Alofa Ato‘atoa, saunia e Del Parson

27 Novema 27–3 Tesema

1–3 Ioane; Iuta

“O Le Atua O Le Alofa Lava Ia”

A o e faitau i Tusi a Ioane ma Iuta, saili musumusuga e uiga i auala e mafai ona faaali atu ai lou alofa i le Atua. Tusifaamaumau nei uuna‘iga ma faatino.

Tusifaamaumau Ou Lagona Uuna‘i

Ina ua tusia e Ioane ma Iuta a la tusi, na amata ona taitai atu e a‘oa‘oga faavae pi’opi’o le toatele o le Au Paia i le liliuese. Sa faapea lava ona fesiligia e nisi o faiaoga pepelo pe na faaali moni mai Iesu Keriso “i le tino” (tagai, mo se faataitaiga 1 Ioane 4:1–3; 2 Ioane 1:7). O le a se mea e mafai ona fai e se taitai o le Ekalesia i se tulaga faapea? Na tali atu le Aposetolo o Ioane e ala i le faasoa atu o lana molimau patino e uiga i le Faaola: “O le molimau lenei matou te tuuina atu e uiga i le mea sa i ai lava mai le amataga, na faapea ona matou faalogoina, na faapea ona matou vaai i ai i o matou lava mata, na faapea ona matou vaai atu i ai, ma uuina i o matou lima, e uiga i le Upu o le ola” (Faaliliuga a Iosefa Samita, 1 Ioane 1:1 [i le 1 Ioane 1:1, vaefaamatalagaa]). Ona a‘oa‘o atu lea o Ioane e uiga i le alofa: O le alofa o le Atua ia i tatou ma le alofa e tatau ona ia i tatou mo Ia ma Ana fanau uma lava. I le i‘uga, o Ioane o se molimau foi lea i lena mea. Sa ia lagonaina patino le alofa o le Faaola (tagai Ioane 13:23; 20:2), ma sa mana‘o o ia i le Au Paia ia latou lagona foi lena lava alofa e tasi. O le molimau ma a‘oa‘oga a Ioane e uiga i le alofa ua faapena lava foi ona manaomia i aso nei, i se taimi ua fesiligia ai le faatuatua ia Iesu Keriso ma taatele ai aoaoga sese. O le faitau i tusi a Ioane e mafai ona fesoasoani tatou te fetaia‘i ai ma faigata o aso nei ma le lototele, aua “e leai se fefe i le alofa; ae o le alofa ato‘atoa e faate‘a‘eseina ai le fefe” (1 Ioane 4:18).

Manatu mo Suesuega Faaletagata Lava Ia o Tusitusiga Paia

1 Ioane; 2 Ioane

O le Atua o le malamalama, ma o le Atua o le alofa lava ia.

Afai e te filifilia se upu se tasi pe lua e faamatala ai le Atua, o a na upu? I ana tusi, sa faaaoga ai e Ioane ia upu “malamalama” ma le “alofa” (tagai, mo se faataitaiga, 1 Ioane 1:5; 2:8–11; 3:16, 23–24; 4:7–21). A o e faitauina tusi muamua e lua a Ioane, mafaufau loloto i aafiaga na maua e Ioane i le malamalama ma le alofa o le Faaola. Mo se faataitaiga, mafaufau i mea na aoaoina e Ioane mai aoaoga a Iesu i le Ioane 3:16–17; 12:35–36, 46; 15:9–14; 19:25–27. O e vaai i ni mea e tutusa ai i le va o nei aoaoga ma mea o loo aoao mai i le 1 Ioane e uiga i le malamalama ma le alofa o le Atua? O a ni aafiaga ua aoaoina ai oe, o le Atua o le malamalama ma le alofa lea?

1 Ioane 2–4; 2 Ioane

“A tatou fealofani, ua tumau le Atua i totonu ia te i tatou.”

O le a e tau ai foi i upu e pei o le “taofimau” ma le “tumau” o ta’ua faafia i tusi atoa a Ioane. Vaavaai mo nei upu, ae maise lava a o e faitau i le 1 Ioane 2–4 ma le 2 Ioane. O le a lou manatu i le uiga o le “taofimau” po o le “tumau” i le Atua ma Ana aoaoga faavae? (tagai Ioane 1:9). O le a le uiga ia te oe o le “taofimau” po o le “tumau” o le Atua i totonu ia te oe?

1 Ioane 2:24–3:3

E mafai ona ou avea faapei o Iesu Keriso.

Pe e foliga maualuga tele ea ia te oe le sini o le avea e faapei o Keriso? Mafaufau i le fautuaga faamalosiau a Ioane: “Le fanau e, ia outou tumau ia te ia, ina ia maua ai e i tatou le faamalosi pe a faaali mai o ia … [ma] foliga ai lea o i tatou ia te ia” (1 Ioane 2:28; 3:2). O le a se mea e te maua i le 1 Ioane 2:24–3:3 lea e tuuina atu ia te oe le lototele ma le mafanafana i le avea ai o se soo o Iesu Keriso? A o e suesue i tusi a Ioane, vaavaai mo isi mataupu faavae po o fautuaga e mafai ona fesoasoani ia te oe i au taumafaiga ia avea atili e faapei o Keriso.

Tagai foi i le Moronae 7:48; Mataupu Faavae ma Feagaiga 88:67–68; Scott D. Whiting, “Avea Faapei o Ia,” Liahona, Nov. 2020, 12–14.

1 Ioane 4:12

Pe “le’i vaaia lava le Atua e se tasi”?

Ua faamanino mai e le Faaliliuga a Iosefa Samita, 1 Ioane 4:12 e faapea, “e le’i vaaia lava le Atua e se tasi [i se taimi], vagana ai i latou o e faatuatua” (i le 1 Ioane 4:12, vaefaamatalagaa; tagai foi i le Ioane 6:46; 3 Ioane 1:11). Ua tusifaamaumauina i tusitusiga paia ni taimi sa faaali mai ai e le Atua le Tama o Ia lava i tagata faamaoni, e aofia ai Ioane lava ia (tagai Faaaliga 4; tagai foi i le Galuega 7:55-56; 1 Nifae 1:8; Mataupu Faavae ma Feagaiga 76:23; Iosefa Samita—Talafaasolopito 1:16–17).

1 Ioane 5

E mafai ona ou faatoilaloina le lalolagi a o faaali atu lo’u faatuatua ia Iesu Keriso ma ou toe fanaufouina.

A o e faitau i le 1 Ioane 5, vaavaai mo mea e ao ona tatou faia e faatoilalo ai le lalolagi ma maua ai le ola e faavavau. Mata e faapei le faatoilaloina o le lalolagi i lou olaga? E mafai foi ona e maua ni tali ma ni vaaiga loloto i le savali a Elder Neil L. Andersen “Manumalo i le Lalolagi” (Liahona, Me 2017, 58–62).

Iuta 1

“Ati ae ia te outou i lo outou faatuatua e silisili ona paia.”

O le a se mea ua aoao mai e le Iuta 1:10–19 ia te oe e uiga ia i latou o e faasagatau i le Atua ma Lana galuega? O le a se mea ua e aoao mai i fuaiupu 20–25 e uiga i le ala e tausisia ai lou faatuatua ia Iesu Keriso?

Manatu mo Suesuega Faaleaiga o Tusitusiga Paia ma Afiafi Faaleaiga

1 Ioane 2:8–11.Ina ia fesoasoani i lou aiga e mafaufau loloto i aoaoga a Ioane, faapotopoto faatasi i totonu i se potu pogisa ina ia iloa e tagata o le aiga le eseesega i le va o le savali “i le pouliuli” ma le savali “i le malamalama.” O a auala e faaoso ai e le ita i tatou e savavali i le pouliuli ma tautevateva? O a auala e aumaia ai e le alofa o le tasi i le isi le malamalama i totonu o o tatou olaga?

1 Ioane 3:21–22.O a mea o i ai i nei fuaiupu e faateleina ai lo tatou “mautinoa” o loo i ai i le Atua, ma i lo tatou mafai ona maua tali i a tatou tatalo?.

O le tausia o poloaiga a le Atua e fesoasoani tatou te faatoilaloina ai le lalolagi.

1 Ioane 5:2–3.Pe o i ai ni poloaiga ua tatou manatu e “mamafa” pe faigata ona mulimuli i ai? E faapefea e lo tatou alofa i le Atua ona suia le auala tatou te manatu ai i Ana poloaiga?

3 Ioane 1:4.O le a le uiga o le “savavali i le upumoni”? Atonu e te faaaogaina lenei avanoa e ta’u atu i tagata o le aiga le ala na e vaaia ai i latou o savavali i le upumoni ma talanoa e uiga i le olioli e aumaia e lenei mea ia te oe. Atonu e fiafia tagata o le aiga e tusi e uiga pe tusi ni ata o upumoni na latou aoaoina i luga o tulagavae pepe ma faaaoga e fai ai se auala e mafai ona savavali faatasi ai luga lou aiga.

Iuta 1:3–4.O i ai ni lamatiaga faaleagaga ua “o ane” i totonu o o tatou olaga ma le aiga? (Iuta 1:4). E mafai faapefea ona tatou mulimuli i le apoapoaiga a Iuta ia “faamalolosi ona finau mo le faatuatua” ma tetee atu i nei mea e lamatia ai? (Iuta 1:3). O le a se mea e mafai ona tatou faia, e faamautinoa ai e “faateleina … le alofa, ma le manuia” i o tatou aiga? (Iuta 1:2).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “A I Ai le Alofa,” Tusipese a Tamaiti, 76.

Faaleleia o Suesuega Faaletagata Lava ia

Mauaina o le alofa o le Atua. Ua aoao mai Peresitene M.Russell Ballard, “[O le] talalelei o se talalelei o le alofa—alofa i le Atua ma le alofa i le tasi ma le isi” (“God’s Love for His Children,” Ensign, Me 1988, 59). A o e faitau i tusitusiga paia, ia maitau faamaoniga o le alofa o le Atua.

Savali faatasi ma Au, saunia e Greg K. Olsen