Dili Ordinaryong mga Anak nga Babaye sa Dios
Ni Jean B. Bingham
Kinatibuk-ang Presidente sa Relief Society
Gikan sa usa ka pakigpulong nga gihatag sa BYU Women’s Conference pagka Mayo 5, 2017.
Ang pagtabang pinaagi sa gagmay ug yano nga paagi makapanalangin sa atong mga pamilya ug sa uban sa dili ordinaryong mga paagi.
Mga sister, ni Katherine Ricks; Mga Babaye nga aduna ug walay mga Anak, ni Caitlin Connolly; Hangop, ni Kathleen Peterson; Mga composer, ni Gaylynn Ribeira; Tigpangalagad nga mga Anghel, ni Annie Henrie Nader Nahinumdom, ni Katherine Ricks; Diha sa Tumoy sa Kabukiran Sila Makalukso, ni Jenedy Paige; Kahupayan, ni Louise Parker; Usa ka Panahon sa Paghangop, ni Connie Lynn Reilly
Ang akong sugilanon daw ordinaryo. Sa nagtubo ko, ganahan kong magkat-on, apan wala gyud ko manghawod sa bisan asa sa akong klase. Dili ko makapanghambog sa bisan unsang mga kahanas. Makatukar ko og piano apan igo lang gani maglisud sa usa ka himno. Ganahan ko nga mobisita sa mga art museum, apan ang artistik nakong mga talento kutob ra sa basta lang makaporma og drowing diha sa akong mga notebook. Makatahi ko og ikasul-ob nga saya, apan ang pagtahi og amerkana lapas na sa akong abilidad.
Bisan og napanalanginan ko og maayong panglawas ug ganahang magdagan-dagan sa parke o maglangoy-langoy sa linaw, wala ko moapil og sport sa eskwelahan sa bisan unsa nga lebel. Wala gayud ako madapit ngadto sa prom, ug dili ko presidente sa bisan unsa. Wala gayud ako masakop sa popular nga pundok, ug usa ka madanihon kaayong higala kausa miusisa sa akong hitsura ug miingon, “Ah, dili gyud ka mogwapa, apan pwede kang mahimo nga madanihon.” Sa laing pagkasulti, kasarangan lang ko.
Pipila kaninyo posibling makasabut niini nga matang sa kasinatian, mobati nga kamo kasarangan ra usab—tingali labaw og gamay sa kasarangan. Kon tawo ikaw—ilabi na, babaye—tingali nakasinati ka og ingon niana nga mga panahon sa pagduha-duha sa kaugalingon ug pagkadiskorahe nganong tanan nga gusto nimong maikaw wala man kanimo.
Apan, bisan sa akong pagka-ordinaryo, nakita sa Langitnong Amahan ang akong bili ug nakatabang nga makasugod ako sa pagpalambo og mga gasa ug grasya nga Iyang nahibaloan nga makatabang aron akong makab-ot ang tanan nga Iyang gidesinyo nga akong maabut. Hibaloi nga ang imong Langitnong Amahan mohatag sa tanan nga imong gikinahanglan aron mahimong dili ordinaryo isip anak sa Dios. Tanan kita mamahimong dalaygon tungod sa atong lahi nga hut-ong sa mga talento ug mga abilidad.
Dili sama dinhi sa kalibutan, sa Iyang gingharian walay plataporma sa mga mananaog nga ang luna para lamang sa usa o duha. Ang matag anak Niya nga babaye gitudloan ug giandam ug ginasahan og talagsaong mga potensyal didto pa sa premortal nga kinabuhi aron mahimong usa ka rayna sa celestial nga gingharian.
Asin, ni Vicki Walker; Ang Kalangitan Nagbakho uban Kanako, ni Caitlin Connolly; Dominggo sa Hapon, ni Heather Barron
Ang Imong Potensyal sa Pagkahalangdon
Unsay gusto nimong matuman sa imong kinabuhi? Unsay imong mga tumong ug mga pangandoy? Kon ang imong taas og tagal nga tumong [long term goal] mao ang pagsulod sa celestial nga gingharian aron makapuyo sa kahangturan uban sa atong Langitnong mga Ginikanan ug sa pinangga nga mga sakop sa pamilya, kana nga nag-inusarang tumong modala kanimo lapas sa imong gihunahuna nga posible (tan-awa sa 1 Mga Taga-Corinto 2:9).
Ikaw adunay dili katuohang potensyal alang sa pagkamaayo kay ikaw anak man sa Langitnong mga Ginikanan. Ang timailhan sa imong natural nga potensyal nga mahimong halangdon maoy yanong kamatuoran nga ikaw natawo dinhi sa yuta tungod kay ikaw nakahimo og mga pagpili didto sa premortal nga kalibutan aron dawaton ang plano sa Langitnong Amahan sa kaluwasan ug mosunod sa ehemplo sa Iyang Anak, si Jesukristo. Ug kay si Jesukristo andam nga modala nganha Kaniya sa mga sala ug mga kahuyang—o mga kakulangan—sa matag usa kanato (tan-awa sa Alma 7:11–13) ug mituman niana nga sagradong buluhaton pinaagi sa Iyang walay kinutuban nga Pag-ula, makabaton kita sa tanang kasiguroan nga atong maabut ang tanan nga gidesinyo para kanato sa balaang paagi. Samtang mohimo kita ug motuman sa sagradong mga pakigsaad, atong gipakita ang atong tinguha aron matuman kana nga balaanong potensyal. Nasayud kita nga dili nato kini mahimo sa atong kaugalingon, apan pinaagi sa gugma sa Langitnong Amahan ug sa grasya sa Manluluwas, atong matuman ang tanan nga gikinahanglan alang sa kahimayaan.
Kana nga panghunahuna nakalig-on nako dihang gitawag ako nga mahimong Kinatibuk-ang Presidente sa Relief Society. Nasayud nga wala kanako ang tanang kaalam ug abilidad sa pagtuman unsay gikinahanglan, bisan pa nahupay ako ug nalig-on gikan sa kahibalo nga ang Dios “aduna sa tanan nga kaalam, ug tanan nga gahum, sa langit ug sa yuta” (Mosiah 4:9) ug nga kon kita maningkamot, mobuhat sa atong labing maayo, bisan dili man hingpit, ang Ginoo “anaa sa [atong] tuo nga kamot ug sa [atong] wala, … ug ang [Iyang] mga anghel anaa libut [kanato], nga modala [kanato]” (Doktrina ug mga Pakigsaad 84: 88). Ang tanan nga Iyang gikinahanglan mao ang “kasingkasing ug andam nga hunahuna” (Doktrina ug mga Pakigsaad 64: 34). Kon magmasulundon kita sa Iyang mga sugo, malig-on kita aron matuman ang tanan nga gikinahanglan niini nga kinabuhi ingon man usab alang sa pagsulod ngadto sa Iyang gingharian sa kinabuhi human dinhi. Ang pagpili nga mahimong disipulo ni Jesukristo naghatag kanato og oportunidad aron magamit ang labaw kay sa gidahom nga impluwensya diha sa naglibut kanato.
Bisan asa kita nagpuyo, unsa man ang atong pamilya, gidaghanon sa atong kwarta sa banko, o kadugayon sa atong pagkamiyembro sa Simbahan, tanan kita mahimong dako kaayong impluwensya alang sa kayohan. Ang pagpanimuyo inubanan sa integridad diha sa balay ug sa komunidad, paggamit og malumo ug mabinationg mga pulong ngadto sa ingon og may pagkagahi nga anak o lisud sabton nga katrabaho, pagpakita sa imong mga sumbanan pinaagi sa tarung nga sininaan, ug paggawas sa komportabling kahimtang aron makig-ilaila niadtong nagpuyo sa imong palibut, mga pipila lamang kana sa yanong mga buhat nga atong mahimo nga makaimpluwensya sa uban aron molambo usab ngadto sa mas taas nga sumbanan sa kinabuhi.
Kadtong pamilyar sa kasaysayan sa pamuy-anan mahitungod sa mga utlanang dapit sa tibuok kalibutan, nasayud nga ang daghang lungsod nagsugod sa walay klarong panagkapundok sa dili hapsayng mga lalaki kinsa miadto para magnegosyo ug mangita sa ilang mga swerte. Wala kini hangtud nga nagkadaghan ang mga babaye ug miinsister sa pagtukod og mga simbahan ug mga eskwelahan ug usa ka hapsay nga palibut diin ang tinuod nga pag-uswag nahimo sa unsay gitawag og sibilisadong pagpakabuhi.
“Sukad pa kaniadto, ang mga katilingban nagsalig sa moral nga impluwensya sa kababayen-an,” matud pa ni Elder D. Todd Christofferson sa Korum sa Napulog Duha ka mga Apostoles. “Samtang dili lang sa positibong impluwensya diha sa buluhaton sa katilingban, ang moral nga pundasyon nga gihatag sa mga babaye naprubahan nga nakahatag og talagsaong kaayohan alang sa tanan. Tingali, kay anaa kini kanunay, kini nga kontribusyon sa mga babaye dili kaayo kanunayng mapasalamatan. … Natawo ang mga babaye dinhi sa kalibutan dala ang piho nga hiyas, balaanong gasa nga naghimo nilang hanas sa pagsilsil niana nga mga kalidad sama sa pagtuo, kaisug, pagbati, ug pagpatahum sa mga relasyon ug kultura.”1
Ang mga babaye gihatagan og mga gasa nga magtugot kanila nga makakita sa mga detalye ingon man usab sa dako nga hulagway, kanunay sa samang higayon. Diskobriha kana nga mga gasa ug gamita kini, minahal kong mga sister!
Nahinumdom ko ni Presidente James E. Faust (1920–2007) nga nagsulti kanato sa iyang maayo kaayo ug mapainubsanong tingog: “Kamong mga sister wala masayud sa gidak-on sa inyong impluwensya. Kamong mga sister palamboa ang inyong kamaloloy-on. … Ang matag babaye nagdala sa iyang kaugalingon nga pinalahi, talagsaong mga kalig-on sa pamilya ug sa Simbahan.”2
Pasalamat sa Anghel, ni Annie Henrie Nader
Unsay Ipasabut sa Relief Society diha Nimo?
Isip mga babayeng hamtong nga miyembro sa Ang Simbahan ni Jesukristo sa mga Santos sa Ulahing mga Adlaw, ikaw ug ako nahisakop sa usa sa pinakakaraan ug kinadak-ang mga organisasyon sa kababayen-an dinhi sa kalibutan. Uban sa kapin sa 7.1 ka milyon nga mga sister sa tibuok kalibutan, aduna kitay usa ka bugkos nga mahimong magmahangturon.
Ang Relief Society mas labaw pa kay sa usa ka klase sa Dominggo. Sama sa gitudlo ni Presidente Faust, balaanong gi-establisar kini nga panag-igsoonay sa mga sister. Dapit kini sa pagkat-on. Organisasyon kini kansang pangunang batakan mao ang pag-atiman sa uban sigun sa gipahayag sa atong motto, “Ang Gugma nga Putli Dili Gayud Mopakyas.”
“Ang pagkamiyembro sa Relief Society … naghatag og usa ka balay nga layo sa [atong] langitnong panimalay, diin [kita] mohimo sa pakigdait sa uban nga nakigbahin sa kaparehas [nato] og mga gituohan ug mga mithi.”3
Adunay mga sagabal ug mga hagit sa dalan. Kon kamo adunay dili kaayo komportabling kasinatian diha sa Relief Society, hinumdumi nga tanan kita nagkat-on. Kini ang luwas nga dapit para sa mga sister nga makapadala sa ilang mga pangutana ug ngadto sa mga nagpangita og kailhanan ug katuyoan. Dapit kini nga makatabang kanato sa tinagsa nga pagpamuklad ug dinungan nga paglambo.
Kon pamilyar ka sa gi-update nga pamahayag sa katuyoan sa Relief Society, imong mahibaloan nga ang “Relief Society motabang aron maandam ang kababayen-an alang sa mga panalangin sa kinabuhing dayon samtang magpalambo sila og pagtuo sa Langitnong Amahan ug ni Jesukristo ug sa Iyang Pag-ula; [samtang sila] molig-on sa mga indibidwal, mga pamilya ug panimalay pinaagi sa mga ordinansa ug mga pakigsaad; ug [sila] magtambayayong sa pagtabang sa mga nanginahanglan.”4
Mao nga, numero uno, maningkamot kita aron matuman ang atong balaanong potensyal. Sa paghimo niana, kita “magtinabangay” sa paghigugma, “sa paghimo sa uban nga malipayon [sa ngalan sa Manluluwas].”5 Moapil kita sa buhat sa kaluwasan, nga naglakip sa miyembro-misyonaryo nga buhat, retensyon sa kinabig, pagpaaktibo sa dili kaayo aktibong miyembro, buhat sa templo ug sa family history ug sa pagtudlo sa ebanghelyo6—tanang butang nga inyoha nang gipangbuhat.
Hugot nga Pagtuo sa usa ka Inahan, ni Kate Lee; Ang Akong Pagtuo, ni Kwani Povi Winder; Pagbalanse sa Tanang Butang, ni Emily McPhie
Asa Kita Magsugod?
Asa ug unsaon nato sa paghimo kini nga buluhaton? Kon atong iagbay ang atong bukton sa maulawon nga sister sa simbahan, kon motabang kita sa usa ka nakigbisog nga batan-ong babaye, kon maningkamot kita sa pagpakaon ug pagsinina ug pagtudlo sa mga bata matag adlaw, kon atong ipakigbahin ang nakapalipay kanato mahitungod sa gipahiuli nga ebanghelyo ngadto sa atong silingan, kon kita motambong sa templo sa usa ka dili kombenyenting oras, kon maningkamot kita sa pagpalambo sa atong mga talento sa tumong nga mahimong instrumento sa Ginoo—kining tanan nga buhat ug daghan pang buhat nga yano apan makahuluganong pagserbisyo, usa ka bahin sa buhat sa kaluwasan. Kana ang atong misyon, ug sa tinuod halapad gayud kini,7 apan kini posibling mahimo kon kita mobuhat og butang—ug kon ipadayon kini!
Sama sa giingon ni Emma Smith, unang Kinatibuk-ang Presidente sa Relief Society, 1842, “Atong buhaton ang talagsaon nga butang.”8
Sama pananglit, usa ka busy nga batan-ong inahan sa Arizona, USA, naghunahuna unsay iyang mahimo sa pagtabang sa usa ka refugee nga pamilya nga bag-ong miabut sa iyang komunidad. Wala madugay nahibaloan niyang pwede ra diay siyang mohatag og pipila ka butang para sa wala pay sulod nila nga apartment. Dihang siya ug ang iyang mga anak mibisita sa pamilya sa pagdala sa mga butang, namatikdan niya nga ang inahan walay pitaka nga kasudlan sa iyang mga personal nga mga butang. Nasayud siya nga siya ug daghan sa iyang mga higala dunay ekstra nga mga pitaka, mao nga nag-post siya sa sosyal media. Kadtong yano nga sinugdanan mibuklad sa pagkahimong bodega nga napuno sa mga butang nga gikinahanglan sa bag-o lang nangabut nga mga pamilya ug nakatabang sa pagmugna og matam-is nga bugkos tali niining kababayen-an sa managlahing relihiyon.
Si Sister Eliza R. Snow, ang ikaduhang Kinatibuk-ang Presidente sa Relief Society, mipamatuod bahin sa mga panalangin sa Relief Society: “Kon adunay anak nga mga babaye ug mga inahan sa Israel nga mobati nga gamay ra [limitado] ang kasamtangan nilang kalibutan, karon ilang makita ang igo nga gidak-on sa matag gahum ug kapabilidad sa paghimo og maayo nga mao gayud ang gituga kanila.”9
Busa, unsa man ang dili ordinaryong butang ang pilion nimong buhaton? Pagpili og butang sumala sa anaa nimong oras ug mga kapanguhaan. “Ayaw pagdagan og labaw ka tulin ug pagbuhat og labaw ka daghan kay sa imong kusog ug lihok nga gihatag nganha kanimo …; apan pagmakugihon” (Doktrina ug mga Pakigsaad 10:4). Bisan og ang imong buhat sa kaluwasan kasagaran anaa ra sa panimalay niining panahona sa kinabuhi o ang imong impluwensya midangat man sa tibuok kalibutan o sa tunga-tunga, ang Ginoo mahimuot sa imong mga paningkamot kon ikaw nakatutok sa pagserbisyo sa mga anak sa Dios ug sa mahangturon nga tumong mahitungod sa pagbalik ngadto Kaniya isip bag-o ug gipalambo nga bersyon sa imong espiritwal nga kaugalingon. Sigun sa pag-summarize niini ni Elder Dieter F. Uchtdorf sa Korum sa Napulog Duha Ka mga Apostoles, “Ang kahimayaan mao ang atong tumong; ang pagkadisipulo mao ang atong panaw.”10
Samtang magpadayon kita sa unahan niini nga panaw sa pagkadisipulo, unta ang matag usa motino nga motabang sa gagmay ug yano nga mga paagi nga makapanalangin sa atong mga pamilya ug sa uban sa talagsaong paagi. Unta atong ibahandi ang atong mga relasyon dinhi niining balaanong gidesinyo nga organisasyon ug makaila ug mosunod ni Jesukristo, kansang mga pagtulun-an ug ehemplo mogiya nato balik ngadto sa atong Langitnong Amahan.