o faife‘autala‘i tama‘ita‘i o loo talanoa atu i se alii talavou

16–22 Oketopa

1 ma le 2 Tesalonia

“E Fa‘a‘ato‘atoaina Ai Mea E Le’i Atoa i Lo Outou Faatuatua”

Afai tatou te le tusifaamaumauina ia lagona tatou te maua mai le Agaga, e mafai ona galo ia i tatou ia mea. O a ni mea ua uuna‘ia oe e le Agaga e tusifaamaumau e faitau i le 1 ma le 2 Tesalonia?

Tusifaamaumau Ou Lagona Uuna‘i

I le Tesalonia, sa tu‘ua‘ia ai Paulo ma Sila i le “faatupu o le fouvale i le lalolagi uma” (Galuega 17:6). O le la tala‘iga sa feita ai ni ta‘ita‘i faapitoa i Iutaia, ma sa faaoso ai e nei ta‘ita‘i ia tagata i se vevesi (tagai Galuega 17:1–10). O le taunuuga, sa fautuaina ai Paulo ma Sila e o ese ma Tesalonia. Sa popole Paulo i tagata fou liliu mai o Tesalonia ma sauaga sa latou feagai, ae sa le mafai ona ia toe foi atu e asiasi ia i latou. “Ua ou le toe mafai ai ona onosa‘i,” sa ia tusi ai, “ona ou auina atu lea e a‘u, ina ia ou iloa lo outou faatuatua.” I le tali mai, sa aumai ai e le fesoasoani o Paulo, o Timoteo, o le sa auauna atu i Tesalonia, “le talalelei ia te i matou i lo outou faatuatua ma lo outou alofa” (1 Tesalonia 3:5–6). O le mea moni, sa lauiloa le Au Paia i Tesalonia o fa‘aa‘oa‘o “i e ua faatuatua” (1 Tesalonia 1:7ma sa salalau atu le tala i lo latou faatuatua i nuu e mamao. Vaai faalemafaufau i le olioli ma le toafilemu o Paulo i le faalogo atu o ana galuega ia i latou “e le i faaleaogaina lea” (1 Tesalonia 2:1 Ae sa iloa e Paulo o le faamaoni i le taimi ua tuana‘i, ua le lava lea mo le ola ai faaleagaga i le lumana‘i, ma sa faaeteete o ia i faatosinaga a faia‘oga pepelo sa i ai i le Au Paia (tagai 2 Tesalonia 2:2–3 O lana savali ia i latou, ma i tatou, o le faaauau lea ona “fa‘a‘ato‘atoaina ai mea e le i atoa i lo [tatou] faatuatua” ma ia “faasilisili pea i ai” i le alofa (tagai 1 Tesalonia 3:10; 4:10).

aikona o su‘esu‘ega faaletagata lava ia

Manatu mo Suesuega Faaletagata Lava Ia o Tusitusiga Paia

1 Tesalonia 1–2

O soo o Keriso e auauna atu i isi ma le loto faamaoni ma le alofa.

I le 1 Tesalonia, o upu a Paulo ua faaalia ai le manatu popole ma le olioli o se tagata ua tuuina atu atoa o ia i le auauna atu i fanau a le Atua. Ae maise lava i mataupu muamua e lua o le 1 Tesalonia, o le a e maua ai upu ma fuaitau o loo faamatala ai uiga faaalia ma amioga a se soo o le Alii. Mo se faataitaiga: o le a se mea ua e aoaoina mai le 1 Tesalonia 1:5–8; 2:1–13 e uiga i le auauna atu i le Alii?

Mafaufau i a oe lava avanoa e auauna atu ai i le Atua ma Ana fanau. O a ni mea e te maua i nei mataupu e musuia ai oe ia faaleleia atili lau auaunaga? Mafaufau e fesili ifo ia te oe lava i fesili e faavae i mea e te maua, e pei o le “Pe o a’u ea o se faataitaiga o mea ua ou iloa?” (tagai 1 Tesalonia 1:7).

1 Tesalonia 3:7–13; 4:1–12

“Faasilisili ona tele o lo outou alofa.”

Sa olioli Paulo i le faamaoni o le Au Paia i Tesalonia (tagai 1 Tesalonia 3:7–9). Ae sa ia manao foi ia i latou ia “faasilisili pea i ai outou” i lena faamaoni (1 Tesalonia 4:1). A o e faitau i le 1 Tesalonia 3:7–13; 4:1–12, mafaufau i auala e mafai ona e “faasilisili pea i ai” faaleagaga (1 Tesalonia 4:10). Mo se faataitaiga, ia maitau na faaaoga e Paulo ia upu e pei o le “paia” ma le “faapaiaina.” O le a se mea e te aoao mai i tusitusiga a Paulo i le uiga o nei upu? E mafai faapefea ona fesoasoani le Faaola ina ia e paia ma faapaiaina atili?

Tagai foi i le Taiala i Tusitusiga Paia, “Paia,” “Faapaiaina,” scriptures.ChurchofJesusChrist.org.

1 Tesalonia 4:16–18; 5:1–10; 2 Tesalonia 1:4–10

Afai ou te faamaoni ma mataala, o le a ou saunia mo le Afio Mai Faalua o le Faaola.

I le 1 Tesalonia 5:1–10, sa faaaoga ai e Paulo ni faatusa e aoao atu ai e uiga i le taimi o le a toe foi mai ai Iesu i le lalolagi. A o e suesue i nei faatusa, mafaufau e tusi i lalo lagona e oo atu ia te oe e uiga i le Afio Mai Faalua o Iesu Keriso.

• “O le gaoi i le po”:

• “Faatiga o le fafine to a fanau mai”

• Isi faatusa e te maua:

O a ni upumoni faaopoopo ua e aoao mai i le 1 Tesalonia 4:16–18; 5:1–10; 2 Tesalonia 1:4–10? O le a se mea ua musuia oe e fai e vaavaai atu ai ma saunia ai mo le afio mai o le Faaola?

Tagai foi D. Todd Christofferson, “Saunia mo le Toe Afio Mai o le Alii,” Liahona, Me 2019, 81–84.

2 Tesalonia 2

O se liliuese, po o le o ese mai le upumoni, sa valoia e muamua mai i le Afio Mai Faalua.

I le ogatotonu o le faateteleina o sauaga, e toatele le Au Paia i Tesalonia sa talitonu ua lata mai le Afio Mai Faalua o le Faaola. Ae sa iloa e Paulo, ao lei oo i le toe foi mai o Iesu i le lalolagi, o le a i ai se liliuese—o se tetee po o se “tetea ese” mai le upumoni (tagai 2 Tesalonia 2:1–4). E mafai ona faaloloto lou malamalama i le Liliuese Tele—ma lou talisapaia mo le Toefuataiga—e ala i le mafaufau loloto i nisi o mea nei:

• Mau o loo muai tau mai ai le Liliuese: Isaia 24:5; Amosa 8:11–12; Mataio 24:4–14; 2 Timoteo 4:3–4

• Mau o loo faaali mai ai ua amata le Liliuese i le taimi o Paulo: Galuega 20:28–30; Kalatia 1:6–7; 1 Timoteo 1:5–7

• Iloiloga e uiga i le Liliuese Tele mai Kerisiano toefaatulagaina:

  Matini Luteru: “E leai se isi mea ua ou sailia i tua atu o le toefaatulagaina o le Ekalesia e tusa ai ma Tusitusiga Paia. … E pau lava lau tala, o le faaKerisiano ua le o toe i ai ia i latou o e e tatau ona faasaosaoina” (i le E. G. Schweibert, Luther and His Times: The Reformation from a New Perspective [1950], 590).

  Roger Williams: “O le liliuese … ua faapea ona faapiopioina ai mea uma, e le mafai ona i ai se toe sao ese mai i lena liliuese seia oo ina auina mai e Keriso ni aposetolo fou e totoina lotu fou” (i le Philip Schaff, The Creeds of Christendom [1877], 851).

Tagai foi 2 Nifae 28; Autu o le Talalelei, “Apostasy,” topics.ChurchofJesusChrist.org.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

1 Tesalonia 3:9–13.O le a se mea ua faagaeetia ai oe e uiga i lagona sa ia Paulo mo ana uo? E mafai faapefea ona tatou “faasilisili ona tele o lo outou alofa o le tasi i le tasi”? (fuaiupu 12).

1 Tesalonia 4:13–18.O a ni fasifuaitau i nei fuaiupu e uiga i le Toetu ua avatu ai ia te oe le mafanafana

1 Tesalonia 5:14–25.A o e toe faamanatu le fautuaga a Paulo i le 1Tesalonia 5:14–25, valaaulia tagata taitoatasi o le aiga e sue se fasifuaitau e mafai ona taulai i ai le aiga. Su’e ni auala fatufatuai e faaali atu ai nei fasifuaitau i lou fale e avea o se faamanatu. Mo se faataitaiga, atonu e maua pe tusi e tagata taitoatasi ni ata o faaalia ai pe faamamafa ai le fuaitau sa ia filifilia.

2 Tesalonia 3:13.Pe tatou te lagonaina ea le “faavaivai i le amio lelei”—atonu e lofituina i manaoga o le avea ma soo? O le a le mea e fesoasoani ia i tatou pe a tatou maua i ni lagona faapea? Tagai Kalatia 6:9; Mataupu Faavae ma Feagaiga 64:33.) E faapefea ona tatou fesoasoani i le tasi ma le isi pe a tupu mai lenei mea?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Loo Ou Taumafai e Avea e Pei o Iesu,” Tusipese a Tamaiti, 40–41.

Faaleleia o Suesuega Faaletagata Lava Ia

Saili faaaliga i aso uma. “O faaaliga e masani ona oo mai i“fuaitau i luga o lea fuaitau’ (2 Nifae 28:30), ae le oo mai uma i le taimi e tasi. … Aua le mafaufau i [suesuega o le talalelei] o se mea e te faaavanoina le taimi e fai ai, ae o se mea o loo e faia i taimi uma” (Aoao Atu i le Ala a le Faaola,12).

Keriso i ao

Keriso Toetu, saunia e Robert T. Barrett