Pagbalik ngadto sa Simbahan sa Maabi-abihong mga Bukton

Ni Rachelle Wilson

Mihunong ako sa pagsimba apan wala gayud kawad-i og hugot nga pagtuo sa unsay akong gituohan. Sa dihang mibalik na ako, ang akong ward diha alang kanako.

Uban sa mga tudlo nga nagmantika tungod sa humok nga piniritong manok ug nanobra ka parat apan nindot nga pagkaprito nga French fries inubanan sa bugnaw kaayo nga paglad-ok sa milkshake atol sa klase unta sa math, gipaila-ila ako ngadto sa bag-ong relihiyon nga wala nako mabatii pinaagi sa usa ka suod nga higala—Ang Simbahan ni Jesukristo sa mga Santos sa Ulahing mga Adlaw. Wala kaayo ako makaamgo nga ako balaang gigiyahan, nakahimamat og mga tawo ug nakabaton og mga kasinatian nga hingpit nga giplano sa Langitnong Amahan alang kanako.

Ako sayo nga nakapalambo og pagtuo sa Dios, ingon nga gipadako nga Katoliko. Apan sa akong pagsulod sa kolehiyo, tataw nakong nahinumduman nga ako may hunahuna nga gusto pang masayud og dugang. Gani gusto ko og mas suod nga relasyon sa Dios. Kana nga hunahuna ug pagkadayag ngadto sa Ginoo mitugot sa akong higala sa pagpaila kanako sa ebanghelyo ug pagdapit kanako ngadto sa simbahan.

Sa dihang ako mitambong sa Ang Simbahan ni Jesukristo sa mga Santos sa Ulahing mga Adlaw sa unang higayon, ako naulaw og gamay, apan gibati nako ang mainitong pag-abi-abi tungod kay ang tanan mabination kaayo, madapiton, ug matinuoron. Bisan tuod ako wala pa gayud makahimamat niining mga tawhana, ako gitagad sama og pamilya. Misugod ako sa pag-adto kanunay, ug human sa dugay nga pagsusi ug sa usa ka makapausab sa kinabuhi nga panalangin sa pagkapari, mipasakop ako sa Simbahan. Apan human sa usa ka lig-on nga lima ka bulan sa pagkaaktibo ug pag-apil sa mga kalihokan sa Simbahan, ang akong hugot nga pagtuo pagasulayan. Gigiyahan ako sa pagpauli sa panimalay.

Balik sa akong siyudad nga natawhan, ako mitambong sa akong bag-o nga ward ug gani gihatagan og mga calling. Naningkamot ako sa pagpabiling aktibo, apan tanan sa kinabuhi mibati nga ingon og kini supak kanako, nagresulta sa akong nagkahinay nga pagtambong sa simbahan.

Mipadayon ako subay sa usa ka gubot nga grabing kausaban sa kinabuhi apan wala gayud kawad-i sa hugot nga pagtuo diha sa unsay akong gituohan. Nasayud ako nga gihuptan sa Simbahan ang kahingpitan sa ebanghelyo ni Jesukristo ug sa tanan nga akong gikinahanglan sa kinabuhi.

Ako usahay mitambong og lainlaing mga ward atol niadtong mga tuig sa pagkadili kaayo aktibo ug nakakita sa kalainan tali sa pagkagiabi-abi ug sa pagkawala mamatikdi. Maayo gani, ang mga misyonaryo misumpay sa kal-ang ug nangalagad sa akong mga panginahanglan hangtud nga sa katapusan mibalik ako sa simbahan. Ang akong home ward sa tinud-anay nalipay sa akong pagbalik. Akong gibati nga ako nahisakop sa higayon nga ako misulod sa mga pultahan. Tungod niadtong maabi-abihong mga miyembro, mipadayon ako sa pagtambong ug sa pagtagamtam sa mga panalangin sa ebanghelyo.

Nagtuo ako nga kamo kinahanglang motambong sa simbahan alang sa inyong kaugalingon ug dili alang sa mga tawo. Apan kini motabang sa walay katapusan kon ikaw mahigugmaong giabi-abi. Maayo gani, adunay mga butang nga imong mabuhat sa paghimo sa imong kaugalingon ug sa uban nga mobati nga mas giabi-abi diha sa simbahan.

Unsaon nimo pagtabang ang imong kaugalingon nga maabi-abi:

Tambong sa institute, mga proyekto sa pagserbisyo, ug mga kalihokan sa Simbahan. Bisan og lisud sa sinugdanan, ilabi na nga walay kaila bisan usa, ang pagbutang sa imong kaugalingon didto nag-abli og mga oportunidad nga makighimamat og bag-ong mga tawo ug sa paghimo og panaghigalaay sa tibuok kinabuhi.
Palibuti ang imong kaugalingon og mga tawo nga susama og mga panghunahuna. Kini importante ilabi na kon ikaw usa ka kinabig o bumabalikay nga miyembro. Ang pagpalibut sa imong kaugalingon sa mga tawo nga susama og panghunahuna nagpasabut nga ikaw wala lamang magpakompromiso sa imong kaugalingon apan makakat-on usab ikaw og daghan gikan kanila ug makaangkon og maayong suporta.
Tambong sa templo. Ang pagpaningkamot sa pagtambong sa templo nagpasabut nga ikaw naghimo og mga pagpili nga nahiuyon sa kabubut-on sa Ginoo. Imong mahibaloan nga ikaw mahimong lig-on diha sa pagkamasulundon.
Hinumdumi kinsa ug ngano. Kinsa ang imong gibuhatan niini? Kinsa ang importante nga tan-awon, ug nganong ania ikaw dinhi? Kini makatabang kanimo ngadto sa paglantaw kon unsa ang makaayo alang sa imong kauswagan.

Unsaon nimo pagtabang sa uban nga mobati nga giabi-abi:

Ipakita ang gugma. Pagmatinud-anon nga usa ka higala. Tanan kita anaa sa managlahi nga mga panaw. Ang pag-ilaila sa uban makatabang kanimo sa pagpangita sa labing maayong paagi sa pagsuporta kanila. Ang pagdapit kanila ngadto sa mga kalihokan, pagpahibalo kanila sa mga kalihokan, ug pagpaila kanila ngadto sa bag-ong mga tawo sa simbahan motabang kanila sa paghimo og mga koneksyon ug bag-ong mga higala.
Paminaw sa mga pag-aghat sa Espiritu ug salig sa takda nga panahon sa Ginoo. Hugot akong nagtuo nga ang Langitnong Amahan naggiya kanato ug tinuyo nga nagbutang og mga tawo diha sa atong mga dalan. Ang pagbuhat sa imong labing maayo matag adlaw mopanalangin kanimo ug motugot kanimo sa pagpanalangin sa uban.

Ang Langitnong Amahan sa tinuod nakaila kanato ug nahigugma kanato sa tinagsa-tagsa. Ako manghinaut nga kamo mobati sa Iyang gugma apan usab nga kamo makakita sa inyong kaugalingon—ug sa uban—sama Kaniya. Ako manghinaut nga inyong ipakigbahin ang gugma nga Siya aduna alang kaninyo ngadto sa uban, ilabi na sa mga bisita, bag-ong mga kinabig, ug niadtong kinsa bumabalikay sa simbahan. Nasayud ako nga mapasalamaton kaayo ako alang sa matag usa ka tawo kinsa mitabang kanako, ug karon ako nangita og mga oportunidad sa pagbuhat og sama.