Mga Hulagway sa Pagtuo
Ulisses ug Emilia Maio
Porto, Portugal
Ang igsoong babaye ni Emilia Maio, si Custodia, natawo nga may dakong kakulian. Kinse ka tuig ang milabay, si Custodia mipuyo kauban ni Emilia ug sa iyang bana nga si Ulisses. Isip usa ka pamilya, nahibaloan nila nga ang dili hinakog nga pagserbisyo sa pamilya usa ka dakong tinubdan sa kalipay.
Leslie Nilsson, Tiglitrato
Emilia:
Dihang ang akong igsoon, si Custodia, natawo, diha dayon akong nakita nga gipadala siya gikan sa langit. Nakita nako kini sa iyang mga mata. Si Custodia ug ako nagtubo nga suod. Tungod sa iyang mga kakulian, alsahon nako siya sa kasagaran kay dili man siya makalakaw. Usahay sa usa ka adlaw atakihon siya og kadaghan sa iyang patol, mao nga usahay lisud ang pag-atiman kaniya, apan naa ra ko kanunay nga motabang sa akong mama. Dihang nasakit ang akong mama, silang duha ang akong giatiman.
Nianang panahona, nagkatigulang na ang akong mama ug naglisud na sa pag-atiman ni Custodia. Mihukom siya nga adto lang siya sa usa ka care center. Si Custodia miadto sa usa ka pasilidad nga moatiman og mga tawo nga may mga kakulian. Mao to nga nagsugod kami sa pagkuha kaniya ug adto siya sa balay uban namo matag tapos sa semana. Gibuhat namo kini sulod sa mga upat ka tuig.
Sa hapit na mamatay ang akong mama, ako ug ang akong bana mibisita niya. Gigunitan niya ang among mga kamot ug gisultihan kami nga isalig niya kanamo ang pag-atiman ni Custodia. Mitubag mi nga among buhaton. Sulod sa katapusang 15 ka tuig, mipuyo ang akong igsoon uban namo ug giatiman namo siya.
Siyempre lisud sa sinugdanan. Kinahanglan kong moundang sa trabaho aron maatiman ang akong igsoon. Apan panalangin kadto. Dihang si Ulisses ug ako bag-o lang naminyo, among nahibaloan nga dili kami makaanak. Si Custodia susama sa usa ka bata nga gipadala sa Dios kanamo nga atimanon. Sa daghang paagi, nakatabang siya nga mahulipan ang among pagbati sa pagkawalay anak. Mapinanggaon siya ug maamumahon. Ganahan siyang mokatawa ug ganahang mosimba. Makalingaw siya.
Ulisses:
Dihang gitawag ako nga moserbisyo isip bishop, naghunahuna ko kon makatuman ba kaha ko sa akong mga katungdanan sa panimalay ug sa akong calling. Amo kining giistoryahan ni Emilia ug among naamguhan nga mahimo namo kini kon ibutang namo ang among pagsalig sa Dios.
Ang pagserbisyo sa akong pamilya kanunay nga mibayaw nako sa espiritwal nga paagi. Bisan og kami wala kaayoy daghang panahon nga kami rang duha isip magtiayon, suod kami sa usag usa sa espiritwal nga paagi. Mas nagkasuod kami isip pamilya. Sa tanang panahon nakita namo ang kamot sa Ginoo nga nagtabang kanamo. Mipakita Siya kanamo og milagro human sa usa ka milagro. Kami napanalanginan gayud.
Ang pamilyang Maio ganahang mangadto sa lokal nga restawrant, diin makig-istorya sila sa ilang mga higala ug mga silingan.
Usa ka higala sa pamilyang Maio ang mihunong sa pagpangumusta ni Custodia. Miingon si Emilia nga ang mga tawo moduol ni Custodia kay “mapinanggaon siya ug maamumahon. Makalingaw siya.”