o ni tama’ita’i e toatolu o loo savavali i fafo o le malumalu

23–29 Oketopa

1 ma le 2 Timoteo; Tito; Filemoni

“Ia Fai Oe ma Fa’aa’oa’o i e ua Faatuatua”

O nisi taimi e fesoasoani ai le faia o au suesuega i tusitusiga paia faatasi ma se fesili se tasi pe sili atu i lou mafaufau. Valaaulia le Agaga e taitai atu oe i tali a o e suesue, ma tusifaamaumau soo se musumusuga e te maua.

Tusifaamaumau Ou Lagona Uuna’i

I tusi sa tusia e Paulo ia Timoteo, Tito, ma Filemoni, tatou te maua ai sina va’aiga i totonu o le loto o se auauna a le Alii. E le pei o isi tusi a Paulo i aulotu atoa, o tusi nei sa tusi atu i tagata taitoatasi—O uo ma aumea mamae a Paulo i le galuega a le Atua—ma o le faitauina o ia [tusi] e pei lava o le faalogologo i se talanoaga. Tatou te vaaia ai le faamalosi’auina e Paulo o Timoteo ma Tito, o ni ta’ita’i se toalua o aulotu, i a la‘ua auaunaga i le Ekalesia. Tatou te vaai ai i lona augani atu i lana uo o Filemoni e faalelei ma se uso a Au Paia ma fai o ia e pei o se uso i totonu o le talalelei. O upu a Paulo sa le i tu’usa’o mai ia i tatou, ma atonu na te le i faamoemoeina o le a matua‘i toatele ni tagata o le a faitau i ai i se aso. Ae tatou te maua i nei tusi ia fautuaga ma faamalosiauga mo i tatou, po o le a lava a tatou galuega patino e i ai i le auaunaga ia Keriso.

aikona o suesuega faaletagata lava ia

Manatu mo Su’esu’ega Faaletagata Lava Ia o Tusitusiga Paia

O ai Timoteo ma Tito?

O Timoteo ma Tito sa galulue faatasi ma Paulo i nisi o ana malaga faafaifeautalai. I le taimi o la laua auaunaga, sa la’ua maua ai le faaaloalo ma le faatuatuaga a Paulo. Sa valaauina mulimuli ane ia Timoteo e avea ma se taitai o le Ekalesia i Efeso, ae o Tito sa valaauina o se taitai i Kereta. I nei tusi, sa tuuina atu ai e Paulo ia Timoteo ma Tito ni faatonuga ma faamalosiauga e uiga i o latou tiutetauave, lea na aofia ai le talaiina atu o le talalelei ma le valaauina o alii e auauna o ni epikopo.

Tagai foi Bible Dictionary, “Pauline Epistles,” “Timothy,” “Titus.”

faifeautalai e toalua o loo talanoa i se alii

“Aua ne’i ‘ino’ino se tasi i lou taulealea; a ia fai oe ma faaa’oa’o i e ua faatuatua” (1 Timoteo 4:12).

1 Timoteo 4:10–16

“Ia fai oe ma faaaoao i e ua faatuatua”

Sa fai lava si talavou o Timoteo, ae sa iloa e Paulo e mafai ona avea o ia ma se taitai maoae o le Ekalesia e ui lava i lona talavou. O le a le fautuaga sa tuuina atu e Paulo ia Timoteo i le 1 Timoteo 4:10–16? E mafai faapefea ona fesoasoani lenei fautuaga ia te oe e taitai atu ai isi i le Faaola ma Lana talalelei?

Tagai foi i le Alema 17:11.

2 Timoteo

“Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai.”

O le2 Timoteo ua talitonuina o le tusi mulimuli lea sa tusia e Paulo, ma e foliga mai sa ia iloaina ua puupuu ona taimi i luga o le fogaeleele i (tagai 2 Timoteo 4:6–8). Faamata o a ni lagona o Timoteo, i le iloaina atonu o le a le umi ae aunoa ma lana faufautua talitonuina ma le taitai? O le a le mea na tau atu e Paulo e faamalosiau ai ia te ia? Atonu foi e te faitau ma e mafaufau i a oe lava luitau ma popolega. O a ni savali o le faamoemoe ma faamalosiauga a le Alii mo oe i le 2 Timoteo?

Tagai foi Kelly R. Johnson, “Enduring Power,” Liahona, Nov. 2020, 112–14.

2 Timoteo 3

O le ola i le talalelei e maua ai le saogalemu mai mea matautia faaleagaga o aso amuli.

Ua tatou ola “i aso e gata ai” lea sa tautala i ai Paulo, ma ua oo mai “aso faigata” (2 Timoteo 3:1). A o e faitau i le 2 Timoteo 3, tusi i lalo ni faigata o aso amuli o loo taua mai ai (tagai foi 1 Timoteo 4:1–3):

E mafai ona e mafaufau i ni faataitaiga o nei faigata i le lalolagi ua siomia ai oe—po o i lou lava olaga? E faapefea e nei faigata, e pei o tagata o loo faamatalaina i le fuaiupu 6, ona “ulu atu i [lou fale], ma ave faatagataotaua [oe]”? O le a se fautuaga e te maua i le 2 Timoteo 3, ma se isi mea i nei tusi, e mafai ona faasaogalemuina ai oe ma lou aiga mai nei lamatiaga faaleagaga? (tagai, mo se faataitaiga, 1 Timoteo 1:3–11; 2 Timoteo 2:15–16; Tito 2:1–8).

O ai Filemoni?

O Filemoni o se Kerisiano sa liliu mai i le talalelei ia Paulo. Sa i ai se pologa a Filemoni na igoa ia Onesemo, o lē sa sola i Roma. O iina na fetaui ai Onesemo ma Paulo ma liliu ai i le talalelei. Na toe auina atu e Paulo ia Onesemo ia Filemoni faatasi ma se tusi e uunaia ai Filemoni e talia Onesemo ia “le toe faapei o se pologa, ae sili i le pologa, o le uso pele” (Filemoni 1:16).

Filemoni

O soo o Iesu Keriso e faia le tasi ma le isi e pei o ni uso ma ni tuafafine.

A o e faitau i le tusi a Paulo ia Filemoni, mafaufau loloto pe ono mafai faapefea ona e faatataua lana fautuaga i au sootaga ma isi. O loo i lalo ni isi o fesili e mafai ona e mafaufau i ai:

• Fuaiupu 1–7: O a ni mea e fautua atu e upu e pei o le “galulue faatasi” ma le “matātau” e uiga i sootaga i le Au Paia? O le a se taimi na e lagonaina ai le “faamafanafanaina” e se uso po o se tuafafine ia Keriso?

• Fuaiupu 8–16: O le a le uiga o le ia “poloai atu” ma le “aioi atu”? Aisea na filifili ai Paulo e aioi atu ia Filemoni nai lo le poloai atu ia te ia? O le a le mea na faamoemoe Paulo e ausia e ala i le toe auina atu o Onesemo ia Filemoni?

• Fuaiupu 16: O le a le uiga o le avea ma “se uso [po o se tuafafine] pele … [i] la le Alii”? E te iloaina se tasi e manaomia ona talia i le auala lenei?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

1 Timoteo 2:9–10.O le a le uiga o le “teuteu [tatou lava] … [i] galuega lelei”? O a nisi o galuega lelei e mafai ona faia e le tatou aiga i lenei vaiaso? Atonu tou te usuina faatasi se pese e uiga i le faia o le lelei, e pei o le “Ua Ou Faia Ea Se Lelei?” (Viiga, nu. 136).

1 Timoteo 4:12.Ina ia fesoasoani i tagata o lou aiga ia mananao e avea “ma faaaoao i e ua faatuatua,” mafaufau e valaaulia i latou e tusi ni ata o ni tagata na fai ma ni faaaoao lelei ia i latou. Na faapefea ona musuia e nei tagata i tatou ia mulimuli ia Iesu Keriso? O le savali a Peresitene Thomas S. Monson “Avea ma se Faataitaiga ma se Malamalama” (Liahona, Nov. 2015, 86–88) e mafai ona tuuina atu ai ni manatu i auala e avea ai ma se faataitaiga i isi.

1 Timoteo 6:7–12.Aisea e te manatu ai “o le manao i le tupe o le pogai lea o mea leaga uma”? O a ni tulaga e matautia ai le taulai o o tatou olaga i tupe po o meatotino? E mafai faapefea ona tatou lotomalie i faamanuiaga ua tatou maua?

2 Timoteo 3:14–17.E tusa ai ma nei fuaiupu, o a faamanuiaga e oo mai ia i latou o e iloa ma suesue i tusitusiga paia? Atonu e mafai e tagata o le aiga ona faasoa atu ni mau na latou tau i ai e faapitoa ona “aoga.”

Filemoni 1:17–21.O le a le mea sa naunau Paulo e fai mo Onesemo? E faapefea ona tutusa lenei mea i le mea na finagalo malie le Faaola e fai mo i tatou? (tagai foi 1 Timoteo 2:5–6; Mataupu Faavae ma Feagaiga 45:3–5). E mafai faapefea ona tatou mulimuli i faataitaiga a Paulo ma le Faaola?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Susulu Pea,” Tusipese a Tamaiti, 96.

Faaleleia o Lo Tatou Aoao Atu

Aoao atu aoaoga faavae manino ma faigofie. O le talalelei a le Alii e matagofie i lona faigofie (tagai Mataupu Faavae ma Feagaiga 133:57). Nai lo o le taumafai e faafiafia lou aiga i lesona e manaomia ai ni tapenapenaga e tele, ia taumafai e aoao atu aoaoga faavae mama ma faigofie (tagai 1 Timoteo 1:3–7).

tamaiti e toalua o loo suesue i tusitusiga paia

“Talu foi ina o e tama itiiti ua e iloa tusi paia, e mafaia ona faapoto ai ia te oe e iu ai i le ola i le faatuatua ua ia Keriso Iesu” (2 Timoteo 3:15).