sa may keyboard. Ganahan si Elizabeth niining Samoan nga himno. Naghisgot kini mahitungod sa pagpasalamat sa Dios.
Gipaandar ni Elizabeth ang de-korente keyboard ug nagsugod sa pagtukar. “Hunahunaa kon unsay imong gitukar,” maoy giingon ni Papa.
Busa iyang gibuhat. Gihunahuna niya ang tanang butang nga angay niyang pasalamatan. Iyang pamilya. Iyang balay. Musika. Matahum nga Samoa.
Ang iyang mga tudlo mas dali nga nakapangita sa mga nota. Wala madugay, ang iyang mga pagbati nagsugod sa pagkausab. Mibati siya og kalinaw. Mipahiyom si Elizabeth. Mibati siya sa Espiritu Santo!
Ang taguktok sa pagpanghiwa nahunong. Si Papa misugod sa pag-hum. Miduol si Papa tapad niya ug misugod sa pagkanta.
Gipadayon niya ang pagtukar, ug si Mama miapil na usab. Si Elizabeth padayong naghunahuna sa tanang paagi sa pagpanalangin sa Dios kaniya ug sa iyang pamilya.
Dapit sa katapusan, miupo si Papa ug nangutana, “Mas maayo na ba ang pagbati?”
“Oo!” matud niya. “Eksakto ka. Ang maayong musika mihimo gayud nga mas momaayo ang akong adlaw!” ●
Mga paghulagway pinaagi ni Rebecca Sorge