Unsaon sa Pagpabiling Makasugakod og Dominggo Kon Ikaw Maulawon

Ni Aspen Stander

Ang ebanghelyo alang sa tanan, ug ang atong indibidwal nga mga hiyas makapapundok kanato.

Isip usa ka tin-edyer, nahadlok ako sa simbahan.

Mituo ako nga ang ebanghelyo tinuod, ug ako nahibalo nga ang pagsimba akong gikinahanglan aron magpadayon sa pagtubo sa espirituhanong paagi. Apan gibati nako kanunay ang kakulangan.

Sa akong hunahuna, nagtuo ako nga dili nako makab-ut ang mga gilauman sa tanan kabahin sa unsa kinahanglan mahisama ang usa ka maayong miyembro sa Simbahan (o unsa ang akong gihunahuna nga gilauman sa tanan). Ang tanan ingon og malipayon, mahigalaon, hanas nga manulti, ug kanunay nga andam sa pagpamatuod o sa pag-ampo. Apan ako? Ako hilum ug mibati og kabalaka sa sosyal nga mga sitwasyon. Busa wala ako mobati sama og ako adunay kahayag nga ibanwag isip usa ka miyembro sa Simbahan.

Ang kamatuoran mao, adunay daghang mga miyembro sa Simbahan kinsa mahigalaon ug madasigon. Ug samtang kana usa ka maayo nga butang, sulod sa dugay nga panahon, gibati nako ang akong mas mapanagan-on ug hilum nga personalidad nga wala mohaum sa “hulmahan.” Apan karon nakaamgo ako nga kini layo ra kaayo gikan sa kamatuoran.

Nag-amgo nga Ako Makapaningkamut

Atol sa kolehiyo mibalhin ako ngadto sa usa ka bag-ong apartment, ug ang akong kauban sa kwarto mipaila-ila kanako ngadto sa iyang mga higala sa ward. Diha-diha dayon akong gibati nga nalakip ako uban kanila tungod sa ilang gugma ug pagdawat nga gipakita nila kanako. Akong gibati nga sila tinud-anay nga gustong makaila kanako. Sa akong katingala, gibati nako nga ang dakong sosyal nga kabalaka nawagtang.

Nakaamgo ako nga kining pagbati nga mahisakop wala magagikan sa usa ka kausaban sa talan-awon, apan gikan sa usa ka nausab nga panan-aw. Akong nakat-unan nga ako dili kinahanglan nga manobra sa pagkamasayaon nga mahimong disipulo ni Jesukristo. Adunay kalig-on sa pagkahilum. Adunay kalig-on sa pagpaminaw ug sa pagpamalandong. Pinaagi sa pag-ila sa akong mga kalig-on isip usa ka tawo nga mas maulawon ug nag-atubang sa akong mga kahuyang kalabut sa sosyal nga mga kabalaka, akong nakaplagan ang kahimtang nga mitabang kanako nga makasugakod—ug gani molambo diha sa ebanghelyo.

Kitang Tanan Adunay mga Kalig-on ug mga Kahuyang

Gihatagan kita sa Dios og lainlain nga mga personalidad, mga kalig-on ug mga kahuyang alang sa usa ka rason. Ang usa ka tawo nga mas nanobra ang pagkamasayaon tingali adunay mas sayon nga higayon sa pag-apil sa klase ug sa pagmugna og pagbati sa panaghiusa sulod sa ward. Ug kadtong kinsa mas mapanagan-on mohatag og lig-ong mga pagpamatuod pinaagi sa ilang mga lihok ug pasalig ngadto kang Jesukristo. Sila usab mahimong maayo kaayo sa pagtabang ngadto sa ubang hilum nga mga indibidwal.

Kon ikaw maulawon, hibaloi nga adunay importante nga dapit alang kanimo diha sa Simbahan. Ang maulawon ug ang nanobra ka masayaon nagdan-ag sa mga hiyas sa Manluluwas nga atong magamit sa paglig-on sa usag usa diha sa ebanghelyo.

Dili Kini Mahitungod Kanimo

Ang usa ka pangutana nga akong gipangutana sa kaugalingon mao nga nganong ako mosimba una sa tanan. Miadto ako aron moambit sa sakramento, sa pagkat-on og dugang mahitungod ni Jesukristo, ug mahimong takus sa templo. Apan ang mga kasulatan usab nagsulti kanato nga “ang lawas [sa Simbahan] nagkinahanglan sa matag sakop, aron ang tanan mahatagan og kaayohan” (Doktrina ug mga Pakigsaad 84:110; tan-awa usab sa Mga Taga-Efeso 4:12).

Samtang ang mga miting sa simbahan nag-amuma sa atong kaugalingong mga pagpamatuod, nakaamgo ako nga ang simbahan dili lamang mahitungod kanako. Kita sa indibidwal nga paagi naghinumdom sa Manluluwas samtang kita nag-ambit sa sakramento, apan kita dungan nga nalig-on samtang kita nakigbahin niini nga ordinansa isip usa ka kongregasyon.

Ako nabalaka kaayo mahitungod sa unsay gihunahuna sa uban mahitungod kanako ug walay igo nga kabalaka sa mga baruganan nga kinahanglang mogiya kanato sa atong tanan nga mga hunahuna ug mga lihok: gugma. Si propeta Mormon misulat, “Ako wala mahadlok unsa ang mahimo sa tawo; kay ang hingpit nga gugma mosalikway sa tanan nga kahadlok” (Moroni 8:16).

Kanang “hingpit nga gugma” nagagikan sa Dios. Kon atong ablihan ang atong mga kaugalingon ngadto sa pagbati niana nga gugma, kita mahimong dili mahadlok kaayo mahitungod sa atong kaugalingong mga sayop mahitungod sa unsay gihunahuna sa ubang mga tawo mahitungod kanato ug mahimong dili kaayo mabalaka sa atong kaugalingong mga problema ug mas andam nga molugway og kalooy ngadto sa uban kinsa mibati nga sila wala mahisakop.

Buhata ang mga Butang og Tagsa-tagsa

Ang atong katungdanan sa paghigugma sa usag usa ug sa pagpakigbahin sa ebanghelyo nagpasabut nga kita kinahanglan nga mohimo og maayong mga pakigrelasyon sa uban.

Kita mahimong makalikay nga masanapan pinaagi sa pagtutok sa mas makahuluganong mga pagbinayloay matag panahon ngadto sa usa o duha ka mga tawo. Bisan og si Jesukristo mitudlo ug miayo ug miserbisyo og mga liboan diha sa Iyang mortal nga pagpangalagad, Siya misunod og sumbanan sa pagpangalagad ngadto sa mga tawo sa tagsa tagsa (tan-awa sa 3 Nephi 11:15; 17:21).

Nakaamgo ako nga dili ako kinahanglan nga mahimong suod nga higala sa tanan o ang labing inila nga tawo sa ward. Unsa ang labing importante dili mao ang gidaghanon sa akong sosyal nga pakigbinayloay apan ang kalidad sa akong mga pakigrelasyon. Imbis nga mabalaka mahitungod sa tanan sa usa ka higayon, ako nagtutok lamang sa pagkonektar ngadto sa usa ka tawo matag semana diha sa simbahan.

Ang Simbahan sa gihapon usa pa ka hagit usahay, apan sa akong hinay nga pagduot sa akong kaugalingon sa paggawas gikan sa akong hamugaway nga dapit ug sa pagbuntog sa akong sosyal nga mga kabalaka, akong gibati ang gugma sa Manluluwas alang kanako ug sa tanan Niyang mga anak. Nagsugod ako sa pagkakaplag sa akong dapit. Nahibalo ako nga nakadawat ako og grasya pinaagi sa Pag-ula ni Jesukristo sa pagtinguha sa pagbuntog sa akong mga kahuyang ug sa paggamit sa akong mga kalig-on sa pagtukod sa gingharian sa Dios.