Melchizedek Blesses Abram [Melchizedek Nagpanalangin ni Abram], ni Walter Rane. Gasa sa artist

Nobyembre 6–12

Mga Hebreohanon 7–13

“Ang Labawng Sacerdote sa mga Maayong Butang nga Nanagpangabot”

Samtang ikaw magbasa sa Mga Hebreohanon 7–13, mahimong makadawat ka og mga panghunahuna pinaagi sa Espiritu Santo. Hunahunaa ang mga paagi nga ikaw makarekord niini; sama pananglit, mahimo nimong i-rekord kini dinhi niini nga latid diha sa kilid sa imong mga kasulatan, o sa usa ka notebook o journal.

I-rekord ang Imong mga Panghunahuna

Bisan ang matinud-anong mga Santos usahay mag-antos nga “pagapasipalahan ug pagasakiton” nga makatandog sa ilang pagsalig (tan-awa sa Mga Hebreohanon 10:32–38). Nasayod si Pablo nga ang Judeo nga nakabig ngadto sa pagka-Kristiyano nagsinati og grabe nga pagpanggukod tungod sa ilang bag-ong pagtuo. Sa pag-awhag kanila nga magpabilin nga matinud-anon ngadto sa ilang mga pagpamatuod, iyang gipahinumdoman sila sa taas nga tradisyon sa ilang matinud-anong mga tumutuo gikan sa ilang kaugalingong kasaysayan: Abel, Enoc, Noe, Abraham, Sara, Jose, Moises—“panganod sa mga saksi” nga ang mga saad sa Dios tinuod ug takos nga pagahulaton (tan-awa sa Mga Hebreohanon 11; 12:1). Kini nga tradisyon inyo usab. Kining kabilin sa pagtuo giambitan sa tanan niadtong kinsa magatutok “kang Jesus [isip] mao ang mag-uugmad ug maghihingpit sa atong pagtuo” (Mga Hebreohanon 12:2). Tungod Kaniya, kon ang kalisdanan naghimo kanato sa “pagsibog,” kita makahimo hinoon nga “manuol uban ang matinuoron nga kasingkasing nga sa hingpit pinasaligan sa hugot nga pagtuo” (Mga Hebreohanon 10:22, 38). Alang kanato, ingon man alang sa karaang mga Santos, si Jesukristo mao ang atong “labawng sacerdote sa mga maayong butang nga nanagpangabot” (Mga Hebreohanon 9:11).

Mga Ideya alang sa Personal nga Pagtuon sa Kasulatan

Mga Hebreohanon 7

Ang Melchizedek nga Pagkapari nagtudlo kanako ngadto ni Jesukristo.

Sulod sa mga siglo, ang mga Judeo migamit sa Pagkapari ni Levi, nga nailhan usab nga Aaronic nga Pagkapari. Apan diha sa kahingpitan sa ebanghelyo ni Jesukristo miabot ang pagpahiuli sa mas labaw nga Melchizedek nga Pagkapari, nga mitanyag og mas daghang mga panalangin. Unsa ang imong nakat-onan mahitungod sa Melchizedek nga Pagkapari gikan sa Mga Hebreohanon 7? Ang paghinumdom nga ang katuyoan niini nga sulat––sama sa tanang kasulatan––mao ang pagtukod og hugot nga pagtuo diha ni Jesukristo, mahimo kang motimaan og mga tudling nga nagpamatuod Kaniya.

Ania ang pipila ka mga ehemplo sa ubang mga kamatuoran nga mahimong imong makaplagan:

• Hubad ni Joseph Smith, sa Mga Hebreohanon 7:3, 21: Kadtong kinsa gi-orden ngadto niini nga Melchizedek nga Pagkapari “gihimo sama ngadto sa Anak sa Dios” ug nagpabiling “[mga pari] sa kanunay.”

• Mga Hebreohanon 7:11: Ang Pagkapari ni Levi wala magtanyag og “kahingpitan” ug busa gipulihan sa Melchizedek (tan-awa sa Doktrina ug mga Pakigsaad 84:18–22).

• Mga Hebreohanon 7:20–21: Ang Melchizedek nga Pagkapari madawat pinaagi sa “panumpa ug pakigsaad” (tan-awa sa Doktrina ug mga Pakigsaad 84:33–44).

Unsa nga mga panalangin ang imong nadawat gikan sa Melchizedek nga Pagkapari ug “sa mga ordinansa niana”? (Doktrina ug mga Pakigsaad 84:20). Sa unsang paagi ang Melchizedek nga Pagkapari mitabang kanimo sa pagduol ngadto ni Kristo?

Tan-awa usab sa Alma 13:1–13; Doktrina ug mga Pakigsaad 121:36–46; Gospel Topics, “Melchizedek Priesthood,” topics.ChurchofJesusChrist.org; Giya ngadto sa Kasulatan, “Melchizedek,” scriptures.ChurchofJesusChrist.org; Russell M. Nelson, “Espirituhanong mga Bahandi,” Liahona, Nob. 2019, 76–79; Dallin H. Oaks, “Ang Melchizedek nga Pagkapari ug ang mga Yawe,” Liahona, Mayo 2020, 69–72.

Mga Hebreohanon 9; 10: 1– 22

Karaan ug karon nga mga ordinansa nagpunting ngadto ni Jesukristo.

Ang orihinal nga Hebreohanon nga mga magbabasa niini nga sulat mahimo unta nga pamilyar na kaayo sa karaang tabernakulo ug sa mga ordinansa nga gihulagway ni Pablo. Apan ang uban wala makaila sa hingpit nga ang katuyoan niini nga mga ordinansa mao ang pagpunting ngadto sa maulaong sakripisyo ni Jesukristo.

Sa biblikanhong mga panahon, sa tinuig nga piyesta opisyal nga gitawag og Adlaw sa Pag-ula, ang usa ka halangdong pagkapari (high priest) mosulod sa labing balaan nga dapit (o Balaan sa mga Balaan) sa templo sa Jerusalem ug mosakripisyo og usa ka kanding o karnero aron sa pag-ula alang sa mga kasal-anan sa Israel.

Samtang imong basahon ang paghulagway ni Pablo niini nga mga ordinansa, pangita sa mga simbolo ug sa mga pagtulon-an nga nagtabang kanimo sa pagsabot og mas maayo sa maulaong misyon sa Manluluwas.

Ang mga ordinansa nga atong giapilan karon mga lahi gikan niadtong sa panahon ni Pablo, apan ang katuyoan niini managsama. Giunsa sa mga ordinansa karon sa pagpamatuod nganha kanimo kabahin ni Jesukristo?

Mga Hebreohanon 11

Ang pagtuo nagkinahanglan og pagsalig diha sa mga saad sa Dios.

Kon adunay usa ka tawo nga mohangyo kanimo sa pagpatin-aw sa hugot nga pagtuo, unsay imong isulti? Si Sister Anne C. Pingree mibase sa pinulongan gikan sa Mga Hebreohanon 11 sa paghatag niini nga pagpatin-aw sa hugot nga pagtuo: “Ang espirituhanong abilidad nga madani sa mga saad nga makita sa ‘halayo’ nga dili mahimong makab-ot niini nga kinabuhi” (“Nagtan-aw sa mga Saad Gikan sa Halayo,” Liahona, Nob. 2003, 14).

Hunahunaa ang pagpalambo og imong kaugalingong pagpatin-aw sa hugot nga pagtuo samtang ikaw mamalandong diha sa mga ideya sa Mga Hebreohanon 11. Unsa ang gitudlo sa mga ehemplo sa mga tawo nga gihisgotan niini nga kapitulo kanimo mahitungod sa hugot nga pagtuo? (Tan-awa usab sa Ether 12:6–22.)

Unsa nga mga saad ang imong nakita sa “halayo”? Unsaon nimo sa pagpakita sa Ginoo nga ikaw “nadani niini, ug [nahimong] misagop kanila”? (Mga Hebreohanon 11:13).

Tan-awa usab sa Alma 32:21, 26–43; Jeffrey R. Holland, “An High Priest of Good Things to Come,” Liahona, Ene. 2000; Gospel Topics, “Faith in Jesus Christ,” topics.ChurchofJesusChrist.org.

Mga Ideya alang sa Pamilya nga Pagtuon sa Kasulatan ug Home Evening

Mga Hebreohanon 10:32–36.Mahimo nimong dapiton ang mga sakop sa pamilya sa pagpaambit og espirituhanong mga kasinatian kon mibati sila nga “nalamdagan” sa kamatuoran. Sa unsa nga paagi kini nga mga kasinatian makatabang kanato nga “dili wad-on ang [atong] pagsalig” sa mga panahon sa pagsulay o pagduhaduha?

Mga Hebreohanon 11.Unsaon nimo pagtabang ang mga sakop sa imong pamilya nga makakat-on gikan sa matinud-anong mga ehemplo nga gihisgotan sa Mga Hebreohanon 11? Tingali kini makalingaw nga himoan og drama ang mga istorya sa pipila niini nga mga ehemplo. Mahimo kang makarebyo sa pipila niini ka mga istorya diha sa Mga Istorya sa Daang Tugon. O tingali ang imong pamilya makahisgot sa mga ehemplo sa ubang matinud-anong mga tawo nga imong nailhan—lakip sa mga katigulangan, mga lider sa Simbahan, ug sa mga miyembro sa imong komunidad. Makahimo ka usab sa pagkanta og usa ka awit mahitungod sa hugot nga pagtuo, sama sa “Hugot nga Pagtuo” (Songbook sa mga Bata, 50).

Mga Hebreohanon 12:2.Sumala niini nga bersikulo, ngano nga si Jesus andam sa paglahutay sa sakit ug sa pag-antos diha sa krus? Unsa ang gitudlo niini kanato mahitungod kon unsaon nga kita makalahutay sa atong mga pagsulay? Si Presidente Russell M. Nelson mihatag og pipila ka makatabang nga mga panabot niini nga bersikulo diha sa iyang mensahe sa “Hingpit nga Kalipay ug Espirituhanon nga Pagsugakod” (Liahona, Nob. 2016, 81–84).

Mga Hebreohanon 12:5–11.Ngano nga ang Ginoo mopanton ug mokorihir kanato? Unsa ang atong namatikdan niini nga mga bersikulo mahitungod sa paagi nga ang Ginoo nagtan-aw sa pagpanton? Sa unsa nga paagi kini nga mga bersikulo nag-apekto sa paagi nga kita naghatag o nagdawat og pagpanton?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Hugot nga Pagtuo,” Songbook sa mga Bata, 50.

Pagpalambo sa Atong Pagtudlo

Paggamit og musika aron sa pagdapit sa Espiritu ug pagkat-on sa doktrina. Ang Unang Kapangulohan miingon, “Ang musika adunay walay kinutoban nga gahom sa pagdasig [kanato] padulong sa mas malamboon nga pagka-espirituhanon” (“First Presidency Preface,” Mga Himno, x). Tingali ang usa ka awit sa hugot nga pagtuo, sama sa “Matinud-anon sa Tinuohan” (Mga Himno, nu. 157), motabang sa panaghisgotanay sa pamilya gikan sa Mga Hebreohanon 11.

Ang mga simbolo ug mga ordinansa sa karaang templo mitudlo mahitungod sa tahas ni Jesukristo.