tama‘i mamoe o loo nofo i le mutia

4–10 Tesema

Faaaliga 1–5

“Ia i a … le Tamai Mamoe … le Viiga, ma le Malosi, e Faavavau Faavavau Lava”

Mafaufau e tusi i lalo ni au fesili o i ai e uiga i mea na e faitau ai i le Faaaliga. Ona e sailia lea o tali i au fesili pe talanoa foi i ai ma se tagata o le aiga po o totonu o vasega o le Ekalesia.

Tusifaamaumau Ou Lagona Uuna‘i

Pe sa i ai se taimi sa faafaigata ai ia te oe ona faaali atu i isi ou lagona i le taimi o se aafiaga mamana faaleagaga? O le gagana i aso uma e mafai ona lagona ai le le ato‘atoa e faamatala ai ni lagona ma ni uuna‘iga faaleagaga. Atonu o le pogai lea sa faaaoga ai e Ioane le faafaailoga loloto ma vaaiga faafaatusa e faamatala ai lana faaaliga mamalu. Sa mafai lava ona ia faapea mai sa vaai ia Iesu Keriso, ae ina ia fesoasoani ia tatou malamalama i lona aafiaga, sa ia faamatalaina ai le Faaola e faaaoga ai upu e pei o nei: “o lona fofoga foi e pei o le mumu o le afi,” “ua alu atu foi ai lona fofoga o le pelu e faataumaai ona itu e maamaai lava,” ma le “o ona fofoga foi e pei o le pupula o le la ina o mu toto‘a” (Faaaliga 1:14–16). A o e faitau i le tusi o Faaaliga, taumafai ia e iloa savali sa mana‘o Ioane e te a‘oa‘oina ma lagonaina, e tusa pe e te le iloa le uiga o loo i tua o faafaailoga uma. Aisea ua ia faatusaina ai aulotu o le Ekalesia i tuugalamepa, Satani i le tarako, ma Iesu Keriso i se tamai mamoe? Mulimuli ane, e te le tau malamalama i faafaatusa uma i le Faaaliga ia malamalama ai i ona autu taua, e aofia ai ona autu e sili ona lauiloa: O le a manumalo Iesu Keriso ma Ona soo i malo a tagata ma Satani.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

O le faaaliga vaaia a Ioane ua aoao mai e uiga i le fuafuaga a le Tama Faalelagi e laveai Lana fanau.

O le tusi o Faaaliga e mafai ona faigata ona malamalama i ai, ae aua le lotovaivai. O le folafolaga a Ioane e mafai ona musuia ai oe ia taumafai pea: “Amuia i latou o e faitau, ma i latou o e faalogo ma malamalama i upu o lenei valoaga, ma taofi i na mea o loo tusia ai, aua ua latalata mai le afio mai o le Alii” (Faaliliuga Iosefa Samita, Faaaliga 1:3 [i le faaopoopoga o le Tusi Paia], ua faaopoopo le faamamafa).

O se tasi o auala e suesue ai Faaaliga o le vaai lea mo autu o loo aoao soo mai. Atonu e fesoasoani le aotelega aoao lenei ia te oe:

• Omataupu 5 ma le 12 o loo faamatala ai mea e tutupu i le muai olaga.

• Omataupu 6–11, 13–14, 16–19 o loo faamatala ai le olaga faitino ma mea e tutupu i le talafaasolopito o le lalolagi.

• Omataupu 2–3, 15, 20–22 o loo faamatala ai le Faamasinoga Mulimuli ma le mamalu o loo faatalitali mai i e faamaoni.

A o e faitau, fesili ifo ia te oe lava, “O le a le mea o aoao mai e lenei fuaiupu e uiga i le fuafuaga a le Atua? O le a le mea na faia e le Atua e fesoasoani ai ia te a’u e faatoilalo le leaga ma toe foi atu ia te Ia? O a Ana folafolaga i e faamaoni?”

Atonu foi e fesoasoani le iloa o le Mataupu Faavae ma Feagaiga 77 o loo faamalamalama mai ai nisi o faailoga na faaaogaina i le Faaaliga. Ma le isi, o le Faaliliuga a Iosefa Samita o loo faamanino mai ai nisi o fuaitau i le Faaaliga, ia siaki e le aunoa vaefaamatalaga ma le pito i tua o le Tusi Paia.

Tagai foi Bible Dictionary, “John”,” “Revelation of John.”

Faaaliga 1

O Iesu Keriso o le Alo Soifua o le Atua Soifua.

O le mataupu muamua o le Faaaliga o loo faamatala ai le faaailoa atu o Iesu Keriso ia Ioane i se faaaliga. Atonu e mafai ona e faia se lisi o mea uma o loo fai mai ai lenei mataupu e uiga ia Iesu Keriso, e aofia ai o ai o Ia, mea e faia e Ia mo i tatou, ma pe faapeī o Ia.

O nisi mea e te aoaoina o le a sau mai faailoga? Mafaufau loloto i mea atonu o loo taumafai le Alii e aoao mai ia te oe e uiga ia te Ia lava e ala i nei faailoga. Mo se faataitaiga, maitau le ta’ua e le Faaola o Ia lava “o le amataga ma le gataaga, o le muamua ma le mulimuli.” Aisea e te manatu ai e taua nei faalagiga? O le a se mea o aoao mai e nei faalagiga ia te oe e uiga i le Faaola?

Faaaliga 2-3

E silafia patino au e lesu Keriso ma o le a fesoasoani ia te au e faatoilalo o’u luitau.

O fetalaiga a le Faaola i le Faaaliga 2–3 ua faaalia ai, e malamalama lelei o Ia i mea e manuia ai ma luitau e tulaga ese i lala taitasi o le Ekalesia i aso o Ioane. Sa Ia viia taumafaiga a le Au Paia ma lapataiina foi i latou i mea na manaomia ona latou suia. O le a se mea ua e aoao mai le viia ma lapataiga a le Faaola?

E malamalama foi le Faaola i ou manuia ma tauiviga, ma e finagalo o Ia e fesoasoani ia te oe. Maitau folafolaga fai soo ua Ia ofoina mai ia i latou o e faatoilaloina. O le a se mea ua faagaeetia ai oe e uiga i nei folafolaga? O le a se mea atonu o finagalo le Alii e te faatoilaloa? O le a se mea e mafai ona e faia ina ia maua ai Lana fesoasoani?

Faaaliga 4–5

E nao Iesu Keriso ua mafai ai le fuafuaga a le Tama Faalelagi.

O le a se mea e te iloa e uiga i le Tama Faalelagi mai le Faaaliga 4 ma e uiga ia Iesu Keriso mai le Faaaliga 5? Mafaufau pe sa faapeī le taimi na tatou iloa uma o Iesu Keriso (o le ”Tamai Mamoe) o le a mafai ai le fuafuaga a le Tama Faalelagi (o le Faaola o le a mafai ona “susue le tusi ma tatala faamaufaailoga e fitu [Faaaliga 5:5]). Aisea ua nao Iesu Keriso ai e mafai ona faia lenei mea?” E mafai faapefea ona e faaalia lou faatuatua ia te Ia e fai ma ou Faaola?

Tagai foi i le Iopu 38:4–7; Mataupu Faavae ma Feagaiga 77:1–7.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Faaaliga 1:20.Aisea na faatusa ai e Iesu Lana Ekalesia i tuugalamepa? (tagai Mataio 5:14–16). Usu se pese e faatatau i le ala e mafai ona tatou pei ai o se malamalama i luga o se tuugalamepa, e pei o le “Susulu Pea” (Tusipese a Tamaiti, 96).

Faaaliga 2–3.Faafoliga e faapea ua talosagaina Ioane e tuuina atu se savali i lou aiga, e pei o savali sa ia tuuina atu i ekalesia i ona vaitaimi. O le a se mea o le a ia fai mai o loo sologa lelei? E faapefea ona e faaleleia?

Faaaliga 3:15–16.A uma ona faitau nei fuaiupu, e mafai e le tou aiga ona inu se mea faaleogolua [mafanafana] lea e sili le tofo lelei pe a vevela pe malulu. O le a le uiga o le faaleogolua faaleagaga?

Faaaliga 3:20.Faaali atu le ata o le Faaola o loo tu’itu’i i le faitotoa (tagai i le ata o loo avatu faatasi ai i le otootoga lenei) a o faitau e lou aiga le Faaaliga 3:20. Aisea e tu’itu’i ai Iesu ae le tau lava o le sau i totonu? E mafai ona auauai tagata o le aiga e tu’itu’i i se faitotoa. Ona fautua atu lea e se isi tagata o le aiga se auala e mafai ona tatou “tatala ai le faitotoa” i le Faaola ma sau ai le tagata o le aiga i totonu. Mata o a ni tou lagona i le i ai o le Faaola i le tou aiga?

Faaaliga 4:10–11.O le a le uiga o le tapuai i le Tama Faalelagi? O a mea tatou te iloa e uiga ia te Ia e mafua ai ona tatou mananao e tapuai ia te Ia?

Faaaliga 5:6, 12–13.Aisea ua ta’ua ai Iesu Keriso o le “Tamai Mamoe”? O le a se mea ua aoao mai e lenei ulutala ia i tatou e uiga ia te Ia?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Sa Fanau Maulalo Iesu,” Viiga, nu. 110.

Faaleleia o Lo Tatou Aoao Atu

Uunaia fesili. O fesili o se faailoaga ua saunia tagata o le aiga e aoao ma tuuina atu se malamalamaaga loloto ma manino i le ala o loo latou tali atu ai i mea ua aoaoina ai i latou. Aoao lou aiga i le auala e maua ai tali i tusitusiga paia. (Tagai Aoao Atu i le Ala o le Faaola, 25–26.)

O Keriso o loo tu’itu’i i se faitotoa

Let Him In, saunia e Greg K. Olsen