Keriso o loo tutu ma se teineitiiti laitiiti

Pulu Pāsama i Kiliata, saunia e Annie Henrie

30 Oketopa–5 Novema

Eperu 1–6

Iesu Keriso, “o le Tupuga o le Ola e Faavavau”

O le tusifaamaumauina o manatu faaleagaga e fesoasoani e te iloa ai mea e finagalo le Agaga Paia e a’oa’o atu ia te oe. O le faatinoina o ou manatu e faaalia ai lou faatuatua o na uuna’iga e moni.

Tusifaamaumau Ou Lagona Uunai

O i tatou uma lava e tatau ona lafoa‘ia se mea ia talia ai le talalelei a Iesu Keriso—o ni mausa le lelei, talitonuga sese, fegalegaleaiga e le talafeagai, po o se isi mea. Mo tagata o Nuuese i le Ekalesia Kerisiano anamua, o le liua sa masani ona faauigaina o le lafoaia o atua sese. Mo tagata Eperu (po o Iutaia), o le liua sa faamaonia le fai o sina lavelave, pe afai e le faigata tele, Ma le isi, o o latou talitonuga ma tu ma aga faapelepele sa faavae lea i le tapua’i i le Atua moni ma a’oa‘\’oga a Ana perofeta, mai lava i le fia afe tausaga i tua atu. Ae sa aoao atu e Aposetolo, o le tulafono a Mose ua faataunuuina ia Iesu Keriso ma o lea ua avea se tulafono maualuga atu ma tulaga faatonuina mo e talitonu. O lona uiga la o le taliaina o le faaKerisiano e tatau ai i tagata Eperu ona lafoaia o latou talitonuga ma talafaasolopito sa i ai muamua? O le Tusi i Eperu sa faapea e fesoasoani e tali ai fesili faapena e ala i le aoao atu e taua uma lava le tulafono a Mose, o perofeta ma sauniga, ae e sili atu le taua o Iesu Keriso (tagai Eperu 1:1–4; 3:1–6; 7:23–28). O le mea moni, o nei mea uma e faasino atu i le, ma molimau e uiga ia Keriso o le Alo o le Atua ma le Mesia folafolaina lea sa faatalitali i ai tagata Iutaia.

O le liua, i na aso anamua ma aso nei, o lona uiga o le avea o Iesu Keriso ma totonugalemu o a tatou tapuaiga ma o tatou olaga. O lona uiga o le taofi mau i le upumoni ae faamatuu ese ia mea e tata’iesea i tatou mai ia te Ia, aua o Ia o le “tupuga o le ola e faavavau ia i latou uma o e usiusitai ia te ia” (Eperu 5:9).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

O ai na tusia le Tusi i Eperu?

Ua fesiligia e nisi o tagata atamamai pe o Paulo na tusia le Tusi i Eperu. O le sitali aloaia a Eperu e fai si ese mai isi tusi a Paulo, ma o lomiga muamua lava o le anotusi sa lei ta’ua mai ai se tusitala. Ae peitai, ona o manatu ua faaalia i le FaaEperu ua ogatasi lava ma isi aoaoga a Paulo, ua tele lava ina talia e le Au Paia o Aso e Gata Ai, e tusa ai ma tu ma aga faaKerisiano, o Paulo sa aafia i le tusiga o lenei tala.

Tagai foi Bible Dictionary, “Pauline Epistles.”

Eperu 1–5

O Iesu Keriso “ua matua tusa lava” ma le Tama Faalelagi.

E toatele tagata Iutaia e faigata ona taliaina o Iesu Keriso o le Alo o le Atua. Ia maitau le ala o loo molimau ai Tusi i Eperu ia te Ia. Mo se faataitaiga, a o e faitau i mataupu muamua e lima, e mafai ona e faia se lisi o suafa, matafaioi, uiga auaumama, ma galuega a Iesu Keriso e te tau i ai o loo taua iina. O a ni mea o loo aoao mai e nei mea e uiga i le Faaola? O a ni mea o aoao mai ai e uiga i le Tama Faalelagi?

O a ni mea mai le saunoaga lenei mai ia Elder Jeffrey R. Holland e faaopoopo atu i lou malamalamaaga o aoaoga i nei mataupu? “Na afio mai Iesu … e faaleleia atili le vaaiga a le tagata i le Atua ma augani atu ia i latou ina ia alolofa i lo latou Tama Faalelagi e faapei ona Ia faia i aso uma ma o le a alofa pea lava ia i latou. … O le fafagaina la o e fia aai, faamalolo i e mamai, aoaiina tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama” (“O Le Silisiliese o le Atua,” Liahona, Nov. 2003, 72).

Eperu 2:9–18; 4:12–16; 5:7–8

Sa tigaina Iesu Keriso i mea uma ina ia mafai ona Ia malamalama ma fesoasoani ia te au pe a ou tigaina.

Pe e te manatu e mafai ona e “faalatalata atu ai ma le faamalosi i le nofoalii o le alofa tunoa” ma saili le alofa mutimutivale? (Eperu 4:16). O le savali e tasi o le Tusi i Eperu o le, e ui lava i a tatou agasala ma vaivaiga, e mafai lava ona tatou o atu i le Atua ma maua Lona alofa tunoa. O le a se mea e te maua i le Eperu 2:9–18; 4:12–16; 5:7–8 e faamalosia ai lou talitonu o le a fesoasoani Iesu Keriso ia te oe ma ou luitau i le olaga nei? Mafaufau e tusifaamaumau i se apitalaaga ou manatu ma lagona e uiga i mea ua faia e le Faaola mo oe.

Tagai foi Mosaea 3:7–11; Alema 7:11–13; 34; Matthew S. Holland, “O Le Meaalofa Silisili o le Alo,” Liahona, Nov. 2020, 45–47.

Eperu 3:7–4:11

O loo avanoa faamanuiaga a le Atua ia i latou o e “lē faamaaaina o [latou] loto.”

O le toe faamatalaina o le tala ia Isaraelu anamua, sa faamoemoe ai Paulo e tauanau ai tagata Iutaia ia aloese ma le measese sa faia e o latou tuaa—o le teenaina o faamanuiaga a le Atua ona o le le talitonu. (E mafai ona e faitau i le tala sa taua e Paulo i le Numera 14:1–12, 26–35.)

Mafaufau pe faapefea ona faatatau le Eperu 3:7–4:11 ia te oe. Ina ia faia lenei mea, e mafai ona e mafaufau loloto i fesili e pei o nei:

• Na faapefea ona faaonoono le fanauga Isaraelu i le Alii? (tagai Eperu 3:8–11). O a taunuuga o le i ai o se loto maaa?

• O le a se taimi sa ou faatagaina ai lou loto ia maaa? Pe o i ai ni faamanuiaga ua finagalo le Atua e aumai ia te au ou te le o mauaina ona o le leai o sou faatuatua?

• O a ni mea e mafai ona ou faia e atiina ae ai se loto malu ma se loto salamo? (tagai Eteru 4:15; Faataoto 3:5–6; Alema 5:14–15).

Tagai foi 1 Nifae 2:16; 15:6–11; Iakopo 1:7–8; Alema 12:33–36; Neill F. Marriott, “Gauai Atu o Tatou Loto i le Atua,” Liahona, Nov. 2015, 30–32.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Eperu 1:8–9.O a ni auala ua faaalia ai e Iesu e alofa o Ia i le amiotonu ae ita i le agasala? Afai e i ai ni o tatou manaoga le amiotonu, o le a se mea e mafai ona tatou faia e suia ai?

Eperu 2:1–4.E mafai ona e mafaufau i se lesona e fai i mea faitino e fesoasoani ia malamalama ai lou aiga i le uiga o le taofi mau i upumoni o le talalelei “ua tatou faalogologo i ai”? Atonu e te faaalia lenei mea i se mea faitino e faigata ona pipii i ai. E pei faapefea a tatou taumafaiga e taofimau a tatou molimau i le pueina ma le uuina o lenei mea faitino? E faapefea ona tatou faamautinoa “o mea ua tatou faalogologo i ai” ia le “te’a” ese mai ia i tatou? (fuaiupu 1).

Eperu 2:9–10.Ina ia vailiili le fasifuaitau “alii o lo latou olataga,” e mafai ona e amata i le talanoa po o a mea e fai e se alii. O le a le uiga o le olataga? E faapefea ona pei Iesu Keriso o se alii mo i tatou ma lo tatou olataga?

Eperu 5:1–5.E mafai ona fesoasoani nei fuaiupu tou te faia ai se talanoaga i le uiga o le valaauina e le Atua e ala mai i se tasi o i ai lena pule. O a ni mea e mafai ona tatou aoaoina mai i faataitaiga a Iesu Keriso e uiga i le mauaina ma le faataunuuina o valaauga?

O Mose o loo faauuina Arona

“E le fai fua foi e se tasi lenei faiva mamalu, tau o le ua filifilia e le Atua, e faapei o Arona foi” (Eperu 5:4). Ua Valaau e Mose ia Arona i le Galuega, saunia e Harry Anderson

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ua Naunau ia te Oe,” Viiga, nu. 57.

Faaleleia o Suesuega Faaletagata Lava ia

Faataitai ni faiga eseese. Nai lo o le suesueina o tusitusiga paia i le auala lava e tasi i taimi uma, mafaufau i ni manatu eseese e suesue ai. Mo ni manatu, tagai i “Manatu e Faaleleia ai Au Suesuega Faaletagata Lava Ia o Tusitusiga Paia” i le amataga o le punaoa lenei.

Iesu Keriso

Malamalama o le Lalolagi, saunia e Walter Rane