“Tinuod, sa Dili Komportabling Paagi Tinuod”
Paghulagway pinaagi ni Cheryl Chalmers
Ang New York Pennsylvania Historic Site Mission nagtanyag og talagsaong mga oportunidad sa pagpaambit sa ebanghelyo ni Jesukristo. Kami mosangyaw, motudlo, ug mobunyag sama sa gibuhat sa ubang mga misyonaryo, apan duna usab kami talagsaong mga buluhaton sa pagtudlo mahitungod sa sagradong mga hitabo nga nanghitabo niining dapita.
Nagserbisyo kami sa umahan sa pamilyang Smith, sa dapit diin gimantala ang Basahon ni Mormon, sa Visitor’s Center sa Bungtod sa Cumorah, ug sa umahan ni Peter ug Mary Whitmer. Isuroy namo ang mga bisita libut niining sagradong mga dapit ug tabangan sila nga mas mapamilyar sa kasaysayan ug mga hitabo nga naglibut sa Pagpahiuli.
Usa ka adlaw ang akong kompanyon ug ako migiya sa pagsuroy ngadto sa umahan sa pamilyang Smith sa usa ka bag-ong pamilya gikan sa Ireland. Bag-o lang silang mga nakabig mga duha ka tuig.
Samtang nagbarug kami sa tinukod og balik sa troso nga balay diin nagpuyo si Joseph Smith ug ang iyang pamilya sa tingpamulak sa 1820, ang akong kompanyon ug ako nahinumdom sa importanting panghitabo sa pagkabata ni Joseph nga nagdala kaniya sa pag-adto sa kakahoyan sa pag-ampo aron sa pagpakisayud asa nga simbahan siya magpasakop. Gipaambit namo kanila ang kasinatian ni Joseph dihang ang Langitnong Amahan ug si Jesukristo mipakita kaniya ug mitubag sa iyang pag-ampo. Dayon gipangutana namo sila unsay ilang gibati sa una nilang pagkahibalo mahitungod ni Joseph Smith ug sa iyang Unang Panan-awon.
Nagdahum ko nga mopahayag sila sa samang mga pagbati nga gipaambit sa kadaghanang tawo—nga sila mibati og kainit sa ilang kasingkasing o nga sila nasayud nga tinuod gayud kini tungod kay ang Espiritu nga ilang gibati kusog kaayo. Miingon hinoon sila nga “tinuod, sa dili komportabling paagi.” Nahunong mi og kadali tungod niadto. Mihangyo kami nga ipasabut nila unsay buot nilang ipasabut.
Gisultihan mi nila nga maayo ra gyud ang mga butang para nila sa wala pa sila makadungog sa ebanghelyo, ug ang ideya mahitungod sa pag-usab sa ilang komportabling kinabuhi sama og dili komportable para nila. Apan dihang nadawat nila ang espirituhanong pagsaksi nga kini tinuod, nasayud sila nga kinahanglan silang mag-usab sa estilo sa ilang kinabuhi.
Ang ilang maanindot ug sinserong pagpamatuod nakadasig kanamo. Tungod kay sila may pagpamatuod gayud kang Joseph Smith ug sa gipahiuling ebanghelyo ni Jesukristo, andam silang mohimo og dili komportabling mga kausaban sa ilang kinabuhi ug mopasakop sa Simbahan. Gibuhat nila kini kay nasayud sila nga kadto nga mga kausaban maoy pinakamaayong butang para sa ilang pamilya!
Ganahan kaayo ko sa akong misyon. Wala akoy pagduhaduha nga ang mga dapit nga akong giserbisyuhan tanan sagrado. Ang tanan nga among gisulti nga nanghitabo dinhi nanghitabo gayud. Milagro kini.