Hello gikan sa Samoa!

Talofa! (“Hi” sa Samoan), kami si Margo ug Paolo.

Kuyugi kami samtang bisitahon namo ang Samoa!

Ang Samoa usa ka isla nga nasud sa Kadagatan sa Pasipiko. Duna kini duha ka dagkong isla ug upat ka gagmayng mga isla.

Ania kon unsaon sa pagsulti sa “Ang Simbahan ni Jesukirsto sa mga Santos sa Ulahing mga Adlaw” sa Samoan: O Le Ekalesia og Iesu Keriso o le Au Paia o Aso e Gata Ai.

Daghang tawo sa Samoa nagpuyo sa fales, diin ang mga kabalayan walay bongbong. Ang pagluto himoon sa gawas ibabaw sa kayo.

Ang mga lubi usa ka ilado nga pagkaon sa Samoa. Ang tanan moani ug motangtang sa mga bunot niini. Ang mga bagol sa kasagaran maoy isugnod para sa pagluto.

Ang mga tawo sa Samoa ganahang mokanta! Kini nga mga bata nangandam para manganta sa Primary.

Tungod kay nagpuyo sila sa isla, ang mga Taga-Samoa dili gayud layo sa dagat.

Daghang tawo ang namuhi og mga baboy ug mga manok ug mogamit og mga iro para sa pagpangayam.

Himamata ang pipila sa among mga higala gikan sa Samoa!

Ganahan kong mokanta og mga kanta sa Primary. Ang akong mga paborito mao ang “Mother, Tell Me the Story [Mama, Suginli Ko sa Sugilanon” ug “Ako Anak sa Dios.”

Mary V., edad 5, Savai’i, Samoa

Nasayud ako nga ang Langitnong Amahan maminaw ug motubag sa akong mga pag-ampo.

Alex S., edad 11, Upolu, Samoa

Taga-Samoa ka ba? Sulati kami! Gusto kaming makadungog gikan kanimo.

Salamat sa pagsuhid sa Samoa uban namo. Magkita kita sa sunod!

Mga paghulagway pinaagi ni Katie McDee; litrato sa mga baboy gikan sa Getty Images