O Paulo o loo faalau atu se tusi mai le falepuipui

9–15 Oketopa

Filipi; Kolose

“Ou Te Mafaia Mea Uma Lava i le Faamalosi mai o Keriso ia te Au.”

Faitau le Filipi ma le Kolose, mafaufau e uiga i tamaiti o loo e faiaoga ai. Saili musumusuga pe faapefea ona aoao i latou i mataupu faavae o i nei tusi.

aikona o le fefaasoaai

Valaaulia le Fefaasoaai

Fesili atu i tamaiti po o le a se mea na latou faia i lenei vaiaso ua tuanai e faatino ai se mea sa latou aoaoina i le vasega o le vaiaso ua tuanai. Mo se faataitaiga, na faapefea ona latou aapa atu i se tasi sa manaomia se uo?

aikona o le aoao atu

Aoao atu le Aoaoga Faavae: Tamaiti Laiti

Filipi 1:3–4; Kolose 1:3, 9

E alolofa taitai o le Ekalesia ia te au ma tatalo mo au.

E tele taimi sa amata ai e Paulo ana tusi e ala i le faaali mai o lona alofa mo tagata o le Ekalesia ma ta’u atu ia te i latou o loo ia tatalo mo i latou. Mafaufau pe faapefea ona e fesoasoani i tamaiti ia malamalama e alolofa o latou taitai o le Ekalesia ia i latou.

Gaoioiga e Mafai Ona Fai

• Faitau leotele le Filipi 1:3–4 ma le Kolose 1:3, 9 ma fai i tamaiti e piilima ma punonou o latou ulu i taimi uma latou te faalogo ai i upu tatalo, olega, ma le faatoga. Faamalamalama atu sa tatalo le Aposetolo o Paulo mo tagata o le Ekalesia, e faapei foi ona tatalo o tatou taitai o le Ekalesia mo i tatou i aso nei.

• Faaali atu se ata o Iesu Keriso, ma faitau atu ni mau o loo faamatalaina o Ia o loo tatalo mo se tasi (mo se faataitaiga, Luka 22:32, 3 Nifae 19:21,23). O le a le mea na aioi atu ai Iesu ina ua Ia tatalo mo isi?

• Fesoasoani i tamaiti e ta’u mai igoa o nisi o o latou taitai faale-Ekalesia, e pei o le peresitene o le Peraimeri, le epikopo, ma le Peresitene o le Ekalesia. Faamalamalama atu o nei taitai o loo aioi atu i le Tama Faalelagi e faamanuia ia tamaiti ma fesoasoani ia latou ola amiotonu. Mafaufau e ta’u i tamaiti mea e te fai atu ai pe a e tatalo mo i latou.

Filipi 4:4, 8

E mafai ona ou olioli i le Alii.

Sa fautuaina e Paulo le Au Paia ia olioli—tusa lava pe sa latou feagai ma tofotofoga faigata ma o loo faapagotaina foi Paulo lava ia. E faapefea ona e fesoasoani i tamaiti ia iloa o le mulimuli ia Iesu Keriso e aumaia ai le olioli?

Gaoioiga e Mafai Ona Fai

• Fai i tamaiti e faalogologo mo se upu e ta’u soo a o e faitauina le Filipi 4:4. Fai i tamaiti e faaali atu ia te oe mea latou te faia pe a latou olioli. Tau atu i tamaiti pe aisea e te “olioli ai i le Alii”—aisea e te lagona ai le fiafia ona o Iesu Keriso. Tuu atu i tamaiti e faasoa atu o latou lagona e uiga ia Iesu.

• Faaali atu ni meafaitino po o ni ata e faatusa i mea e fesoasoani ia te oe e “olioli ai i le Alii” (Filipi 4:4), e pei o Ana foafoaga, o se malumalu, Lona Toetu, po o se aiga. Tuu e feauauai ia tamaiti e filifili mai se ata po o se mea faitino ona ta’u lea i ai pe aisea e faafiafiaina ai oe i lea mea. Valaaulia i latou e faasoa mai ni mea e fesoasoani latou te olioli ai i le Alii.

• Faitau faatasi le Filipi 4:8 , ma fesoasoani i tamaiti e mafaufau i mea e fetaui ma le faamatalaga o i le fuaiupu (tagai foi Mataupu Faavae o le Faatuatua 1:13). Valaaulia tamaiti e tusi ni ata o mea nei.

Kolose 1:23; 2:6–7

E tatau ona “mauaa” lo’u faatuatua ia Iesu Keriso.

Afai e mafai e tamaiti ona fausia o latou olaga ma o latou faatuatua i le Faaola, o le a mafai ona latou tatalia afa o le olaga.

Gaoioiga e Mafai Ona Fai

• Faaali atu le ata o se laau mai le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga a o e faitauina fasifuaitau autu mai le Kolose 1:23; 2:6–7 (po o le faaali o le vitio “Asiosio Faaleagaga [Spiritual Whirlwinds]” i luga o le ChurchofJesusChrist.org). Mata o le a le mea e tupu i lenei laau pe afai e sau le afa ae le’i i ai ni aa malolosi o le laau? Tuu atu i tamaiti e tutu ma faafoliga o se laau ua vaivai ona aa i se afa ona avea lea o se laau ua malolosi ona aa. Molimau atu o le faatuatua i le Faaola e fesoasoani ia i tatou e faapei ai o se laau ua malolosi ona aa. Ona mafai lea ona tatou tatalia “afa,” faaleagaga e pei o faaosoosoga ma taimi faigata.

• Valaaulia se tamaitiiti e tusi se laau i luga o le laupapa. Fai i tamaiti e ta’u mai ni mea e mafai ona latou fai ia “mauaa” ai ia Iesu Keriso. O taimi taitasi e ta’u mai ai e se tamaitiiti se mea, valaaulia o ia e faaopoopo se a’a i le ata.

aikona o le aoao atu

Aoao atu le Aoaoga Faavae: Tamaiti Matutua

Filipi 4:4–13

Afai ou te faatuatua ia Iesu Keriso, e mafai ona ou fiafia e oo lava i taimi faigata.

Sa puapuagatia Paulo i le tele o tofotofoga, ae sa fiafia o ia aua sa ia faatuatua ia Iesu Keriso.

Gaoioiga e Mafai Ona Fai

• Fai atu i tamaiti e mafaufau faapea o loo latou i ai i le falepuipui, e pei ona sa i ai le Aposetolo o Paulo i le taimi na ia tusia ai le Tusi i Filipi. Faitau faatasi ma tamaiti le Filipi 4:4–13 ma fai i ai e vaavaai mo upu “olioli,” “manuia,” ma le “toafilemu.” Aisea na mafai ai ona olioli ia Paulo ma lagona le toafilemu e oo lava i le falepuipui? Fesoasoani i tamaiti e sue ia upu “Alii,” “Atua,” ma le “Keriso” i fuaiupu. Fesoasoani ia latou malamalama faapea o le faatuatua o Paulo ia Iesu Keriso na mafai ai ona olioli o ia.

• Valaaulia ia tamaiti e fesoasoani ia te oe e faatumu ia fuaiupu nei e pei o le: “E mafai ona ou i ai i le pogisa ae iloa lava mea pe afai e i ai so’u . E mafai ona ou i ai i fafo i se aso vevela ae lagona lava le mālū pe afai e i ai so’u . E mafai ona i ai ni o’u taimi faigata ae maua lava le olioli pe afai ou te .” O le a se mea o fautua mai e le Filipi 4:4–13 e mafai ona tatou faia e maua ai le olioli? Valaaulia tamaiti e faasoa mai ni viiga po o ni mau e uiga ia Iesu e mafai ona fesoasoani latou te lagona ai le olioli i taimi faigata.

Filipi 4:8

E mafai ona ou “mafaufau i” ni mea e moni, faamaoni, ma mama.

E tele taimi e vaai ai tamaiti i mea leaga ma e le mama. E mafai ona e fesoasoani ia i latou e saili ni mea e faagaeetia ma mama.

Gaoioiga e Mafai Ona Fai

• Fai i se tamaitiiti e faitau leotele le Filipi 4:8 a o vaavaai isi mo upu o i le Mataupu Faavae o le Faatuatua 1:13 e tutusa pe talitutusa. Valaaulia se tasi e tusi upu nei i luga o le laupapa. Fesili atu i tamaiti po o le a le uiga o upu, ma fesoasoani ia i latou e faamatala mai pe a manaomia. Aisea e tatau ai ona tatou “mafaufau i” nei mea? E mafai faapefea ona tatou “sailia ia” mea?

• Fai i tamaiti e ta’u mai igoa o mea e fetaui ma faamatalaga o i le Filipi 4:8. Valaaulia i latou e tusi se lisi i lenei vaiaso o soo se mea latou te matauina e fetaui ma nei faamatalaga. Fautuaina i latou e aumai a latou lisi i le Peraimeri i le vaiaso lea ma faasoa mai mea sa latou mauaina.

Kolose 1:23; 2:6–7

E tatau ona “mauaa” lo’u faatuatua ia Iesu Keriso.

E taumafai Satani e faavaivaia lo tatou faatuatua e ala i faaosoosoga ma aoaoga faavae sese. E mafai faapefea ona e musuia tamaiti ia faamalolosia lo latou faatuatua i le Faaola ina ia latou “le o ese ai mai le faamoemoe o le talalelei”? (Kolose 1:23).

Gaoioiga e Mafai Ona Fai

• Valaaulia ia tamaiti e tusi ni ata e faatusa i upumoni latou te mauaina i le Kolose 1:23; 2:6–7. Tuu atu latou te faasoa mai a latou ata i le vasega ma faamalamalama mai upumoni e faatusa ia latou ata.

• Faaali le vitio o le “Spiritual Whirlwinds.” O a ni tofotofoga ma ni aoaoga faavae sese i le lalolagi i ona po nei e mafai ona faavaivai ai lo tatou faatuatua? Fautuaina tamaiti e tusi i lalo se mea se tasi e mafai ona latou faia e faamalosia ai lo latou faatuatua ina ia “mauaa” i latou (Kolose 2:7) ia Iesu Keriso. Fai atu ia i latou e faaali mai lenei mea i se mea o le a latou vaai i ai i aso taitasi.

aikona o le aoaoina

Uunaia le Aoaoina i le Aiga

Valaaulia tamaiti e faasoa atu i o latou aiga mea sa latou aoaoina e uiga ia Iesu Keriso. E mafai ona latou faaaogaina le itulau o gaoioiga o le vaiaso lenei po o se mau sa latou faitauina i le vasega i le aso.

Faaleleia o Lo Tatou Aoao Atu

E fia iloa lava ma fia aoao tamaiti e ala i aafiaga fou ma eseese. Faaaoga gaoioiga e fesoasoani latou te feoai ai, faaaoga uma o latou sane, vailiili, ma taumafai ni mea fou. O fautuaga i le “Taulimaina o Manaoga o Tamaiti Laiti Ifo” i le amataga o lenei punaoa e mafai ona fesoasoani. (Tagai foi i le Aoao Atu i le Ala o le Faaola, 25–26.)

itulau o gaoioiga: pe a mauaa lo’u faatuatua ia Iesu Keriso