o se aiga o loo matamata i ata

2–8 Oketopa

Efeso

“Ina ia Fa‘a‘ato‘atoaina ai le Au Paia”

O e vaai i ni fesootaiga i le va o savali i le konafesi aoao ma le Tusi a Paulo i Efeso?

Tusifaamaumau Ou Lagona Uuna‘i

Ina ua amata ona salalau atu le talalelei i Efeso, sa faapea ona tupu ai “le faanunununu” (Galuega 19:23) i Efeso. O tufuga i le lotoifale o e sa gaosia nofoaga paia i le tupua atua fafine, sa latou vaaia le faaKerisiano o se taufaamata‘u i a latou tupe maua, ma e le‘i leva ae “tutumu ai lea o i latou i le feita, … ma sa matua tumu le aai atoa i le le mautonu” (tagai Galuega 19:27–29). Vaai faalemafaufau i le avea ma se tagata fou liliu mai i le talalelei i se tulaga faapea. E toatele tagata Efeso sa talia ma ola i le talalelei e ui lava i lenei “taalili vale” (Galuega 19:40), ma sa faamautinoa atu e Paulo ia i latou o “Keriso … tatou te lelei ai” (Efeso 2:13–14). O nei upu, faapea ma lana valaaulia ia “tea ma outou upu faafiufiu uma lava, ma le lotoa, ma le ita, ma le leotele, ma le upu leaga” (Efeso 4:31), e foliga mai ua fetaui lelei ma fa‘ala‘ei‘au i le taimi nei e pei foi ona sa i ai i aso la. Mo Efeso, faapea foi ma i tatou taitoatasi, o le malosi‘aga e faafetauia ai le fili e sau mai “i le Alii, ma le malosi o lona mana” (tagai Efeso 6:10–13).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Efeso 1:4–11, 17–19

Sa filifilia, pe sa muai faauuina, a’u e faataunuu ni tiutetauave patino i le lalolagi.

Sa saunoa Paulo e uiga i le Au Paia ua “tofia anamua” e le Atua ma “filifili mai … a o lei faavaeina le lalolagi” e fai ma Lona nuu. Ae peitai, e pei ona ta’ua e Peresitene Henry B. Eyring, e le faapea ai, “ua leva lava ona fuafua e le Atua po o ai Ana fanau o le a Ia laveaiina ma faia le talalelei ia avanoa ia i latou, ae o i latou e lei faalogo lava i le talalelei sa lei ‘filifilia’ lava i latou. … O le fuafuaga a le Atua e matua sili lava le alofa ma le amiotonu nai lo lena. O loo naunau lo tatou Tama Faalelagi ia faapotopoto ma faamanuia Lona aiga atoa” (“Faapotopotoina o le Aiga o le Atua,” Liahona, Me 2017, 20–21). E mafai e fanau uma a le Atua ona talia le talalelei ma ona sauniga ona o le galuega sa faatinoina i malumalu paia mo e ua maliliu.

E ui lava e leai se tasi ua muai tofia e faasaoina pe le faasaoina, ae ua aoao mai e faaaliga i onapo nei, o nisi o le fanau a le Atua sa filifilia pe “muaifaauuina” i le muai olaga e faataunuu ni tiutetauave faapitoa i le ausiaina o faamoemoega o le Atua i le lalolagi. A o e faitau i le Efeso 1 ma le Gospel Topics, “Foreordination” (topics.ChurchofJesusChrist.org), mafaufau loloto pe faapefea ona faatatau lenei upumoni ia te oe.

Efeso 1:10

O le Atua o le a “faaopoopoina [mea uma] ia Keriso.”

Aisea e te manatu ua ta’ua ai o tatou aso “o le tisipenisione o le atoatoaga o taimi”? Faamata o le a le uiga o le ia “faaopoopoina [mea uma] ia Keriso”? A o e mafaufau loloto i nei fuaitau, faitau ia mau nei: Efeso 4:13; 2 Nifae 30:7–8; Mataupu Faavae ma Feagaiga 110:11–16; 112:30–32; 128:18–21. Atonu e te lagona le musuia o oe e tusi i lalo la oe lava faamatalaga o nei fuaitau.

Tagai foi David A. Bednar, “Faapotopoto Faatasi Mea Uma ia Tasi ia Keriso,” Liahona, Nov. 2018, 21–24

Efeso 2:19–22; 3:1–7; 4:11–16

Ua faavaeina le Ekalesia i luga o aposetolo ma perofeta, ma o Iesu Keriso o le maatulimanu autu.

E tusa ai ma le Efeso 2:19–22; 3:1–7; 4:11–16, o le a le mafuaaga o le i ai o a tatou perofeta ma aposetolo? Mafaufau i savali mai perofeta ma aposetolo na e faalogo i ai i le taimi o le konafesi aoao. E faapefea ona faataunuuina e a latou aoaoga ia faamoemoega na faamatalaina e Paulo? Mo se faataitaiga, na faapefea ona fesoasoani nei aoaoga ia te oe ina ia le “feaveaiina [oe] i matagi uma lava o mataupu”?

E faapefea ona pei Iesu Keriso o se maatulimanu mo le Ekalesia? E faapefea ona avea o Ia o se maatulimanu mo lou olaga?

Tagai foi i le Galuega 4:10–12.

maatulimanu o se fale

O Iesu Keriso o le maatulimanu o le Ekalesia.

Efeso 5:21–6:4

O le mulimuli i le faataitaiga a le Faaola e mafai ona faamalolosia ai o’u sootaga faaleaiga.

A o e faitau i le Efeso 5:21–6:4, mafaufau pe mafai faapefea e fautuaga o loo i nei fuaiupu ona faamalosia ou sootaga faaleaiga.

E taua le matau o upu a Paulo i le Efeso 5:22–24 sa tusia i le anomea o aganuu faaleagafesootai o lona vaitaimi. Ua aoao mai perofeta ma aposetolo i aso nei, e le sili ae alii i tamaitai, ma o ulugalii e tatau ona avea ma se “paaga tutusa” (tagai “O Le Aiga: O Se Folafolaga i le Lalolagi,” ChurchofJesusChrist.org). E ui i lea, e mafai lava ona e maua fautuaga talafeagai i le Efeso 5:25–33. Mo se faataitaiga, e faapefea ona faaalia e le Alii Lona alofa mo le Au Paia? O le a le mea o faaataata mai e lenei mea i le auala e tatau ona faia ai e taitoalua, o se paaga tutusa, ia le tasi ma le isi? O a ni savali ua e maua mo oe lava i lenei fuaiupu?

Efeso 6:10–18

O le a fesoasoani le ofutau o le Atua e puipui a’u mai le tiapolo.

Ao e faitau i le Efeso 6:10–18, mafaufau pe aisea na faaigoa ai e Paulo ia vaega taitasi o le ofutau i le faiga sa ia faia ai. O le a le mea e “puipui [mai ai oe] e le ofutau atoatoa o le Atua?“ O le a se mea e mafai ona e faia ina ia faamaulu atoatoa ai vaega taitasi o le ofutau i aso uma lava?

Tagai foi 2 Nifae 1:23; Mataupu Faavae ma Feagaiga 27:15–18.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Efeso 1:10.Ina ia aoao atu e uiga i lenei fuaiupu, na faaaoga ai e Elder David A. Bednar se faataitaiga o se maea (tagai “Faapotopoto Faatasi Mea Uma ia Tasi ia Keriso”). Mafuafau e faaali atu i tagata o le aiga se maea ma tuu i ai e uu ma iloilo ao e faasoa atu vaega o le savali a Elder Bednar. E faapefea ona faapotopoto faatasi e le Atua mea uma ia tasi ia Keriso? O faapefea ona faamanuiaina i tatou ona o lenei faapotopotoina?

Efeso 2:4–10; 3:14–21.Valaaulia tagata o le aiga e faasoa atu ni aafiaga sa faapea ona latou lagonaina ai le alofa ma le alofa mutimutivale o le Atua ma Iesu Keriso e pei ona faamatalaina i nei fuaiupu.

Efeso 2:12–19.Atonu e fiafia lou aiga e fau ni pa [puipui] i aluga po o isi mea faitino o i ai i lou fale ona toe tu’i lea i lalo. A o faatatau atu Paulo i le “pa vaeloto” i le va o Nuuese ma Iutaia, o a ni ituaiga o puipui o tuueseeseina tagata i aso nei? Na faapefea ona “soloia” e Iesu Keriso nei pa vaeloto? E faapefea ona Ia “faaleleia [i tatou] ma le Atua”? (fuaiupu 16).

Efeso 6:10–18.E mafai ona fai e lou aiga a latou lava “ofutau o le Atua” e faaaoga ai mea e maua i le fale. E mafai ona fesoasoani le vitio “The Armour of God” (ChurchofJesusChrist.org) i tagata o le aiga e vaai faalemafaufau ai i lenei ofutau, ma e mafai ona latou maua ni faamalamalamaga faigofie i le “The Whole Armor of God,” (Friend, June 2016, 24–25). E faapefea ona puipuia i tatou faaleagaga e vaega taitasi o le ofutau? O a ni mea e mafai ona tatou faia e fesoasoani ai i le tasi ma le isi ia “oofu i le ofutau atoatoa o le Atua” (Efeso 6:11) i aso uma lava?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Faamoemoe o Isaraelu,” Viiga, nu. 161.

Faaleleia o Suesuega Faaletagata Lava ia

Tuu atu i le Agaga e taitaia au suesuega. Ia nofouta i le Agaga ao Ia taitai atu oe i mea e manaomia ona e aoaoina i aso taitasi, e tusa lava pe o lenei mea e taitai atu ai oe e suesue se autu e te lei fuafuaina muamua.

o se alii o loo ofu i le ofutau i le vaitaimi o le Feagaiga Fou

O le faamaulu “o le ofutau atoatoa o le Atua e mafai ona puipuia ai i tatou faaleagaga.