Kitang Tanan Nangandoy nga Mahisakop
Bisan kini kauban sa pamilya, mga higala, mga kauban sa trabaho, o mga tawo sa simbahan, kitang tanan nangandoy nga mahisakop.
Dili ako maayo sa basketball. Tawga kini og kaliwat, tawga kini og natural nga abilidad, tawga kini og bisan unsa—kini kanunay ingon og ang tanan diha sa korte aduna niini, ug ako wala. Kasagaran naghimo kini kanako nga mobati nga wala mahisakop.
Kini nga kamatuoran wala mopahunong sa akong mga higala sa pagdapit kanako sa pagdula og basketball. Ako modagan lamang ngadto ug ngari sa korte, nagpakaaron-ingnon nga ako nakahibalo sa unsay akong gibuhat. Wala ako maghunahuna nga akong gibuang si bisan kinsa. Apan, ila ang dungog, ang akong mga higala mihimo sa ilang labing maayo sa pagpaapil kanako.
Atol sa usa ka dula, misulay ako sa pagshot ug ang bola milupad padulong sa basket. Kini miigo sa backboard, sa mga ngilit sa ring, dayon nahulog ngadto sa basket. Dili ako makatuo niini. Lonlon nga swerte, ako naka-shot!
Nakasabut sa katalagsaon niini nga higayon, ang akong mga higala mipahalipay kanako. Ako wala makahatag og daghan niana nga dula, apan akong gibati nga ako nahisakop, ug kana dako og kahulugan.
Ang pagkamasakop usa ka tawhanong panginahanglan. Bisan kini kauban sa pamilya, mga higala, mga kauban sa trabaho, o mga tawo sa simbahan. Isip mga miyembro sa Ang Simbahan ni Jesukirsto sa mga Santos sa Ulahing mga Adlaw, dili lamang kita gusto nga mahisakop, apan kinahanglan usab nato nga ang uban mobati nga sila nahisakop usab. Kita kinahanglan nga mosunod sa ehemplo ug gugma sa Manluluwas ug motabang sa tanan kinsa nagtinguha “sa pag-ipon ngadto sa panon sa Dios, ug pagatawgon nga iyang mga katawhan” (Mosiah 18:8).
Kitang Tanan Gikinahanglan
Sa kaalaot, dili ang tanan mobati nga sila nahisakop—bisan diha sa simbahan. Ang ubang mga tawo mahimong mobati nga wala kinahanglana o gani wala apila. Apan kon kini hunahunaon kon unsa ang tinuod, kitang tanan gikinahanglan. Si Apostol Pablo, namulong mahitungod sa Simbahan, miingon: “Kay ang lawas [ni Kristo] dili usa ka bahin lamang, kon dili daghan” (1 Mga Taga-Corinto 12:14).
Si Elder Jeffrey R. Holland sa Korum sa Napulog Duha ka mga Apostoles miingon, “Kini mao ang usa ka makatagbaw kaayo nga butang nga gikinahanglan diha sa lawas ni Kristo. Kon ako maglihok isip usa ka mata o bukton dili importante; ang kamatuoran mao nga ako gikinahanglan … ug ang lawas dili hingpit nga wala ako.”1
Kon kita mahimong bahin sa lawas ni Kristo—ang Simbahan—kita kauban sa uban diha sa pagtuo. Ug isip bahin sa lawas ni Kristo, ang matag miyembro sa Simbahan gikinahanglan.
Kita Makatabang sa Uban nga Mobati nga Nahisakop Sila
Uban sa pag-ambit sa sakramento, kita mosimba aron “[mag]tigum … sa pagpuasa ug pag-ampo, ug sa pagpakigsulti sa usag usa mahitungod sa kaayohan sa [atong] mga kalag” (Moroni 6:5).
Kadtong mga bag-o ug bumabalikay sa simbahan mahimong dili komportable og gamay. Sila mahimong mobati nga sila wala mahisakop, naglaum nga usa ka tawo motabang ug magmahigalaon. Kita mahimong mao ang mopahiyom, mangumusta, ug makighigala kanila.
Si Presidente M. Russell Ballard, Akting nga Presidente sa Korum sa Napulog Duha ka mga Apostoles, miingon, “Kon kita tinuoray nga disipulo ni Ginoong Jesukristo, kita makatabang uban sa gugma ug pagsabut sa tanan natong mga silingan sa tanang panahon.”2
“Walay Usa Kaninyo nga Kinahanglang Mopalayo”
Sa dihang ang Manluluwas mipakita ngadto sa mga Nephite, gidapit Niya ang tanan sa paghikap sa mga marka sa Iyang mga kamot, mga tiil, ug kilid. Tagsa tagsa, ang mga katawhan miduol ngadto Kaniya (tan-awa sa 3 Nephi 11:15). Dayon Siya miayo sa masakiton, may balatian, ug sa gitakbuyan (tan-awa sa 3 Nephi 17:7, 9). Dayon Siya mipanalangin sa tanang mga bata ug nag-ampo alang kanila (tan-awa sa 3 Nephi 17:21). Sa wala madugay, Siya malumong miingon, “Ako misugo nga walay mopalayo kaninyo” (3 Nephi 18:25).
Bisan pa sa inyong mga pakigbisog, inyong kaagi, inyong pagmatuto, o bisan unsa nga makapahimo kaninyong mobati nga kamo wala mahisakop, hinumdumi nga ang Manluluwas dili gusto kaninyo nga mopalayo. Kon gibati ninyo nga nag-inusara o wala apila, Siya nasayud unsa ang bation niana. Siya gitamay ug gisalikway (tan-awa sa Isaias 53: 3). Gidala diha sa Iyang Kaugalingon ang atong mga sala ug mga kasub-anan ug gisinati ang tanang matang sa balatian ug pag-inusara (tan-awa sa Alma 7:11). Si Jesukristo andam sa pagsinati niining tanan aron Siya masayud kon unsaon sa pagtabang kanato. Samtang kita magsunod Kaniya, atong mahibaloan nga kita sa tinuod nahisakop.
Adunay Luna alang Kaninyo
Ang Simbahan anaa aron sa pagtabang kanato sa pagkat-on kon sa unsang paagi kita mahimong sama sa Langitnong Amahan. Kini naghatag usab sa mga estraktura ug awtoridad nga gikinahanglan sa paghimo og sagradong mga pakigsaad ug nagbutang kanato diha sa dalan ngadto sa kahimayaan.
Bisan asa pa kamo niini nga panaw, hinumdumi, ingon nga gisulti ni Elder Dieter F. Uchtdorf sa Korum sa Napulog Duha ka mga Apostoles, “Adunay luna alang kaninyo dinhi niini nga Simbahan. Dali, pakig-uban kanamo!”3
Samtang kita naningkamot sa pagsunod sa hingpit nga ehemplo sa Manluluwas pinaagi sa paghigugma, pagtabang, ug panlimbasog sa pagtabang sa usag usa, makahimo kita sa simbahan nga usa ka dapit sa pagkanasakop ug pagkanahiusa. Bisan alang sa mga tawo kinsa dili makamaong modula og basketball!