o faifeautalai tamaitai o loo talanoa atu i se alii talavou

16–22 Oketopa

1 ma le 2 Tesalonia

“Faaatoatoaina Mea e Le’i Atoa i lo Outou Faatuatua”

A o e faitauina ma le agaga tatalo le 1ma le 2 Tesalonia faatasi ma tamaiti i lou mafaufau, o le a e maua ia mataupu faavae e manaomia ona latou malamalama i ai.

aikona o le fefaasoaai

Valaaulia le Fefaasoaai

I le lesona o le vaiaso talu ai, pe na e valaaulia ia tamaiti e faaaoga mea sa latou aoaoina i se mea? Tuu i tamaiti e faaaoga nai uluai minute o le vasega i lenei vaiaso e faasoa mai ai o latou aafiaga.

aikona o le aoao atu

Aoao atu le Aoaoga Faavae: Tamaiti Laiti

1 Tesalonia 5:1–6

A o ou mulimuli i poloaiga a le Atua, o le a ou saunia mo le Afio Mai Faalua o Iesu Keriso.

Tatou te le iloa po o afea o le a toe afio mai ai le Faaola i le lalolagi. Ae e mafai ona tatou vaavaai atu mo Ia ma saunia mo Lona afio mai.

Gaoioiga e Mafai Ona Fai

• Valaaulia se tina e faasoa puupuu mai pe na faapeī le faatalitali mo le fanau mai o lana pepe. Faitau le 1 Tesalonia 5:2–3, ma ta’u atu i tamaiti o le a toe afio mai Iesu Keriso i le lalolagi, ae e leai se tasi e iloa tonu le taimi—e pei foi ona le iloa tonu e se tina pe o le a le taimi o le a fanau mai ai le pepe.

• Fai i tamaiti e talanoa e uiga i se taimi sa latou sauniuni ai mo se malaga po o se mea o le a fai. O a ni mea sa latou faia e sauniuni ai? Aumai se atopau po o se taga, ma tuu i tamaiti e faafoliga faapea o la e teu i ai mea e sauniuni ai mo se malaga. Faatasi ai ma mea taitasi latou te faafoliga o loo teuina, fesoasoani i tamaiti e mafaufau i se auala se tasi e mafai ai ona tatou saunia mo Iesu Keriso e toe afio mai.

• Faitau le 1 Tesalonia 5:6 i tamaiti ma faamalamalama atu i ai afai tatou te le saunia mo le toe afio mai o Iesu, e pei o lea ua tatou tulemomoe ma tatou le saunia ai mo Ia. Valaaulia tamaiti e faafoliga faapea o la ua tulemomoe. Faamalamalama afai tatou te saunia, e pei o lea tatou te feala ma faatalitali mo Ia. Valaaulia i latou e feala mai.

• Usu se pese e faatatau i le Afio Mai Faalua o le Faaola, e pei o le “Pe A Ia Toe Afio Mai” (Tusipese a Tamaiti, 46).

2 Tesalonia 2:1–3

Sa aoao mai e Paulo e faapea o le a tupu se liliuese a o lei toe afio mai Iesu Keriso.

O le Ekalesia na faatuina e Iesu Keriso na iu ina pau atu i le liliuese, o lona uiga na aveesea mai le lalolagi le pule o le perisitua ma upumoni o le talalelei. Sa valoia e Paulo o lenei liliuese, po o le “pauu ese,” o le a tupu a o lumanai le Afio Mai Faalua o le Faaola.

Gaoioiga e Mafai Ona Fai

• A uma ona faitau faatasi ma tamaiti le 2 Tesalonia 2:3 fau se ‘olo mai ipuinu pepa po o ni poloka. Ta’u i tamaiti o ipuinu po o poloka e faatusa i vaega taua o le Ekalesia moni, e pei o upumoni o le talalelei, o le perisitua, faamauga i le malumalu, ma perofeta. Ina ua maliliu Paulo ma isi Aposetolo, sa leiloloa nei mea, ma sa lei i ai le Ekalesia moni i le lalolagi mo le tele o tausaga. Valaaulia se tamaitiiti e talepe i lalo le ‘olo, ma faamalamalama atu sa ta’ua lenei mea o le Liliuese po o le “pauu ese.” Ina ua toe faafoi mai e Iesu Keriso Lana Ekalesia, sa faaigoaina o le Toefuataiga.

• Faaali atu se Tusi a Mamona ma ni ata o le perofeta ma se malumalu. Valaaulia tamaiti e fai mai “Liliuese” pe a e nanaina mea i se taga ma le “Toefuataiga” pe a toe aumaia i fafo.

• Usu ni pese o loo aoao mai ai upumoni sa aveesea i le taimi o le Liliuese ma toefuatai mai i o tatou taimi, e pei o le “O Au o se Atalii o le Atua,” “Ua Toe Fuatai Mai le Perisitua,” ma le “Ou Te Fia Vaai i le Malumalu” (Tusipese a Tamaiti, 2–3, 60, 99).

aikona o le aoao atu

Aoao atu le Aoaoga Faavae: Tamaiti Matutua

1 Tesalonia 5:1–6

A o ou mulimuli i poloaiga a le Atua, o le a ou saunia mo le Afio Mai Faalua o Iesu Keriso.

E mafai ona fesoasoani le fautuaga a Paulo tatou te saunia ai ma vaavaai atu mo lena aso tele pe a toe afio mai le Faaola i le lalolagi.

Gaoioiga e Mafai Ona Fai

• Valaaulia se tamaitiiti e faitau mai le 1 Tesalonia 5:1–6 a o mulimuli ai isi tamaiti. A maea fuaiupu taitasi, fai i se tamaitiiti e aotele mai pe o le a sona manatu i le mea o loo talanoa mai ai le fuaiupu. Atonu e te manao e faamalamalama atu faapea “o le aso o le Alii” o lona uiga o le Afio Mai Faalua o Iesu Keriso. Aisea ua faatusaina ai le Afio Mai Faalua i se gaoi i le po po o se fafine o le a fanau?

• Fai i tamaiti e vaai faalemafaufau faapea o le a asiasi mai le Faaola i le tou vasega i se taimi o le aso. E mafai faapefea ona tatou saunia mo Lana asiasiga? Fesoasoani i tamaiti e mafaufau i mea e mafai ona tatou faia e sauniuni ai i tatou lava mo le aso o le a toe foi mai ai Iesu Keriso. Mo se faataitaiga, e mafai ona tatou salamo, faamagalo atu, faaleleia a tatou sootaga ma o tatou aiga, mulimuli i le perofeta, saili ia maua le faatosinaga a le Agaga Paia, ma tausi a tatou feagaiga. Fautuaina tamaiti e filifili se mea se tasi o le a latou faia e sauniuni ai i latou lava e talia le Faaola i Lona Afio mai.

2 Tesalonia 2:1–3

Sa aoao mai e Paulo e faapea o le a tulai mai se liliuese a o lei toe afio mai Iesu Keriso.

Afai e malamalama ia tamaiti sa aveesea le Ekalesia a Iesu Keriso ma Lana talalelei mai le lalolagi i le taimi o le Liliuese Tele, o le a atili manino ai ia te i latou le tatau ona i ai o le Toefuataiga.

Gaoioiga e Mafai Ona Fai

• Valaaulia se tasi o tamaiti e faitau le 2 Tesalonia 2:1–3. E tusa ai ma nei fuaiupu, o le a le mea sa tatau ona tupu a o lei oo mai le “aso o Keriso,” lea e faauigaina o le Afio Mai Faalua? O le a le uiga o le fuaitau “o le tete’a ese”? Ia mautinoa ua malamalama ia tamaiti o lona uiga o le Liliuese Tele, lea sa tupu ina ua mavae le maliliu o Aposetolo a le Faaola. Atonu e te manao e faasoa atu faamatalaga mai le “Liliuese” i le Taiala i Tusitusiga Paia (scriptures.ChurchofJesusChrist.org).

• Fesoasoani i tamaiti e lisi i le laupapa ni nai upumoni ma faamanuiaga ua tatou olioli ai ona o le talalelei. Tape ese mea nei taitasitasi, ma fesili i tamaiti pe mata e ese faapefea o latou olaga e aunoa ma nei mea. Faamalamalama atu o nei upumoni na leiloloa i le taimi o le Liliuese Tele. Aisea na taua ai le toefuatai mai o le Ekalesia a Iesu Keriso i le lalolagi i aso e gata ai? Valaaulia ia tamaiti e “toefuatai” pe toe tusi ia upumoni ma faamanuiaga i le laupapa.

2 Tesalonia 3:7–13

E finagalo le Tama Faalelagi ia ou galue.

E mafai faapefea ona e fesoaoani i tamaiti e vaai i le galue o se faamanuiaga, ae le o se mea e ’alo ai?

Gaoioiga e Mafai Ona Fai

• Valaaulia tamaiti e feauauai i le faitauina o fuaiupu mai le 2 Tesalonia 3:7–13 ma vaavaai mo le faafitauli sa feagai ma le Au Paia. Aisea e finagalo ai le Tama Faalelagi ia tatou galulue? O le a le mea semanu e tupu pe anafai tatou te le aoao e galulue malosi? Tuu i tamaiti e feauauai e faatino mai ni feau faigofie ae mate mai e isi tamaiti a latou mea la e fai.

• Valaaulia ia tamaiti e talanoa e uiga i se taimi sa latou galulue malosi ai i se galuega, se galuega faatino, po o se sini. O a ni o latou lagona e uiga ia i latou lava ina ua uma ona latou faia? O le a le uiga o le “e aua nei outou faavaivai i le amio lelei”? (2 Tesalonia 3:13). O le a se mea e fesoasoani ia i tatou e faaauau ai pea pe a lagona o le galue ua faigata?

aikona o le aoaoina

Uunaia le Aoaoina i le Aiga

Valaaulia ia tamaiti e ta’u i se tagata o le aiga po o se uo se mafuaaga e tasi latou te faafetai ai i le i ai o le talalelei i le lalolagi i ona po nei (e mafai ona tuuina atu e le itulau o gaoioiga o le vaiaso lenei ni manatua ia i latou).

Faaleleia o Lo Tatou Aoao Atu

Lagolago atu i matua o tamaiti. “O matua o faiaoga o le talalelei aupito taua ia mo a latou fanau—e i ai ia i latou le tiutetauave autu ma le mana silisili e tosina ai a latou fanau (tagai Teuteronome 6:6–7). A o e aoao atu tamaiti i le lotu, saili ma le agaga tatalo e lagolago atu i o latou matua i la latou matafaioi taua” (Aoao Atu i le Ala a le Faaola,25).

itulau o gaoioiga: e taimua mai le Liliuese i le Afio Mai Faalua