1 Ug karon, nahitabo nga si Alma, kinsa milayas gikan sa mga sulugoon ni hari Noah, naghinulsol sa iyang mga sala ug sa mga sayop nga binuhatan, ug sa tago miadto taliwala sa katawhan, ug misugod sa pagtudlo sa mga pulong ni Abinadi—

2 Oo, kabahin niana nga moabot, ug usab kabahin sa pagkabanhaw sa mga patay, ug sa katubsanan sa katawhan, nga mahitabo pinaagi sa gahom, ug sa mga pag-antos, ug sa kamatayon ni Kristo, ug sa iyang pagkabanhaw ug sa pagkayab ngadto sa langit.

3 Ug kutob sa mamati sa iyang pulong iyang gitudloan. Ug siya mitudlo kanila sa tago, nga kini dili mahibaloan sa hari. Ug daghan ang mituo sa iyang mga pulong.

4 Ug nahitabo nga kutob sa mituo kaniya miadto sa usa ka dapit nga gitawag og Mormon, nakadawat sa mao nga ngalan gikan sa hari, kay anaa man sa mga utlanan sa yuta nga gidagsaan, sumala sa kahigayonan o kapanahonan, sa ihalas nga mga mananap.

5 Karon, didto sa Mormon adunay usa ka tuboran sa dalisay nga tubig, ug si Alma midangop didto, kay duol didto sa tubig dunay bagâ nga gagmayng mga kahoy, diin didto gitago niya ang iyang kaugalingon panahon sa adlaw gikan sa gihimo sa hari nga mga pagpangita.

6 Ug nahitabo nga kutob sa mituo kaniya miadto didto sa pagpamati sa iyang mga pulong.

7 Ug nahitabo nga human sa daghang adlaw dihay ubay-ubay nga gidaghanon nga nagpundok didto sa dapit sa Mormon, aron sa pagpaminaw sa mga pulong ni Alma. Oo, ang tanan nagkapundok nga mituo sa iyang pulong, aron sa pagpaminaw kaniya. Ug mitudlo siya kanila, ug misangyaw kanila og paghinulsol, ug katubsanan, ug pagtuo sa Ginoo.

8 Ug nahitabo nga miingon siya kanila: Tan-awa, ania ang katubigan sa Mormon (kay sa ingon niini kini gitawag) ug karon, kay nagmatinguhaon kamo sa pag-ipon sa pundok sa Dios, ug pagatawgon nga iyang katawhan, ug andam nga mopas-an sa mga alantoson sa usag usa, nga kini mogaan;

9 Oo, ug andam sa pagbangotan uban niadtong nagbangotan; oo, ug sa paghupay niadtong nanginahanglan og kahupayan, ug mobarog isip mga saksi sa Dios sa tanang panahon ug sa tanang butang, ug sa tanang dapit diin kamo nahimutang, bisan hangtod sa kamatayon, aron matubos kamo sa Dios, ug maihap uban niadtong maapil sa unang pagkabanhaw, nga makabaton kamo og kinabuhing dayon—

10 Karon sultihan ko kamo, nga kon mao man kini ang tinguha sa inyong mga kasingkasing, unsa may inyong isupak mahitungod sa pagpabunyag sa ngalan sa Ginoo, isip pagpamatuod ngadto kaniya nga kamo misulod sa pakigsaad uban kaniya, nga kamo mag-alagad kaniya ug motuman sa iyang mga sugo, nga mobu-bo siya sa kabuhong sa iyang Espiritu diha kaninyo?

11 Ug karon sa diha nga ang katawhan nakadungog niini nga mga pulong, namakpak sila tungod sa kamaya, ug misinggit: Mao kini ang tinguha sa among mga kasingkasing.

12 Ug karon nahitabo nga si Alma midala kang Helam, siya nga usa sa mga nag-una, ug miadto ug mibarog sa may tubig, ug misinggit, nga nag-ingon: O Ginoo, ibu-bo ang imong Espiritu diha sa imong sulugoon, aron makahimo siya niini nga buhat inubanan sa kabalaan sa kasingkasing.

13 Ug sa dihang nasulti na niya kini nga mga pulong, ang Espiritu sa Ginoo nag-uban kaniya, ug miingon siya: Helam, ako mobunyag kanimo, pinaagi sa gihuptan nga awtoridad gikan sa Labing Makagagahom nga Dios, isip pagpamatuod nga ikaw nakasulod sa pakigsaad nga mangalagad kaniya hangtod nga ikaw mamatay sumala sa mortal nga lawas; ug nga ang Espiritu sa Ginoo ibu-bo diha kanimo; ug nga siya mohatag kanimo sa kinabuhing dayon, pinaagi sa katubsanan ni Kristo, kinsa iyang giandam gikan sa katukoran sa kalibotan.

14 Ug human masulti ni Alma kini nga mga pulong, sila si Alma ug si Helam mipaunlod sa tubig; ug mibarog sila ug mitunga gikan sa tubig nga nagmaya, nga napuno sa Espiritu.

15 Ug usab, si Alma mikuha og laing tawo, ug miadto sa ikaduhang higayon sa tubig, ug mibunyag kaniya sumala sa nauna, lamang wala na niya ipaunlod pag-usab ang iyang kaugalingon sa tubig.

16 Ug subay niini nga paagi gibunyagan niya ang matag usa nga miadto sa dapit sa Mormon; ug ang ilang gidaghanon mikabat og mga duha ka gatos ug upat ka kalag; oo, ug gibunyagan sila didto sa katubigan sa Mormon, ug napuno sa grasya sa Dios.

17 Ug gitawag sila nga ang simbahan sa Dios, o ang simbahan ni Kristo, gikan niadtong panahona. Ug nahitabo nga bisan kinsa kadtong gibunyagan pinaagi sa gahom ug awtoridad sa Dios gidugang ngadto sa iyang simbahan.

18 Ug nahitabo nga si Alma, kay adunay awtoridad gikan sa Dios, mi-orden og mga pari; gani usa ka pari sa matag kalim-an sa ilang gidaghanon iyang gi-orden sa pagsangyaw ngadto kanila, ug sa pagtudlo kanila mahitungod sa mga butang kalabot sa gingharian sa Dios.

19 Ug misugo siya kanila nga sila kinahanglan walay laing itudlo gawas sa mga butang nga iyang gitudlo, ug sa gipamulong pinaagi sa ba-ba sa balaang mga propeta.

20 Oo, gani misugo siya kanila nga sila walay lain nga isangyaw gawas sa paghinulsol ug pagtuo sa Ginoo, kinsa mitubos sa iyang katawhan.

21 Ug misugo siya kanila nga kinahanglan walay panagbingkil sa usag usa, apan sila molantaw sa unahan uban sa hiniusa nga panan-aw, may usa ka pagtuo ug usa ka bunyag, diin ang ilang mga kasingkasing mabugkos sa panaghiusa ug sa gugma sa usag usa.

22 Ug sa ingon niana misugo siya kanila sa pagsangyaw. Ug sa ingon niana nahimo silang mga anak sa Dios.

23 Ug misugo siya kanila nga kinahanglan silang mobalaan sa adlaw nga igpapahulay, ug balaanon kini, ug usab matag adlaw magpasalamat sila sa Ginoo nga ilang Dios.

24 Ug usab misugo siya kanila nga ang mga pari kinsa iyang gi-orden kinahanglan motrabaho gamit ang ilang kaugalingong mga kamot alang sa ilang panginahanglan.

25 Ug dihay usa ka adlaw sa matag semana nga gigahin nga sila magtapok aron magtudlo sa katawhan, ug sa pagsimba sa Ginoo nga ilang Dios, ug usab, sa kanunay kutob sa ilang mahimo, aron sila magkapundok.

26 Ug ang mga pari dili angay nga magsalig sa katawhan alang sa ilang panginahanglan; apan sa ilang pagtrabaho madawat nila ang grasya sa Dios, nga sila magmalig-on sa Espiritu, kay nakaangkon og kahibalo bahin sa Dios, nga makatudlo sila pinaagi sa gahom ug sa awtoridad gikan sa Dios.

27 Ug usab si Alma misugo nga ang katawhan sa simbahan kinahanglan mohatag sa ilang kabtangan, matag usa sumala sa unsay anaa kaniya; kon siya adunay labaw nga kabuhong siya mohatag sa labaw nga kabuhong; ug kaniya nga adunay diyotay lamang, diyotay lamang ang gikinahanglan; ug siya nga wala kinahanglan nga hatagan.

28 Ug sa ingon niana angay nga mohatag sila sa ilang kabtangan sa ilang kaugalingong kabubut-on ug maayo nga mga tinguha ngadto sa Dios, ug ngadto niadtong mga pari nga nagkinahanglan, oo, ug ngadto sa matag timawa, hubo nga mga kalag.

29 Ug gisulti niya kini ngadto kanila, kay gisugo sa Dios; ug sila naglakaw nga matarong atubangan sa Dios, naghinatagay sa usag usa sa temporal ug sa espirituhanong paagi sumala sa ilang mga panginahanglan ug mga kakulangan.

30 Ug karon nahitabo nga kining tanan nahimo didto sa Mormon, oo, didto sa katubigan sa Mormon, sa lasang nga duol sa katubigan sa Mormon; oo, sa dapit sa Mormon, sa katubigan sa Mormon, sa lasang sa Mormon, pagkatahom nila ngadto sa mga mata niadtong didto nakaangkon og kahibalo mahitungod sa ilang Manunubos; oo, ug pagkabulahan nila, kay sila moawit sa pagdayeg kaniya sa kahangtoran.

31 Ug kini nga mga butang nabuhat didto sa mga utlanan sa yuta, nga kini unta dili mahibaloan sa hari.

32 Apan tan-awa, nahitabo nga ang hari, kay nakadiskobre sa mga kalihokan sa katawhan, mipadala sa iyang mga sulugoon sa pagpaniid kanila. Busa sa adlaw nga nagkatigom sila sa ilang kaugalingon aron sa pagpaminaw sa pulong sa Ginoo nadiskobrehan sila sa hari.

33 Ug karon ang hari miingon nga si Alma mihulhog sa katawhan sa pagsukol batok kaniya; busa iyang gipadala ang iyang kasundalohan sa paglaglag kanila.

34 Ug nahitabo nga si Alma ug ang katawhan sa Ginoo gipahibalo bahin sa pag-abot sa kasundalohan sa hari; busa ilang gidala ang ilang mga tolda ug ang ilang mga pamilya ug mibiya paingon sa kamingawan.

35 Ug sila may gidaghanon nga mga upat ka gatos ug kalim-an ka kalag.