Sa asiasi atu le Faaola toetu ia Paulo i le falepuipui (tagai i le Galuega 23:11). E mafai e Iesu Keriso ona faasaoloto i tatou mai le “amo o le pologa” (Kalatia 5:1).

25 Setema–1 Oketopa

Kalatia

“Savavali i la le Agaga”

A o e faitauina le Kalatia, o a ni uunaiga ua e maua e uiga i le mea e manaomia e tamaiti o lau vasega ona aoaoina?

Valaaulia le Fefaasoaai

Tuu atu ni nai minute i tamaiti e tusi ai se mea sa latou aoaoina mai se talanoaga lata mai o le talalelei i le fale po o le lotu. Tuu atu i tamaiti e faasoa mai po o le a le fuaitau o loo suitulaga ai ata taitasi.

Aoao atu le Aoaoga Faavae: Tamaiti Laiti

Kalatia 5:22–23

E fesoasoani le Agaga Paia ia te au e lagona le alofa, olioli, ma le filemu.

E mafai ona iloa e tamaiti laiti le fua o le Agaga. O le a saunia ai i latou e sailia le tosinaga a le Agaga Paia i o latou olaga atoa.

Gaoioiga e Mafai Ona Fai

• Faaali ni ata o ni fualaau suamalie eseese, ma fesili i tamaiti e faamatala mai pe faapei le tofo o fualaau taitasi. Faamalamalama atu e pei ona eseese le tofo o fualaauaina, e mafai foi ona tatou lagonaina le Agaga Paia i ala eseese, e pei o le alofa ma le filemu. Faamatala nisi o auala na e lagonaina ai le Agaga Paia i lou olaga, ma tuu atu i tamaiti e faasoa mai lagona o le Agaga Paia ia i latou.

E mafai e tamaiti o tausaga uma ona iloa “fua o le Agaga.”

• Faitau faatasi ma tamaiti le Kalatia 5:22–23 ma faamalamalama ia upu atonu latou te le masani ai. Valaaulia tamaiti taitasi e filifili se fua o le Agaga o loo ta‘ua i nei fuaiupu, ma fesoasoani ia i latou e mafaufau i se taimi na ia aafia ai. Valaaulia ia tamaiti e tusi ni ata faigofie o o latou aafiaga.

Kalatia 6:2

E manao Iesu Keriso ia ou fesoasoani i e manaomia le fesoasoani.

O le faatonuga o i le Kalatia 6:2 e tali tutusa ma aoaoga a Alema o i le Mosaea 18:8 i tagata o e o le a papatisoina. Faaaoga le avanoa lea e fesoasoani ai i tamaiti e sauniuni mo feagaiga o le papatisoga.

Gaoioiga e Mafai Ona Fai

• Faaali se ata o se tamaitiiti ua papatiso (pei o le Tusiata o le Talalelei, nu. 104). Fesili i tamaiti po o le a le mea a le tamaitiiti o fai. Faamalamalama atu pe a tatou papatiso, tatou te osia feagaiga, po o folafolaga. Faitau le Kalatia 6:2 po o le Mosaea 18:8 e fesoasoani ai i tamaiti e aoao se tasi o mea tatou te folafola atu e fai: tauave avega a isi. Valaaulia ia tamaiti e tusi ni ata o auala e mafai ona latou fesoasoani ai i isi o e tauaveina avega.

• Faitau atu i tamaiti le fasifuaitau lea mai le Kalatia 6:2: “Ia outou fesui i a outou avega e ave.” Ina ia faapupula atu le uiga o lenei mea, tuu atu i se tasi o tamaiti se mea mamafa e amo. Ona fesili lea mo se tasi e ofo mai e fesoasoani e amo pe sii le mea faitino. Faamalamalama atu i tamaiti e tele mea e mafai ona pei o se avega, e pei o le ma’i po o le lagonaina le faanoanoa po o le tuulafoaiina. O le a se mea e mafai ona tatou faia e fesoasoani ai i se tagata i lea ituaiga o avega?

Kalatia 6:7–9

O a tatou taga, pe lelei pe leaga, e i ai taunuuga.

O le aoao atu tatou te selesele ai i mea tatou te luluina, e pei ona faamatalaina i le Kalatia 6:7–9, e mafai ona e aoaoina tamaiti e mafaufau i taunuuga o a latou faatinoga.

Gaoioiga e Mafai Ona Fai

• Faaali atu se fatu ma se fualaau faisua. Faitau le Kalatia 6:7--9 i tamaiti. Fai i tamaiti e faafoliga o la e toto se fatu pe a latou faalogo i le upu lulu. Fai i ai e faafoliga o la e piki se fualaau faisua mai se laau pe a latou faalogo i le upu seleseleina.

• Faaali i tamaiti ni ituaiga eseese o fualaau faisua, ma fesoasoani ia i latou e sue ia fatu mai fualaau taitasi. Tuu ia fatu i se koneteina, ma fai i tamaiti e feauauai e filifili se tasi ma faamatala mai po o le a le fualaau faisua o le a ola mai ai pe afai latou te totoina. Fesoasoani ia i latou ia iloa e faapei lava o fatu tatou te totoina e iloa ai le fualaau faisua tatou te maua mai ai, o filifiliga foi tatou te faia e iloa ai taunuuga ma faamanuiaga e iu ina tatou maua.

• Fai se laina i luga o le fola i se teipi. Tuu se foliga fiafia ma se foliga faanoanoa i pito faafesagai o le laina. Valaaulia se tamaitiiti e tu i le ogatotonu o le laina, ma fesoasoani i isi tamaiti e mafaufau i filifiliga o le a taitai atu ai i le fiafia po o le faanoanoa. Mo filifiliga taitasi, fai i le tamaitiiti o i le ogatotonu e laa agai i le itu fiafia po o le itu faanoanoa. Toe fai ma saga fai le gaoioiga, ma tuu atu e feauauai ia tamaiti e tutu i luga o le teipi.

Aoao atu le Aoaoga Faavae: Tamaiti Matutua

Kalatia 3:26–28

O le papatisoina tatou te “tasi ai ia Keriso.”

Sa aoao atu e Paulo le Au Paia i Kalatia a papatisoina i latou o le a latou “tasi ia Keriso Iesu.” E mafai faapefea ona e fesoasoani i tamaiti e taumafai mo le lotogatasi o loo faamatalaina i le Kalatia 3:26–28?

Gaoioiga e Mafai Ona Fai

• Valaaulia tamaiti e faitau le Kalatia 3:26–28 ma mafaufau i le fesili lenei: O le a le mea e tupu pe a ou papatiso? Atonu e te manao e taulai atu i fasifuaitau e pei o le “oofu ia Keriso” po o le “tasi ia Keriso.” Mata o le a le uiga o nei fasifuaitau? E faapefea ona tutusa le “oofu ia Keriso” ma le tauaveina o Lona suafa i o tatou luga? (tagai Mataupu Faavae ma Feagaiga 20:75–79). O le a se mea e mafai ona tatou faia e faaali atu ai i isi ua tatou tauaveina Lona suafa i o tatou luga?

• Faitau faatasi le Kalatia 3:28, ma faailoa mai nisi o auala na faailoa mai ai e tagata i latou lava ina ua papatisoina i latou i ona po o Paulo. Fesoasoani i tamaiti e ta‘u mai nisi o auala latou te faailoa mai ai i latou lava i aso nei. O le a le mea o loo taumafai Paulo e aoao i tatou e uiga i le ala e tatau ona tatou vaai atu ai i le tasi ma le isi pe a tatou papatiso?

Kalatia 5:16, 22–23

Afai ou te “savali i la le Agaga,” o le a ou maua le “fua o le Agaga.”

A papatisoina i tatou ma maua le meaalofa o le Agaga Paia, e mafai ona tatou maua atili fua o le Agaga i o tatou olaga. E mafai faapefea ona e fesoasoani i tamaiti ia iloa lenei fua i o latou olaga?

Gaoioiga e Mafai Ona Fai

• Tuu atu ia tofu le tamaitiiti ma se fasipepa (e faafoliga i se fualaau aina suamalie), ma fai i tamaiti e sue se “fua o le Agaga” o loo lisi mai i le Kalatia 5:22–23. Valaaulia i latou e tusi se tasi o fua i le tasi itu o la latou pepa ma se upu e faafeagai lona uiga i le isi itu. (Fesoasoani ia latou malamalama i upu latou te le masani ai.) Valaaulia i latou e faasoa mai a latou fua i le vasega. O le a se mea e mafai ona latou faia ia faatasi ai le Agaga Paia ma i tatou i taimi uma?

• Valaaulia ia tamaiti e faitau e uiga i le fua o le Agaga i le Kalatia 5:22--23 ma fai se tusiga pe tusi se ata o se taimi na fesoasoani ai le Agaga Paia ia i latou ia lagonaina se tasi o na fua. Fai i ai e faasoa atu i se isi tagata o le vasega la latou tala po o le ata. Aisea ua avea ai fua ma auala lelei e fesoasoani tatou te malamalama ai i le ala e tosina ai i tatou e le Agaga?

Kalatia 6:7–9

O a tatou taga, pe lelei pe leaga, e i ai taunuuga.

Fesoasoani i tamaiti ia malamalama o taunuuga o a tatou amioga o nisi taimi e oo vave mai ma o isi taimi e ono oo mai “i ona po e tatau ai” (fuaiupu 9).

Gaoioiga e Mafai Ona Fai

• Faitau faatasi le Kalatia 6:7–9. Saunia se lisi o faatinoga (po o fatu tatou te “luluina”) ma taunuuga (po o fua tatou te “seleseleina”). Fai atu i tamaiti e faafetaui taga i o latou taunuuga.

• Valaaulia ia tamaiti e lisi mai ni faamanuiaga ua latou faamoemoe e maua mai le Tama Faalelagi. Fesoasoani ia latou mafaufau i “fatu” e tatau ona latou totoina ina ia “selesele ai” nei faamanuiaga.

Uunaia le Aoaoina i le Aiga

Fesoasoani i tamaiti e vaavaai mo auala e faatatau ai upumoni sa latou aoaoina i aso nei i o latou olaga i aso taitasi. Mo se faataitaiga, e mafai ona e valaaulia i latou e vaavaai mo taunuuga lelei, po o “fua,” ia e oo mai ona o faaiuga lelei latou te faia.

Faaleleia o Lo Tatou Aoao Atu

Fetuunai gaoioiga mo le matutua o tamaiti. Tuu atu i tamaiti ia avanoa e auai ai i le faatinoina, ae ia manatua o lo latou tomai e faia ai o le a eseese ona o o latou tausaga ma le matutua. E ono manaomia e tamaiti laiti ifo nisi taiala ma taitaiga. A o faasolo ina matutua, e mafai e tamaiti ona latou saofaga atili ma lelei atu i le faasoa mai o latou mafaufauga. (Tagai i le Aoao Atu i le Ala o le Faaola, 25–26.)