Na-14 Anyos Ko og Balik
Samtang naa ko sa negosyo sa Rochester, New York, USA, nakahukom kong mobiyahe og kadiyot ngadto sa makasaysayan nga mga dapit sa Palmyra, mga 25 ka milya (40 km) ang gilay-on. Gusto gyud kong makakita sa Sagradong Kakahoyan.
Nianang panahona, nag-atubang ko og mga kasagmuyo sa trabaho ug sa balay, ug naghandum ko og usa ka sagradong kasinatian sa akong kaugalingon nga momatuod diri nako sa pipila ka talagsaong paagi nga ang Langitnong Amahan naghunahuna kanako.
Mga katuigan kini sa wala pa matukod ang Visitors’ Center sa Cumorah ug ang Templo sa Palmyra New York. Mi-parking ko duol sa balay sa pamilyang Smith, migawas sa sakyanan, ug gisubay ang mga timaan padulong sa Sagradong Kakahoyan. Inubanan sa pag-ampo sa akong kasingkasing, akong gisubay ang dalan padulong sa kakahoyan. Namalandong ko samtang naglakaw, gani miluhod ko sa pag-ampo. Mibati ko og kakalma, apan wala akoy nakitang haligi sa kalayo ug wala mobati og hilabihang emosyon. Ang akong mga kabalaka nagpabug-at gihapon sa akong hunahuna.
Medyo nasagmuyo, miadto ko sa gitukod pag-usab nga trosong panimalay diin didto mipuyo ang pamilyang Smith. Mahunahuna nako sila nga nagtrabaho, nagbasa sa mga kasulatan, ug nag-ampo didto. Gibisita nako ang kwarto sa taas ug ang kusina, nga dunay brick nga daubanan, lamesa nga kahoy ug mga lingkuranan, mga salog nga tabla, ug yanong mga gamit. Gisantupan ako sa paghunahuna nga sulod kadto sa usa ka panimalay nga ang 14 anyos nga batang lalaki nagpuyo nga, puno sa pangutana, siya uban sa katuyoan milakaw ug nangutana sa Dios.
Samtang nagbarug ko sa may pultahan, andam nang molakaw, akong gilantaw ang Sagradong Kakahoyan. Nasayud kong si Joseph Smith miadto sa duol nga kakahoyan, nag-ampo, ug nakakita sa Dios nga Amahan ug sa Iyang Anak, si Jesukristo. Sa kalit, ang pagbati para kang Joseph misanap kanako. Sama og ako mibati unsay gibati ni Joseph sa wala pa siya mag-ampo. Nagkulang ako sa kaalam, apan nasayud akong makapangutana ako sa Dios ug makadawat og mga tubag (tan-awa sa Santiago 1:4–5). Nahinumdom ko kon giunsa nako sa pag-ampo inubanan sa pagtuo sa usa pa ko ka tin-edyer ug gibati ang kalinaw ug kasiguroan. Akong gibati ang sama nga paglaum ug ang gugma mipuno sa akong kasingkasing. Sama og ako ning-14 og balik.
Akong giduko ang akong ulo ug mihalad og hilum nga pag-ampo sa pasalamat. Akong nadawat ang tubag. Ang Langitnong Amahan nakakita kanako. Ug kon padayon akong mosalig Kaniya padayon Siya nga motubag.