batan-on naglimpyo sa bongbong

Nobyembre 13–19

Santiago

“Tumana Ninyo ang Pulong, ug Dili Kay Magpaminaw Ra Kamo Niini”

Samtang magbasa ka sa Epistola ni Santiago, hatagi og pagtagad ang mga hugpong sa mga pulong nga importante kanimo. Sa unsa nga paagi ikaw naaghat sa “pagtuman” niini nga mga pulong? (Santiago 1:22).

I-rekord ang Imong mga Panghunahuna

Usahay usa lang ka bersikulo sa kasulatan makausab sa kalibotan. Ang Santiago 1:5 ingon og usa ka yano nga tambag—kon nagkinahanglan ka og kaalam, pangayo sa Dios. Apan sa dihang ang 14 anyos nga si Joseph Smith mibasa niana nga bersikulo, “kini ingon og misulod uban sa makusog nga gah[o]m ngadto sa matag tipik sa [iyang] kasingkasing” (Joseph Smith—Kasaysayan 1:12). Sa ingon nga nadasig, si Joseph mibuhat sa tambag ni Santiago ug nagtinguha og kaalam gikan sa Dios pinaagi sa pag-ampo. Ug ang Dios mihatag nga madagayaon gayod, mihatag ni Joseph sa usa sa labing talagsaong langitnong mga pagbisita sa kasaysayan sa tawo—ang Unang Panan-awon. Kini nga panan-awon nakausab sa dagan sa kinabuhi ni Joseph ug misangpot ngadto sa Pagpahiuli sa Simbahan ni Jesukristo dinhi sa yuta. Kita tanan napanalanginan karon tungod kay si Joseph Smith mibasa ug mibuhat sa Santiago 1:5.

Unsay imong makita samtang magtuon ka sa Sulat ni Santiago? Tingali usa ka bersikulo o duha ang makausab kanimo o sa usa ka tawo nga imong gihigugma. Ikaw makakaplag og giya samtang ikaw maningkamot sa pagtuman sa imong misyon sa kinabuhi. Tingali maawhag ka nga mosulti nga mabination o mas mapailubon. Mahimong maaghat ka sa paghimo sa imong aksyon nga mas mahiangay sa imong hugot nga pagtuo. Bisan unsa ang makadasig kanimo, himoa kini nga mga pulong nga “mosulod … ngadto sa matag tipik sa [imong] kasingkasing.” Ug dayon, “dawata ninyo sa kaaghop ang … pulong,” ingon nga si Santiago misulat, tumana ninyo ang pulong, dili kay magpaminaw ra (tan-awa sa Santiago 1:21–22).

icon sa personal nga pagtuon

Mga Ideya alang sa Personal nga Pagtuon sa Kasulatan

Kinsa si Santiago?

Gituohan sa kadaghanan nga ang tagsulat sa Sulat ni Santiago mao ang usa ka anak nga lalaki ni Maria, ang inahan ni Jesukristo, ug busa igsoon sa Manluluwas sa inahan. Gihisgutan si Santiago sa Mateo 13:55; Marcos 6:3; Mga Buhat 12:17; 15:13; 21:18; ug Mga Taga-Galacia 1:19; 2:9. Makita niini nga mga kasulatan nga si Santiago mao ang lider sa Simbahan sa Jerusalem ug gitawag isip usa ka Apostol (tan-awa sa Mga Taga-Galacia 1:19).

Santiago 1:2–4; 5:7–11

Mapailubon nga paglahutay mosangpot ngadto sa kahingpitan.

Human makabasa sa Santiago 1:2–4; 5:7–11, unsay imong ikasulti nga importante nga mensahe ni Santiago mahitungod sa pailob? Kini mahimong makatabang ang pagpamalandong kon unsa ang nakat-onan sa pamilya ni Elder Jeremy R. Jaggi mahitungod sa pailob gikan niini nga mga bersikulo (tan-awa sa “Paniguroa nga ang Inyong Pagkamalahutayon Mahingpit, ug Ipha Kining Tanan nga Hingpit nga Kalipay!,” Liahona, Nob. 2020, 99–101). Unsa ang “hingpit nga buhat” sa pagkamalahutayon? (Santiago 1:4). Unsaon nimo sa pagpakita sa Ginoo nga ikaw andam nga magpailob?

Santiago 1:3–8, 21–25; 2:14–26; 4:17

Ang pagtuo nagkinahanglan og buhat.

Unsaon nimo pagkahibalo kon ang usa ka tawo adunay pagtuo diha ni Jesukristo? Sa unsa nga paagi nga ang imong mga buhat nagpakita sa imong hugot nga pagtuo diha sa Dios? Hunahunaa kini nga mga pangutana samtang magtuon ka sa mga pagtulon-an ni Santiago mahitungod sa hugot nga pagtuo. Makapaikag tingali ang pagbasa usab mahitungod nila ni Abraham ug Rahab, duha ka ehemplo nga gihisgotan ni Santiago (tan-awa sa Genesis 22:1–12; Josue 2). Giunsa nila sa pagpakita nga sila adunay hugot nga pagtuo sa Dios?

Ang pagbasa sa Santiago 1:3–8, 21–25; 2:14–26; 4:17 mahimong motabang kanimo sa paghunahuna og mga paagi nga ikaw mahimong mas maayo nga motuman sa pulong. I-rekord ang bisan unsa nga mga panghunahuna nga imong madawat, ug paghimo og mga plano sa pagbuhat niini.

Tan-awa usab sa Alma 34:27–29; 3 Nephi 27:21.

Abraham nag-ampo sa gawas sa iyang tolda

“Abraham mituo sa Dios, ug kadto giisip kaniya nga maoy pagkamatarong” (Santiago 2:23). Abraham on the Plains of Mamre [Abraham didto sa Kapatagan sa Mamre], ni Grant Romney Clawson

Santiago 1:26; 3:1–18

Ang mga pulong nga akong isulti adunay gahom sa pagpasakit o sa pagpanalangin sa uban.

Uban sa naghingapin nga imahe nga gigamit ni Santiago sa tibuok niya nga sulat, ang pipila sa iyang labing tataw nga pinulongan makita diha sa iyang tambag mahitungod sa pinulongan. Hunahunaa ang paghimo og lista sa tanang mga paagi nga gihulagway ni Santiago ang dila o ba-ba. Unsa ang gisugyot sa matag pagtandi o imahe mahitungod sa mga pulong nga atong isulti? Paghunahuna og usa ka butang nga imong mahimo nga makapanalangin sa usa ka tawo pinaagi sa imong mga pulong (tan-awa sa Doktrina ug mga Pakigsaad 108:7).

Santiago 2:1–9

Isip usa ka disipulo ni Jesukristo, kinahanglan akong higugmaon ang tanang tawo, walay pagsapayan sa ilang mga kahimtang.

Gipasidan-an ni Santiago ang mga Santos ilabi na batok sa pagdapig sa adunahan ug pagtamay sa kabos, apan ang iyang pasidaan mahimong magamit sa bisan unsa nga mga pagpihig o mga pagbatok nga kita tingali aduna ngadto sa uban ngil-ad nga paghukom sa uban. Samtang ikaw mainampoong magtuon sa Santiago 2:1–9, siksika ang imong kaugalingong kasingkasing ug paminawa ang mga pag-aghat sa Espiritu Santo. Kini mahimong makatabang sa pagpuli sa hugpong sa mga pulong dinhi niini nga mga bersikulo, sama sa “usa ka tawo nga nagsapot og sinina nga san-ot” (bersikulo 2), og ubang mga pulong o mga hugpong sa mga pulong nga naghulagway sa usa ka tawo nga ikaw mahimong matintal sa paghukom sa dili patas nga paagi. Nakamatikod ba ikaw og bisan unsa nga mga kausaban nga kinahanglan nimong himoon sa paagi sa imong pagtagad o paghunahuna sa uban?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Santiago 1:5.Human mabasa ang Santiago 1:5, ang imong pamilya maka-summarize sa asoy sa Unang Panan-awon (tan-awa sa Joseph Smith—Kasaysayan 1:8–20) o tan-awa ang video “Ask of God: Joseph Smith’s First Vision” sa (ChurchofJesusChrist.org). Dapita ang mga sakop sa pamilya sa pagpaambit sa ilang mga pagpamatuod bahin ni Propeta Joseph Smith ug sa mga kasinatian sa dihang gitubag sa Langitnong Amahan ang ilang mga pag-ampo.

Santiago 1:26–27.Hunahunaa ang pagtan-aw sa video “True Christianity” (ChurchofJesusChrist.org). Dayon basaha ang pagpatin-aw ni Santiago sa “relihiyon nga putli” diha sa Santiago 1:26–27, ug hisgoti ang mga paagi nga ang imong pamilya makahimo sa inyong pagpraktis sa relihiyon nga mas putli.

Santiago 3.Ang Santiago 3 naglakip sa daghang mga imahe nga makapadasig og halandumong mga leksiyon nga may butang nga gigamit sa pagtabang sa imong pamilya sa paghinumdom sa pagsulti sa mabinationg paagi. Sama pananglit, makahaling kamo og kalayo nga mag-uban ug magsultihanay mahitungod kon sa unsa nga paagi ang gamay, dili maloloy-ong pulong makahimo og usa ka dakong problema (tan-awa sa mga bersikulo 5–6). O ikaw makadalit og aslom o pait sa butang nga sa kasagaran gigamit alang sa matam-is nga pagkaon—sama sa duga sa lemon diha sa banga sa dugos. Kini mogiya ngadto sa panaghisgotan mahitungod sa paggamit og mga pulong nga maayo ug makabayaw (tan-awa sa mga bersikulo 9–14).

Santiago 4:5–8.Ngano nga kita “moduol ngadto sa Dios” (Santiago 4:8) kon mag-atubang kita og tintasyon?

Santiago 5:14–16.Si Presidente Dallin H. Oaks mitudlo nga “ang mga ginikanan kinahanglang moawhag og mas daghang mga panalangin sa pagkapari diha sa pamilya” (“Ang mga Gahom sa Pagkapari,” Liahona, Mayo 2018, 67). Tingali ang pagbasa sa Santiago 5:14–16 ug sa pagpakigbahin sa mga kasinatian mahitungod sa pagdawat og panalangin sa pagkapari makaawhag sa mga sakop sa pamilya sa pagpangayo og usa ka panalangin kon sila nasakit o nanginahanglan og espirituhanong kalig-on.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Nakabuhat Ba Ako Og Maayo Karon?,” Mga Himno, nu. 135.

Pagpalambo sa Personal nga Pagtuon

Buhata unsay imong nakat-onan. Samtang ikaw magtuon, paminaw sa mga pag-aghat gikan sa Espiritu mahitungod kon unsaon nimo sa paggamit unsay imong nakat-onan sa imong kinabuhi. Pasalig sa pagsunod niini nga mga pag-aghat ug sa pagpuyo og hingpit sa ebanghelyo. (Tan-awa sa Pagtudlo sumala sa Pamaagi sa Manluluwas, 35.)

Joseph Smith nga nagbasa sa Biblia

Ang tambag ni Santiago nga “papangayoa sa Dios” (Santiago 1:5) midasig ni Joseph Smith sa pagtinguha og kaalam gikan sa Dios. Gilitratohan ni Christina Smith.