O Keriso o loo Tala’i Atu i le Lalolagi o Agaga, saunia e Robert T. Barrett

20–26 Novema

1 ma le 2 Peteru

“Olioli ai ma le Fiafia e Le Matalatalaina ma le Tumu i le Mamalu”

A o e faitau i Tusi a Peteru, atonu e te maua ni uuna’iga faaleagaga. Ia vave ona tusifaamaumau a’o e “i ai pea i le Agaga” (Mataupu Faavae ma Feagaiga 76:80) ina ia mafai ona e mauaina tonu mea e aoao mai e le Atua ia te oe.

Tusifaamaumau Ou Lagona Uuna’i

E le’i leva ona mavae Lona Toetu, ae fai e le Faaola se valo‘aga lea atonu sa faapopoleina ai Peteru. Sa Ia mua’i faailoa atu o le a maliu fasia Peteru mo lona faatuatuaga, e aveina atu “i mea e le loto [o ia] i ai … , e faailoa atu ai le uiga o lona oti e vivii atu ai o ia i le Atua” (Ioane 21:18–19). I tausaga mulimuli ane, ina ua tusia e Peteru ana tusi, sa ia iloaina na latalata atu lenei valoiaina o le maliufasia: “E vave ona tuueseina o lo’u nei fale apitaga, faapei ona faailoa mai ia te a’u e lo tatou Alii o Iesu Keriso” (2 Peteru 1:14). Ae ui i lea, o upu a Peteru sa le’i faatumulia i le mata’u po o le manatu o le a leaga mea uma. Nai lo o lena, sa ia aoao atu i le Au Paia ia “olioli,” e ui lava sa latou “faanoanoa i tofotofoga eseese.” Sa ia fautuaina i latou ia manatua “o le tofotofo foi o lo [latou] faatuatua” o le a ta’ita’i atu ai i le “viiga ma le mamalu ma le manuia pe a faaali mai Iesu Keriso” ma “i le faaolaina lea o [latou] agaga” (1 Peteru 1:6–7, 9). Atonu sa avea le faatuatua o Peteru ma faamafanafanaga ia i latou o le Au Paia anamua, e pei ona fai ma faamafanafanaga i le Au Paia i aso nei, o e foi o “tofusia … faatasi i tiga o Keriso; … ina ia fiafia [tatou] ma le olioli tele pe a faaalia mai lona mamalu” (1 Peteru 4:13).

Manatu mo Suesuega Faaletagata Lava Ia o Tusitusiga Paia

1 Peteru 1:3–9; 2:19–24; 3:14–17; 4:12–19

E mafai ona ou maua le olioli i taimi o tofotofoga ma puapuaga.

O le periota ina ua mavae le Faasatauroga o Keriso, sa le o se taimi na faigofie ai le avea ma se Kerisiano, ma o le tusi muamua a Peteru na faailoa mai ai lena mea. I mataupu muamua e fa, o le a e maitau ai upu ma fuaiupu o loo faamatalaina ai faigata: faanoanoa, tofotofoga, tiga, tofotofoga pei o le afi, ma le tiga [puapuaga] (tagai 1 Peteru 1:6; 2:19; 4:12–13). Ae o le a e maitauina ai upu e foliga mai e fiafia—atonu e te manao e fai se lisi o mea e te maua. Mo se faataitaiga, a o e faitau i le 1 Peteru 1:3–9; 2:19–24; 3:14–17; ma le 4:12–19, o le a le mea e tuuina atu ia te oe le faamoemoe e mafai ona e maua le olioli e ui lava i le totonugalemu o tulaga faigata?

Atonu foi e te faitau i le savali a Peresitene Russell M. Nelson “Olioli Ma le Ola Ai Faaleagaga” (Liahona, Nov. 2016, 81–84) ma vaavaai mo ni mea e tutusa ai mea na aoao mai e Peteru ma mea na aoao mai e Peresitene Nelson. O le a se mea e uiga i le ata o le faaolataga ma le talalelei a Iesu Keriso ua aumaia ia te oe le olioli?

Tagai foi Ricardo P. Giménez, “Mauaina o le Malutaga mai Āfā o le Olaga,” Liahona, Me 2020, 101–3.

1 Peteru 3:18–20; 4:1–6

O loo talai atu le talalelei i e ua maliliu ina ia mafai ai ona faamasinoina i latou ma le tonu.

E i ai le aso, o le a tutulai taitoatasi ai le tagata i le pa o le faamasinoga ma “tala atu le tala i le ua saunia e faamasino i e ola ma e ua oti” (1 Peteru 4:5). E mafai faapefea e le Atua ona faamasino tonu tagata uma ae e matuai eseese lava o latou avanoa e malamalama ma ola ai i le talalelei. Maitau le ala ua fesoasoani ai le aoaoga faavae sa aoao mai e Peteru i le 1 Peteru 3:18–20; 4:6 e tali ai lenei fesili. E faapefea ona faamalosia e nei fuaiupu lou faatuatua i le sa’o ma le fai mea tonu o le Atua?

Ina ia suesue atili i lenei aoaoga faavae, sailiili i le Mataupu Faavae ma Feagaiga 138, o se faaaliga na maua e Peresitene Iosefa F. Samita a o ia mafaufau loloto i tusitusiga nei a Peteru. O a ni upumoni faaopoopo sa aoaoina e Peresitene Samita?

Tagai foi i le Gospel Topics, “Baptisms for the Dead,” topics.ChurchofJesusChrist.org.

2 Peteru 1:1–11

E ala i le mana o Iesu Keriso, e mafai ai ona ou atinaeina ou natura paia.

Pe e te lagona ea, o le avea e faapei o Iesu Keriso ma le atinaeina o Ona uiga auaumama e le o se mea e mafai ona faia? Sa ofoina mai e Elder Robert D. Hales le manatu faamalosiau lenei e uiga i le auala e mafai ona tatou atinaeina ai uiga auaumama faaKeriso: “O uiga paia o le Faaola … ua lalagaina faatasi, e faaopoopo atu le tasi i le isi, lea e atiinae i totonu o i tatou i ni auala fesootai. I se isi faaupuga, e le mafai ona tatou mauaina se uiga faaKeriso se tasi e aunoa ma le mauaina foi ma le uunaiaina o isi. E pei ona amata ona malosi se tasi o uiga, e faapena foi le tele o isi” (“Avea o se Soo o lo Tatou Alii o Iesu Keriso,” Liahona, Me 2017, 46).

O uiga auaumama taitasi faaKeriso tatou te atinaeina e fesoasoani tatou te lalagaina ai se ie lalaga faaleagaga o le avea ma soo.

A o e faitau i le 2 Peteru 1:1–11, mafaufau loloto i uiga auaumama o “le amio atua” ua lisiina i nei fuaiupu. I lou aafiaga, o faapefea ona “lalagaina faatasi” i latou e pei ona faamatalaina e Elder Hales? E faapefea ona latou atinae i luga o le tasi ma le isi? O le a se mea ua e aoao mai nei fuaiupu e uiga i le faagasologa o le avea atili faapei o Keriso?

Atonu foi e te mafaufau loloto i “folafola[ga] … silisili ese … ma le aoga” e tuuina mai e le Atua i Lana Au Paia—e aofia ai ma oe (2 Peteru 1:4). O le savali a Elder David A. Bednar, “O Folafolaga Silisili Ese ma le Taua” (Liahona, Nov. 2017, 90–93) e mafai ona fesoasoani e te malamalama ai po o a na folafolaga ma pe faapefea foi ona maua.

Manatu mo Suesuega Faaleaiga o Tusitusiga Paia ma Afiafi Faaleaiga

1 Peteru 2:5–10.A o outou faitauina nei fuaiupu ma lou aiga, mafaufau e faaaoga ni maa e fesoasoani ai i tagata o le aiga e vaai faalemafaufau i aoaoga a Peteru e faapea, o le Faaola o lo tatou “maa tulimanu aupitoaluga.” E faapefea ona tatou pei o “[maa ola]” e faaaoga e le Atua e fausia ai Lona malo? O le a le mea ua tatou aoao mai ia Peteru e uiga i le Faaola ma la tatou matafaioi i Lona malo? O le a le savali a Peteru i lou aiga?

1 Peteru 3:8–17.E mafai faapefea ona tatou “saunia pea lava e tali atu” ia i latou e fesili mai e uiga i la tatou tapuaiga? Atonu o le a fiafia lou aiga e faatino faataitai tulaga pe a faapea e alu atu se tasi ia i latou ma se fesili e uiga i le talalelei.

1 Peteru 3:18–20; 4:6.O le a se mea e mafai ona faia e lou aiga ia lagona ai le fesootai atu i o outou tuaa? Atonu e mafai ona outou faamanatuina aso soifua o ni tuaa ua maliliu i le saunia o a latou mea taumafa e sili ona fiafia i ai, matamata i ata, pe faamatala ni tala mai o latou olaga. Afai e mafai, e mafai foi ona tou fuafua e faia sauniga mo o outou tuaa i le malumalu (mo se fesoasoani, asiasi i le FamilySearch.org).

2 Peteru 1:16–21.I fuaiupu nei, sa faamanatu atu ai e Peteru i le Au Paia ia lona aafiaga i luga o le Mauga o Liua (tagai foi Mataio 17:1–9). O a ni mea tatou te aoao mai nei fuaiupu e uiga i aoaoga a perofeta? (tagai foi Mataupu Faavae ma Feagaiga 1:38). O le a se mea e aumai ai ia i tatou le talitonuga mautinoa e mulimuli i le tatou perofeta soifua i aso nei?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Talafaasolopito--O Lea Ou Te Faia,” Tusipese a Tamaiti, 100.

Faaleleia o Lo Tatou Aoao Atu

“Ia sauni i taimi uma.” O avanoa le sasalua e aoao atu ai i le fale e vave sau ma toe mou atu, o lea e taua tele le faaaoga o na avanoa pe a oo mai. E mafai faapefea ona e taumafai “ia sauni i taimi uma” e aoao tagata o lou aiga i upumoni o le talalelei ma faasoa atu “le faamoemoe o loo ia te outou” (1 Peteru 3:15) pe a oo mai taimi e aoao atu ai? (Tagai i le Aoao Atu i le Ala a le Faaola, 16.)

E ui ina sa fetaiai Peteru ma le tele o sauaga ma le tetee, ae sa tumau mausali pea o ia i lana molimau ia Keriso.