Ang Pag-ampo alang kang Tiyo Dan
Si Isabelle ganahan nga mag-ampo! Sa pagkabuntag mihimo siya og usa ka “maayong buntag” nga pag-ampo. Gipasalamatan niya ang Langitnong Amahan alang sa kasanag sa adlaw ug sa bag-ong adlaw.
Atol sa paniudto gisultihan ni Isabelle ang Langitnong Amahan mahitungod sa iyang adlaw karon. Nag-ampo siya alang sa tabang nga mabuotan siya sa iyang mga igsoong babaye inig uli nila gikan sa eskwelahan.
Sa hapit na matulog, ang pamilya ni Isabelle dungan nga nag-ampo. Kanunay silang magsugod pinaagi sa pag-istorya mahitungod sa mga tawo nga tingali nagkinahanglan og ekstra nga mga panalangin.
Karong gabii miingon si Papa, “Palihug iampo si Tiyo Dan. Nawad-an siya og trabaho.”
Naguol si Isabelle. Wala kaayo siyay nahibaloan bahin sa mga panarbaho, apan nahibalo siya nga dili maayo ang mawad-an og trabaho. Gipangga niya ang iyang tiyo. Mohimo siya og lamian nga popcorn. Ug ang katapusan niyang pag-anhi, gipakita niya kang Isabelle unsaon paghimo og kariton!
“Mag-ampo ko nga makakita siya og trabaho,” miingon si Maria. Si Maria usa sa mga magulang ni Isabelle. Iyang turno karon ang pag-ampo og kusog para sa pamilya.
Pagkasunod nga adlaw, nangutana si Isabelle kon nakakita na ba og trabaho si Tiyo Dan.
“Wala pa,” miingon si Papa. “Usahay ang mga pag-ampo dili dayon matubag.”
“Kinahanglan ba nga padayon kitang mag-ampo para niya?” Nangutana si Isabelle.
Mitando si Papa. “Dako kaayo kana nga tabang ngadto kang Tiyo Dan.”
Matag adlaw, si Isabelle ug ang iyang mga igsoon padayong nag-ampo para ni Tiyo Dan. Nag-ampo sila para niya nga makakita og trabaho. Nag-ampo sila para niya nga aduna siyay igong kwarta para sa iyang panginahanglan. Nag-ampo sila para niya nga mobati nga gihigugma.
Nalipay si Isabelle nga makatabang siya ni Tiyo Dan pinaagi sa iyang mga pag-ampo. Ang pag-ampo para kang Tiyo Dan nakalipay kaniya ug nakalig-on.
Natabangan usab nila si Tiyo Dan sa ubang paagi. Usa ka adlaw gitabangan nila si Tiyo Dan sa paglimpyo sa iyang balay. Sa laing adlaw, si Isabelle ug si Mama mihapit aron motan-aw og salida kuyog ni Tiyo Dan.
Milabay ang mga semana. Sa katapusan, dunay maayong balita si Papa.
“Si Tiyo Dan nainterbyu og duha ka trabaho niining semanaha!” Miingon si papa.
Sa sulod nalipay si Isabelle. Nalipay siya nga pwede ra diay siyang mag-ampo alang sa mga tawo nga iyang gihigugma. ●
Mga paghulagway pinaagi ni Holly Jones