Maisugon nga mga Ehemplo
Ang Damgo ni Anthony
Nakalitan si Anthony sa iyang pagmata. Ikatulong higayon na kini nga mao gihapon ang iyang gidamgo! Sa iyang damgo, usa ka taas nga tawo mipakita kaniya og matahum nga building. Unsa kahay buot ipasabut niini?
Isip usa ka maestro sa eskwelahan, nakabisita na si Anthony og daghang dapit sa gawas sa iyang balangay sa Nigeria. Ang building diha sa iyang damgo lahi ra gyud sa tanan nga iyang nakita kaniadto. Tingali wala gayuy ingon niini. Apan may butang nga espesyal gayud mahitungod niini.
Paglabay sa katuigan, gihunahuna gihapon ni Anthony ang mahitungod sa iyang damgo, apan nabalaka siya mahitungod sa laing mga butang. Usa ka gubat nagsugod sa Nigeria. Dili luwas para ni Anthony ug sa iyang asawa ang pagbiya sa ilang balay. Apan lisud nga naa ka lang sa sulod sa tibuok adlaw. Wala na igkita ni Anthony ang iyang mga higala ug mga estudyante.
Usa ka adlaw nakakita si Anthony og karaang magasin sa iyang balay. Sa iyang pagpakli niini, may nakita siyang daw pamilyar. Kadto ang matahum nga building gikan sa iyang damgo! Tinuod kini.
Ang building gipanag-iya sa Ang Simbahan ni Jesukristo sa mga Santos sa Ulahing mga Adlaw. Wala pa gyud ko makadungog nianang simbahana kaniadto, naghunahuna si Anthony. Gusto siyang makakat-on og dugang pa mahitungod niini, apan tungod sa gubat, dili gihapon siya makabiya sa iyang balay. Kinahanglan siyang maghulat.
Dihang nahuman ra gyud ang gubat, nagpadala og sulat si Anthony ngadto sa mga ulohang buhatan sa Simbahan sa Siyudad sa Salt Lake. Mihangyo siya kon pwede ba silang makapadala og mga misyonaryo aron makatudlo niya ug sa iyang pamilya. “Pwede kaha kamong magtukod og simbahan diri sa akong lungsod?” Misulat si Anthony. “Palihug padalhi ko og mga kasulatan aron akong matudloan ang ubang katagibalangay.”
Nasubo si Anthony dihang nadawat niya ang sulat gikan sa punoang buhatan sa Simbahan: “Sa pagkakaron wala kami mga misyonaryo sa inyong nasud.” Kaniadto, ang mga tawong itom dili makahupot og pagkapari. Ug dili pa kaayo daghan ang naorganisar nga Simbahan sa Africa.
Apan si Anthony maayong mohulat sa panahon sa Ginoo. Bisan og dili pa siya mabunyagan, gipabilin niya nga hugot ang iyang pagtuo.
Ang Simbahan mipadala kang Anthony ug sa iyang pamilya og Basahon ni Mormon ug ubang mga basahon sa Simbahan. Gitun-an ni Anthony ang mga basahon ug gitudlo ngadto sa ubang katagibalangay ang iyang nakat-unan.
Daghan kaayong tawo ang nainteresado sa ebanghelyo nga si Anthony gusto og usa ka dapit diin magtagbo ang tanan.
Dapit sa karsada diin naglinya ang mga punoan sa saging, nagtukod si Anthony og usa ka chapel nga blue ang pultahan ug mga tabon sa bintana. Sa atubangan sa building mabasa, “Mga Santos sa Ulahing Adlaw sa Nigeria.”
Milabay ang katuigan. Dayon usa ka adlaw si Anthony nakadungog og maanindot nga balita. Ang Dios misulti sa propeta nga ang tanang takus nga mga tawo makadawat na sa pagkapari. Ang Simbahan nagpadala og mga misyonaryo sa balangay ni Anthony!
Nakalitan ang mga misyonaryo nga nakakita og usa ka building sa simbahan ug daghan na kaayong tawo ang andam nga magpabunyag. Natingala sila sa hugot nga pagtuo ni Anthony ug sa ubang mga katagibalangay.
“Usa kadto ka taas, lisud nga paghulat,” matud pa ni Anthony sa mga misyonaryo, “apan karon dili na kini igsapayan. Sa katapusan ania na kamo.”
Si Anthony ang unang gibunyagan sa Suba sa Ekeonumiri sa Nigeria. Dihang giorganisar ang bag-ong branch, gitawag siya nga branch president. Ang iyang asawa si Fidelia, ang presidente sa Relief Society. Nasilyo sila sa templo mga katuigan human niadto.
Gipadayon ni Anthony ang iyang pagpaambit sa iyang gituohan ngadto sa uban. Sa kasagaran sultihan niya ang mga tawo nga ang binhi sa ebanghelyo nga gitanom sa Nigeria motubo ngadto sa usa ka dakong kahoy. Makalitan ang kalibutan sa pagtubo niini.
Eksakto si Anthony. Karon aduna nay kapin sa 170,000 ka miyembro sa Simbahan sa Nigeria—ug usa ka matahum nga templo! Ang binhi sa ebanghelyo nga gitabangan ni Anthony nga matanom padayong mitubo libut sa kalibutan karon. ●
Padayon akong nagdamgo og usa ka matahum nga building!
Mao kini ang building nga akong nakita sa akong damgo!
Gitukod ko kining gamay nga chapel aron duna kami dapit nga katagboan!
Nabunyagan ra gyud sa katapusan!
Mga paghulagway pinaagi ni Dilleen Marsh